Bahan Jamita Bina Warga Bulan Pebruari 2009

Jamita Minggu 4 Dung Epiphanias

Tgl. 01 Pebruari 2009

Lukas 15 : 11 - 24
Pdt. Eben Hutasoit, S.Th
Pdt HKI Resort Panei Tongah

Hamubaon i dipatudu Parulaon

I. Patujulo.
Turpuk on, somal do digoari anak na mago. Alai, molo taida do impola ni umpama on, atik beha dohononta turpuk on taringot tu Ama na gok holong ni roha, ai di bagasan turpuk on dipabotohon do tu hita taringot na gumodang holong ni Ama i sian dosa ni anak na mago i. Disisi na asing boi do berengonta holan di bagasan Jesus do adong ngolu dohot hatiuron. Umpama on dihatahon Jesus do laho mangalusi ungutungut ni halak Parise dohot siboto surat, ala torop angka sijalobeo dohot sipardosa na pasolhot dirina laho tumangihon hata ni Jesus (pat. Luk: 1-2). Di jolo ni turpuk on, nunga adong dua umpama dipabotohon Jesus, i ma taringot tu birubiru na lilu dohot hupang na so tarida (ay. 4- 10). Alai turpukta sadarion dao tumorang sian turpuk na di jolona. Ai holong ni roha ni Debata na tuk do manaluhon haotoon ni jolma, pangaleaon ni soarasoara na mangunjuni dohot pemberontakan ni roha na tinuntun. Holong ni roha ni Debata na tuk do mangalehon ngolu dohot mamboan jolmai sian haholomon tu hatiuron, asa patar di ida jolma i hagogoon ni Debata.

Dua anak ni sada halak; Sianggian mangido sinamot na tu amana. Dungi dilehon, laho ma ibana tu luat na dao; dipansuasehon ma sinamot i, suda ma suluhutna. Di na ro haleon poor, mahiandu (mambuat gaji) ma ibana, gabe marmahan babi ibana, dungi male, jala disangkapi do manganhon indahan ni babi i. Dung i marhusori ma pingkiran dohot rohana namandok; boasa mansai torop halak digaji amangku, jala lobian indahan, hape ianggo ahu ingkon mate ma dison anturaparon?. Dung adong di ibana panolsolion sisongoni gabe patar jala torang ma diantusi ibana ia amana i parasi dohot gok holong ni roha do. Hehe ma ibana mandapothon amana, huhut manolsoli di pambahenan na. Panolsolion ni anak-na i, dijangkon amana do, marhite na patupa pesta dohot mangalehon ulos na dumenggan, tintin dohot sipatu. Jadi mamungka marlas ni roha ma nasida.

II. Hatorangan ni turpuk:

Ayat 11-16; Somal do masa di halak Jahudi namanadinghon hutana alani hapogoson laho mangalului pandaraman na dumenggan di luat na asing. Ala godangan dope jolma on mangalului ngolungolu sian hangoluan. Mangihuthon adat ni nasida, ndang jadi gadison tano sipatepate (pat.3 Musa 25:23-28). Anak sianggian mangido sinamot sian amana, manang nasadia tohapna. Ra napinangido ni anak sianggian i ma arta na asing (harta bergerak); diboto ibana do i, ai 2/3 arta i di sihahaan do, anggo di ibana holan 1/3 do (pat. 5 Musa 21: 17). Boi do ra taantusi pangidoan anak sianggian i ala poso dope ibana, ra songon na runtus do i; ala ndang dope tardok na sala. Ndang pola dipaboa na so lomo rohana mida amana, manang naung loja ibana paihutihut aturan ni amana i. Jadi ndang apala tangkas atik na adong sian mulana i tahitahi na jahat di hadirion ni ibana. Alai dung dipapungu ibana saluhutna na patut di ibana, laho ma ibana tu luat na dao. Manang boha pe marhite ngolu na morlobilobi, ala naung tarsulandit ibana, na mansegai dirina sandiri, gabe suda ma sude sinamot na binoanna i. Ala nunga suda sude, pola ndang tarbahen ibana manuhor mangan, alani laho ma ibana mangalului ulaonna. Mangihuthon adat Jahudi, sada ulaon na ramun do marmahan babi (pat. 3 Musa 11: 7), alai diolohon ibana do i, nang pe so pola terjamin upa sijaloonna. Alani malena, pola do disangkapi ibana laho manganhon langkat i, indahan ni babi i. Alai ndang adong na mangalehon tu ibana. Alani do didok halak batak: tumajom do butuha, sian raut parsinabung. Alani siubeon sisanjongkal on ingkon ulahonon do sude asa boi marisi sipanganon.

Ayat 17-20 a; Hapaeton ni ngolu na tipa tu anak na mago on ndang mambahen ibana gabe putus asa, alai situasi i do na gabe mangonjar ibana tu hamubaon ni roha. Marhite parungkilon i gabe patar ma di antusi ibana ndada holan ngolungolu na porlu di portibion alai dohot do hangoluan sian Debata. Tarida do i sian pandohan: "Dungi di pasuang ma rohana tu bagasan". Diingot ibana ma holong ni roha ni amana dohot haburjuon di bagas ni amana i. Torop halak digaji amana, jala lobian sipanganon; marhite angka i, lam ditanda ibana ma dirina, gabe disolsoli dirina jala muba ma rohana. Ndang sae holan disolsoli dirina, alai hehe ma ibana mandapothon amana. Ala dibagasan hatiuron na sian Debata, gabe boi ibana malua sian haholomon alana patar ibana marnida sondang hangoluan i. Nunga diboto ibana, ia ngoluna nunga maralo tu lomo ni roha ni Debata. Jala diboto ibana do, nunga disegai ibana pardomuanna dohot amana, pola ingkon mago kedudukanna songon sada anak. Alani do dipangido ibana tu amana: ndang tama be ahu goaron anakmu, bahen ma ahu songon anak gajianmu sada. Pandohanna i manggombarhon na tumoru dope sian sahalak naposo na masuk tu keluarga ni tuanna. Jadi, hehe ibana manopot amana. Na adong dibagasan rohana, gabe sada tindakan nyata. Boi do ingotonta nang di hata Heber "Syub", namarlapatan marhusor jala mulak, mulak tu Tuhan i, i ma hamubaon na singkop, namanghamham hamubaon ni ngolu dohot hamubaon ni roha.

Ayat 20 b-24; Diparjumpanganna dohot amana, tung dao do sia naniarop ni rohana. Jempek do pingkiranna jala metmet do dihirim ibana. Hape anggo amana i, dao dope nunga ditatap ibana. Ala ni asi ni roha ni amana, hatop ma di tomu, dihaol jala diumma songon tanda holong ni rohana ala naung mulak anakna i, andorang so didok anakna i hata na naeng sidohononna (pat. 2 Samuel 14: 33). Pandohan di ayat 21 dos do i tu ayat 18-19. Disolsoli anak i dosana tu amana, na so tama be ibana goaron anakna, alai ndang dioloi amana i pangidoan ni anakna i. Marhite hata ni amana tu angka naposona naeng do jangkonon ni amana i ibana songon anakna hian, gariada tahe asa dibagasan las ni roha. Dilehon ulos na dumenggan (Tanda ni hasangapon), tintin tu tanganna (songon tanda kedudukan na timbo dohot huaso) kedudukan songon anak (pat. 1 Musa 41:42), dohot sipatu tu patna, na manggombarhon anak mata (orang merdeka), ndang hatoban na somal mardalan so marsipatu. Asing sian i diboan do anak ni lombu na pinamokmok, asa dipotong, mangan, marlas ni roha. Parmanganon on, paboahon naung mulak denggan pardomuan ni ama tu anakna. Ai anak na manggotaphon pardomuan tu amana, boi dohonon naung mate do i. Laos songoni do, naung mago gabe jumpang muse. Lapatanna, di pahehe tu sada ngolu na imbaru (pat. Rom 6: 1-4), jala papatarhon hatiuron di ngoluna asa boi ibana marnida hatiuron na sian Debata.

III. Sipahusorhusoron

1. Turpuk taringot tu umpama anak na mago on, boi do songon sada sorminan na tatiop di bagasan ngolunta. Atik beha do hita sandiri na gabe "anak na mago" i, na manuntun lomonta, gabe lao hita tu luat na dao, lilu jala mangulahon ulaon na dao sian hasintongan i. Alai marhite na tatanda haliluonta dohot holong ni Debata na mansai balga gabe mulak hita huhut marhatopothon dao umbalga do asi ni roha ni Debata sian angka dosa na taulahon, gabe dijangkon hita sumuang gabe anak na hinaholongan ni Debata.

2. Di pargoluan siapari, sai ummura do jolma mambahen pemutusan hubungan sian na padimundimun hasadaon. Taida do i nang diturpuk on, ai ndang pola ganjang prosesna, dipangido anak sianggian i sinamot na tu ibana, ala holan kepentingan pribadina do dipatujolo ibana, asa boi dipaolooloi hisapna. Jotjot do tabege manang taboto, laho manggohi hisap ni ni sasahalak, ndang alang rohana mamunu jolma na asing. Suang songoni, di angka boruboru naposo (ABG), sopola marpingkir ganjang, ndang alang rohana "manggadis dirina ", nang nunga maralo tu hata ni Debata asal ma hatop ibana dapotan laho manggohi hagiotna. Alani do jotjot dibagasan ngolu ni jolma, holan mangalului ngolungolu lupa mangalului hanggoluan. Ndang diboto hatiuron dohot hahapatar ni ngolu i holan sian Debata do.

3. Panandaon diri, mangonjar hita laho tu hamubon ni roha. Tontu sahali panandon diri, mangonjar hita laho tu hamubon, ndang ro boti; alai marhite na mamereng humaliang , mangantusi na masa, di tingki na salpu dohot di tingki nuaeng. Lapatanna: Marhitehite hatiuron na ro sian Jesus gabe boi hita marnida hatiuron i dibagasan ngolunta on. Pangalaosion, hapogoson (hape namora do amana), haraparon (hape lobian indahan do di bagas ni amana) gabe ditanda ma dirina. Sude on ndang sae holan tinggal di bagasan roha, alai hehe do ibana mandapothon amana, jala pajumpang ibana, marhite na dihaol jala diumma amana i ibana, i ma hamubaon na marpangulaon. Ndang holan buni di bagasan roha, alai dipapatar ibana do i marhitehite na pajumpang ibana dohot amana. Di ngolunta pe, naeng ma patar tarida hamubaon ni roha na tangkas, dipambahenanta, marhite hata dohot pangalaho. Ndang lomo roha ni Tuhan Jahowa mida hamatean ni halak parjahat i, so ingkon mida hamumulak ni parjahat i tumadingkon dalanna, asa mangolu ibana (Hesekiel 33: 11).
Amen.

Jamita Minggu Septuagesima

Tgl. 08 Pebruari 2009

Jeremia 29 : 22 - 23
Pdt. Suparman Simamora, S.Th
Pdt. HKI Resort Labuhan Batu II

Di Debata ma Hasangapon

I. Patujolo

Nungga tatanda anggo panurirang Jeremia (pat Jer 1:1 ff). Ibana sahalak panuriranng na so olo kompromi maradophon angka pangalaho namaralo tu lomo roha ni Debata. Jala nasai girgir mansoarahon hamubaon ni roha dibangso ni Debata dohot asa marpangunsadean jala marhaporusan tu Debata. Hadirion ni si Jeremia on ndang boi ditawar-tawar. Mansai togu jala hot do ibana disi, maradu gabe sisogo do ibana maradophon dongannna sabangso. Ndada holan i, maradu dohot do nang hosana dipaburuburu angka alona.

Turpukta on ima namasa di tingki ni Raja Joiakim. Dimasa ni si Joiakim on adong pigapiga namansai riongkot nagabe titik berat kritikan ni si Jeremia, jala ringkot dalan mangantusi turpuk ta:

1. Perasaan aman na palsu. Adong anggapan tingkini, bagas joro ni Debata dohot angka pelean situtungon naung pinelehon i, boe gabe benteng pertahanan sian angka musu. On ma dok ni raja Joiakim i tingki i, jala mandok tu bangso i asa dihaporsea i (Jer. 7:4). Hape sementara pangalaho ni bangso i ndang na ture diadopan ni Debata. Hata ni Debata marhite si Jeremia mandok molo so dipauba nasida rohana pamasaon ni Debata ma haurahon di bangsona ( 7:1-8:7; 26:1-24).

2. Raja Joiakim manimbil sian amana raja Josia. Balik do pangalaho ni si Joiakim sian amana raja Josia. Gabe diula do naso denggan ima: ndang dipatigor uhum, mangarupa halak na buro, natading di lampin, boru-boru na mabalu, jala mangusehon mudar na so marpipot dohot mangihuthon debata sileban (7:5-10,30-31).

3. Taringot tu kebijaksanaan luar negeri. Raja Joiakim mendukung koalisi dohot halak Misir laho mangalo halak Babel, ianggo si Jeremia mandok ingkon tunduk ma tu si Nebukadnesar. Tadok ma i sebagai pembangkangan terhadap Allah (pat 9:24-25).

II Hatorangan ni turpuk

1. Songonon do hata ni Jahowa:"Sai unang ma ditengahon nabisuk habisuhonna...." Hata ditengahon, dihata Indonesia di dok "bermegah". Manang yithallel (hallel : Heber) ; memuji, membanggakan, memasyurkan, bermegah. Jadi mansai tangkas do nanaeng didok dison ima; naso jadi habisuhon ni jolma i pangasahonon, manang marpos ni roha tu si. Songoni nang angka nagogo dihagogoonna, nang na mora pe dihamaoraonna. Manjadihon hamoraon, hagogoon, dohot habisuhonna diginjang ni Debata, gabe ndang diakui be habisuhon ni Debata.

2. Alai manang ise nanaeng mamuji dirina, maka kebanggaan yang utama dalam dirinya ima ala ditanda do Debata Jahowa, parasi roha namanghajongjonghon uhum dohot hatigoran di tano on. Ndada jolma na sangap, na bisuk, na gogo, dohot na mamora na di portibion. Ai saguru di Debata do saluhut na portibion ro di isina pe. LomoNa do naingkon saut di partingkian on. Si Pulus mandok :"Na naeng mamuj i dirina, mangasahon Tuhan i ma ibana mamuj i! (Barangsiapa yang bermegah, hendaklah ia bermegah di dalam Tuhan." :1 Kor 1:31; 2 Kor 10:17).

III. Sipahusorhusoron

Disaluhut na on, ndang adong dapot i di Raja Jojakim. Baliksa gogo dohot pamingkirionna do dipangasahon laho mangalo musu manang laho palua ibana sian angka hamaolonna. Ndang Debata dioloi ibana songon nanidok ni panurirang Jeremia. Alai dipaginjang ibana do rohana, manundalhon Debata Jahowa jala manangihon tagonan angka panurirang gapgap namanuriranghon hatana sian pingkiranna sandiri, ndada sian Debata Jahowa. Panurirang Jeremia mansai marsihohot do haporseaonna holan tu Jahowa Debata. Ido umbahen pos rohana mandok holan huaso ni Debata do namanontuhon saluhut namasa ditanoon. Selain Ibana namanontuhon, holan Jahowa do tutu na berhak mengubah sangkap-Na (Jer 18:7-10). Dibahen i ringkot porsea situtu di Tuhan i, asa ibana mangaturhon saluhutna. Jala angkup ni i, ima paubahon roha. Ai hagigion do di Jahowa angka namanghaginjanghon dirina, ai tarrajum ma nasida namanundalhon Debata. Amen.

Jamita Minggu Sexagesima

Tgl. 15 Pebruari 2009

Lukas 8 : 9 - 15
Pdt.M.P. Siregar, M.Th
Pdt. HKI Resort Huta Bayu

Pauba Hamu ma Rohamunma

I. Patujolo
Andorang di portibi on dope Tuhan Jesus, di angka poda pangajarionNa/jamitaNa, jotjot do dipangke Ibana umpama/tudosan na marpardomuan tu angka na masa di parngoluan ni jolma si ganup ari (vide: Yoh. 10:11).
Tardok hita do on, sada metode ni Tuhan Jesus do, asa marhite i :

1. Ummura ma jolma na umbegesa laho mangantusi hataNa i.
2. Umbagas dipingkiri lapatanna jala pintor peop dibagasan rohana hata i.
3. Mura situtu pintor antusanna angka hata pandohan ni Tuhan i.
4. Ndang na hulinghuling/Marhulinghulingan hataNa i, manang mangalojai jolma i mambahen bingung jumolo laho mangalapatisa, alai mura do terjemahonon tu ngolu niba.
5. Lumeleng ma ingoton, lumobi panghorhon ni hata i, jala hona tu roha.
6. Tiur jala tung tulus do roha ni jolma i laho mangulahon/patupahonsa.
7. Dohot lan na asing dope na mardomu tusi.

Songon on do dipaboa Tuhan Jesus dibagasan umpama on : Ia "boni" i, hata ni Debata do i (ayat 11), jala Debata do Panabur i ! jala songon on do na pinaboa ni Tuhan Jesus disi, ima angka rumang ni panjaloon ni hita jolma (tano=roha) na gabe inganan ni hatubuan ni boni i, na sinaburhon ni Panabur i hombar tu tingki dohot ingananna.

Taringot tusi, tontu asing be do taida angka partingkian dohot ingananna dipatupa Debata, na martudu-tudu laho manjou jolma i, asa masuk tu bagasan harajaonNa. Adong do idaonta songon pagalaho ni boni i, tumibu ibana tubu, adong do na umpudi Ibana tubu, alai laos adong do naso tubu. Asa tung lam tumangkas, boi ma taida rumang ni angka i, marhite-hite na pinatorang dibagasan turpuk on.

II. Hatorangan
Di hata barita/poda pangajarion ni Tuhan Jesus di umpama on, adong do 4 bagian inganan na laho hatubuan ni "boni" na sinaburhonNa i, ima:1. Di dalan; 2. Di batu 3. Di Parsihupian, 4. Di Tano na denggan.

1. Di Dalan
Didok : Anggo boni na di dalan i, ima angka tudosan ni jolma angka na umbegesa, dungi........d.u,. panghorhonna, gabe tardege angka pardalan ma boni i gabe tarpisat manang mate, manang diparguti angka pidong na martongatonga langit gabe soada.
Rajumanta do pangalaho on, marhite pangantusion na mandok: dibege na umbegesa do hata i, alai ndang dipinggol, manang ditangihon do nian hata i, alai ndang dung anggo tung dibege, ai masuk sian siamunna do dipinggol ibana hata i, alai haruar sian siamun, manang dietong rohana do na songon pamolus ni alogo sambing do hata ni Tuhan i di ibana, manang ndang adong kepedulianna jala tertutup do rohana tu angka na denggan i, ai dipasombu ibana dibuat sibolis i hata i sian bagasan rohana, gabe mago ma dohot haporseaonna unang dapotan haluaon na sian Tuhan i. Hinorhon ni i, laos mago ma dohot tondina tu hamatean si saleleng ni lelengna.

2. Di Batu
Angka boni na madabu tu batu, sepintas idaonta hira na tubu do ibana satongkin, dungi rahar ma, ala soada aek. On ma hataridaan ni pangalaho ni jolma na holan sambolus sambing idaon songon na las rohana manjangkon hata i, alai ndang tubu anggo uratna, ai holan sangombas manang sangkidop mata sambing do halak on porsea , alai ndang adong hatubuan ni uratna, manang ndang terkesan do rohana panghorhon ni hata i.
Di parngoluon si ganup ari pe molo adong na mandok tu sadasada halak "roha batu tu donganna, ima paboa naso adong tubu parsaoran di halak si songon i. Lapatanna: ndang ringkot adong parsaoran di ibana tu donganna , lumobi ma tu Debata ! Ai lam boha ma tardok hita mandok: denggan do parsaoran ni halak si songon on tu Debata, ai tu donganna jolma ibana ndang ungkap rohana laho pasaorhon dirina tu donganna jolma, manang donganna pe ndang berterima tu bagasan rohana. Tung holan "sitau"/"siripe" ibana nian olo do rela angka donganna laho manganju hahuranganna i. Alai songon i pe tung so boi tarungkit manang aha sian ibana, ujungna sai dipasiding halak ma ibana, gabe tarpunjung songon tandiang naso hapuloan, ai jolma pe ndang adong mardonganhon Ibana, nang tung Debata sandiri pe.

3. Di Parsihupian
Di inganan on, tubu do nian boni i, lapatanna: dibege ibana do hata i, alai alani pandosak ni donganna na humaliangsa na tubu disi, gabe haporsuhon ma ibana
hinorhon ni panosak ni angka donganna, lapatanna: ala rap tubu do dohot donganna na sai papisat-pisat ibana di inganan i, baik di sipanganonna, gabe sai terancam ma pertumbuhanna, hinorhon ni angka hamaolon na niadopanna, gabe maol nama ibana magodang jala ndang matoras be parbuena manang lambangon nama.
Nang pe adong nian sipanganon diparade tano hatubuanna i, alai ala so dipardagingkon ibana do sipanganon i, gabe dionsop na niallang nai do ibana umbahen so olo be ibana matoras rap dohot parbuena, manang holan mangoloi hisaphisap ni dagingna sandiri ibana, gabe matua marpengpeng ndang adong hataridaan ni ngoluna manang aha pe hasilna.

4. Di Tano na denggan
Boni na tubu di tano na denggan, denggan do partubuna sian mulana dope, ima angka jolma na mameop hata ni Debata na binegena, dibagasan roha na bonar jala denggan, gabe saut marparbue dibagasan habengeton. Lapatanna: ibana marlas ni roha menerima/manjalo apa adanyan silehonlehon ni Debata na tu ibana mardongan sabam ni roha, huhut diboto ibana mandok " mauliate" tu Debata silehon ngolu dohot na manarihon ngoluna, huhut ditanda, dihaporseai, dipuji jala dipasangap ibana do Debata na sumarihon angka na ringkot di ngoluna. Di dok do: ia dung tubu boni i (ibana), diparbuaehon ma saratus lompit (ayat 8a), ima hataridaan ni boni na denggan i na marparbuehon godang, ai dijalo ibana do pasupasu ni Debata. Amen

Catatan kaki pendukung turpuk on :
1. vide Ulaon ni Apostel 16: 14
2. vide Heber 10:36.

Jamita Minggu Estomihi

Tgl. 22 Pebruari 2009

Markus 8 : 31 - 38
Pdt.Toljun Lumbantobing, S.Th
Pdt. HKI ResortSibolga

I. Patujolo:
Tung mansai tangkas do dipatorang Jesus Kristus, marhite "pangajarionNa" tu angka siseanNa nang tu saluhut halak Kristen, taringot tu "HadirionNa", ise do Jesus Kristus na mamboan haluaon i tu ganup jolma, jala songon dia do sikap, hadirion - keberadaan- ni halak Kristen - si ihuthon Ibana" di ngolu siapari di portibion ?.

II. Hatorangan

Tutu di patolhas Tuhan Jesus sandiri do : "angka konsekwensi - akibat dohot angka siadopan" ni angka na satia jala na olo mangihuthon Ibana, na gabe siseanNa; Diperhadaphon do tu dua kondisi, jala berada di persimpangan jalan do jolmai" mangulahon lomoni roha ni Jesus manang mangulahon lomo ni roha ni jolma nang portibion sandiri ?. "Jala ndang gabe tarbahen sisean ni Jesus molo so di tadingkon nasa na di ibana". (Jaha Luk 14: 33). On ma konsekwensi ni halak nanaeng mangihuthon Jesus Kristus, jala ingkon tangkas do dipergumulhon, molo naeng mangihuthon Jesus Kristus di bagasan hasintongan.

Tung pe songon i boratna nanaeng sitaonon ni halak si ihuthon Jesus, di lehon Jesus do nang bagabaga hasonangan, laba ni angka na mangihuthon Jesus ima "hatuaon" molo tung ditaon angka na porsuk alani na mangihuthon Ibana.( Mat 5: 11).

Dipatuduhon Jesus do jumolo "hadirionNa" na ingkon manaon sitaonon, haporsuhon, parungkilon sahat tu "hamatean" marhitehite na di parsilangkon, di haroroNa tu portibion ala ni dosa dohot hajahaton ni jolma, dohot tujuan akhir ima "mamboan, patupahon dohot mangalehon " haluaon dohot hangoluan ni jolma.

Tung tangkas do di pabotohon Jesus tu angka si ihuthothon Ibana, angka ise do nanaeng mambolongkon Ibana, marhitehite na manangkup, manjehehon, na mangambat haroroNa, na naeng manundati sangkapNa marhite na mamunu Ibana, ima angka halak na so olo manjangkon Jesus. Ima horong na di pasangap di bangso Jahudi ; tokoh masyarakat, tokoh agama dohot tokoh uhum/undang-undang, aturan, - na sangat berpengaruh "huasona" ujui di na manontuhon pardalanan ni ngolu ni halak Jahudi (ima angka Sintua, Malim dohot Siboto Surat na mengkleim dirina na gabe penentu di ngolu ni jolma marhite ajaran "parugamoon" na pabotohonn angka ragam ni haporseaon dohot ulaon na mardomu tu lomo ni roha ni Debata Jahowa) alai marguru tu lomo ni roha dohot aturan na pinatupa nasida, jala otomatis ma manolak - ndang olo manjalo - ajaran ni Jesus Kristus, sekaligus membenci jala marsangkap ingkon mamunu Jesus asa unang adong na gabe mangihuthon.

Si Petrus na gabe sisean ni Jesus - "si ihuthon Jesus"?, alai tongtong dope mamangke hadirion hajolmaon - pola pikir kasat mata manusia - na didondoni biar ni roha maradophon huaso ni angka malim, sintua dohot siboto surat, na memang sangat bringas jala ndang ber perikemanusiaan molo saut di patupa nasida tu Jesus songon na dihatahon Jesus sandiri, patubu biar na mansai balga situtu di roha dohot pingkiran ni si Petrus. Gabe ndang tarjalosa "pangajarion dohot panindangion ni Jesus na sintong i (ayat 31 a), na ingkon manaon sitaonon jala pusaonna" (ayat 31b). Ala biar ni si Petrus, jala holan mamereng sitaonon ni Jesus i ibana, gabe ndang marnida mata ni haporseaonna di hata ni Jesus na mandok na "mulak mangolu di ari patoluhon "(ayat 31 c).

Laos ima mangonjar roha dohot pingkiran ni si Petrus laho mangarahon Jesus jala di solsoli Ibana (ayat 32), na patuduhon na so lomo roha ni si Petrus masa saluhutnai tu Jesus, ai ndang tarjalo ibana konsekwensi, sitaonon naingkon masa tu Jesus i, jala di hirim ibana unang ma saut i nian. Jala molo boi padaoon ni Jesus sian diriNa na didokNai: "Asi ma roha ni Debata di Ho, unang ma songgop i tu Ho" ( Past Mat 16:22). Pangidoan ni si Petrus on manggombarhon hadirion ni hajolmaon, na gale na so manahan di angka haporsuhon, lumobi alani hasintongan?. So adong na so patut dibahen Jesus, so adong na sala jala sude na niulaNa manghorhon haluaon dohot hangoluan do, boasa ingkon manaon si taonon jala ingkon mate? Da halak na jahat dohot na so mangulahon uhum do nian na patut manaon angka parungkilon dohot haporsuhon jala ingkon mate ?. Alai boasa tung ingkon Jesus, na so hea mangulahon dosa dohot hajahaton, ingkon manaon na porsuk jala ingkon dibunu angka sintua, malim dohot siboto surat ?. Molo tung adong pe na marsangkap na roa tu Jesus naeng mamunu Ibana, da boi do bahenon ni Jesus "huasoNa" mangalo sude angka musuNa ? Jala marhite "huaso ni Jesus, da boi do nian patupaon ni Jesus "haluaon ni jolma so pola manaon sitaonon, jala sahat tu tangan ni "pamunu"?

Panghirimon dohot pangidoan na sinangkapn ni si Petrus; ndang holan taringot tu diri ni Jesus asa unang manaon sitaonon maradophon nanaeng patupaon ni angka sintua, malim dohot siboto surat, alai dohot do tu dirina , nanaeng malua, jala sonang huhut boi dapotan hangoluan sian na mangihuthon Jesus so pola manaon sitaonon nian. Ai molo Jesus sandiri ingkon dibunu, ra dohot ma ibana ingkon manaon songon na tinaon ni Jesus, -hona bunu-, jala molo ndang ditaon Jesus angka parungkiloni, sahat tu hamatean,- ba ibana pe ndang pola manaon sitaonon be.

Tangkas do diboto Jesus aha na dibagasan roha ni si Petrus, ndang adong na buni di adopan ni Jesus, tung pe di tabunihon si Petrus di dirina angka sangkap hajolmaonna dohot sangkap ni sibolis na dibagasan rohana, tung maralo do di roha ni Debata, jala tung so lomo rohaNa molo sai digohi lomo ni roha ni portibion dohot dipengaruhi gogo nang sangkap ni sibolis roha ni si Petrus. Ido umbahen na di pinsang Jesus si Petrus mandok: " laho ma ne ho bolis, ai holan na di jolma do diparrohahon ho" ( ayat 33).

Paminsangion ni Jesus tu si Petrus, ndang na gabe palaohon boti, ndang laho membangun batas tembok pemisah, jala gabe mambahen putus hubungan. Jala ndang dipasombu Jesus mago boti haporseaon, roha dohot pingkiran ni si Petrus, alai asa paingothon do tu perobahan, asa unang olo di gohi huaso ni sibolis na sai marusaha laho mangambat sangkap haroro ni Jesus laho paluahon jolma. Jala asa nang sude na mangihuthon Ibana ingkon tangkas pauba roha laho manjanghon Jesus di sude angka konsekwensi, na ingkon mangulahon lomo ni roha ni Debata, ndang lomo ni rohaNa jolma na di pengaruhi angka sangkap ni si bolis.

III. Panimpuli

Laho mangulahon lomo ni roha ni Debata, na gabe sada bukti na si ihuthon Jesus, "ingkon do mampu mansoadahon dirina lao pasauthon na sinangkapan ni Debata. Ndang gabe luluan haluaon ni diri niba laho mangihuthon Jesus, tu lomo ni roha ni hajolmaon, jala ndang porlu marusaha laho paluahon hosa niba sandiri dohot dalan padaohon diri sian angka haporsuhon dohot sitaonon. Ingkon tuhukon do silang na tu iba, ingkon mampu laho mangadopi angka parungkilon dohot sitaonon justru manghatindangkon hasintongan ni Jesus Kristus. Ingkon dohot do sude halak Kristen manaon songon sitaonon ni Jesus asa gabe dohot nampuna haluaon na binoan ni Jesus. Molo dongan ni Jesus hita di sitaonon, donganNa do hita songot di hasangapon, jala molo partohap do di sitaonon, gabe partohap do di apulapul (Jaha Roma 8:17+ 2 Korint 1:7). Jala ala ni i ma ingkon adong di halak Kristen: "pamingkirion na sintong", na so boi mangasahon gogo laho "manahan" hosa tu hangoluan, manang ala ni aha pe, tung adong pe arta nang hamoraon. Ai ndang gabe malua tondi ni jolma di luar ni Jesus Kristus, ai ndang adong na boi tarpangasahon jolma laho tobus ni hosanna ( ayat 36-37).

Holan Jesus do na marhuaso mangatur ngolunta, ai Ibana do nampuna hita. Ndang boi manang isepe rnanontuhon ngoluna tu lomo ni rohana sambing. Mangihuthon Jesus Kristus ingkon do mamparbuehon "panindangion" di Jesus Kristus i, jala unang manimbil, mandele jala maila ala ni angka sitaonon dohot haporsuhon. Pos ni roha dohot togu ni haporseaon ima ojahan ni "panindangion" di Jesus Kristus marhite tondi porbadia, gabe margogo jala marhapistaran laho mangulahon lomo ni rohani Jesus Kristus, "ai dilehon Debata do tondi hagogoon, tondi haholongon dohot tondi hapistaron di pangarajaion diri" asa unang maila laho manghatindangkon Jesus di ngolu siapari (2. Tim. 1:7).

Ala ni i, manang songon diape situasi na ni adopan ni halak Kristen na gabe "si ihuthon Kristus", ingkon do tangkas manghatindangkon Jesus huhut mamaritahon "haluaon" na binoanNai, dohot tujuan asa saluhut halak dapotan haluaon, ai ido sangkap ni Debata na marsuru Jesus Kristus tu portibion, paluahon saluhut pardosa. Amen.