Jamita Minggu 20 dung TrinitatisTgl. 05 Oktober 2008
Nats : Jesaya 61 : 1 - 3
Pdt. Hugo De Groot Nababan, STh
HKI Resort Simpang Opat Porsea
Ngolu na digohi Tondi ni Debata
I. Patujolo
Molo mobil ingkon denggan do Mesin, cukup bensin manang bahan bakarna, denggan lampuna, kaca spion lengkap, rodi sude keperluan ni mobil i. Alai sae do holan i? Tontu daong. Adong dope na rumingkot, ima supir, tu dia do naeng arahonon mobil i, songon dia pardalanna tergantung tu supir do i. Songon i do nang angka pelayan ndang sae holan parsingkolaan na timbo, alai na manontuhon ulaon ni parhobas manang pelayan i ma Tondi ni Debata. Gabe songon "Supir" do Tondi dipanghobasion ni Huria.
Diondolhon Turpukon do pandonganion/ Peran Serta ni Tondi ni Jahowa tu si Jesaya. Angka naposo ni Debata ima angka na miniahan ni Debata jala disonggopi Tondi ni Jahowa. Dungpe disonggopi Tondi ni Jahowa si Jesaya asa diula ibana ulaon na pinasahat ni Debata. Tondi ido na patauhon ibana mangula saluhutna i.
Barita las ni roha do na naeng pasahaton ni si Jesaya, ima tu halak na dangol, na tarhurung, na tarbuang. Asa gabe apul-apul do on tu halak na dangol, ai tongtong do diparrohahon Debata angka na marsitaonon jala boanonNa haruar sian angka sitaonon i.
II Hatorangan ni Turpuk
Pengakuan jala pengalaman rohani ni si Jesaya mandok;, "songgop do tu ahu Tondi ni Tuhan Jahowa". Jala piga piga ayat patoranghon na didongani Tondi ni Jahowa do ibana. Songgop do tu ibana Tondi ni Jahowa, Tondi habisuhon dohot Tondi ni hapistaran, Tondi ni panuturion dohot Tondi ni hagogoon, Tondi parbinotoan dohot biar mida Jahowa (11:2). Ida ma naposongKi na hutogu, na hupillit hasudungan ni rohangKi, nunga huampehon TondingKu tu ibana (42:1). Parsuruon ni Debata tu naposoNa ndang terlepas sian pandonganion (penyertaan) ni Tondi Debata. Asa Tondi i do na margogoihon, mangajari, mangaramoti si Jesaya mangula ulaonna. Gabe tarpatupa ibana mangulahon ulaonna mardongan hasation dompak Debata. Berani mangadopi resiko, hamaolon, tigor jala sintong ulaonna di adopan ni Debata.
Mansai ringkot rimanganta nuaeng marhitehite pengalaman rohani ni si Jesaya, hita songon pangula manang ruas pe, beha, nunga songgop Tondi ni Jahowa tu hita? Ingkon tapangido jumolo Tondi ni Jahowa andorang so mangula dope hita. Asa dao penyelewengan tugas, dao biar dohot losok laho mamaritahon Barita Nauli.
On mansai hurang nuaeng diparhobas nang ruas pe di partingkian on. Guru, Bibelvrouw, Pandita nang ruas pe ingkon na miniahan ni Jahowa jala disonggopi Tondi. Molo hurang denggan ualonta, naeng tangkas tasungkun dirinta be ‘songgop do tu ahu Tondi ni Debata?’. Ai angka naposo ni Debata nang ruas ingkon jumolo mangido tu Debata asa songgop Tondi Porbadia jumolo, dung i asa mangula. I do na taida di turpuktaon jolo tangkas do dimiahi Debata si Jesaya jala disonggopi Tondi, i pe asa mangula ibana pasahathon tona ni Debata.
Narumingkot, ia panjouon ni si Jesaya na digohi Tondi ni Debata laho mamaritahon barita nauli ndang holan bersifat historis, alai lobi sian i do, ima patolhashon sada rimpunan, ia parsuruon manang pengutusan ni Debata tu angka naposoNa di sepenjang zaman na ingkon digohi Tondi ni Jahowa. Anggo so Tondi ni Jahowa mangula di hita aha ma na tolap taulahon? Ingkon tondi ni Jahowa do gabe ‘supir’ ni sude angka pelayan di nasa aras pelayanan asa gabe pelayan na tepat, na sintong jala mengena tu sude aspek parngoluon ni jolma. Ima na digoari pelayanan na
holistik manang menyeluruh, hona tu partondion, hona tu pardagingon. Boasa godang murak nuaeng on angka parhalado? Ala ndang dilehon rohana gabe hasonggopan ni Tondi. Boasa hurang ‘sangap’ angka pangula nuaeng on? Ala ndang tingkos ulaonna, boasa ndang tingkos? Ala ndang didongani Tondi ibana.
Tondi ni Debata do na tuk merobah angka parangenta na so tama. Tondi i do patingkoshon angka ulaonta manghobasi di tonga-tonga ni huria dohot di ulaon aha pe. Pangido Tondi i, jala bahen ngolum gabe hasonggopanNa.
Dijou Debata si Jesaya laho mamaritahon barita nauli tu angka na dangol. Ido tugas manang ulaonna. Tontu molo angka jolma na di pardangolan sai mangkirim do di apul-apul, ringkot pangurupion asa malua sian parsorionna. Ragam do mambahen hita gabe mardangol, boi do i ala ndang adong kebebasan, boi do i ala ni hapogoson, parsahiton, utang dohot ragam na asing. Gabe mambahen hita marroha na bojok manang remuk hati.
Ditingtinghon si Jesaya do taon parasinirohaon ni Jahowa (tahun kemurahan/ rahmat Tuhan). Dilatarbelakangi tahun Jobel do pandohan i. Ia pangalaho ni taon parasi nirohaon i, ima ganup halak namarsingir ndang jadi tungguonna donganna manang hahaanggina jumpang taon Jobel. Lapatanna adong penghapusan hutang jala marningot 50 taon haluaon ni halak Israel (5 Musa 15; 3 Musa 25) jala laos dipadomu ma i na tarhurung jala na tarrante ima halak Jahudi na tarbuang di Babel. On ma bukti nyata pambahenan ni Jahowa laho pabangkithon lapisan masyarakat bawah, dipalua Debata do bangso Israel sian tano habuangan i mulak tu hutana. Ndang holan ribuan taon na salpu Debata paluahon, alai sepanjang zaman do Debata mangula, mangurupi angka na dangol.
Dijaha Jesus do ayat on di na mamuhai ulaonNa (Luk. 4:17-19). Songgop do Tondi ni Jahowa tu Jesus jala barita las ni roha do diboan Jesus tu angka na pogos. Mamboan haluaon tu na tarhurung, na mapitung gabe marnida, na ginosagosa dipalua. Sandok parasinirohaon do diulahon Tuhanta Jesus Kristus.
Tangkas do dihatindangkon angka parevanggelium ulaon dohot ngolu ni Jesus, ima ngolu na marsilehonlehon (memberi). Dilehon Jesus do hamalumon tu na marsahit, na sarion, na mapitung, na pangpang, na sibolison dohot lan angka sahit na asing dope. Dilehon Ibana ngolu tu si Lassarus naung mate i, dilehon Ibana mangan angka na rapar, dilehon Ibana koreksi tu angka halak Parise, dilehon Ibana sipaingot manang tegoran tu si Marta. Dilehon haluaon tu angka na torop. Sandok ulaon ni Jesus digohi ulaon marsilehonlehon (memberi). Didok Ibana do; …asa Hupasonang hamu (Mat. 11:28).
Beha do hita? Anggo hasomalan ni jolma nuaeng, ndang marsilehonlehon alai manjalo manang naeng papunguhon do (memiliki). Arian borngin hita karejo asa lam godang artanta, nasa usaha tapatupa nang pe sipata manusai angka dongan asal ma mangomo hita. Ukuran na tabahen mangukur jolma ima menurut aha na adong di ibana (menurut apa yang ia miliki). Sifat na egois do sisongon i ai lupa do hita mangurupi angka dongan na dangol dohot na marsitaonon, holan dirinta jotjot tasarihon .
Dibahen Jesus do tu hita tiruan asa olo hita marsilehonlehon asa gabe habaoran ni pasu-pasu hita tu na humaliang. Asa jumpang keadilan dohot keseimbangan, asa malua angka dongan sian pardangolanna. Tu si do hita tarjou, alani pelayanan ni Huria ima pelayanan na holistik manang menyeluruh. Marhitehite pelayanan ni huria i, ingkon gabe manghilala ruas ni huria di pangurupion ni Debata na paluahon jala mamboan hamubaon ni parngoluonna.
Molo adong na marsitaonon sai didok halak batak do umpasa; "Pilopilo madungdung ma nina tu pilopilo na bajar, sae ma na lungun sai ro ma na jagar". Sianon boi dohonon tung so adong do na marlomo ni roha mangolu di bagasan arsak. Sai manghirim do hita asa sai ro na jagar manang las ni roha. Ido barita nauli na sahat tu hita nuaeng. Marpadan do Debata; pahinsaonna hita angka na marsak jala na dangol. Tongtong do didongani Debata hita rasirasa ro ajal ni hasianganon. Tapadao ma arsak i mangasahon gogo ni Debata. Ai angka na marsak ndang boi denggan mangula ulaonna, mura diserang sahit jala ndang boi mamuji Debata dohot denggan.
Sirabun, ima simbol berkabung di halak Jahudi. Nunga diganti Debata gabe tumpal, ima simbol las ni roha. Nungnga dipasahat ulos na marhadohoan singkat ni tondi na marhatahuton, nungnga mulak tondi tu ruma ninna halak Batak molo malua sian angka mara dohot biar ni roha. Gabe dipatudos ma hita songon hariara hatigoran. Hariara ima songon simbol masa depan dohot generasi na imbaru. Hariara na togu gabe boi parlinggoman ni halak na ringkot marlinggom. Jala lam tu toguna nasa bangso ni Debata.
III. Panutup
Tondi ni Debata mansai ringkot songgop tu hita ganup marsadasada. Tondi ni Debata do na paubahon ngolu ni si Jesaya songon i nang ngolunta. Tondi i patauhon ganup angka na porsea gabe habaoran ni pasupasu laho mamboan barita nauli tu angka na marsitaonon.
Mansai torop dope di tongatonganta angka na dangol, dijou do hita asa olo marsilehonlehon asa malua angka donganta sian pardangolanna. Pelayanan ni Huria ingkon pelayanan na menyeluruh (holestik). Asa hehe angka ruas sian pardangolanna be, jala marpos ni roha tu Debata ma saluhutna angka na di bagasan pardangolan dope. Porsea ma hita na so hea ditadinghon Debata angka na porsea di Ibana. Jala las ni roha do na naeng pasahaton ni Debata tu hita saluhutna. Amen.
Jamita Minggu 21 dung TrinitatisTgl. 12 Oktobert 2008
Nats : Rom 3 : 23 - 28
Pdt. D. Pasaribu S.Th
Pdt. HKI Resort Patane Porsea
Pdt. HKI Resort Patane Porsea
Mangaradoti Poda Dalan tu Hangoluan
I. Barita Masa di Huria Rom
Ia ruas ni Huria na di Rom, ima halak Jahudi (4:1, 7:4-6) dohot na so Jahudi (1:5+13, 11:13). Kemungkinan besar tumorop do halak na so Jahudi sian halak Jahudi. Nagabe tema pokok di surat Rom, khususna di bindu 1:18-11:36, ima hasadaon ni halak Jahudi dohot na so Jahudi di pamintorion dalan haporseaon di bagasan Kristus Jesus. Andorang so haroro ni Jesus Kristus, ndang adong hadomuan ni na dua houm i. Bangso Jahudi, ima bangso na pinillit ni Debata. Tanda ni pamilliton i, ima Patik dohot parsunaton. Alai dung haroro ni Kristus, jala dihaoojak ni huria bona, halak Jahudi dohot na so Jahudi gabe rap bangso ni Debata. Pandidion ima tanda masuk tu parsaoran ni punguan manang huria i. Ondo barita nauli binaritahon ni Paulus, paboa di bagasan Kristus ndang adong be parasingan ni na dua houm i, alai tung sada do dibagasan Kristus Jesus.
Tubu do hamaolon diadopi Paulus sian horong ni halak Jahudi naung gabe Kristen. Dijangkonnasida do barita nauli i, alai sai tongtong gomos maniop parasingan ni na dua houm i. Tung so tarjalonasida do injil/ barita nauli i na gabe mansoadahon hadirion hapunjungannasida songon bangso na pinillit ni Debata.
Mangihuthon haporseaonnasida, haroro dohot ulaon ni Kristus tidak mengubah status Israel sebagai umat Allah yang eksklusif dan tidak juga meniadakan kewajiban orang percaya untuk memelihara seluruh hukum taurat. Marojahan di kepercayaan inti/ unok ni haporseaon na songon i maringkon do nasida asa nasa halak na so Jahudi na porsea tu Jesus masuk gabe anggota umat Jahudi ingkon do marsunat jala mangaradoti patik pinasahat ni si Musa.
Tung dihasogohonnasida do Paulus (bahkan sahat tu sangkap naeng mamunu, Ul. Ap. 20:3, 23:12) ala dirajuminasida Paulus manegai/ mansoadahon hadirion hapunjungan (kedudukan eksklusif) nasida songon bangso ni Debata jala na so mengharuskan halak na so Jahudi naung manjalo injil/ barita nauli i mangaradoti (memelihara) aturan ni patik i. Autsura saut pinarsinta ni halak Jahudi i masa di tonga ni huria i, sega ma hasadaon ni parsaoran ni halak Jahudi dohot na so Jahudi di tonga ni huria i.
Nang sian tonga ni halak na so Jahudi naung Kristen pe adong do tongtong pamingkirion sipatureon ni Paulus na manghorhon hasesega tu hasadaon ni na dua houm i pinaojak ni Paulus diojahan ni barita nauli i. Di houm ni halak na so Jahudi, Israel sudah tidak masuk perhitungan lagi (11:17 dohot udutna). Selaku orang "kuat" mereka memandang rendah orang Kristen "lemah", yang masih merasa wajib memelihara berbagai peraturan ritual (14:1-15:13). Pandapot nasongonon pe tongtong do manegai hasadaon i.
Dilihat dari sudut teologi sistematis, dengan cara ini hubungan antara PL dan PB, antara injil dengan Hukum Taurat akan putus. Dengan demikian, Perjanjian Lama bukan lagi Kitab Suci Gereja Kristen. Khususna sian pihak Jahudi, ditudu do Paulus;
1. Pararathon barita haluaon sian duru (tanpa) ni patik (pat. 3:21). Nasa hasintongan na sian duru ni patik, ima hasintongan na so polin ala ndang mangargahon tona ni Debata.
2. Hasintongan na so marojahan di patik, na marlapatan do i mansoadahon patik i.
3. Debata binaritahon ni Paulus, ima Debata na asing, ala mambasabasahon haluaon dalan haporseaon, ndang dalan patik. Ndang i Debata na mangihot parpadanan dohot Israel. Allahnya Paulus itu tidak dapat diandalkan, tidak setia, bahkan adalah Allah yang sewenangwenang, sebab ia menolak umat yang telah dipilihnya sebelumnya (pat. 3:1-8, 9:6, 14, 19, 11:1a +11, Gal. 2:17, 3:21).
Songon i ma na masa di parsaoran ni huria Rom jala na pinatureture ni Paulus marhite surat Rom on. Hinirim ni roha ni si Paulus asa momos ojak parsaoran ni huria i di ojahan ni barita nauli i. Hasadaon do pinarbuehon ni i nang pe marasing marga, houm, adat dohot angka na asing.
II. Panangkasion Ni turpuk
1. Andorang so tatangkasi turpuk (Rom 3:23-28) on, sada na ringkot naeng gomos tioponta, ndada taringot tu dosa na gabe pokok perhatian di turpukon, alai HATIGORAN NI DEBATA na mamintori jolma pardosa do. Jolma pardosa dipintori Debata marhite hatigoranNa, alani i gabe pintor di adopanNa.
Hatigoran ni Debata (dikaiosune theou), mangihuthon tata bahasa Gorik ‘yang dimiliki Allah’ (genetif subyektif), ‘yang diperoleh dari Allah’ (genetif yang menunjukkan asal). Taringot tu son didok amanta si Martin Luter, kebenaran Allah bukanlah kebenaran yang mengganjar, melainkan kebenaran yang membenarkan, membebaskan dari hukuman orang yang sebenarnya tidak layak dibebaskan. Jadi hatigoran ni Debata, ima ulaon na paluahon hajolmaon sian dosa jala na papatarhon hasatiaonNa di saluhut baga-baga pinasahatNa.
2. Didok si Paulus, ndang adong imbar ni halak Jahudi dohot na so Jahudi, tung saluhutna do mardosa. Nangpe bangso na pinillit halak Jahudi jala hasahatan ni patik ni Debata tongtong do jolma pardosa nasida jala tung so boi pintor anggo alani na mangulahon patik ni Debata. Ai dihorhon patik i do panandaon di dosa (3:20b). Hata dosa di ayaton mamangke bentuk tunggal. Pandohan i ndang boi tafsirhononta seakan-akan, baru kehadiran Hukum Taurat (patik) membuat orang menyadari perbuatan mereka dosa. Alai marhite patik i lam tu sangena ma huaso ni dosa i. Anggo patik i na badia (7:12) jala partondion (7:14) do, alai hinorhon ni huaso ni dosa na di bagasan jolma i gabe papeolhon hatigoran ni patik i.
Ido umbahen gomos diondolhon Paulus, anggo alani na mangulahon patik do tung so boi do gabe pintor jolma i di adopan ni Debata. Kedudukan istimewa ni halak Jahudi, ima bangso pinillit ni Debata dohot marhite na mangulahon patik, tung so boi do i paluahonnasida sian uhuman ni Debata na naeng silaluhononna tu jolma i. Ai tung so memenuhi standar/ syarat do saluhut parangena i mangihuthon hatigoran ni Debata di patik i alani huaso ni dosa na adong di ngolu ni jolma i.
Songon i ma tongtong nang halak na so Jahudi, tongtong do jolma pardosa nang pe so mananda patik i. Asa molo diradoti na so tarsunat i pangidoan ni patik i, nda rajuman ma dagingna na so tarsunat i doshon naung disunat, ninna Paulus di 2:26.
3. Udut ni ayat 23, di hata Gorik, husterountai tes doxes tou Teou. Marasing do terjemahanna di Bibel na marhata Batak dohot Indonesia di pandohan i. Hata Batak manterjemahon, "ndang dapot pujion ni Debata nasida", Bibel na marhata Indonesia, "telah kehilangan kemuliaan Allah".
Ummappit do pangalapation ni hata Indonesia i. Husterountai, lapatanna gagal memperoleh, tidak memiliki. Doxes; terang cahaya, kemuliaan. Dosa telah (bentuk lampau) menjauhkan manusia dari Tuhan, sehingga ia kehilangan (bentuk sekarang) kemuliaan itu. Orang percaya akan menerima kemuliaan itu kembali sepenuhnya pada waktu mereka bangkit dan disatukan dengan Kristus (Pilp. 3:21, 1 Kor. 15:43).
4. Antong songon dia nama hape jolma (halak Jahudi dohot na so Jahudi) i? Molo halak Jahudi ndang boi pintor di adopan ni Debata alani ni na mangulahon patik, behanama maradophon rimas ni Debata? Molo na so Jahudi, naung mardosa nangpe so mangulahon aturan ni patik, nang mangulahon aturan patik pe tongtong do ndang malua sian rimas ni Debata, beha nama hape?
Mamungka sian ayat 24, Paulus mambaritahon barita nauli manang barita las ni roha. Dibaritahon ibana, jolma pardosa dipintori dalan basabasa. Basabasa sian kharis hata Gorik, na marlatar belakang kata kerja hata Heber (khen), lapatan harafiahna; membungkuk, lalu juga memberi kasih karunia, mengasihani (2 Musa 33:19, Psalm. 123:3). Kata kerja itu membuat kita membayangkan seorang ibu yang membungkuk untuk mengangkat anaknya yang telah jatuh. Molo tahonahon kata kerja i tu Debata; Debata papatarhon ulaonNa nionjar ni asi ni rohaNa tuat sian banua ginjang mangangkat jolma naung madabu tu bagasan dosa.
Dipintori hita manang gabe pintor hita na marlapatan kita dianggab telah memenuhi syarat-syarat perjanjian antara Tuhan dengan umatNya. Asa sude hasalaan manang dosanta ndadabe dipersoalhon ala sibasabasa do asi ni roha i. Marhite i torang tabereng, injil/ barita nauli i manutup kemungkinan boi jolma mangalului haluaon sian usahana sandiri (mangulahon patik), alai mengungkap pintu tu nasa jolma na manghirim haluaon i sian Debata.
5. Pamintorion i hinorhon ni panobusion di bagasan Kristus. Panobusion, sian apolutrosis. Lutrosis, kata benda, lutron, kata kerja. Godang do jumpang pandohan i di Padan Narobi na marhata Gorik (LXX), ima na diterjemahon sian ga’al/ ge’ulah. Hata ga’al/ ge’ulah di halak Heber dihonahon do i tu panobusion ni milik keluarga atau anggota keluarga yang diperbudak oleh keluarga terdekat (pat. Rut 4), manang manobus patumonaan ni bortian manang hosa ni sasahalak (pat. 2 Musa 34:20, 1 Sam.14:45). Secara khusus, pandohan i dipangke do i tu pembebasan ni Debata maradophon bangso Israel perseorangan (2Musa 15:13, 5 Musa 9:26, Psalm. 26:11). Molo di Jesaya paduahon (Deutro Jesaya), dihangkam pandohan i do sahat tu panobusion sian dosa (Yes. 43:22-28, 44:21 dht udutna, 48:9 dohot udutna, 50: 1-3, 54:6-8, 55:7). Nang di surat ni Paulus pe tongtong do jumpang hita songon pangalapation ni Deutro Jesaya i, isarana songon na di turpuk jamitantaon, dung i di Epesus 1:7, dohot Kol. 1:14.
Jolma naung madabu tu bagasan dosa i, ditobus Debata di bagasan Kristus. Torang diondolhon Paulus, panobuson i di bagasan Kristus do, ndada di bagasan patik. Injil mengaruniakan keselamatan ‘di dalam Kristus’ yang bertentangan dengan asas ‘dalam hukum Taurat’.
6. Kristus dipadiri bahen habangsa parasian (bhs. Indo; jalan pendamaian) marhite sian haporseaon di mudarNa i. Habangsa Parasian/ jalan pendamaian paingothon na manjaha surat Rom on tu upacara pendamaian di Padan Narobi. Di padan Narobi marhite ari rea pendamaian dosa ni bangso i dihaporseai nasida do na disesa Debata dosanasida. Ido tongtong na niondolhon ni Paulus marhite pandohan ‘Kristus dipadiri bahen habangsa parasian’. Marhite hamamate ni Kristus; di dalamnya, bahkan dosa seluruh umat manusia didamaikan. Hamamate ni Kristus gabe ‘tempat pendamaian’ manang ‘sarana pendamaian’.
Marhite sian haporseaon di mudarNa i. Torang tabereng paboa Debata tidak bekerja dengan cara serba otomatis, lepas dari sikap manusia, tetapi olehnya dibangkitkan iman, sikap penuh percaya, yang menerima kabar tentang Allah yang mendamaikan manusia dengan diriNya dan dengan demikian menyelamatkan manusia dari dosa dan maut. Iman dalam arti itulah yang menjadi jalan dan cara manusia memperoleh anugerah Allah yang begitu besar itu.
Kristus dipadiri bahen habangsa parasian; …asa dipapatar Debata di si hatigoranNa (ay. 25b),… asa pintor Ibana jala dipintori na porsea di Jesus (26b). Debata mambuktihon hatigoranNa di bagasan Kristus pinadiriNa i bahen dalan pardenggananNa dohot jolma pardosa. Kristus ditentukan Allah sendiri supaya Ia kena murka Allah dan dengan demikian kita luput. Di dalam kematianNya sekaligus nyatalah kebencian Allah terhadap dosa dan kasihNya kepada orang berdosa.
Namangihut muse, ‘asa pintor Ibana jala dipintori na marhaporseaon di Jesus’. Boi dohonan pandohanon songon kesimpulan ni bindu 3:1-26. Allah sungguh-sungguh memperlihatkan bahwa Ia setia kepada umatNya. Sekaligus Ia sungguh-sungguh memperlihatkan pula (melalui kematian Kristus) bahwa Ia tidak bisa tidak menghukum dosa. "…jala dipintori na marhaporseaon di Jesus’". Kebenaran itu bukanlah abstrak tetapi kegiatan, tindakan yang tidak bisa tidak mengerjakan sesuatu yaitu kebenaran manusia. Dalam hal itu, Paulus dan lawan bicaranya sepakat: Allah membenarkan manusia. Perbedaannya terletak dalam kata-kata terakhir, "yang percaya kepada Yesus". Yang dibenarkan bukan manusia yang berupaya sekuatkuatnya memenuhi Hukum Taurat. Sebaliknya yang dibenarkan ialah mereka yang percaya bahwa tuntutan itu telah dipenuhi dalam kematian dan kebangkitan Yesus, bahwa Yesus telah menjadi penebusan bagi mereka. Mereka itu dapat dengan penuh percaya datang kepada Allah dan tidak usah lagi takut akan hukumanNya.
7. Haporseaon i do mamintori jolma, ndada marhite na mangulahon patik. Tung so boi do pintor jolma anggo sian na mangulahon patik, alai dalan haporseaon do dipintori jolma i. Unsur ni haporseaon na mamintori i ima; a). Maninggalhon upaya na mamintori diri dalan parniulaan (amal), b). Manjalo uhuman ni Tuhan i maradophon dirina sandiri, c). Manjangkon dalan pardamean tinotophon ni Tuhan i, ima Jesus Kristus. Alani haporseaon i gabe taruli hita dame dohot nasa basabasa pinaradeNa di bagasan Kristus. Ido sialana umbahen tung so boi hita paburnanghon diri di adopan ni Tuhan i.
III. Sipasahaton di Jamita
Adong piga-piga hal naeng sipasahatonta marhite turpuk jamitaon;
1. Hombar tu topik ni minggu naung ditontuhon, ima REFORMASI 4: Sola Gratia (Holan asi ni roha), asa gomos ondolhononta asi ni roha ni Debata binasabasahonNa tu hita hita jolma pardosa. Dipintori hita jolma na so bolas pintor anggo sian parangenta di adopanNa ala ni hatigoranNa di bagasan Kristus dalan haporseaon. Hinorhon ni hatigoran ni Debata naung patar di bagasan Kristus gabe taruli hita hasesaan ni dosa jala bolas malua sian uhumanNa marhite hamamate, dohot haheheon ni Kristus i. Nungnga tung singkop situtu asi ni rohaNa dipapatar tu hita uju pinarhatoban ni dosa hita.
Tung so adong do sipangasahononta sian dirinta mambahen pintor hita di adopan ni Debata. Di bagasan asi ni roha ni Debata naung suksuk di bagasan Kristus, tartutup do pintu dapotan haluaon sian na mangasahon parangenta, alai ungkap do pintu i di angka na manjangkon barita nauli di bagasan Jesus i.
2. Pamintorion ni Debata di konteks parsaoran ni huria. Tung diparsinta Paulus do parsaoran ni huria na di Rom asa hot parsaoran ni ruas (halak Jahudi dohot na so Jahudi ) i di ojahan hatigoran ni Debata pinapatarNa di bagasan Kristus. Ndang adong parasingan ni halak Jahudi alani status na mamunjung songon bangso pinillit ni Debata dohot hasahatan ni patik ni Debata maradophon halak na so Jahudi, ai pardosa do sude jolma. Alai sada do nasida hinorhon ni panobusion na di bagasan Kristus Jesus. Ndang adong be status na tumimbo dohot na tumoru alai sarupa do di adopan ni Debata ala rap taruli pamintorin sian Debata. Baik orang Yahudi maupun non-Yahudi diselamatkan oleh Injil yang sama dan dengan cara yang sama. Songon i ma tongtong nang di tonga ni parsaoran ni huria nuaengon. Nasa naung tardidi tu bagasan goar ni Debata Ama, Anak dohot Tondi Parbadia nunga masuk tu parsaoran pinintoran ni Debata. Ndang adong imbar ni na sada maradophon na asing, alai sarupa do i luhutna. Asa unang be dapot di tonga ni huria na paimbarhon ruas ni huria na sada tu na asing, manang na mendapat perlakuan khusus alani sinadongan na adong di ibana. Olo do masa tuminggil parhobas ni huria tumangihon ruas na sumurung sinadonganna. Olo do masa tongtong hu roha ni na sumurung sinadonganna maradophon parhahurangan. Asa molo masa na songon i, taingotma ndang di parsaoran pinintoran ni Debata dope ojahan ni parsaoran i.
3. Parange na tama dohot pamintorion ni Debata. Ala naung dipintori Debata do hita dalan haporseaon di bagasan Kristus Jesus papataronta ma angka parange na tama di adopan ni Debata dohot maradophon dongan jolma. Sotung be adong pangarajumion asa dipintori Debata hita marhite pahala ni angka parange na tama. Marparange na tama ma hita saleleng mangolu di portibion di adopan ni Debata dohot dongan jolma songon hamauliateon ni rohanta tu Debata na mamintori hita. Ondo parasingan ni hita halak Kristen sian ajaran ni ugamo na adong di humaliangta. Alai naeng ma gomos bagabagahononta tu rohanta; saya akan tetap setia mengabi kepada Tuhan, saleh di hadapan Tuhan, berbuat baik terhadap sesama karena Tuhan telah membenarkan saya di dalam Kristus Yesus. Ingot ma tung so pailaon ni Debata do ganup na burju roha di adopanNa.
4. Tema: "Asi ni roha ni Debata do na mamintori ngolunghu di adopanNa di bagasan Kristus Jesus".
Jamita Minggu 22 dung TrinitatisTgl. 19 Oktobert 2008
Nats : Psalmen 51 : 9 - 15
Pdt. Amran Simangunsong, S.Th
Pdt. HKI Resort Ujung Batu Rokan
Mulak ma tu Debata
I. PATUJOLO
Psalmen 51:9-15 ima bagian sian Psalmen panopotion diri, na masuk tu horong panolsolion, ala adong do 2 bagian Psalmen, ima: Psalmen na marisi pujipujian dohot Psalmen na marisi panolsolion. Jala somal do Psalmen dipangke di kebaktian-kebaktian Israel. Godang do halak namananda Psalmen ni Raja David/ Daud ala ringgas do raja i manurathon angka poda namarimpola.
Diaturhon parpsalmen on asa sude jolma manopoti dosana, asa mulak tu Debata. Diboan ibana pengalamanna sandiri ai mansai marungkil do namardosa tu Debata. Songoni do naung hea dialami raja Daud, mardosa ibana ala na mangalangkup. Hansit diae ibana ala diuhum Debata ibana di tingki mangolu dope. Sihol do rohana asa mulak tu Debata jala mardalan di dalan na sintong. Songoni do sihol ni roha parpsalmen dison manogihon sude termasuk hita angka panjaha Psalmen asa mulak tu Debata. Sude angka pardosa ingkon manopoti jala mulak tu Debata asa unang marungkil jala asa malua jala marhasonangan gabe anak parasian ni Debata.
II. HATORANGAN
1. Mananda dosa di dirinta sandiri
"Sude do jolma mardosa, ndang adong na tigor nanggo sada" ninna si Paulus tu halak Rom di bindu 3:10. Sude do marsala: Namora, napogos, nametmet sahat tu namagodang. Alai ndang pola be tarangrangi sude taringot tu dosa. Jumolo ma jo tatandai dosanta sandiri. Ala olo do maol hita mananda dosanta alai mananda dosa ni halak mansai mura. Songon naung dipasingot Jesus asa unang pintor manguhumi, ala olo do jolma i ndang boi mangida hasalaan na satiang di simalolong na sandiri, hape silbaksilbak di simalolong ni dongan mansai mura (Mat. 7:3).
Ditopoti parpsalmen do dirina sandiri gabe "contoh konkrit", ibana do jolma na mardosa. Dihaporseai halak Israel do na ingkon hona uhum jolma i hombar tu naniulana sogot. Adong inganan naung diparade, ima narokko. Alai dihaporseai do muse adong do uhum na tongtong diae jolma di tingki ngoluna dope di portibion. Jala tangkas dihatindangkon parpsalmen na diae ibana do hansit ni ngolu, pola do naung ginopu holiholina (ay 10). Holan sada na hinirim ni ibana, ima asi ni roha ni Debata namanesa dosa dohot angka pangalahona.
Songoni ma nian hita unang holan na boi mangetong dosa ni halak/ donganta. Jumolo ma asa dosanta i tapingkirpingkiri jala ingkon marsoara ma hita mangido hasesaan ni dosa tu Debata asa disesa dosanta. Ganup minggu do nian hita manopoti dosa di kebaktian minggunta, alai molo soadong do hamubaon ndang marlapatan be na kebaktian i di hita. Ndang marlapatan be hita na marsaor tu Debata ganup minggu di gareja. Ende pujipujian dohot tangiang i ndada holan ulaon teknis i, alai i do ulaon na marimpola, haporseaon na ingkon marparbue.
2. Holan Debata do na marhuaso pasaehon dosa
Ndada hea didok parpsalmen on na boi ibana sandiri pasaehon dosana. Dirajumi ibana do "keterbatasanna" na so tolap ibana padaohon dosana sian dirina sandiri. Tung mangido bagas do ibana asa Debata mangurasi ibana sian angka dosana (ay 9, 11). Masihol ibana tu si las ni roha, diboto ibana do molo dung disesa dosana, jaloonna ma hasonangan (ay 10). Jala holan Debata do namarhuaso pasaehon i, holan tu Ibana ma parpsalmen mangido suang songoni nang di hita pe, asa jumolo ma hita manopoti dosanta tu Debata ala holan Ibana na marhuaso pasaehon dosanta.
Theologianta HKI taringot tu hatigoran ima sian theologia Luther, sola gracia. Ndada alani gogonta, malonta manang sian angka pambahenanta, alai dipintori do hita alani asi ni roha. Unang adong na ginjang roha, ala ndang adong na boi tapangasahon,holan Debata do namamintori hata asa sahat tu haluaon.
3. Parbue ni hamuliatehon ala naung disesa dosa: Manogihon halak/ dongan asa mulak tu Debata
Nunga ditopoti parpslamen dosana jala disolsoli do pambahenanna i di jolo ni Debata. Holan i do dalan asa boi sonang marsaor dohot Debata, hasesaan ni dosa i do namamboan jolma asa marhaluaon jala manatap di ngolu na imbaru, gabe tama di jolo ni Debata.
Dihatindanghon parpsalmen jala marjanji do ibana asa gabe parhitean ibana manogihon angka jolma mardalan di dalan na tigor (ay 14-15). On do parbue na, jala na patubuhon holong. Jala hita pe angka naung manjalo hasesaan ni dosa ingkon tubu roha laho mangarahon angka donganta asa unang madabu tu pengalaman na paet, asa rap marlas ni roha hita mandapothon holong ni roha ni Debata.
III. APLIKASI
Topik ni minggu di Almanakta ima taringot tu pertobatan, jala marpardomuan do i tu situasi nuaeng on, ala nunga lam jahat taida pangalaho ni jolma. Godang do taida di TV manang angka media cetak angka kriminalitas. Boi dohononta porlu adong "gerakan pertobatan nasional", jala molo boi "pertobatan global", ai mansai godang do angka hajahaton ni portibion. Naeng ma nian huria tanggap asa mamboan pembinaan asa mangonjar pertobatan.
Songoni muse di bulan parheheon Ama bulan on, naeng ma nian marhite pengalaman parpsalmen on adong koreksi diri tu ama asa mananda dirina. Tongtong ma marparange na denggan jala mangarahon angka dongan ama, ina dohot ianakhon di tongatonga ni keluarga asa tongtong mardalan di dalan na tigor. Hombar tu bulan parheheon ama, naeng ma nian ama di HKI hehe sian ngolu na buruk tu ngolu na imbaru.
Jamita Minggu 23 dung TrinitatisTgl. 26 Oktobert 2008
Nats : Poda 20 : 22 - 27
Pdt. M. Lumban Gaol, S.Th
Parhobas di Kantor Pusat HKI
Mangaramoti Tondi Parbagasan
Patujolo:
"Biar mida Jahowa" ido rimpun ni habisuhon jala rahutrahut ni parsaoran nauli na niihot ni Jahowa dohot jolma naung binahen sian mula ni panompaon i. Halangguson ni jolma laho mameop dohot mangulahon rahutrahut i parohon jea dohot hasusaan tu dirina sandiri songon na dihatindanghon Bibel i namasa dingolu ni jolma parjolo i; si Adam ro diangka pinomparna ditingkion, hita. Laos i do tongtong nanaeng dirataratai buku Poda on: habisuhon (biar mida Jahowa) – parohon hasonangan dohot hadameon alai haotoon (manghalanggushon Jahowa) parohon jea dohot hasusaan.
Patujolo:
"Biar mida Jahowa" ido rimpun ni habisuhon jala rahutrahut ni parsaoran nauli na niihot ni Jahowa dohot jolma naung binahen sian mula ni panompaon i. Halangguson ni jolma laho mameop dohot mangulahon rahutrahut i parohon jea dohot hasusaan tu dirina sandiri songon na dihatindanghon Bibel i namasa dingolu ni jolma parjolo i; si Adam ro diangka pinomparna ditingkion, hita. Laos i do tongtong nanaeng dirataratai buku Poda on: habisuhon (biar mida Jahowa) – parohon hasonangan dohot hadameon alai haotoon (manghalanggushon Jahowa) parohon jea dohot hasusaan.
Hatorangan:
1. "Unang dok: Ingkon marbalos bahenonhu na jat i ". (ay.22)
Ndang ise halak manghalomohon masa hajahaton tu ngoluna. Baliksa tahe angka na denggan ma na ro, atik pe olo jolma mambahen najahat tu donganna. Alai molo sanga masa hajahaton i songgop tu jolma i, asa sombu roha, baloson ma i marhitehite hajahaton. Somal do i dipangalahohon, jala nunga gabe adat ni hajolmaon. Alai, sada sian pangalaho naso dihalomohon Debata diulahon halak Kristen, manang aha pe alasan na (pat. Poda 24:29). Tangkas do taida molo pola mamaloshon na jat maralohon na jat; ndang marnasae be muse ulaon hamusuon di jolma i jala ndang be jumpang dame dohot las ni roha baliksa gabe hagaoron dohot hasusaan. Jotjot do masa di parngoluan siapari (diparkarejoan, nang diparsaoran di huta) pangalaho ni angka dongan na pajuthon roha, ima nasai dirugihon hita, pis roha ni halak marnida hita, sai disuduthon hita, diambati jala dilitohi ulaonta asa roa ulaonta, manang paroaroahon. Tung paet do panghilalaan. Molo parkarejo hita, naolo ima dongan mandabuhon hita. Boha do hita mangadopi i ? baloson do songon nabinahenna i tu hita? Molo ido, namarpangalahohon uhum "mata abul ni mata, ipon abul ni ipon" (2 Musa 21:24-). Dia ma hasil ni i: Gabe "mapitung ma alonta i jala lobangon". Alai unang lupa hita, nang hita pe gabe tong do "mapitung jala lobangon"!.
Mamaloshon na jat alo ni na jat tung so marnasae do. Paloashon sogo ni roha mangarajai diri mambahen ndang bolas sada rohanta mula ulaon. Ai ndang mintop be ari holan laho mamingkiri asa patupaon pamaloson. Molo tung pe sombu roha ala saut mamaloshon na jat i, alai gabe sega ma nasa ulaon. Boi hita mambahen mapitung jala lobangon alonta, alai songon i ma muse masa nang tu hita sandiri.
Sada sian kunci keberhasilan ni si Salomo, ima: ndang mamaloshon hajahaton ni angka musuna hombar tu hajahatonna. Pangalaho nasongon i do mangintopi parmusuon naso olo marnasae. Jala on do napinatogu ni Tuhan Jesus Kristus namanotophon uhum haholongon i, asa unang be hita mamaloshon na jat maralohon na jat, alai mamalos hajahaton i dohot ulaon na denggan (1 Petrus 3:9), "doshon na pagukguk gara tu atas uluna" do i (Poda 25:22, Rom 12: 20; patudos Mateus 5:39).
Di buku 5 Musa 32:35 didok Jahowa: "Ahu do nampuna partubolon dohot pamaloson". Tung tangkas do pandohan i mandok naso jadi jolma i sandiri mamaloshon pangalaho hajahaton na ro tu dirina (pat. 1 Tes. 5:15) ai ndang tagamon loasonNa partigor i humasusa ro di salelenglelengna (Psalm 55:23b). Alani i do dipaingot do angka naporsea asa maniru pangalaho ni Tuhan Jesus Kristus pasahathon ngolu dohot haporsuhonna i tu Debata (1 Petrus 2:23; 4:19) ai pintoran ni Jahowa do angka na pinillitNa, angka na manjou Ibana arian dohot borngin (Lukas 18:7). Baliksa tahe, unang talu angka naporsea i dibahen hajahaton marhite namamaloshon hajahaton alai baloshonon mai marhitehite ulaon nadenggan, ai tusi do hita tarjou (1 Petrus 3:9). Ai molo mamalos do hita, nunga dos hita dohot angka parjahat i. Ai torus do hasogohonon ni portibion angka naporsea i. Na boi manaluhon hatangkangon nasida i ndada mamaloshon; ai molo i do, talu do hita. Alai na boi manaluhon ima: Mamalos dohot ulaon na denggan (Rom 12:18; Mat. 5: 39,44). Alani i, tapasahat ma pamaloson ni najahat i holan tu Debata (Rom 12, 19; Heber 10,30)
2. Unang mardua batu timbangan.
Dipatikhon do tu bangso Israel ingkon mamangke timbangan (3 Musa 19:35-36; Hesekiel 45:10). "Hagigian ni Jahowa do na mardua batu timbangan". Masa do on di dunia ekonomi, di partigatigaan. Molo manuhor dipake timbangan na umbalga, alai molo manggadis dipangke timbangan na ummetmet, asa godang pangomoan. Tung koras do hata ni angka panurirang tu angka partigatiga namamangke timbangan naso sintong (5 Musa 25: 13, Mikha 6: 11, Poda 11:1, 20:23), namangotootoi samasama nasida. Toho do mangomo, alai, tung harugian bolon do panghorhonna. Dia ma i? Mago ma tondina. Ai ndada holan sogo roha ni Debata, alai nunga magigi Debata mida ibana, jala bohi ni Debata ma alona. Panghorhonna muse, lam botoon ni halak ma ibana pangotootoi, gabe ndang porsea be jolma tu ibana. Laos "lari" ma angka langgananna, ndang laku be tigatigana. Ingkon peopon ni partigatiga do: ia sada kunci keberhasilan diulaon ima: kejujuran, haposan, baik di mutu, arga, tarlumobi timbangan. Molo naeng godang pangomoan jala leleng martigatiga, ingkon tingkos ma bahenon mutu, arga, tarlobi timbangan (taida ma naso olo pola be halak manuhor angka mangga di Parapat, manang ombusombus di pasar Siborongborong). Ndang holan dipartigatigaan on masa tahe; nunga jumpang dipangalahohon angka sibahen keadilan (jaksa nang hakim di Pengadilan). Alani hepeng nunga masa dii pengadilan mardua "timbangan", gabe so adil be panimbangionna. Pangalaho nasongon i ma mambahen kacau masyarakat, jala tung dihasogohon Debata do on (songon na masa di zaman ni si Jeremia, Amos dohot Hosea).
Nang di rumahtangga pe, jotjot do masa pangalaho nasongon on, isara mardingkan mambahen uhum dohot holong tu ianakhon; suang songoni manimbangi dohot manguhumi hasalaan nabinahen ni natoras dohot nabinahen ni ianakhon.
Dipatikhon do tu bangso Israel ingkon mamangke timbangan (3 Musa 19:35-36; Hesekiel 45:10). "Hagigian ni Jahowa do na mardua batu timbangan". Masa do on di dunia ekonomi, di partigatigaan. Molo manuhor dipake timbangan na umbalga, alai molo manggadis dipangke timbangan na ummetmet, asa godang pangomoan. Tung koras do hata ni angka panurirang tu angka partigatiga namamangke timbangan naso sintong (5 Musa 25: 13, Mikha 6: 11, Poda 11:1, 20:23), namangotootoi samasama nasida. Toho do mangomo, alai, tung harugian bolon do panghorhonna. Dia ma i? Mago ma tondina. Ai ndada holan sogo roha ni Debata, alai nunga magigi Debata mida ibana, jala bohi ni Debata ma alona. Panghorhonna muse, lam botoon ni halak ma ibana pangotootoi, gabe ndang porsea be jolma tu ibana. Laos "lari" ma angka langgananna, ndang laku be tigatigana. Ingkon peopon ni partigatiga do: ia sada kunci keberhasilan diulaon ima: kejujuran, haposan, baik di mutu, arga, tarlumobi timbangan. Molo naeng godang pangomoan jala leleng martigatiga, ingkon tingkos ma bahenon mutu, arga, tarlobi timbangan (taida ma naso olo pola be halak manuhor angka mangga di Parapat, manang ombusombus di pasar Siborongborong). Ndang holan dipartigatigaan on masa tahe; nunga jumpang dipangalahohon angka sibahen keadilan (jaksa nang hakim di Pengadilan). Alani hepeng nunga masa dii pengadilan mardua "timbangan", gabe so adil be panimbangionna. Pangalaho nasongon i ma mambahen kacau masyarakat, jala tung dihasogohon Debata do on (songon na masa di zaman ni si Jeremia, Amos dohot Hosea).
Nang di rumahtangga pe, jotjot do masa pangalaho nasongon on, isara mardingkan mambahen uhum dohot holong tu ianakhon; suang songoni manimbangi dohot manguhumi hasalaan nabinahen ni natoras dohot nabinahen ni ianakhon.
3. Unang neang roha tu habadiaon ni Debata.
"Bagabaga" dihata Indonesia di dok nazar (Heber Nadar), mangihuthon kamus marlapatan: ‘janji hendak berbuat sesuatu jika maksud atau keinginannya tercapai’. Mangihuthon Bibel, hata nadar on: naeng mambahen sada tindakan (1 Musa 28:20), laho paholanghon diri sian sada tindakan (Psalmen 132:2), asa dapotan asi niroha sian Debata (3 Musa 21:1-3), manang naeng pasahathon diri tu Debata (Psalmen 22:25). Habadiaon ni nadar (bagabaga) on dos do tu "padan" (Ind: sumpah) (5 Musa 23:21-24). Ala ni, unang ma marbagabaga (nadal) so jolo manat manimbangi (poda 20:25), ai molo so pasautonna naung nibagabagahon na i, gabe jorgong do i tu dirina sandiri; dosa naparohon bura (pat. Maleaki 1:14). Toho ma songon pandok ni natuatua: jolo nidilat bibir asa nidok hata. Alani, taingot be ma, atik adong hita sanga marbagabaga tu Tuhan i, hape ndang saut tagarari (Psalm 50:14, 116:14, Mateus 5:33).
4. Palito ni Jahowa do tondi ni jolma, na manulingkit sude bilut ni pusupusu. (ayat 27).
Nabadia do Debata, jala ditompa jolma i tumiru rupaNa laos dilehon do tu jolma tondi (roha, hati nurani). Hati nurani, ido nagabe songon panjaga, pengawas, penyelidik di diri ni jolma i. Didok ayat on: Palito ni Jahowa do tondi ni jolma, na manulingkit sude bilut ni pusupusu.Dibahen Debata do sada palito (tondi, roha parbagasan, panggora niroha) di ganup jolma napabendahon jolma i sian natinompaNa naasing i, jala palito i torus mangolu mangalehon hatiuron di jolma i. Di Padan naimbaru, hata on "conscience (hati nurani) dipanke lobi sian 27 hali, dihata Gorik di dok: suneidesis (di hata Latin, con (bersama) dan scientia (mengetahui)). Palito on ma nasai mangangkupi/ paingothon hita di na mulaulaon hita; sala manang sintong ulaon i.
Las do roha molo diboto halak hita mangulahon na denggan, alai unang nian diboto halak angka hahurangan dohot hasalaanta; tung tatabunihon do i simpan. Ala ndang adong nabuni sian adopan ni Debata; diboto Debata sude dosa na diulahon jolma. Jala ndang tarbahen manggabusi/ paholiphon i sian Debata; ai dibagasan hita sandiri do parhitean ni Debata, ima tondi nadibagasan hita, namanulingkit sude bilut ni pusupusu. Di dok di Rom 8:16, Tondi na dibagasan angka naporsea i, nasian Debata, ido manghatindanghon natutu hita anak ni Debata. Alani tung ringkot do rohahononta tondi nadibagasan hita, asa tongtong dao hita sian pangalaho hajahaton naso hinalomohon ni Debata (pat. Ul. Apostel 24:16).
Panimpuli:
Dr. Hallesby, doktor teologi sian Norwegia mandok di Desertasina "On Conscience": sai dipaingot tondi parbagasan (Hati Nurani) do jolma i dinalaho mangulahon dosa. Adong do pigapiga alusta, parjolo: mangoloi, gabe so saut mangulahon dosa i, gabe aleale nadenggan ni tondi parbagsan ima hita. Paduahon: ndang parduli tu soara ni tondi parbagasan i. gabe so ma tondi parbagasan jala laos modom. Songon namonang ma panghilalaan, ala saut marlomolomo hita mangula ulaonta. Alai dungo do muse tondi parbagasan i, dung taulahon dosa i laos diboan hita tu panguhuman i. Molo pola songon i, ndang tarbahen be maringkat manang manesa hasalaan i.
Ala ni i, tapamanat ma sotung gabe tarpodom tondi parbagasan na dihita ala sai tahalanggushon panggora na. Sai tabahen ma ibana dungo jala polin, marhite mangharinggashon manangihon Hata ni Debata. Amen.