Evangelium di Minggu 6 September 2009Johannes 17: 14-23
MARSADA NI ROHA PINADOMU NI HATA NI DEBATA
Patujolo
Andorang di portibi on dope Tuhan Jesus nunga dibereng Ibana angka hamaolon na naeng adopan ni angka jolma siihuthon Ibana. Lam tu torop na ma jolma naeng ro mangihuthon Ibana tinogu ni parjamitaonNa nang na tinogu ni angka siseanNa. Ndada holan na marharoroan sian Jahudi be nasida tung sian sude liat portibi on do tahe. Alani i martangiang do Tuhan Jesus tu Amana di banua ginjang asa margogo nian jolma i mangoloi Hatana di bagasan hasintongan, jala asa sai marsada ni roha nasida mangoloi Hata ni Tuhan i. Lam godang ma elaela naeng ro tu angka na porsea i, jala lam malo do angka panggunturi maradophon huria i. Dibahen i tung so margogo nasida molo so ‘sada’ nasida di harohaon nang di pambahenan.
Sipahusorhusoron di bagasan roha
Di bagasan turpukta on Tuhan Jesus martangiang asa marsada ni roha angka sisean i. Tung bagas do panghamham ni hasadaon na nidok ni Tuhan Jesus di tangiangNa i ai ndada holan hasadaon boti alai na gabe impolana ima kwalitas (mutu) ni hasadaon nasida naeng nian songon hasadaon ni Tuhan Jesus dohot Amana na di banua ginjang i. Dipabotohon Tuhan Jesus tu Amana ia na gabe ojahan ni parngoluon ni jolma na porsea i ima Hata ni Debata. Hata i ma na naeng pasadahon nasida. Ai lan angka poda di portibi on na boi mambahen jolma i marsada ni roha alai na mambahen hasesega do i tu halak na asing. I do anggo hagiot ni portibi on. Alani i nunga diboto Tuhan Jesus hian i, ai gabe hosoman ni portibi on ma angka na mangihuthon Ibana, ai dang sian portibi on nasida songon Kristus i. Nang pe songon i, ndang marsangkap Tuhan Jesus laho mambuat angka na porsea sian portibi on gariada tahe ingkon di portibi on dope nasida asa gabe sira dohot panondang tu angka jolma na mian di haholomon dope.
Asa margogo angka na porsea i, dipangido Tuhan Jesus do ditangiangna asa diparbadiai Ama i nasida dibagasan Hata i. Marhitete tudosan (teladan) na pinatupaNa sandiri “mamparbadiai diringNa humongkop nasida-asa gabe badia nasida” nian. Ima naeng sitiruon ni halak Kristen di ngoluna, ngolu habadiaon. “Unang gabe sarombang dohot portibi on” (Rom 12: 2). Ingkon asing do ngolu ni halak Kristen sian angka halak na so siihuthon Jesus. Ingkon jumpang do disi dame dohot lambas ni roha, habasaron, habasaon, halambohon dohot hatomanon. Saluhut na i diulahon dibagasan hasadaon. Molo marsada ni roha halak Kristen i, gabe porsea ma halak na asing na tinogu nasida. Hasadaon manghorhon haporseaon – parbadaan / perpecahan manghorhon hagangguon ni roha. Dilehon Jesus do hasangapon tu angka siihuthon Ibana asa marsangap nang siihuthon Ibana asa sada halak Kristen i songon Jesus dohot Ama i. Ai maringan do Jesus di angka halak na porsea, Debata maringan di bagasan Anak i alani i botoon ni portibi ma ia Jesus na sinuru ni Ama i, jala na holong do roha ni Ama i di angka na porsea i.
Molo tapamanat di angka ombas na parpudi on nunga lam torop huria i, torop aliranna, pangajarionna. Hape ianggo di mulana holan sada hian do huria i. Dung lam torop halak Kristen gabe adong ma pigapiga huria di tano Palestina nang di tano parserahan. Alai sada do uluan nasida ima angka apostel i, huria sabungan ima na di Jerusalem. Dung diakui agama Kristen gabe agama negara di Roma, gabe disi ma uluan ni huria na digoari huria Roma Katholik. Alai dung lam diida si Marthin Luther adong na humurang di pangajarion ni huria i, dibahen ibana koreksi tu huria i, alai ndang tarjalo angka uluan i pandohan i. I do umbahen na dipapulik si Marthin Luther sian huria Rom. Ndang na marsangkap si Marthin Luther laho mambahen huria na mamulik sian huria sabungan i, manang laho manegai hasadaon na niigil ni Tuhan Jesus sian angka siseanNa, tung holan na paingothon huria i do asa mulak tu pangajarion ni Tuhan Jesus. Mamungka sian i ma gabe adong huria Protestan. Asa hape ‘hasadaon’ na nidok ni Tuhan Jesus ndada tarsirang sian Debata Ama, ai boi do angka ruas ni huria marsada ni roha alai holan mangihuthon sangkapsangkap ni rohana.
Hasadaon na nidok ni Tuhan Jesus, gabe sunggulsunggul do i tu angka huria laho mambahen hasadaon di angka panghobasion ni huria naung lam torop i. Alani i gabe tubu ma ulaon oikumene na mamungka sian Edinburgh Missionary Conference taon 1910 sahat tu Amsterdam 1948, tubu ma World Council of Churches (Dewan Gereja Dunia). Ai di angka parpunguan na parjolo i marhite Konsili oikumenis ndang boi dope marsada ni roha laho mangambat angka parpoda haliluon dohot pamolamola na ro tu huria i. Gabe adong ma na dipabali sian ruas ni huria i. Anggiat ma lam tu toguna hasadaon ni huria i laho mangadopi hamaolon ni huria i sahat tu ombas on asa saut na pinangido ni Tuhan i. Molo tung adong pe hamaolon, molo marsada ni roha sai na boi do paulion i.
Di pigapiga inganan (huria) boi do idaonta lam ngali holong jala lam dao hasadaon di huria. Sai hira naung hasomalan na ingkon sijaloon nama i di roha ni na deba. Godang do halak na rap marminggu di gareja alai ndang pola be marsitandaan jala ndang ringkot dihilala rohana marsitandaan. Tarlumobi di angka huria na di kota, dietong na deba do gabe harugian molo godang ditanda jolma ai mabiar do nasida gabe ro maon mangido pangurupion tu jabuna molo ditanda ise ibana. Alai laos songon i do sebalikna, sai adong do sian tongatonga ni ruas i molo ditanda seseorang na bonggal, gabe holan naeng mangidoido ibana tusi. Di situasi na songon i ma ra naeng paandaronta ‘hasadaon’ na nidok ni Tuhan Jesus di turpukta on. Asa naeng ma ganup halak Kristen mananda tanggungjawabna hombar tu silehonlehon na dipasahat Debata tu Ibana. Antara hak dan tanggungjawab ndang gabe manegai PARSAORAN (Persekutuan) di huria. Naeng ma sude ruas nang parhalado mangharingkothon tanggungjawabna. Termasuk do angka parhalado ni huria, ingkon mangalehon rohana tu ruas ni huria i secara adil asa unang sega hasadaon ni huria i isarana, ndada holan mangalehon rohana tu na mora dohot parpangkat, laos songon i do nang sebalikna ndada holan na pogos diurus parhalado i ai didok rohana ido na porlu siuruson, ianggo halak na gogo i boi do i mangurus dirina sandiri.
Hasadaon na nidok ni Tuhan Jesus ndada na mandok asa gabe dos di sasude. Ai sada realita (na tutu situtu) do adong perbedaan ni jolma di portibi on. Alani i hasadaon na nidok ni Tuhan Jesus ima “Kesatuan dalam keragaman dan kejamakan, “songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita.” “sama seperti Engkau, ya Bapa, di dalam Aku dan Aku di dalam Engkau, agar mereka juga di dalam kita.” Na marlapatan do i, hasadaon i ndada na mamparsoada hadirion ni Ama i, manang Anak i manang Angka na porsea i. Hasadaon i ima rade manjalo ‘hadirion/kepribadian’ ni halak na asing. Marhitehite hamamate ni Tuhan Jesus manogu hita gabe sada dohot Ibana nang dohot Ama i. Ibana di bagasan Ama i, hita di bagasan Jesus jala Jesus di bagasan halak na porsea (Joh 14: 20-21). Hasadaon na nidokna disi ima hasadaon ni roha, gogo dohot pingkiran mangihuthon Jesus Kristus di bagasan haporseaon (iman).
Panimpuli
Hasadaon ni halak Kristen na pinangido ni Tuhan Jesus di tangiangna naeng ma songon hasadaon ni Tuhan Jesus dohot Amana na di banua ginjang i. Hata i ma na naeng pasadahon hita. Nang pe adong perbedaan di hadirion ni jolma i alai na ingkon sada do di roha, pingkiran tarlumobi haporseaon. Molo dung jumpang hasadaon, dapot ma hagogoon. Margogo ma halak Kristen mangula ulaonna di portibi on, gabe sira dohot panondang. Di portibi on dope halak Kristen i, jala godang dope na mian di haholomon na naeng sitogutoguon ni halak Kristen i. Nunga dipabotohon Jesus, na ingkon donganNa do hita disi alai ingkon mangolu do hita di bagasan habadion songon naung pinatupaNa i. Amen.
Pinatomutomu ni
Pdt. TL. Hutagalung, MSc
BAHAN EVANGGELIUMMinggu, 14 Dung Trinitatis
Ulaon Ni Apostel 28: 1 – 10
Tanggal, 13 September 2009
“Gabe TiruanNa Denggan Ma Ho Di Bagasan Ngolum”
1. Hamonanghon Haporseaon mi, ndang maila angka si ihuthon Jesus.
Aha na so boi patupaon ni keluarga i da, hepengna godang, artana godang, pansarianna tabo. I ma hata ni angka jolma na tinggal di sada luat tu sada keluarga di huta i. Tardok keluarga i do apala na ummora di luat i, jabuna adong manang na piga, mobilna, tanona, sandok tung godang ma artana mambahen sai siingoton ni halak keluarga i. Di mulana i tung martoruk ni roha do nasida, sai dipujipuji natorop, sude angka sipatupaon sai ingkon diparguruhon tu nasida. Di pudian ni ari gabe ibana ma nampuna hata, ingkon nidokna ma saut. Mamareng jolma di luat i gabe neang ma rohana. Jotjot hatana mandok: ndang maol pola di ahu pamasukhon jolmaon tu hurungan. Di mulana sian burju ni roha do mangurupi jolma na ro mangido pangurupion. Hape di ujungna gabe tarlilit utang ma jolma i, gabe lam tu leana ma dibahen natoropi. Sian na so panagaman gabe madabu ma keluarga i tu hapogoson ala ni parsahiton. Ndang pola marasi ni roha jolma i baliksa didok be ala ni pangalahona do i, saonari ma di jalo upana.
Marhaporseaon i do apala na niondolhon di turpuk on, porsea tu Jesus Kristus na boi mangurupi angka jolma na porsea di Ibana. Debata ndang olo pailahon angka na porsea i. Haporseaon i do mangonjar hita manghahologi Debata dohot mangaradoti angka hataNa. Haporseaon i do, mangonjar hita dohot manghaholongi dongan jolma. Hinorhon ni haporseaonta tu Jesus Kristus do na pamonanghon hita marolohon saluhut angka na masa. Hinorhon ni haporseaon do umbahen di goari si Abraham ompu ni naporsea, jala rade rohana mangoloi parsuruon ni Debata dohot mamelehon anakna si Isak. Hinorhon ni haporseaon do si Noak dohot sude anakna, umbahen na boi malua sian aek na sumar. Hinorhon ni haporseaon do apostel Petrus patupahon angka tanda halongangan termasuk pangoluhon na mate. Hinorhon ni haporseaon do apostel Paulus umbahen na borhat mamaritahon barita na uli, nang pe ingkon mangadopi ragam hasusaan.
Sian i idaonta ma, tung na balga do hinorhon ni haporseaon. Taida do i di pardalanan ni ngolu ni si paulus na sai tongtong di urupi jala di pargogoihon Debata ibana. Sampe 14 ari ibana mumbangumbang di tongatonga di laut ndang marmara ibana. Sai tong do di urupi Debata ibana di sitaonon na i. Dung tardappar ibana tu pulo Malta di halaputi angka jolma na torop i do ibana. Ndang di paloas Debata na torop i mambahen ibana marmara. Somalna molo tardappar kapal tusi pintor disamun do sude barangna manang di bunuh jolma na ro tu si. Balik do ianggo tu si Paulus pintor di hobasi pagalak api asa unang mate ibana alani ngalina. Marpardomuan tu si didok: “na mate do haporseaon i molo so mardongan parulaon”. Lapatanna, tung tangkas do tarida pangkorhon ni haporseaon. Di uji Debata do haporseaon ni natorop i marhitehite na pinargut ni ulok dari si Pualus. Lomos jala munggil do nasida. Didok ala ni dosana, hajahatonna do Sipaulus i ma na dipargut ulok i. Didok do si Paulus pambunu. Nang pe malua ibana sian laut alai ingkon mate do ibana bahenon dewa keadilan. Adong do pamingkirion ni nasida, angka jolma na mardosa ingkon hona uhum do bahenon ni Dewa. Ndang jadi mangolu si Paulus ala ni godang ni dosa na niulana. Somalna jolma na pinargut ni ulok dari pintor hatop do mate. Ndang di paloas Debata maila, marjea angka na porsea i. Sai tongtong ditogutogu di bagasan pardalanan ni ngolunna. Di padao sian jea dohot panggo ni si bolis i.
Parsorion na masa di bagasan ngolu ni angka na porsea boi do papitahon haposeaon ni sadasada halak. Mangarahon jolma mananda hagogoon ni Debata. Dung di palua Debata si Paulus sian hamagoan na pinargut ni ulok i. Gabe didok natorop i do ibana Debata. Sian i taida hurang dope panandaion, parbinotoan ni nasida taringot ise do Debata. Didok roha nasida jolma na so mate di pargut ulok dari nunga Debata (pat. 14:13). Hape, Debata i ma panompa nasa na adong di portibion. Angka dalanNa, pambahenanNa ndada boi hapingkiran dohot hasuhatan ni jolma.
2. Marhuaso do Debata Paluahon jolma na porsea i
Tarajumi do naung porsea hita tu Tuhan Jesus, ala ni ingkon patar ma tarida pangkorhonna di ngolunta siganup ari. Mampangkorhon tu na uli do angka parulaon ni angka na porsea, jala ndang mabiar i mardalan di angka sidalanan na. Debata do na gabe hagogoonna. Tarida do i nang di pardalanan ni si Paulus, dipatongontongon Debata do ibana di angka dalan ni ngolu na lehet. Pintor ro do si Publius sada na sanggap, parhuaso (wali negeri) laho manamuei nasida mangan tu jabuna, jala mian si Paulus disi saleleng tolu ari. Dison taida haroro ni si Publius gabe dalan ni Debata laho pabotohon tu angka natorop i ia si Paulus i ma naposo ni Debata. Mangula do Debata di hadirion ni naposona i, asa lam rarat barita na uli i. Laos boha pe sangkap ni jolma laho pamatehon hata ni Debata, ndang boi mate i. Debata do na marsuru jala manontuhon aha na masa taringot tu barita na uli i. Ingkon sar do hata ni Debata di pulo malta, jala ingkon hamonanghon ni naposona i do haporseaonna maradophon Debata. Di mulai si Paulus do patandahon huaso ni Debata marhitehite na pamalumhon sahit ni ama ni si Publius. Dipatuduhon si Paulus do hagogoon ni Debata tuk mangubati ragam ni angka sahit. Halongangan na pinatupa ni Debata torus do i di ganup ngolu ni jolma na mian jala mangolu di bagasan Debata. Ndang adong na boi mangambati angka na porsea i patupahon hamamalum ni parsahiton. Ndang boi debata ni portibion jala ndang margogo i paluahon angka jolma sian ragam ni parungkilon i.
Pangubation na pinatupa ni si Paulus mambahen goarna dohot goar ni Debata sar tu na humaliang ni pulo Malta. Gabe godang ma na marsahit sian na torop mangido pangurupion tu si Paulus. Dipangke si Paulus do tingki i laho manghatindanghon Gaor ni Debata. Paboa holan Debata do sisombaon. Holan Debata do na boi mangalehon angka na sinangkapan ni roha ni jolma. Holan di Debata do adong hatuaon dohot haluaon. Marhite Jesus Kristus tung patar do hadirion ni Debata. Jesus Kristus do mangurasi dohot paluahon jolma sian gonggoman ni dosa. Jesus Kristus do manghamonanghon hita asa porsea tu Debata. Marhite hamamalum sahit ni angka na torop i laos i do asal muasal ni hararat ni barita na uli i di pulo Malta. Alani do didok: “Nunga ditongos Debata haluaon on tu halak sipelebegu; tangihonon nasida do i” (28:28). Lapatanna, marhite hadirion ni angka naposona i ingkon lam tu rarat na barita na uli i.
Ingkon gabe sorminan ngolu ni angka na porsea i tu halak sipelebegu. Marhite parulaonta, parangenta ingkon boi jolma tartait mangihuthon Jesus i. Ingkon hamonanghononta do haporseaonta i mardophon portibion. Unang gabe tartait hita mangoloi hisap dohot hasonangan na sian potibion. Unang gabe madabu tu ginjang ni roha. Ingkon tu serepna, tu sabamna do ngolu ni angka na porsea di Jesus. Taida do i di pangkobasion ni si paulus ditongatonga pangisi ni pulo malta. Ndang tahutan ibana manghamonanghon haporseaonna. Ngoluna gabe sorminan na mangolu tu jolma na torop i. Marhite na patupa halongan si Paulus na sian Debata, gabe godang jolma mangulahon jala manghagoluhon hata ni Debata. Ndang marimbar inganan marbarita na uli manang didia pe. Porsea do hita, na sai urupan ni Debata do angka na porsea i laho mnghatahon hataNa. Ndang porlu lomos manang tahutan hita patupahon halongangan na sian Debata tu sude sundut portibion. Songon halak na porsea hita, pos do rohanta tu Debata na ingkon patupaonna angka na taharingkothon di ngoluntaon. Ndang jadi hita hurangan di na laho mangulahon ulaon ni Tuhan i. Na porlu jamita i do pangalahonta, pangalhonta i do jamitatta. Na penting ngolunta on marimpola jala mangkorhon hadengganon tu na humaliangta. Alani i, Gabe Tiruan Na Dengggan Ma Ho Di Bagasan Ngolum asa lam tamba bilangan ni jolma laho manghuthon Jesus i. Amen
Pinatomutomu ni:
Pdt. Eben Hutasoit
Pdt. Eben Hutasoit
Jamita Minggu 15 dung TrinitatisTgl. 20 September 2009
2 Korint 11 : 6 - 16
2 Korint 11 : 6 - 16
Pdt. M. Lumban Gaol, S.Th
Parhobas di kantor Pusat
Marmanat di Hamajuon ni Huria
Patujolo:
Lam mangerbang huria i mangihut do ringkot ni tamba ni pangula nalaho manghobasi huria. Nang dihurianta pe di HKI sai lam martamba do ganup taon angka huria, lam martamba ruas, tamba gereja naeng do mangihut lam martamba angka pangula. Ende ta (no. 133:2) mandok "Anggiat apimi ma galak, marlojong tu saluhut bangso i. jahowa sai paborhat halak naburju manghatahon hataMi. Sai tatap lambas ni gotilon I, ianggo naposom otik do i. ndang holan huriata tahe na lam mangerbang, dohot do lam mangerbangan nuaeng angka parpunguan ni halak Kristen "naung unlam dihalomohon torop halak Kristen" ala ni acara parpunguan i dohot parjamitaon "na tung manghalashon roha". Panghorhonna, gabe adong ma perbandingan na jotjot pametmethon hurianta dohot angka parjamita. Lam tamba huria, tamba nang ragam ni parmingguon "lam tamba do nang sipingkiran".
Hatorangan:
Ay.6- 9: Masa ni apostel Paulus, nunga jumpang tongtong nang angka "sipingkiran" (hamaolon) songon na nidok i. Di naung lam magodang huria na di Korintus, lam martamba do nang angka "Siboan Barita Nauli". Aturanna nian manghorhon las niroha do molo tamba "parbarita nauli" dohot ruas naung lam magodang; hape baliksa, gabe sitaonon do jumping apostel Paulus di hamajuon ni huria i. Lam torop angka parbarita nauli na ro mandapothon (ditanda) huria gabe hal "nanegatip" do tubu: gabe diperbanding-bandinghon do angka parbarita Nauli i, dipapujipuji nasada – dipametmet naasing. Apostel Paulus namungka huria Korintus masuk tu horong ni nadipametmet: didok halak "nahurang malo". Ndang holan i tahe, sahat do nagabe diraguhon haapostelon ni Paulus. Tung tarmuruk do Paulus mambege penilaian i, pola gabe dihatahon pambahenanna manghophop huria Korintus: "songon silehonlehon huboan barita nauli i, ndang hususai hamu, sian huria na asing balanjongku laho marulaon tu hamu (ay.7-9). Taida ma jo partudos ni namasa tingki ni apostel Paulus dohot sinuaengon:
- Mangalului hahurangan
Diparhatopot ap. Paulus do na hurang malo do ibana manghatai. Martimbanghon angka pangajari na asing na ro mandapothon huria Korintus marasing jala ummalo do nasida laho patolhashon Barita nauli i sian apostel Paulus. Ala ni i gabe tubu do parbolatbolatan di nasida (1 Kor 1:12 Alai on do hudok: Adong do di hamu na mandok: Sisean ni si Paulus do ahu; na deba: Sisean ni si Apollos do ahu; na deba: Sisean ni si Kepas do ahu; na deba: Sisean ni Kristus do anggo ahu.). nang ditonga tonga nihurianta saonari on nunga jotjot tarbege hata na memperbandingbandinghon huria dohot angka parjamita. Kenyataan naung diadopi hurianta do naung lam tu toropna ruas ni huria laho mandapothon parmingguon na asing dohot alasan: monoton parmingguonta, parjamitaon pe mambahen mondokondok angka ruas, nang angka ende pe mambahen mondokondok. Sumalin tahe pola adong mandok: "ndang mangolu partondion di parmingguonta", ndang digohi Tondi Porbadia parmingguonta. Molo di huria nasadaan, tung semangat parmingguon dohot parendeon i, parjamitaonna pe tung masuk tu pusupusu.
Nian secara positip boi do gabe kritikan namembangun on laho pahehehon angka parjamita dohot pangaradeon namarsitutu di ganup hurianta. Ndang piga dope hurianta marsitutu laho paradehon ulaon minggu, ala dianggap ulaon naung somal do i. Hape jumpangma, paragenda namago pusuk, ende nasala manarik tone (patimbo hu manang patoru hu), parpoti (organ) marsalaan mambahen ende, jamita pe ndang marsitutu di parade (sae do holan sian sermon resort), ende koor pe asal ma diendehon, mic pe ndang denggan, mangkuling muse ma HP ni parhalado i jumpang acara minggu. Ingkon sipareahanta do marsitutu laho paradehon parmingguon asa tung mansai denggan jala tongam asa tung tangkas parmingguon i tingki marsaor dohot Debata Nabadia.
Diangka ari parpudion lam torop do halak tartait tu ulaon parmingguon "na hona tu roha". Molo so hona tu rohana parmingguon sai dirajumi do naso adong dapot pasupasu disi. Hape aha do natalului jumping ari parsaoran nabadia (ari minggu) tu gareja: Tuhan Parasiroha bolon i do, manang parjamita naboi mambahen mengkel manang pentas pertunjukan ? Songon na di dok 2 Tim. 4:3 : Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokkon pinggolnasida.
Nunga torop ruas ni huria ndang focus be laho manangihon pangajarion ni Tuhan i, alai gabe patagashon hagigiot ni roha di parmingguon i nama. Hagigiot niroha nama nagabe sentral (manang tujuan) ni parpunguan: ndang be hata ni Debata. Tapamanat 1 Petrus 5:8 "Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna."
Dipangke sibolis do hagigiot ni daging laho paholang hita sian Tuhan i.
- Mangharingkothon di pangula ni Huria.
Tung marsitu do apostel Paulus laho mambaritahon barita Nauli I di tongatonga ni halak Korintus, pola do so olo ibana manjalo parbalanjoan sian nasida, ndang disusai agia ise (ay.8-9). Ndang namandok so ringkot di apostel Paulus parbalanjoan, ai sian Makedonia do na patukhon naringkot di ibana. Napatut do nian gabe tanggungjawab ni huria Korintus laho manggohi na ringkot di ibana (1 Kor. 9:9-10, 1 Tim 5:18), alai ndang pola dibobani Paulus nasida disi. Sada naung pinatikhon ni Debata do taringot tu panarihonon tu angka mangula di BagasJoro songon na ni dokNa tu halak Israel di Padan Narobi (4 Musa 18:8-13; 5 Musa 18:1-3)
Di hurianta, nunga leleng disangkapi laho patupa sentralisasi, asa unang gabe "boban" nian dirajumi huria angka pangula (na full time) manang didia (resort/huria) nasida mangula. Alai maol dope jumpang hasadaon ni roha laho patupa i. Gabe sai adong ma huria na merasa "boban" di nasida Pandita/Guru Huria/ Bibelvrow. Tumorop huria mandok dirina ndang boi dope humusor laho patupa i dohot alas an godang dope sibangunon di gareja. Adong muse do naso rela jala ndang mangarajumi kewajibanna do laho mangohi naringkot di pangula i. Adong muse mandok: "ai so di hami nasida mangula", pandita/guru ni halak/huria an do i ! Alani i, sai marungkil do Pucuk Pimpinan jumping patupa mutasi ni angka pangula na Full time. Hape molo hurang penampilan ni angka Pandita/Guru (parhalado) sai matua hona hata do, jala molo marpadot pe pangula laho manggohi tu parngoluan siapari tong do didok ndang suman. Mauliate ma diangka huria naung berobah cara pandangna taringot tu parhaladona. Nunga lam tamba nuaeng angka pangula i naung suman penampilanna jala ndang pola merasa minder be pajumpang tu angka pangula ni huria na asing jumpang adong angka parpunguan. Alai ringkot do eahanta unang holan parhalado na hita na "suman", naeng do dohot pangula na dihuria/resort na asing.
Panimpuli:
Disosoi apostel i do asa tangkas marpanindangion huria i taringot tu na patutoru diri. Na mardosa do ahu di na hupatutoru i diringku laho patimbo hamu. Patutoru diri, sada sikap na sai dijouhon apostel Paulus. Ndang dos na patutoru diri dohot na rendah diri. Tangkas do dijou apostel Paulus halak Pilippi asa masijangkonan sama nasida marhite na patutoru diri manang roha, bahkan didok ibana asa rajuman dongan sumangap sian diriniba. Ai songon i do dipatupa Kristus laho paluahon hita jolma (Pil. 2:3). Laos songon i do ngolu ni apostel Paulus, asa Kristus i na gabe marsangap.
Sai adong do halak manang horong na mangarajumi dirina sumurung hajongjonganna di jolo ni Debata. Akibatna, di toru ni hajongjonganna i ma angka halak na asing nang pe sisada haporseaon. Laho patingkoshon hajongjongan ni angka na porsea di jolo ni Debata didok apostel i ma, ndang olo hami mamujimuji dirinami di na so tingkina. Manang ise na naeng mamujimuji dirina marhite Tuhan i ma ibana mamuji (10:13+17).
Di godang ni angka parpunguan ni halak Kristen di angka ari parpudion, ingkon manat do hita di angka poda na dipasahat disi. Nunga godang jolma mamangke punguan gabe songon "usaha" mangalului pangomoan manang martigatigahon hata ni Debata. Jala na umpaet, molo gabe angka pangajari gapgap do namangajari disi; sai hira namangajarhon hata ni Debata hape parpoda haliluon (Mat.24:11, 24). Unang ala maringanan di inganan na uli (lux, mewah, lambok), dengan musik dohot angka parendena, tabo jamitana, bo dipamasa angka tanda halongangan pintor sai taharinggashon mandapothon i. Ai ndang na laho papuashon roha ulaon parmingguon, alai nanaeng pajumpang jala marsaor dohot Debata do hita rap angka donganta. Amen.
Jamita Minggu 16 dung TrinitatisTgl. 27 September 2009
Nats : Pilippi 2 : 1 - 11
Pdt. Marhasil Hutasoit, M.Th
Pdt. HKI Resort Siantar II
Saroha Sapanghilalaan ma Hamu Songon Kristus i
Marsadaroha Marhitehite Pangalaho na Patutoru Roha
Kata kunci asa boi marsada roha ima ingkon adong pangalaho na olo patutoru roha maradophon halak na asing. Torop do halak mandok; tung mansai maol do laho pasadahon roha di tingki na parpudi on. Tutu do i, ai molo tabereng do ditingki sinuaeng on, ra tung mansai maol do berengonta angka parsaoran na gok sada ni roha. Boi do i tapamanat diangka punguan/lembaga di hurianta; ra molo tapamanat do dohot denggan, ia angka lembaga/punguan di hurianta mengalami penurunan do. Luhutna i gabe manghorhon tu ketertinggalan diangka siulaon di ganup huria. Tung jarang do nuang angka ulaon ni angka punguan molo ta bandingkon dohot tingki naung salpu. Keadaan on sada petujunjuk do, ia dihurianta adong do penurunan sikap laho marsadaniroha. Jala on, sada tugas/tanggungjawabta do on. Ingkon sungkunonta ma rohanta be; boasa songoni? Aha do namambahen saluhutna i?
Sasintongna, ia ulaon hasadanirohaon ndang bangkol ulahononta molo olo hita ganup laho patutorurohanta be. Hasadaonniroha ndang na gabe ingkon sarupa sude angka pingkiran nang angka pangalahonta be dohot angka donganta. Alai hasadaon i tarida do molo boi hita manjalo angka pingkiran dohot pangalaho ni angka donganta na laho pamajuhon panghobasion di Tuhan i. Adong pangalaho na matoras (dewasa), ndang pintor mura mardandi dohot muruk molo so dijalo angka pandapotna. Ingkon talapati do aha impola molo didok marsadaniroha. Marsadaniroha namarlapatan do pasadahon roha angka namarragam laho mangeahi angka na denggan tu dos tu lomo ni roha ni Debata. Pandohan on namarpardomuan do dohot “parsaoran/persekutuan”, asa molo didok marsaor (bersekutu) namarlapaton do i hasadaon ni roha sian pigapiga pangalaho/pribadi boi mamereng sada tujuan na denggan. i do na gabe dasar/prinsip ni namarsaor (bersekutu).
Pangalaho na olo patutoruroha tung mansai ringkot situtu do laho pauneunehon sada punguan. Pangalaho na songon ingkon ma adong diganup jolma naung di bagasan Kristus. Marhite sikap na olo patutoruroha do boi taeahi angka na umbalga jala na ummuli di bagasan Tuhan i. Talup ni roha ima sai jumolo mamereng halak unringkot sian ibana. Dison dituntut do asa unang jumolo mamereng angka nadidirinta sandiri hita. Ai molo sai holan angka naringkot na dihita do jumolo taeahi gabe daonama sian rohanta laho mangharingkothon angka na didongan (Kristen sejati adalah orang yang mampu menempatkan kepentingan orang lain jauh lebih penting dari pada dirinya sendiri sebab dengan sikap yang demikianlah kita mampu mengasihi orang lain). Molo nunga mian talup ni roha dibagasa hadirionta be, ndang be maol mangulahon sada niroha. Alai gabe ulaon na mura do i jala manghorhon tu angka hadengganon. Talup ni roha boi do mian di hita molo olo hita ganup manghangoluhon Hata ni Debata dingolunta be. Namarlapatan do i, ia ajaran (poda) marhite Hata ni Debata ingkon manian gabe sifat (karakter) di hita.
Sapanghilalan Di Bagasan Holong
Tung gok do lasnirohanta di bagasan Tuhan molo sapinghilaan jala saparniahapan hita dohot angka donganta naasing. Sapanghilaan namarlapatan do i saroha jala sapandohan dibagasan Tuhan i. Hataridaanna ima molo boi hita marlasniroha jumpa donganta marlasniroha jala molo boi hita sapartinaonan uju donganta pe marsitaonon. Ndang na gabe marpangalaho na dibaenbaen (sandiwara) alai saluhutna i ingkon na nionjar ni roha na tulus (kita mampu merasakan perasaan orang lain jika didorong oleh ketulusan dari dalam hati kita, bukan tindakan yang berpura-pura/sandiwara. Jika sudah demikian maka itulah yang disebut simpatik yang mendorong kita untuk berbagi rasa dengan orang lain dalam keadaan apapun juga). Jala laos ima na dihatahon si Paulus di Rom 12:15 “marlasniroha ma hamu rap dohot angka namarlasniroha, jala tangis ma hamu rap dohot na tangis”.
Sapanghilaan ndang holan marlapatan boi manghilala panghilaan ni dongan, alai ingkon adong do parniulaon/pangurupion jala disi ma jumpa holong. Ai molo holan na manghilala do hita alai ndang adong pangurupion sarupa do i na gabe holan penonton hita namangamatamati donganta alai ndang adong pangurupionta. Sapanghilaan ingkonma nanionjar ni holong dibagasan Tuhan i. Alani ma gabe didok; ia sapanghilalan ndang na holan masalah perasan alai ingkon adong holong jala holong ndang na holan hata alai ingkon adong ma panurupion (pengorbanan). Ai boi do patorangon ni sasalak jola panghilalaan ni donganna alai ndang adong rohana laho mangurupi (orang bisa berkata apapun tentang perasaan seseorang, dia mungkin bisa menjelaskan apa yang dirasakan saudaranya tetapi dia tidak mampu memberikan bantuan sebagai wujud kasihnya. Untuk itulah kasih bukanlah hanya sekedar perkataan tetapi kasih adalah sesuatui yang sangat indah yang di dalamnya ada pengorbanan yang tulus).
Hita sebagai halak Kristen naeng ma manat hita dipartingkion na parpudi on. Ia tingki/zaman on ima zaman globalisasi (modren) namangonjar hita jolma laho marsigulut mangeahi na tasangkapi be. Ndang sala hita marsiadu laho mangalului angka naringkot dingolunta be. Alai na sala do molo tapangke ragam cara laho mandapot angka nataparsinta. Dison ma hita ingkon manat, ai olo do gabe donganta korban asalma dapot angka na taparsinta i, gabe ngali holong i (Mat. 24:12). Pangalaho na sisongon on gabe marparbuehon “egois” jala namengarah tu “individulisme” ima sada sifat na holan mamingkirhon dirina jala na so parduli tu angka donganna. Sai hira na holan ibana nama dianggap jolma (zaman ini bisa menghancurkan hidup sesama kita jika kita tidak hati-hati untuk menyikapinya. Sebab setiap orang akan berlomba untuk mendapatkan keinginannya tanpa memperdulikan orang lain sehingga kasih itu bukan lagi sesuatu yang harus dipertahankan tetapi malah diabaikan).
Marguru Ma Hamu Tu Kristus Naung Mangulahon I Uju DingoluNa
Marhite turpuk on, di bahen do sada tiruan di hita ganup asa tontong maniru Kristus naung patupahon haluaon di hita. Mulai sian ayat 5 sahat tu ayat 11 ima teologi taringot tu Kristus. Dilehon do sada gombaran jala sekaligus jaminan ia hita si ihuthon Ibana na tuk do gogonta laho patupahaon talup ni roha di bagasan haholongon. Marhite tiruan on, dipatorang songon dia do Kristus patutoru diriNa holan patimbohon hinaarga ni hajolmaon. Dison ma tarida, ia Jesus ndang holan mamboto pangkilaan ni hita jolma na di bagasan dosa alai dipalua Ibana do hita sian hadosaonta i marhite naung gabe jolma Ibana ro tu portibion. Angka dia do na dipatupa Kristus nagabe tiruan di hita?
Dipatutoru do diriNa marhite mangarumari diriNa (Ayat 7-8). Jesus ima Anak ni Debata jala sasintongna berhak do Ibana hot di hadebataonNa alai dipatutoru do diriNa gabe suman tu jolma Ibana marhitehite diharadeonNa laho mangarumari diriNa gabe jolma pola sampe mate Ibana. Mangarumari diriNa namarlapatan do ndang marjugul dihadirionNa. Saluhutna i boi do dipatupa Kristus ala ni haholonganNa mida hita halak pardosa. Ndang lomo rohaNa hita mago binahen ni dosa i, alai ditaluhon Ibana do huaso ni dosa i marhitehite haradeonNa pasahat ngoluNa gabe pola sampe mate tarsilang.
Tarida do antong haholongon ni Kristus tu hita, ndang holan hata alai dipatudu marhitehite hamamateNa dinatarsilang i Ibana. Diusung Ibana do harajaon na sian banua ginjang tu portibion asa masa lasniroha dohot hadameon di tano on. Dison ma tarida haholongion ni Kristus (simpati) jala di painngot do hita asa tatiru Kristus i. Nang hita pe molo mangulahon holong hita songon Kristus, ingkon ma rade rohanta laho mangarumari hadirionta. Ai molo sai tajugulhon do hot hita dihadirionta i ndang boi taulahon saluhutna i. Kita harus rela untuk mengosongkan dan bahkan harus menghilangkan jati diri kita supaya kita mampu melakukan kasih di dalam Kristus. Keika kita mau melakukan kasih jangan pernah lihat kepada dirimu tetapi lihatlah Kristus yang telah mengosongkan diriNya demi kasih yang sejati.
Boha do pangalaho nang pambahenanta tu angka donganta jolma, boi taulahon songon pambahenan ni Kristus i? Tarlumobi ma di taon on, dipamasa hurianta do ia taon on ima taon diakonia. Porlu ingotonta, ia diakonia ndang sada hala na absrtak alai ingkon tarida do di pambahenanta be. Ndang tarulahon hita ulaon diakonia i molo sai holan dirinta do tasarihon. Sada prinsip manang dasar ni Diakonia ima: sai jumolo ma taparhatopot ia hita ingkon mangkilala songon na hinilala ni angka dongan na so mampu (Diakonia itu boleh terlaksana jika gereja/orang Kristen melihat dirinya sebagai korban yang pantas ditolong sama seperti orang lain yang memerlukan pertolongan). Pandohan on, namarpardomuan do dohot pangajaron ni Tuhanta Jesus namandok: naeng mansihaholongan hamu, songon Ahu manghaholongi hamu (Joh. 15:12). Turpuk on paingothon hita sada tugas ni hita halak Kristen di portibion ima patuduhan suasana harajaon ni Debata di portibion (sama seperti Kristus, dengan keralaanNya menjadi manusia untuk memanusiakan kita maka kita juga harus memanusiakan orang lain melalui pelayan kasih yang kita lakukan).