Evangelium Januari 2010

JAMITA TAHUN BARU 2010.
5 Musa 31:1-8.

Epistel: Heber 12: 1-3.
Oleh Pdt. Dr. B. Purba (Ephorus HKI)

Huria ni Tuhanta na hinaholongan di bagasan Goar ni Tuhanta Jesus Kristus. Selamat Taon Baru ma di hamu saluhut na. Tapuji ma Amanta Debata napatariparhon hita sian taon na salpu, taon 2009, tu taon naimbaru, taon 2010 on. Nunga mangalangka hita nuaeng tu taon 2010 on. Ndang taboto dope songon dia rumang ni angka na masa siadopanta di taon on.. Mamereng situasi parngoluon siganup ari, na digoari krisis ekonomi global, dohot ragam ni sahit na masa nuaeng, olo do hita lomos. Sai songon na so margogo hita tahilala mangadopi saluhut na i. Alai, mauliate ma di Debata Amanta I, na so hea manadingkon hita. Marhite jamita on, dipapos rohanta. Didok tu hita nuaeng.

UNANG TAHUTAN JALA UNANG GODORON HAMU

Ndang hea maradian Debata manguluhon hamu.

Dung mandonok 40 taon leleng na diuluhon si Musa bangso Israel mardalan manuju Tano Kanan, Tano Bagabaga i, dung haruar nasida sian Tano Misir, Tano parhatobanan i, manghatai ma Debata tu ibana, ninna ma:” :”Ndang tarbahen ho be manaripari Jordan on!” (ayat 2). Alai ni i, diparade ibana ma bangso i manorushon pardalanan i, dohot mamongoti Tano Kanan, Tano Bagabaga i. Dipapungu ibana ma bangso i, didok ma tu nasida:”Boho saratus duapulu taon ahu marumur sadarion, ndang tarbahen ahu be laho ruar dohot laho bongot, ai nunga pola marlumba Jahowa tu ahu:”Ndang tarbahen ho be manaripari Jordan on!” (ayat 2). Dihatindanghon si Musa, paboa na laho salpu nama angka ari, bulan, dohot taon na. Ndang tarbahen ibana be manorushon pardalanan i rap dohot bangso i. Tinggal nama ibana. Alai, nangpe salpu ari, bulan, dohot taon ni si Musa, anggo asi ni roha ni Debata di bangso i, ndang salpu. Nangpe so dohot be si Musa manaripari aek Jordan i, anggo Debata torus do mangula patariparhon bangso i. Tangakas do i dihatindangkon ibana di nanidok na:”Jahowa Debatam sandiri taripar manguluhon ho”(ayat 3).

Huria ni Tuhanta nahinaholongan di bagasan Goar ni Tuhanta Jesus Kristus. Nunga salpu muse sada taon tabolus. Nunga tading deba donganta di taon na salpu. Songon si Musa di jamita on, na so dohot be manorushon pardalanan na rap dohot bangso i, songon i do angka donganta naung maradian i. Ndang dohot be nasida manorushon pardalanan i di taon 2010 on. Nunga dipaujung nasida parlojongon nasida i (2 Tim 4:7). Nunga rade di jolo nasida tumpal hangoluan sijaloon nasida sogot (2 Tim 4:8). Alai tu hita namanorushon pardalananta on dope, didok Debata do: Ndang maradian asi ni roha na tu hita. Amanata Debata do pataripar hita sian taon na salpu, taon 2009, laos Amanta Debata do mandongani hita manorushon pardalananta di taon 2010 on. Salpu pe ari, minggu, bulan, dohot taon tabolus, anggo asi ni roha ni Debta, tongtong do paihutihut hita.

Singkop do panogunoguon ni Debata di hamu.

Ndada holan patariparhon bangso i mangalaosi aek jordan Debata, alai dohot do manguluhon bangso i mardalan manuju tano kanan, tano bagabaga i. Dipabangkit Debata do si Josua gabe naposona mangganti si Musa laho manguluhon bangso i. Marhite naposona si Josua, ingkon sahat do bangso i uluhonon ni Debata mamongoti tano bagabaga i. Didok Debata marhite si Musa tu si Josua: :”Pir ma tondim jala marsihohot, ai sahat ma anggo ho rap dohot bangso on masuk tu tano naung niuarihon ni Jahowa tu ompu nasida...,jala ho do managihonsa tu nasida..”(ayat 7).

Marhite hata on, tung mansai tangkas dipapatar Debata hasatiaonna manguluhon bangso i sahat tu tujuan. Ai marhite hata on, dipasahat Debata dua ulaon na balga tu si Josua, ima: manguluhon bangso i manorushon pardalan i dohot mansagihon tano i, tu ganup marga ni bangso i, gabe peopon (milik) nasida be, songon naung niuarihon ni Debata hian tu nasida. Laho margogoihon si Josua mangulahon ulaon i, dibohali Debata do ibana marhite hata ni Debata. Didok Debata tu si Josua marhite si Musa:”Pir ma tondim jala marsihohot”(ayat 7). Lapatan na: Di namangula ulaon i si josua, ingkon holan marhaposan tu Debata Jahowa sambing ibana.

Huria ni Tuhanta nahinaholongan di bagasan Goar ni Tuhanta Jesus Kristus. Debata napalua bangso Isarel sian parhatobanan Misir dohot namanguluhon mardalan manuju Tano Kanan, Tano naung niuarihon ni Debata tu nasida, laos i do Debata na paruar hita sian parhatobanan ni dosa, sian haholomon, tu hatiuron halongangan ni Debata (1 Pet 2:9) marhite panobuson ni Tuhanta Jesus Kristus. Diarahon Tuhanta do hita marudur manuju “Tano Kanan Naimbaru”, ima Surgo sambulo ni tondinta.

Dipardalananta on, mansai godang dope hamaolon siadopanta dohot sibolusonta. Alai, marhite jamita sadarion, dipapatar Debata tu hita, paboa Taon parasinirohaon ni Debata do taon 2010 on di hita. Songon pangalean ni Debata di bangso Israel hamonangan, songon i do lehonon ni Debata hamonangan tu hita. Dung dipataripar hita sian taon 2009, didongani do hita mardalan mandalani taon 2010 on. Debata Jahowa mardalan di jolonta, manjoloani hita di pardalanan ni ngolunta. Debata Jahowa marmahani hita, asa unang lilu hita, asa unang marmara hita; manogunogu hita tu “jampalan na lomak dohot mual hangoluan”, asa unang anturaparon hita. Antong, di namangalangka hita mamongoti taon 2010 sadarion, dipapos Debata rohanta, didok tu hita ganup marsadasada:”Pir ma tondim jala marsihohot, unang tahutan hamu jala unang godoron, ai Jahowa Debatam sandiri donganmu mardalan” . Amen.

JAMITA MINGGU DUNG TAON NA IMBARU

TANGGAL 3 JANUARI 2010

JOHANNES 16 : 20 – 24

ARSAK NI ROHA MUBA GABE LAS NI ROHA

( Pdt. Firman Sibarani, M.Th )

P a t u j o l o

Perikop jamita on marbonsir sian boa-boa ni Jesus na marsirang nama Ibana sian siseanNa, (ay. 1-7, 16-19). Tingki parsirangon i didok “satongkin nari” (ay. 16). Ia parsirangon i dua periode do. Parjolo, antara parsilangon tu haheheon (ay. 16). Paheba bentuk pandohan na asing, “Na hehe ma Ahu di ari patoluhon” (Mat. 27:63). Paduahon, antara hananaek tu haroroNa paduahalihon (pah. Joh. 16:5-7). Dipabotohon Jesus, na songgop ma arsak ni roha di ngolu ni sisean di periode parsirangon i. Alai didok do muba do i gabe las ni roha. Alani i diapoi do sisean i mangido marhite goarNa asa manjalo jala gok halalas ni rohanasida (ay. 23-24).

H a t o r a n g a n

Ayat 20 – 22 : Masa Arsak Ni Roha Alai Muba Do i Gabe las Ni Roha

Dipabotohon Jesus do paboa di tingki parsirangon i tumatangis jala mangandungi ma sisean i. Marsak roha nasida ala haporsuhon jambar nasida (pah. Ay. 33). On do haporsuhon i : a. punjung sisean i di portibi on, ai borhat ma Jesus sian portibi on (pah. Joh. 17:11). b. Las roha ni portibi on disi. Ai molo borhat Jesus sian portibi on ido las ni roha ni portibi on. c. Hosoman ni portibi on do sisean i (Joh 15:19). Pola do pabalion ni musu nasida sian huria, pusaonna ala ni Kristus (Joh 16:2-3). Hinorhon ni arsak i pola marserak sisean i masitondong dalanna (ay.32).

Alai diapoi Jesus do siseanNa. Didok. muba do arsak ni roha i gabe las ni roha. Satongkin do masa arsak ni roha i. Digombarhon do i tu boruboru laho manubuhon posoposona. Dokdok diae saleleng gabegabean dohot manubuhon. Alai dung sorang dang diingot be i dibahen halalas ni rohana. Tudos tusi do arsak ni roha ni sisean. Ai rodo muse Jesus. Berengon ni sisean i do muse Jesus. Ai pajumpang dohot Jesus ido patubu las ni roha. Di ayat 22 didok “idaonku do hamu muse”. Tu tolu partingkian hamamasa ni i. Parjolo, na hehe do muse Kristus sian namate jala mangula ditongatonga ni siseanNa. Paduahon, dung manaek tu banua ginjang, na rodo muse Kristus mangondihon sisean i marhite kehadiranNa dibagasan Tondi Parbadia (pah. Ay.7-15). Patoluhon, na rodo muse Kristus paduahalihon mangalap sisean tu habangsaNa (pah. Joh 14:1-3). Jala nang pe so diida sisean i Jesus (pah. Joh. 20:29), diida Tuhan i do nasida. Tongtong do diramoti Tuhan i nasida maralohon na jahat (pah. Joh. 17:15). Sirang di pardagingon, alai ndang tarsirang manang aha holong ni Kristus sian siseanNa (pah Joh. 15:1-8; Rom 8:38).

Ayat 23 – 24 : Mangido marhite Goar Ni Jesus Manjalo Gok Halalas Ni Roha

Di na sadari i (ay. 23) mandok tingki haroro ni Kristus mangida sisean, na gabe tingki halalas ni roha. Hubunghonon do i tu tingki haheheon ni Tuhan Jesus, haroro ni Tondi Parbadia dohot haroro ni Jesus paduahalihon. Di ganup partingkian i tangkas jala lam tangkas panandaon ni sisean i di Jesus songon i pangantusion nasida di sude na masa di ganup periode ni parsirangon i. Asa nang pe sirang di pardagingon dihaporseai sisean ido na tongtong Jesus mangondihon nasida. Diantusi nasida penyataan ni Kristus i ndada holan dibagasan daging alai dibagasan Tondi, huaso dohot hataNa. Diantusi ma Jesus na ro sian Debata Ama (ay. 25-30). Gabe martangiang nasida tu Ama i marhitehite goar ni Jesus.

Diapoi Jesus ma siseanNa asa mangido marhitehite goarNa tu Ama i. Ai dibagasan Jesus do hubungan ni sisean tu Ama i jala disi do hagogok ni las ni roha (ida 15:11 dohot 17:13). Sisean na manaon arsak ni roha ala manghatindangkon ngolu dohot hamamate ni Jesus tama do mangido las ni roha. Na mangido las ni roha tu Debata Ama ala goar ni Jesus manang ala ni na sitindangi ni ngolu dohot hamamate ni Jesus manjalo las ni roha (pah. Mat. 7:7; Luk 11:9).

Hahonaan Tu Jamita

1. Na manaon haporsuhon do huria (Joh 16:33), tumatangis jala mangandungi dibagasan arsak ni roha siala hapunjunganna di portibi on, dihosomi jala dipusa portibi on (anti Kristus) ala ni Kristus. Sai godang do hamaolon, parungkilon dibolus huria. Nang so sude huria i di ganup luat mangae arsak ni roha alai na masa do i di pardalanan ni godang huria. Jala na jadi masa do i nang di taon on manang tu angka taon naro. Alai nunga dipabotohon Jesus paboa satongkin do masa arsak i, sangombas sambing do tingkina. Taboto ma, dibagasan arsak ni roha i tubu do las ni roha. Diondihon Tuhan i do huriaNa marhite Tondi parbadia, diramoti maralohon na jahat gabe mangerbang di liat portibi on. On do las ni rohanta, sai na donganan ni Tuhan i do huriaNa ganup ari rasirasa ro ajal ni hasiangan on (Mat. 28:20).

2. Sengsara membawa nikmat do haporsuhon, arsak ni roha ala ni Kristus. Ai martua do na hona insak, na pinaburuburu ni halak ala ni Kristus. Molo manaon haporsuhon ala ni Kristus, pola tumatangis jala mangandungi unang ma mandele, unang frustrasi, unang murtad. Las ma roha disi. jala marolopolop. Boasa? Ai godang do upa di banua ginjang i (Mat. 5:11-12) jala songgop Tondi hasangapon na sian Debata (1 Pet. 4:14).

3. Adong peribahasa, “Berakit-rakit ke hulu, berenang-renang ke tepian, bersakit-sakit dahulu, bersenang-senang kemudian”. Tudos tusi do na marhuria, na mar-hki. Ai Kristus na tarsilang do raja ni hurianta, Tuhan na manaon na porsuk jala hehe sian na mate. Dung i manaek Ibana tu banua ginjang, tu hasonangan. Namangihuthon Kristus i do hita na marhuria, na mar-hki. Saleleng marhuria, mar-hki, na manuhuk silang ni Kristus ido hita. Silang ni Kristus do na tatuhuk di na parsidohot manuhuk ulaon marbarita nauli, mambangun gareja dohot pelayanan na asing di huria i. Lam maju ma hurianta, lam marsangap Debata di portibi on. Tontu lam tamba do las ni rohanta disi. Las ma roha ni sude ruas ni huria ala parsidohot disi. Ai dapotan upa (pahala) di banua ginjang. Ndang holan di banua ginjang, dohot do di portibi on. Ai hasonggop ni Tondi hasangapon na sian Debata i patubu las ni roha, parolopolopon naso tarlehon portibi on (pah. 1 Pet. 4:12-14).

4. Unang ma hita manaon na porsuk ala na marjahat. Jala sotung ma adong marsak, tumatangis jala mangandungi huria manang ruas ni huria ala na marsihosoman jala marjahat huria tu huria, ruas tu ruas. Unang ma adong sian hita marjahat na mambahen huria manang ruas ni huria manaon na porsuk.

5. Molo adong manaon na porsuk ala na kristen manang ala ni Kristus, unang ma hansit rohana. Molo diarsahi halak unang balos niarsahan halak i. Molo tumatangis jala mangandungi iba dibahen halak ndang gabe bahenon halak i tumatangis jala mangandungi. Aha do bahenon? Parjolo, dipasangap ma Debata di sudena i (1 Pet. 4:15). Paduahon, martangiang ma tu Debata marhitehite goar ni Jesus mangido hagogok ni las ni roha.

Jamita tu Binawarga, Minggu, 10 Januari 2010

Ev; 5 Musa 5: 6-7 (Ep. Mateus 4: 1-11)

Pdt. Dormen Pasaribu, S.Th

HKI Res. Patane Porsea

1. Patujolo

Bukku 2 Musaon, ima songan sada bukku perpisahan ni si Musa dohot Israel (1:1ff). Di bukkuon diparatarata si Musa do angka pambahenan ni Debata dohot patikNa tu bangso Israel asa angka sundut na so mamereng dohot manghilalahon peristiwa-peristiwa na salpu mamungka sian haruruanasida sian Misir tongtong manghaporseai Debata Jahowa.Di turpuk jamitantaon, dipaingot si Musa do Israel asa manghangoluhon patik na jinalonasida uju di Sinai, molo nungnga maringanan di tano Kanaan. Tongon ma turpuk jamitantaon, patik parjolo na jinalo ni Isarel marhite si Musa. Marhite patik na parjoloon, naeng tangkas dapot di bangso i, haporseaon na polin; marsomba holan tu Debata na mamboannasida haruar sian parhatobanon Misir. Antong, ta uji ma jolo manigatisa.

2. Hatorangan Ni Turpuk

1. Turpuk jamitantaon, ima patik parjolo sian patik na sampulu i na pinasahat ni Debata tu Israel marhite si Musa. Mangihuthon panindangion ni bukku 2 Musa 19:1ff, patolubulanhon dung ruar bangso i sian tano Misir, tongon posisi nasida di halongonan Sinai, di si ma dijalo nasida patik sian Debata marhite si Musa. Dung di taon pa opatpuluhon, tongon posisi ni bangso i di bariba ni Jordan, di tano Moab (posisi naeng bongot tu tano Kanaan) dipaingothon si Musa muse patik ni Debata (5 Musa 1:1ff) tu bangso i. Tontu maksud ni si Musa umbahen na pola dipaingot bangso i di patik i di taon paopatpuluhon, ima di na tongon naeng bongot Israel tu tano Kanaan asa sundut naeng mangingani tano i ingkon marparange di patik ni Debata. Ndada holan sasundut, alai sahat do tu angka sundut na so tarida dope ingkon marparange hombar tu patik dohot aturan ni Deba ta. Ido na pinarade ni si Musa di tonga ni bangso Israel. Dipaluhut ibana bangso i laho paingothon nasida di patik ni Debata. Nungnga torop sian bangso i, tarlumobi angkasundut na umposo, na so langsung mamereng dohot mangalami angka pambahenan ni Debata, mamungka haruar sian parhatobanan Misir, isarana; paskah na parjolo, peristiwa laut rara, peristiwa dolok Sinai, ima di na tuat Jahowa tu dolok Sinai. Di bukku 5 Musa on, saluhutna pambahenan ni Debatatarlumobi patik na pinasahatNa, diparatarata si Musa tu bangso i asa holan tu Debata nasida marsomba. Molo nungnga bongotnasida jala maringan di tano Kanaan asa tongtong marparange di patik dohot aturan ni Debata.Hasonangan nasida di tano na naeng sibongotan nasida ditontuhon haunduhonnasida tu patik dohot aturan naung jinalonasida sian Debata. Di bindu 28:1-2 didok; "Molo tung tinggil situtu roham tumangihon soara niJahowa, Debatam, mangaringgas roham mangulahon patikna, angka na hutonahon I tu ho sadarion, jadi pabangkiton ni Jahowa, Debatam ma ho tumimbul sian nasa bangso di tano on. Songgop ma huhut tu ho sude angka pasupasuon jala pasahatonna tu ho, molo ditangihon roham soara ni Jahowa, Debatam". Dung imamungka sian ayat 3-14 dirinci do angka pasupasu sijaloonnasida molo marparange di patikNa. Sabalikna, molo so marhaunduhon tagamonnasida ma torutoru sian Debata (ay. 15-69).

2. Dipaingot si Musa do bangso i asa holan tu Debata nasida marsomba.Holan Debata na paruarhon nasida sian Misir do alamat ni parsombaononnasida. Di tonga ni bangso pardebata sileban, unang munggil haporseraonnasida, holan Jahowa Debata do sioloannasida, sisombaonnasida, dungkon ni i ndang adong . Holan Debata na paruarhon nasida sian Misir do anggo Debata na mangolu. Ibana do Debata na mamboannasida haruar sian tano Misir, bagas parhatobanani. Pandohan 'na mamboan haruar sian tano Misir", ima na paingothon bangso I tu Debata na mangula di sejarah pardalanannasida, di tingki na salpu, sadarion, sahat tu ari na naeng ro. Sejarah pardalanannasida mamungka sian tano Misir sahat tu tano Kanaan na naeng siebatannasida, ima sada arena kegiatan Allah bertindak/ mangula. Saganjang ni pardalanan i gok angka pambahenan ni Debata na tung mansai balga. Patar do di si panganjuon ni Debata di nasida, patar do di si parmudumuduon dohot panangannanganon niDebata, tarlumobi patar do di si hagogoon ni Debata na marmudumudu nasida. Asa Debata ni Israel ima Debata na mangolu jala naung memerdekahon nasida sian parhatobanon. Marhite tangan na gogo Debata paluahon/ memerdekahon nasida. Ndang jadi marangkup Debata bahenonnasida di tano na naeng siebatannasida i. Diorai Debata bangso pinillitNa i marsomba/ beribadah tu debata sileban. Tuhan telah menetapkan diriNya menjadi Allahnya Israel (2 Musa 16:12, 20:2), telah mengangkat mereka menjadi anakNya (2 Musa 4:22-23), hambaNya (2 Musa15:13,16) atau umat milikNya (2 Musa 6:6, 5 Musa 4:20, 7:6 pat. 10:15, 14:2). Alani i tung so patut do bangso i marsomba tu Debata sileban. Ndada holan marsomba tu debata sileban tahe diorai Jahowa bangsoNa i, alai dohot do na pajongjongkonsa (5 Musa 27:15). Dan juga bukan hanya pembuatan patung-patung yang menggambrkan allah-allah asing 'di samping Allah' saja yang terlarang, tetapi juga membuat dan mendirikan patung-patung yang menggambarkan Tuhan sendiri. Allah Israel tidak berwujud kebendaan, tidak bertubuh seperti manusia, binatang ataupun mahluk apapun juga, bahkan secara prinsipil tidak kelihatan. Asa oraora mambahen marangkup Debata tung tangkas situtu do disosohon tu bangso i. Torang do i tarsurat di 2 Musa 20: 3,5, 34:14, 23:13; 3 Musa 19:4a; 5 Musa 5:7, 6:13. Jala manang ise na marsomba/ marsomba tu debata sileban ingkon siaphononkon (2 Musa 22:20 pat. 5 Musa 17:2-5).

3. Usul tu Pangabahan ni Jamita.

Jumolo ma tapatolhas hadirionta di adopan ni Debata. Bangso Isarel na imbaru do hita di adopan ni Debata marhite Jesus Kristus. Bangso Israel diparuar/ dimerdekahon Debata marhite tangan na gogo sian parhatobanan Misir. Hita Israel na imbaru nungnga diparuar Debata sian parhatobanan ni dosa marhite Jesus Kristus. Marhite tangan na gogo Ibana paruarhon hita sian sorop ni dosa dohot hamatean. Hagogoon ni Debata patar do i di na hehe Jesus Kristus sian na mate; haheheonNa i ma hamonanganta maralohon hamatean sorop ni dosa i. Asa bangso na pinillit ni Debata do hita di bagasan Jesus Kristus (pat. 1 Petrus 2:9). Ibana do nampuna hita jala nungnga diparbadia hita laho mamaritahon hadengganon ni rohaNa. b. Namangihut muse, songon Israel na di pardalanan dope manulus tano Kanaan, dipaingot Debata nasida marhite si Musa asa holan tu Jahowa Debata, na mamboan nasida haruar sian Misir, marsomba. Hitape na tongtong do dipardalanan manopot sada inganan, ima sambulon ni tondinta, surgo hasonangan. Di pardalanan ni ngolunta dipaingot hita asa holan tu Debata, na papatarhon hadirionNa di bagasan Jesus, hita marsomba. Ibana do nampuna hita, jala nungnga ditaluhon huaso na di portibion laho mangain hita asagabe anak dohot boruNa. Saonari didok tu hita; "Ahu do Jahowa Debatam., unang marangkup ahu bahen". Jotjot do marangkup tabahen Debata, ala hurang porsea hita di hagogoon ni Debata. Di sihapataran marsomba tu Debata, alai di inganan na soding lao hita mangido pangurupion tu huaso na di portibion. Unangbe dapot sian tongatonga ni hita halak Kristen nian na mardua tuan, manang na palaokhon haporseaonna, marhite na manghaporseai kekuatan-kekuatan gaib (okultisme) na adong di portibion. Tapahusorhusor ma di rohanta hagogoon ni Debata na luar biasa, na mangatasi hagogoon na adong di portibion, ima; "pahehehon Jesus Kristus sian na mate". Molo boi do dipahehe Debata na mate, ndang pola tulak hagogoonNa patupahon na ringkot di hita. Alani holan tu Ibana ma hita marsomba. c. Ingkon parbohalanta do angka sundut na umposo, dohot angka sundut na so tarida dope asa marhaunduhon tu tona dohot patik ni Debata. Tarlumobi ma asa porsea tu hagogoon ni Debata, asa unang gabe palaokhon haporseaonna. Tarlumobi ma di partingkianta saonarion, ingkon sian roha na marsitutu dohita mamparbohalinasida. Tartogutogu do angka sundut na umposo nuaengon manghaporseai kekuatan mistik/ gaib, marhite angka tayangan-tayangan ni TV, isarana; the master na di RCTI dohot angka na asing. Alani i, unangbe marnalemba hita laho manogunogu nasida. Gok halongangan do ngolu ni angka naholan marsomba Debata. Amen

DEBATA DO SISOMBAON JALA SIOLOAN

Jamita tanggal 17 Januari 2010;

Ev. Ulangan 5:8-10; Ep. Galatia 4:8-11

(Pdt.Hopol M.Sihombing,STh – Bandung)

Patujolo

a. Goar ni Bukku Nalima i (Pentateuhk)

Buku 5 Musa digoari do di Alkitab; ‘Ulangan’ namarlapatan; mangulahi naung hea, mangarata-ratai. Patar do antong tarida i ai di buku 5 Musa on ma patik/ tona i nang angka hata ni Debata diulahi muse dijamitahon, dihatahon naung hinatahon di angka ari naung salpu. Jala molo tapatudos tu: a) Biblia Hebraica (Alkitab berbahasa Ibrani/Heber), digoarima 5 Musa on; Debar manang Eleh Hadebbarim lapatanna; “On do angka hata i” (inilah perkataan-perkataan = 5 Musa 1: 1) maksudna angka naung hinatahon ni si Musa i hian. b) Molo Septuaginta (LXX) ima Padan Narobi (PL) na marhata (terjemahan) Gorik (Yunani), buku 5 Musa digoarima i; Deutronomion. Molo Vulgata (Alkitab: padan na robi dohot Padan naimbaru) namarhata (terjemahan) Latin digoarima i; Deutronomium, lapatanna: pangulakhonon di Patik/ tona i, paduahalihon dihatahon (pengulangan hukum Taurat).

Hape boasa di hata Batak digoari 1, 2, 3, 4 – 5 Musa? Holan di Bibel do i. Molo di Alkitab dohot Bible (hata Inggris) angka ondo do goarna: 1) Kejadian (genesis) = parjadi/ panompaon/ parmulaan, 2) Keluaran (exodus) = haruar sian Mesir, 3) Imamat (Leviticus) = hamalimon; 4) Bilangan (numbers/numeri) = hitungan, sensus, angka-angka/ nomor-nomor, jumlah; 5) Ulangan (Deuteronomy) = paduahalihon, mangulakhon.

Tung sura do adong sungkun-sungkun, atik ala dominasi do Musa? Ia si Musa napinillit ni Debata intap ni Horeb gabe uluan di bangso i mansai andul do tohonanna jala padompak-dompak manghatai tu Debata (theofanis = berhadapan muka dengan Tuhan), jala parhiteNa tu bangso i. Alani i gabe goarna ma goar ni bukku i. Alai molo tapamanat tu bukku 1 Musa, dang tardok ala ni dominasi, ai dang sorang dope si Musa. Baru pe di 2 Musa dipatorang partubuna di Mesir.
Hira on do alana umbahen digoari 1-5 Musa; Ponggol (bagian) parjolo di Padan Narobi i di goari do i Thora (Taurat), lapatanna a.) Pangajaron nasian pangungkapon (penyataan/ wahyu) ni Debata tu angka malim. b) Goar panimpuli ni nalima bukku parjolo di Padan Narobi (pentateuhk). Memang mangihuthon tradisi naparjolo (kuno) sai somal do di dok si Musa do namanurat lima bukku on. Atik pe di angka ari naparpudi dung lam diteliti, ndada holan si Musa namanurat na lima bukku i, ai tangkas do didok di 5 Musa 34, taringot tu parmondingna. Alani i tagamon do adong panurat na asing tamba ni si Musa, boi do i halak Kanaan sandiri, dohot angka panurat na sinuru ni Debata. Haru mangihuthon penelitian, adong do i si abad 7 SM ai mirip deba songon naskah Lakhis dohot hata (bahasa) bukku Jeremia. Alani i dang saluhut na lima buku i sian si Musa.

b. Bukku 2 Musa dohot 5 Musa (Keluaran dan Ulangan) Taringot tu Patik/ tona i

Sian bukku 2 Musa 19-20 taboto: tolu bulan dope bangso Israel haruar sian Mesir, sahat ma nasida di halongonan (padang gurun) Sinai jala marsaro (berkemah) ma disi tondonghon (dekat/ kaki gunung) dolok i. Jala di dolok Sinai i do si Musa majalo patik/ tona i. Debata do manjou ibana marhite suara asa nangkok-tuat pola opat hali ibana tu dolok i. Hatiha i holan dihatahon Debata (lisan) dope patik/ tona i tu si Musa. Dung pe di 2 Musa 24:12-18; 31:18 dijou Debata ma si Musa Muse nagkok tu dolok i manjalo patik/ tona/tona naung nisurat ni jari/ tangan ni Debata sandiri di batu le (tulisan). Opat pulu ari ma ibana di dolok i rap dohot Tuhan i manangihon luhut tonaNa dohot aturan parugamoon. Alai ala songoni lelengna pola 40 ari, gabe ro tu roha ni bangso i, mambahen ganaganaan debatana lombu tuangan sian sere. Laos disuru debatama si Musa tuat mandapothon bangso huhut diboan ibana dua batu le namarsurat i. Toho ma tutu diida ibana nunga manontori bangso i manomba lombu tuangan i. Tarrimas ibana laos didanggurhon ma batu le i, gabe mapuntar, songoni lombu tuangan i ditutungi ibana (2 Musa 32).

Alai nangpe songon i, disuru Debata do muse si Musa mandakdak (memahat) dua batu suman tu naparjolo i asa diboan tu dolok i. Di dolok i ma ibana muse 40 ari nai. Disuru Debatama si manurathon sude hataNa i dohot patik/ tona na sampulu i di dua batu le i. Jadi tangan ni si Musa ma manurat (2 Musa 34:27-28), ndada songon naparjolo i tangan ni Debata sandiri.

Alai ianggo perikope-ta sian bukku 5 Musa on, di dok do di 5 Musa 4:45-46; “On do angka panindangion dohot angka aturan dohot uhum, angka naung pinatolhas ni si Musa tu halak Israel, dung ruar nasida sian Misir. Di bariba ni Jordan, di rura tondong ni Betpeor, di tano ni si Sihon, raja ni halak Amori na maringan di Hesbon....” Sian taantusi, hata on dihatahon di tano Moab jonokhon ni tano Kanaan (nalaho sahat nasida). Maradi do nasida disi dung nasai leleng mardalan. Tangkas didok si Musa di 5 Musa 5: 5; “Ahu do uju i jongjong di holangholang ni Jahowa dohot hamu laho pabotohon tu hamu hata ni Jahowa;....” Alai ianggo nuaeng tu nasida nama hata i. (5:3 Ndada tu angka amanta, ....tu hita do, tu hita on angka na dison nuaeng, tu luhut hita angka na mangolu.)

Alani i ndang na dua patik/ tona i alai namangulakhon nama muse si Musa pasahathon, manjamitahon hata ni Tuhan i, ai nunga hea i dihatahon uju marsaro nasida di tondonghon ni dolok Sinai. Jadi secara umum ia bukku 5 Musa on, angka hata ni Debata napinasahat ni si Musa di adopan ni bangso Israel hatiha di tano Moab bariba ni Jordan manjonokhon Kanaan.

Patik/ tona parjolo dohot patik/ tona paduahon

Di tradisi ni Katolik dohot ‘katehismus besar’ Lutheran ianggo 5 Musa 5: 6 -10 sai somal do dipadomu jala didok ma i patik/ tona parjolo. Alai anggo tradisi Jahudi dibagi dua do i jala digoari ma i patik/ tona parjolo dohot paduahon. Jala atik pe saluhutdo patik/ tona nasampulu i marhadomuan, alai najumonok hadumuanna patik/ tona parjolo dohot paduahon do. Ai molo tung diorai manomba patung manang angka ganaganaan hombar dipatik/ tona paduahon i dos do lapatanni i asa holan Debata do sisombaon (patik/ tona parjolo). Jala nang parsiajaran taringot di patik/ tona i, dung sidung dijahahon ayat paduahon adong do sungkun-sungkun na; “Dia do lapatan ni i?” on do! Ingkon biar do rohanta tu Debata jala holong rohanta di Ibana asa unang olo hita marsomba tu debata sileban manang ganaganaan mangido hangoluan sian i, jala dang jadi sombaon angka begu, songoni manghaposi hadatuon nang angka homitan (benda-benda magic).

Molo di patik/ tona parjolo i ditonjolhon pribadi ni Debata, ise Debata, ise sisombaon; (Ahu do Jahowa Debata......). Alai di patik/ tona paduahon lobi ditonjolhon; cara marsomba tu Debata (Dang jadi marhite patung manang ganaganaan/ suman-suman).

Ganaganaan, Suman-suman nang homitan; Ndang jadi Sisombaon (8)

Di Alkitab didok; “Jangan membuat bagimu patung yang menyerupai apa pun......” (5:8), lapatanna tudos manang aha pe nadi langit, di banua tonga, di toru ni tano dohot aek, dang jadi sisombaan manang sioloan. Di hata Heber didok “Pesel” (patung dalam segala wujud dan bahan). Adong do patung na didakdak (dipahat) sian batu, hau. Adong patung tuangan sian logam/ emas/ perak jala adong diolah sian tano. Manang na marrupa aha pe i; dekke, pidong (unggas), ulok, marrupa jolma, suru-suruan, dna, dang jadi i gabe sisombaon. Songoni do nang homitan ima angka benda-benda magis, simbora nasian hadatuon dohot homitan nadiyakini boi mangalehon angka hagogoon, pelaris, parmanison, pitonggam, partahanan ni daging, pangaliluon, utian di tohang/ pintu ni ruma, dna, unang ma dipeop rohanta i. Ai manang ise namarsomba tu si songoni namarlapatan do i:

a. Marsomba (menyembah) tu najinama ni tangan (karya sendiri)

b. Manggeser Debata Panompa saluhut gabe natinopa ni jolma (bnd. tompa ><>

c. Mambahen Debata nabadia, namangolu jala nagogo i, gabe benda biasa, mati jala naso margogo

d. Mambahen Debata gabe silomo-lomo, sisuru-suruon. Jala uju i di Sinai diulahon bangso Israel do mambahen patung tuangan sian sere margombar anak ni lombu laos marsomba tu si. Alani tung mansai muruk jala tarrimas Debata marnida i (2 Musa 32). Nang di angka ari namangihut dohot di tingki angka raja sai olo do Israel namarsomba tu debata Baal. Alani ni sai jot-jot do dipataridahon Debata murukNa marhite angka hamaolon, talu marporang, ari logo naganjang, haleon potir, sahit narenge/ posa. Tarbuang pe nasida tu Babel tong do ala hatangkangon, ketidakadilan dohot ala manomba debata sileban. Alai dung masa sisongoni marhite panogihonon ni angka panurirang, mulak ma nasida tu dalan na tigor i ima manomba Debata Jahowa. Laos disi do nasida manjalo muse pasu-pasu sian Tuhan i ala ro mulak manomba Debata. Rimas ni Debata tu halak Nasogo Roha di Tuhan i (9) Molo di gareja sai tabege do, bagian on (....ro di sundut patoluhon, ro di sundut paopathon....) dung sidung patik/ tona na sampulu i di jahahon paragenda. Hape di son dung sidung patik/ tona paduahon do. Tontu adong do alasan ni, jala na boi dohonon taringot tu si; ia silaosi manang na dia pe sian patik/ tona na sampulu i, targoar do i parsogo roha tu Tuhan i, ai sian Debata do saluhut na patik/ tona i. Manang ise pe na olo mambahen angka patung, ganaganaan, suman-suman dohot homitan di bagasan haposeaonna manang sioloanna jala sisombaonna disimpuli ayat 9B ma i; “angka namarsogo roha tu Debata”. Jadi ndada pola angka silele halak Kristen, panegai bagas joro songon si Saulus (andorang so gabe Paulus) asa digoari parsogo roha di Tuhan i. Alai angka namanomba debata sileban dohot ganaganaan pe parsogo roha do i tu Jahowa. Didok; parrimas do Debata tu ibana, jala luluhononNa ma hajahatonna i ro tu pinomparna patoluhon ro di paopathon. Molo maretong (taksiran) secara mate-matika, pinompar patoluhon dohot paopathon sadia godang ma on jala piga taon ma on ulaning? Tagoarima jo: generasi parjolo (namarsomba tu ganaganaan i), pinompar paduahon angka anakhon ma i, pinompar patoluhon angka pahompuna ma i, pinompar paopathon angka nini/nono-na ma i. Nunga hatop ra di jaman nuaeng on molo marnini marnono jolma dung marumur 80 taon tu ginjang. Alai godang do jolma nuaeng dang sahat tu namarnini-marnono, jala adong do dang sahat tu namarpahompu. Molo songoni sahat tu namate pe ibana tong do dope jolma nanirimasan ni Debata ibana. Sian segi jumlah, molo nunga marnini-marnono sasahalak ra nunga adong torop ni pinompar i ro di 70-100 halak. Antong molo nanirimasan ni Debata do on, 100 halak ma na hona uhum. Aha do nanaeng sibandinghononta disi? Balga nai hape uhuman tu halak na olo mambahen patung gabe sisombaonna, manang ganaganaan sipeleonna, manang homitan (benda magis) nihaposanna.

Pasu-pasu dohot Asi ni roha tu angka Parholong di Debata (10)

Di ayat10 i didok; “Alai asi do rohangku di angka na marriburibu, angka na mangkaholongi Ahu, angka na mangaradoti angka patik/ tona”. Molo tabandinghon tu na diginjang i, pinompar patoluhon ro di paopathon tataksir antara 70-100 halak; berarti molo marribu (1.000 - < sepuluh ribu halak, mis 9.000 berbanding kelipatan dari setiap 4 generasi) mungkin 12 generasi/ keturunan. Boi dohonon; ganjang nai hape pasu-pasu sijaloon ni jolma ro di tu pinomparna marsundut-sundut molo marholong roha tu Jahowa. Jala sian pandohan ni Tuhan i di ayat 10 on dipatuduhon do sikapNa, umbalga do holongNa sian rimasNa. Dang apala lomo rohaNa nian mangarimasi jolma i, ai hira dang sabanding pasu-pasuNa i tu rimasNa. Ai rimasNa intap ni 4 generasi do hape pasu-pasuNa boi ro di 12 keturunan – dst. Manang ala ni asi ni rohaNa gabe marganjang do generasi i, alai ala ni dosa i, 4 generasi pe nunga mago ibana. Nda andul umbalga do asi ni roha dohot pasu-pasuNa i?

Panutup

Holan sada do Debata Jahowa sitompa langit dohot tano nang nasa isina sudena. Di bagasan Jesus Ibana ro gabe Sipalua, laos ido na ro di bagasan Tondi Parbadia mangaramoti huriaNa. Antong dang adong na asing gabe sisombaon manang si haposan. Laos ido didok Tuhan Jesus di Mat. 22::37 “Sihaholonganmu do Tuhan Debatam sian nasa ateatem, sian nasa hosam dohot sian nasa roham!” Nang di Ul. Apostel 16:31 didok; “Haporseai ma Tuhan Jesus, asa malua ho dohot isi ni bagasmi!”. Unang ma adong hita naporsea tu angka gana-ganaan, homitan, hadatuon, ai dapot haluaon dohot hangoluan partondian sian i. Sian Jesus jumpang hita do las ni roha, hamamalum, tarlumobi hangoluan salelenglelengna di surgo. Antong tadokma songon nidok ni si Josua (24:15) “..alai anggo ahu dohot donganku sajabu, ingkon Jahowa do oloannami.” amen.

Bahan Jamita 24 Januari 2010

Nats : 5 Musa 5:11-15

Topik Patik III dan IV

Pdt.Suparman Simamora,S.Th HKI Labuhan Batu II

PASANGAP JALA PARBADIAI MA DEBATA

1. Patujolo

Ia Buku palimahon ni si Musa on ima buku namarisihon angka jamita parpudi dingolu ni si Musa. Ima angka jamita napinasahatna tu bangso Israel uju nasida di Tano Moab . Nungga 38 taon 9 bulan lelengna nasida na rap mardalan sian haluaran sian Misir. Angkup ni I muse nungga dipabotohon Debata hian naso parsidohot si Musa sahat tu tano baga-baga I, ima tano Kanaan. Disi ma disangahon si Musa papunguhon sude bangso I jala di tonai. Pola do adong 3 bagian tona manang jamita ni si Musa di bangso i. Naparjolo: Bindu 1:6-4:43 taringot tu angka napinamasa ni Debata di bangsona I dohot angka huta haporusan dibariba ni Aek Jordan . Napaduahon: Bindu 4:44 -26:19 taringot tu angka ruhut-ruhut ni uhum ni Debata. Napatoluhon: Bindu 29-30) taringot parpadanon ni bangso I dohot DebataNa.

Turpukta saonari ima sian horong paduahon i. Ima jamita ni si Musa paduahon, napaingothon muse taringot tu patik ni Debata nasampulu i. Secara khusus diturpukta on taringot tu patik patoluhon dohot paopathon. Naung jinalo nasida hian sian Debata marhite si Musa di dolok Sinai. Jala nungga marpadan hian bangso I diadopan ni Debata asa diulahon. Jala salelenng diulahon nasida patik ni Debata, pasupasuonNa ma nasida leleng mangolu di tano nanilehon ni Jahowa Debata tu nasida.

2. Hatorangan ni Turpuk
Sian turpukta saonari tarsurat :

Ayat 11) Dang jadi dohononmu goar ni Jahowa, Debatam, anggo sian neang ni roha. Ai sai na hona toru ni Jahowa do manang ise namandok GoarNa sian nenang ni rohana. 12)Ingot hamu ma pabadiahon ari Sabat I laho pabadiahonsa. Songon natinonahon ni Jahowa, Debatam tu ho. 13)Onom ari ma lelenngmu mulaulaon jala radotanmu nasa sibahenonmu. 14) Alai anggo ari papituhon I, ari Sabat (paradianan) ni Jahowa, Debatam do I, dang jadi ho radotanmu disi agia aha ulaon, nang ho, manang anakmu manang borum, manang naposom lahi-lahi manang naposom boru, ro di pinahanmu, nang nasorang tu ho dibagasan hutam, asa maradian naposom lahi-lahi dohot naposom boru-boru suang songon ho. 15) Ai tama ingkon ingotonmu naposo do ho najolo di tano Misir, gabe ditogihon Jahowa, Debatam ho ruar sian I marhite sian tangan nagogo dohot botohon na toltol; ala ni do umbahen didokkon Jahowa Debatam ho pabadiahonari Sabbat i.
On ma patik nadua I ima patik 3 dohot 4 naung jot-jot tadok siganup minggu i:

Patik 3 : Dang jadi dohononmu goar ni Debata ianggo so ture dalanna. Ai hona uhumNa do sogot angka namarsineang di goarNa.

Patik 4 : Ingot hamu ma pabadiahon ari minggu (Sabat) i. Onom ari ma ula hamu nasa siulaon muna . Alai anggo ari papituhon I, ari paradianan ni jahowa debatam do i. Dang jadi ho mangula anggo di nasadari I. Manang anakmu pe , manang borum, manang naposom lahi-lahi manang naposom boru, ro di pinahanmu, ro diisi ni huta ni halak pe namangebati hutam. Ai di na onom ari do ditompa Debata langit dohot tano dohot laut ro di nasa isina. Dungi maradian ma ibana di ari papituhon i. dibahen I do umbahen na dipasu-pasu debata ari paradianan na I jala diparbadia i.

Hata “..dohononmu… sian neang ni roha..” (ay.11) di turpukta on marlapatan mamangke dohot manjou manang mandok goar ni Debata tu/di angka naso denggan. Manang mamangke dohot manjou goar ni Debata tu/di naso ture dalanna. Hata lasaw (heber) namarlapatan : untuk kesiasiaan/kepalsuan. Tu sude panjouon di goar ni Debata tu angka naso tingkos berarti namamangke goar ni Debata secara sembarangan. Dang na manjaga habadiaon ni goari i.

Songon naung tangkas taboto dang jadi dohonon goar ni Debata tu namamburai (hujat atau kutuk: pat 2 Musa 22:28a; 3 Musa 24:16 ). Manang martolon/bersumpah (pat. 3 Musa 19:12a; Matius 5:34 -36). Manang bahkan tu angka praktek-praktek perdukunan songon na dipraktekkon adong sian halak kristen dope nuaengon.1) Sude I naparmeammeamhon goar ni Debata do i. Dibahen I naing ma mandok goar ni Debata sian dalan na ture. Ture lapatanna dang sian neang ni roha manang sian roha na leas. Ingkon dibagasan sangap dohot biar do dohonon jala jouan goar ni Debata. Ai nabadian goarNa I tudoshon habadiaonNa i. Angkup ni i pangkeon ma goar ni Debata laho mamuji jala pasangaphon Debata, laho martangiang tu ibana, jala mandok mauliate.

Namangihut muse didok “Ingot hamu ma pabadiahon ari Sabat I (ay 12-15). Kekudusan hari Sabbat adalah alasan yang terpenting bagi hukum ini. Ala ari paradianan jala Sabbat ni Debata do I (3 Musa 19:3) naung tinontuhonna jala diparbadiai. Songon Debata namaradian di na sadari I, naeng songon I ma jolma I dohot pabadiahon nasadari I songon paradianan. Dang jadi mangula ulaon dinasadari I manang ise/manang aha pe naadong di bangso ni Debata. Manang anakna manang boruna, manang naposona manang lombuna manang hodana, manang isi ni huta ni halak namangebati hutanasida. Alasan asa pabadiahon Sabbat ima natarsurat di ayat 15 ima taringot tu halauon ni bangso Israel sian parhatobanan Misir masuk tu ngolu naimbaru. Dibahen I do naing pabadion nasadari I di Debata. Jala dinamaradian nasida di ari Sabbat I dung sahat tu tano baga-baga i, laos ido paimbarhon nasida paboa naso bangso hatoban manang dang diparhatobanan be nasida.

3. Panimpuli

Sidohonon ni turpukta on ima asa badia jala sangap bahenon Debata dingolunta on. Sude I borhat sian angka namasa napinatupa ni Debata di bangsoNa nasailaon. Dinatinoguna bangso I sian parhatobanan Babel gabe tu haluaon (dari perbudakan menjadi umat yang merdeka). Sudena pambahenan ni Debata I di nasida ndada holan gabe sada parsiajaran dibangso I tu ari marsogot, alai gabe sumber namempengaruhi masa depan di bangso i. Aha napinamasa ni Debata saonari sai marudut (dang haru singkop dope) dope tuhasisingkopna. Dibahen I dang boe malua bangsoNa sian sangkap manang manimbil sian dalan naung tinontuhon ni Debata. Tung pe tardok adong kebebasan ni jolma I laho manontuhon dirina, alai sai sangkap ni Debata do na saut.

Dibahen I, borhat sian parpadanan ni Debata doho t bangsoNa, saleleng bangso Israel mian dibagasan hata /patik ni Debata jala sai tong-tong pasangap jala pabadiahon Debata dibagasan ngoluna dung sahat nasida tu Tano Kanaan, ramotan ni Debata ma nasida di tano hasonangan i.
Di ngolu padan naimbaru, ari minggu I gabe parningotan dihita diangka napinamasa ni Tuhan bahen haluaonta marhite Anak-Na Tuhan Jesus Kristus naung mate jala hehe sian hamatean i. Di ari nasasadai singkop diula Tuhan Jesus sangkap ni ama I paluahon jolma sian dosa. Alai datung I dope hasisingkop ni halauon sipamasaon ni Tuhan I dihita. Naro dope Ibana muse diarina mambahen hasisingkopna diangka nadiibana i. Dinamanagam hita disi, asa tong-tonng hita mian di hataNa dohot lomo ni rohana. Jala naing angka panghongkopon ni Jesus I jala angka napinamasa nai dihita patoguhon jala pahothon rohanta laho marhaporseaon tu Ibana.


Jamita Tanggal 31 Januari 2010

Septuagesima = 70 ari di jolo ni ari Haheheon
J a m i t a = Ulaon no Apostel 22 : 12 – 21

P a t u j o l o

Dr Lukas Naposos ni Debata, haholongan i, sada halak sian na ginoaran Partobo di Injil Synopsis manang na ginoaran Evangelium (Mateus,Markus,Lukas dohot Johannes) ; Dr Lukas on ma na manurat jala na manongoshon surat ulaon ni Apostel on tu na margoar Si Tiopilus (Ul Ap 1:1 ; band Kolose 4 : 14).

Surat on, menjembatani, antara surat Injil Synopsis dohot surat ulaon ni Apostel on, na saling melengkapi do na dua surat on,namanaringoti taringot tu dua bagian parhataan, ima Kesaksian manang panindangion na hinatindangkon ni angka Apostel ni Tuhan I na dibagasan Injil synopsis taringot tu hadirion ni Tuhan Jesus, lumobi ma saluhut angka ulaon napinatupaNa namanghatindanghon Hasintongan I di bagasan Harajaon ni Debata marhite-hite Tuhan Jesus Kristus, sian hatutubuNa, hamamateNa, habangkitanNa sian hamatean I, sahat tu na manaek tu Banua ginjang laho hondul di siamun ni Debata Ama; rodi nalaho ro Ibana muse tu Portibion na paduahalihon I ; sandok tung singkop situtu do diulahon Tuhan Jesus hombar tu parsuruni Debata tu Ibana.

Di surat Ulaon ni Apostel,on pe di hatindanghon angka Apostel nasinuru ni Debata do nasida taringot tu Barita Nauli, Barita hasintongan I, dibagasan goar ni Tuhan Jesus Kritus na sinuru ni Debata ro tu portibion laho patupahon haluaon I di saluhut jolma pardosa asa tu hangoluan i.
Pangulaon di panindangion na pinatupa ni angka Apostel on ma na gabe songon udut ni ulaon, manang angka Apostel ni Tuhan I na ma manguduti nasa ulaon naung pinatupa ni Tuhan Jesus di portibion.

Laos marhite ulaon ni angka Apostel on ma, di papatar nasida do taringot tu parmulaan ni sejarah hajongjongan ni hakristenon na parjolo I ( Gereja mula-mula ) Idaonta ma disi dohot peranan ni pangulaon ni Tondi parbadia ni Debata, ima ; Na margogoihon, mandongani, manogunogu dohot na manuturi nasida sahat tu na patulushon saluhut ulaon misi Gereja na niula nasida; lapatanna : Di saluhutna ulaon na pinatupa nasida I : Debata Jahowa do na patupahon bohal pardagingon nang partondion nasida, laho manjamitahon dohot papatarhon Barita Nauli, Barita Hasintongan dohot Barita Haluaon I, naung pinatupa ni Tuhan Jesus Kristus tu sandok portibion.

H a t o r a n g a n

1. Ia bindu 22: 1 – 30 ( secara khusus bd 22 : 12 – 21 ), sasintongna, saihot do panuturionna, umbahen namasilehonan do hatoranganna laho mangaratarata I parnigotanta taringot tu Mekanisme dohot Transparansi ni panjouon ni Debata tu Apostel Paulus.
Asa marmula do nauli jala marbona do na denggan. Ai andorang so tarhinsat dope Tuhan Jesus tu Banua ginjang, dung hehe Ibana sian na mate, martinading hata do Ibana jala di patihi do angka siseanNa i, mandok “ Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu, di Yerusalem dohot di sandok Yudea dohot Samaria, sahat ro di ujung ni tano on ( Ul Ap 1 : 8 ; band Ul Ap 5 : 32 ).

2. “ Panjouon ni Debata “ ( Ay 12 – 16 )

Taboto do, na ragam do “ Motivasi “ na boi idaonta taringot tu panjouon ni Debata tu angka naposoNa ( di PL dohot PB ), termasuk ma tu panjouon ni Debata di Apostel Paulus na di turpuk on. Si Saulus, na margoar Paulus ( vide : Ul.Ap 22 : 13 ), marhite si Ananias halak Damarkus, sada halak na daulat roha na ro manopot si Saulus (vide : Ul.Ap 22:12-13). Ibana do parhitean ni Tuhan I laho mambuha simalolongna asa marnida.

Ai andorang so ditangkup di jou Tuhan Jesus Ibana gabe ApostelNa, tardok : “ Anti Kristus” hian do ibana jala sahalak na Fanatik tu patik / Ugamo Jahudi ala di parsikolaan ni Gamaliel do ibana marsikola manguruhon i.

Beralaskan dukungan surat rekomendasi ni sintua ni malim dohot Sintua Bangso Yahudi, Ibana borhat tu huta Damarkus laho manangkup dohot mamboan tarihot / di tali angka halak Kristen tu huta Jerusalem asa manaon na porsuki, dilinsingi, diparsipal dihurungkon, dungi nadeba di pamate. Songon ima kronologis – sistematikana sahat tu panjouon ni Debata tu Apostel Paulus.

3. Di panjouon ni Debata tu Apostel Paulus on, adong do dapot hita impolana na gomos pardomuanna tu :

a. Sejarah hajongjongon ni Huria/ Gereja mula-mula.

b. Pangulaon ni Tondi Parbadia ni Debata di saluhut siseanNa.
c. Angka tanda-tanda halongangon bolon na pinatupa ni Debata laho papatarhon HasintonganNa i.
d. Dibohali Debata do angka siseanNa i di ulaonna i.
e.Hasadaon ni roha ni saluhut halak Kristen napatupahon angka ulaon lomo ni roha ni Debata, isarani : Martagiang patupa angka ulaon Asini Roha dohot lan naasing, dalan nasida mamuji dohot pansagaphon Debata.

II. Usul Ojahanna

Alusi jala oloima panjouon ni Debata na tuho”
Borhat ma ho tu inganan sipatuduhonon ni Debata doi tu ho.
Patupa, pajongjong, puji jala pansangap ma Debata marhite ulaonmu.
Pinatutomu ni :
Pdt.M.P.Siregar,MTh