Bahan Jamita Bina Warga Bulan April 2009

Jamita Minggu Palmarum
Tgl. 05 April 2009

Nats : Psalmen 99 : 1 - 7
Pdt. Janto Sihombing.. S.Th
Pdt. HKI Resort Jakarta IV

Pujima JahowaNasongkal Jala Nabadia

I. Patujolo.

Buku Psalmen sebagai buku na puitis, tung godang situtu do marisihon angka hasintongan teologis tarlumobima i na manaringoti "hasintongan taringot tu Debata". Sada hal na tung ni ondolhon ni Parpsalmen ima paboa na Tuhan Jahowa do Raja. Raja na gumonggom Israel, Raja ni sandok bangso. Isarani: Psalmen 9:8 ; 47:9 ;65:5 ; 93; 96 ; 97 ; 98 ; 99,103:19 ; 114:2 ; 132 ; 145:13, dohot angka lan na asing.

Psalmen 99 na gabe jamitanta onpe tong do patuduhon dohot manghatindanghon huaso dohot hagogoon ni Tuhan Jahowa sebagai Raja. Ibana do Raja di saluhut bangso na patupahon hasintongan dohot hatigoran na manggomgomi di bagasan hasongkalon dohot habadiaon. Parpsalmen manjou huhut mangarahon asa saluhut jolma mamuji dohot marhatopothon, Jahowa do Raja na manggomgomi saluhut.

Tabereng ma jo parsagi ni Psalmen 99:1 - 9 on atik pe anggo jamita tingkion holan sahat tu ayat 7 do.

1. Ay.1-2,4,6b,7a,8b : Parpsalmen manghajonjonghon dohot manggombarhon Jahowa Tuhan sebagai Raja
2. Ay. 3,5,9 : Angka hara-hara manang jou-jou ni Parpsalmen tu saluhut bangso naung marnida hasongkalon, hatomanon dohot hasangapon ni Debata
3. Ay. 6b,7b : si Musa, si Harun dohot si Samuel di goar jala dibahen parpsalmen do na gabe tau tiruan ni ngolu. Nasida na manghangoluhon hagogoon dohot huaso ni Debata

II. Hatorangan

1. Jahowa do Raja na marhuaso jala na tongam na gumomgom saluhut bangso

Dihatindanghon parpsalmen on do paboa na Jahowa do Raja na marhuaso jala na gumomgom nasa bangso. PanggomgomionNai i ma na mangatur sude bangso marhite uhum dohot hatigoran. Di bagasan hasongkalon, habadiaon dohot hatigoran do Ibana manggomgomi, mangarajai dohot manguhum. Tarida do i marhite pandohan ni Parpsalmen i, di Sion jala marhabangsa kerubim do Tuhan i mangarajai. Inganan hajongjongan ni Nabadia do Sion i, jala kerubim patuduhon na sun badia do i di bagas joro i (bnd. I Raja 6:23-28; 8:6-8) sada credo laos pengakuan do i di bangso Israel. Jadi, ala Jahowa do Raja, jala di bagasan hasongkalon dohot habadiaon do Ibana manggomgomi patut ma ingkon angka hitir na ro tumopot Ibana jala humuntal nang tano on ala ni sun hinagogo do Tuhan i jala gok huasoNa do liat tano on.

Jadi, tung andul marasing situtu do panggomgomion ni Tuhan i sian angka panggomgomi na di portibion. Atikpe angka bangso dohot ugamo ni portibion marhatopothon angka debatana sebagai raja, alai sude i ndang tarpatudos tu hadebataon ni Debata Jahowa sebagai Tuhan dohot Raja. Ibana doTuhan ni saluhut, Debata ni nasa debata jala Raja di atas ni saluhut raja. Sebagai Raja na sun hinagogo, na sangap jala na tongam ndang dipangke harajaonNai laho menindas manang pamatehon alai songon na nidokna di ay.4, hagogoonNai dipangke laho manghaholongi, pahot hasintongan dohot pamasa uhum hatigoran do songon na tu Jakob/Israel.

2. Raja na Tongam jala na timbul do Jahowa

Hatongamon dohot hatimbulon ni Jahowa di harajaonNai diparhatopot parpsalmen. Jala ganup do hita diarahon asa dohot mamuji huhut ro marsomba tu Ibana marsinggang tu joloNa. Asa ngolu ni angka na porsea ingkon do mamuji jala pasangaphon Jahowa. Ingkon pujion jala patimbulon do Jahowa Tuhan i di sude pardalanan ni ngolu.

Hasongkalon, Habadiaon, Hatongamon dohot hatigoran ni Tuhan i, na pajongjong uhum i do dihatindanghon parpsalmen i, laos i do na mangonjar ibana laho mamuji Tuhan i huhut marhatopothon paboa Ibana ma Tuhan jala Raja. Pengakuan dihadirion ni Debata sisongoni ingkon do adong mian jala parhatopoton ni ganup na ro mamuji dohot marsomba tu Jahowa. Ai di angka namarhatopothon dohot na mangarajumi hadirion ni Debata sisongoni di bagasan rohana i do na boi jala na olo marunduk ni roha mandapothon Tuhan i. Ganup halak na mangarajumi hadirion ni Tuhan Jahowa Nabadia, Nasongkal, Natongam, tontu ro ma ibana mamuji jala marsomba huhut marsinggang dohot angka hitir. Artina dohot rasa hormat huhut so mangasahon hatalupon dohot hagogoon ni diri. Ai tandaonna ma dirina jolma pardosa jala parhatopotonna holan asi dohot holong ni Tuhan i do umbaen na tarbahen ro tu jolaNa.
3. Dialusi Jahowa do joujou ni angka na mian di bagasan pangaradotion dohot panindangion ni HataNa.

Si Musa, si Aron dohot si Samuel gabe tiruan dibaen parpsalmen gabe tau tiruan di namamuji dohot marsomba tu Tuhan i. Dihangoluhon jala dipatuduhon nasida do ngolu nasai jou-jou tu Tuhani huhut maniop angka patik ni Tuhan i. Terbukti do nasida nasai manarihon, mangondihon, manangianghon bangso Israel songon bangso naginomgomanNa jala hata ni Debata i tontong dihangoluhon nasida. Nasida nasai mansoarahon goar ni Tuhan i jala na sai mangondihon bangsoi di ngolu siganup ari. Didapothon Jahowa do nasida dibagasan ombun hamuliaon i jala dialusi do jou-jou nasida ala di bagasan pangaradotion dohot panindangion tontong nasida.

Nunga dipatupa Jahowa uhum hatigoran dohot hasintongan i dingolu ni nasida jala fakta sejarah do i dingolu ni Israel i ma si Musa, Harun dohot si Samuel (pat. 2 Musa 32:11-14, 31-34 I Samuel 7:7-11). Diparhatopot jala diboto halak Israel do na ditangihon jala dialusi Tuhan i do angka tangiang ni nasida jala sai marpamuati rohaNa ala ni angka pangaradotion nasida dihataNa.

Jadi atikpe songon i hadirion ni Tuhan i, nasongkal,nabadia, tongam jala Raja Ibana alai ndang mambahen holang jala dao, alai jonok do Ibana di angka namanjou jala na ro mandapothon Ibana asalma di bagasan roha namarsinggang dohot na sai mian di bagasan HataNa. Antong, tapuji jala tasomba ma Tuhan i di bagasan tondi dohot hasintongan. Dungi panghilalahononta ma hajonokon dohot tangiang na maralus sian Ibana.

III. Siauhononhon

1. Dijou jala diarahon jamitaon do hita ganup asa tahangoluhon jala tapapatar habadiaon dohot hamuliaon ni Debata di ngolu parhuriaonta songoni nang di ngolu si ganup ari. Jahowa Debata Nabadia, na songkal jala na tongam do natasomba jala natapuji di tongatonga ni huriaNa alani unduk ma rohanta ro marsinggang tu joloNa, unang ma pangasahon hadirionmu alai tung pangasahon ma ala jou-jou Na sambing do umbahen na talup hita ro mandapotton Ibana.

2. Jahowa do Raja namanggomgomi saluhut. Di bagasan hasintongan dohot hatigoran do Ibana manguhum. Hasintongan dohot hatigoranNai ima na manghaholongi dohot na pangoluhon hita. Alani tapuji jala tapatimbulma goarNa marhite na mangulahon holong dohot ragam ni hasintongan tu ganup jolma di ngolu si ganup ari. Uhum hasintongan na tapatupa di ngolu siganup ari di tonga-tonga ni huria, rumah tangga nang masyarakat ima gabe hapapatar ni parsombaonta dohot pamujionta di Raja na sun badia i.

3. Di papatar Tuhan i do hamuliaon dohot habadiaonna. Songon na tu bangso Israel marhitehon ombun hamuliaon i. Di si dipapatar do hadirion dohot pandonganionNa laho paposhon dohot patoguhon haporseaon ni nasida di Debata Jahowa i. Di bagasan Kristus Jesus Tuhan i, ro do Ibana mandapothon portibion asa patar hadirion dohot asi nirohaNa. Jesus Kristus do Raja hamuliaon na ro tu portibion na sinuru ni Debata laho pasahat uhum hasintongan dohot hatigoran marhite holong panobusion di sandok portibion. Alani tapuji jala tahatindanghon ma Jesus i di sude ngolunta siganup ari.

4. Jamita on ta pasahat di minggu Palmarum i ma minggu Maremare. Maremare ima tanda lasniroha dohot penyambutan. Asa di bagasan lasniroha naeng tarida sambutan pengakuan mandok Jesus Kristus do Tuhan, Raja hadameon na badia jala nasongkal jala na manggomgomi di bagasan hasintongan dohot hatigoran. Puji jala somba ma Ibana di bagasan habadiaon ro ma hita marsinggang tu joloNa mardongan hamuliateon Jala Ibana ma Raja na tongtong mangarajai ngolum.

IV. Pangarimpunan Puji ma Tuhan Jahowa, Nasongkal jala Nabadia, ai:
1. Ibana do Raja namarhuaso na mangatasi saluhut
2. Natongam jala natimbul do Ibana
3. Dialusi Jahowa do joujoumi asal ma mian jala diradoti ho hataNa
4. Jangkon jala paloas ma Ibana mangarajai ngolum.

Jamita Partangiangan Kamis Putih

Tgl. 09 April 2009

Mateus 26 : 38 - 43
Pdt. M. Saragi
Praeses HKI Daerah I S.Timur I

Dungo ma Hamu Jala Martangiang

1. Songon jolma na gale hita, marsak jala bobonosan do rohanta mangadopi sitaonon dohot parungkilon. Jotjot do taadopi ragam ni krisis di ngolunta. Aha sipatupaonta jala beha do hita mangadopi krisis dipardalanan ni ngolunta na boi mambahen marsak, biahaton huhut bobonosan rohanta? Sian hatutubuNa sahat tu hamamateNa, gok krisis do ngolu ni Jesus. Dilele Raja Herodes Ibana dung tubu di huta Betlehem. Malua sian usaha pamunuon i, saleleng ngoluNa ingkon bersitegang dohot hona tekanan do Jesus sian halak Parise, Saduse, Siboto Surat. Parngoluon na gok krisis ingkon adopanNa sahat tu hamateanNa di hau silang i. Sada momen na paling krisis di ngolu ni Jesus ima di porlak Getsemane. Borngin parpudi andorang so ditangkup Ibana dohot diparsilanghon, di dolok Zaitun, masa ma krisis bolon di ngolu ni Jesus. Tung singkop do na digombarhon parevangelium Mateus, Markus dohot Lukas angka na masa di porlak Getsemane, di dolok Zaitun i.

2. Dung sahat Jesus raphon angka siseanNa tu Getsemane, ditingki ima mansai marsak roha ni Jesus, Alana tongkinnari ro ma angka na naeng manangkup Ibana hape tarpodom anggo angka siseanNa di hatiha i. Di Getsemane i, mansai marsak situtu do Jesus jala bobonosan, hira na mate panghilalaanNa (ayat 36 – 38, bd. Mark　14:33). Di na marsak jala bobonosan ima, laho ma sahalakNa martangiang. Sahalak ni Jesus do mangadopi krisis i. Dibagasan bahasa Gorik, ia "marsak" marharoroan sian hata EKTHAMBEOMAI (marlapatan ‘be greatly alarmed’ : sangat takut). Alani marsak jala biahaton panghilalanNa i, parevangelium Lukas　(22:44b) manggombarhon pola songon mudar na himpal madekdek hodokNa i tu tano (Di dalam dunia psikologi, apa yang dialami Yesus bisa digambarkan sebagai suatu emosi kesedihan yang begitu dalam, duka yang begitu mengiris hati. Penelitian di dalam literatur dunia medis menjelaskan, situasi yang dialami Yesus dikenal dengan istilah hematidrosis atau hemohidrosis (Allen, 1967 dalam The Skin: A Clinicopathological Treatise, pp. 745-747). Kondisi ini adalah peristiwa keluarnya darah melalui kelenjar keringat seseorang yang disebabkan oleh kondisi stres yang sedemikian besar. Faktor utama penyebab hematridosis adalah "Rasa takut yang akut dan pergumulan mental dan emosional yang mendalam" (Holoubek and Holoubek, 1996 dalam Blood, Sweat, and Fear. ‘A Classification of Hematidrosis ). Digurithon parevangelium Matius dohot Markus hata ni Tuhan Jesus tu siseanNa i andorang so laho Ibana martangiang, ": Mansai marsak situtu do rohangku, hira na mate. Dison ma hamu, dungo rap dohot Ahu!". Sian pandohanNa i, Jesus manghilalahon ingkon Ibana nama na mangadopi angka sitaonon na naeng masa i. Nang pe rap Jesus dohot angka siseanNa i alai marsak jala biahaton rohaNa. Nadihilalahon Jesus i, jotjot do ra tahilalahon. Diragam ni angka na masa di ngolunta on boi ro arsak ni roha jala bobonosan. Di sitaonon dohot parungkilon na mambahen marsak jala bobosan arop rohanta adong dongan na mandongani jala mangalehon pangapulion di hita. Ima nadipataridahon hajolmaon ni Jesus songgop namasa on di Ibana.

3. Aha do umbahen marsak jala bobonosan roha ni Jesus, pola hira na mate panghilalaanNa ? Aha do na umbahen pola dipatungkap Jesus bohiNa tu tano martangiang ? Ndada hamatean dohot sitaonon i na ni habiaranNa alai rimas ni Debata na tinuhukNa i holan laho paluahon jolma i. Uhuman ni Debata na ingkon porsanon ni jolma dipaporsanhon tu Jesus (bd. Mat. 8:17; 1 Pet. 2 : 24). Namardosa do Jesus umbahen marsak jala bobonosan Ibana gabe mabiar Ibana tu uhuman ni Debata? William Hendriksen mandok : "Ra di Getsemane i, di ida Jesus rimas dohot uhuman ni Debata alani dosa-dosa ni jolma i". Panindangion di Bibelta patuduhon ndang mardosa anggo Jesus i. Holan humonghop hita gabe dosa Ibana na so tumanda dosa i (bd. Ibr 4:15; 2Kor 5:21). Calvin mengatakan: "dalam keadaan kita yang berdosa sekarang ini, tidak mungkin untuk mendapatkan perasaan yang tidak berlebihan, seperti yang ada dalam Kristus; tetapi kita harus menghormati Anak Allah dengan tidak menghakimiNya dengan apa yang kita dapatkan dalam diri kita sendiri. Ketika Kristus takut pada kutuk ilahi, perasaan dari daging mempengaruhiNya dengan cara sedemikian rupa sehingga iman tetap teguh dan tidak tergoyahkan. Karena begitu murninya hakekatnya, sehingga ia merasa tanpa terluka oleh pencobaan-pencobaan yang akan menusuk kita dengan sengatnya". Calvin memaksudkan bahwa: "kita sebagai manusia yang berdosa, sangat berbeda dengan Kristus yang suci murni itu, karena itu kita tak boleh menghakimi Kristus dengan apa yang ada dalam diri kita, karena Ia memang beda dengan kita. Pada saat Kristus takut, Ia bisa tetap beriman (kita tak bisa seperti ini), dan karena itu Ia tetap tidak berdosa.

4. DitangiangNa i, dipangido Jesus "Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohanghu; roham do! (ayat 39). Na dimaksud "siinumon" (cawan) ima rimas dohot uhuman ni Debata. Cawan manang piala na ingkon inumon jotjot do dipangke di Bible laho manggombarhon rimas dohot uhum ni Debata (bd. Maz 11:6,　Maz　75:8-9, Yes　51:17,22,　Yer　25:15,17,28　 Yer　49:12,　Hab　2:16, Wah　14:10,　16:19). Marhite pandohan ni Jesus na mandok, "namun na tarbahen" (bd. Luk 22:42 : "aut olo ma Ho nian"; Mar 14:36: "saluhutna do tarpatupa Ho") hira na mangalo sangkap ni Debata do Jesus jala mengkonfrontasikan huaso ni Debata tu sangkapNa. (Calvin mengatakan: "ini bukan doa yang direnungkan / disusun lebih dulu! Dan dalam doa kita tidak selalu memikirkan Rencana Allah, juga sering tidak memikirkan apakah doa itu mungkin atau tidak mungkin terjadi"). Pangidoan ni Jesus di tangiangNa on patuduhon hajolmaonNa. Di hajolmaonNa i, boi do Ibana marsak, biahaton, bobonosan, marlas ni roha, dna. Hita pe molo mangadopi sitaonon, parungkilon, masalah, boi do hita mabiar jala marsak. Songoni do tong Jesus sian sisi hajolmaonNa. Sian hajolmaonNa do Jesus mangidohon tu Debata Ama asa sitaonon na naeng porsanonNa i malua sian diriNa. Dipangido Jesus asa ndang pola porsanonNa angka sitaonon i. Diparngoluonta pe, molo ro angka sitaonon, masalah, jotjot do hita manghirim asa malua sian masalah nang angka sitaonon. Jotjot tapangidohon tu Debata asa ndang pola taadopi masalah dohot angka sitaonon di ngolunta on jala asa dipalua hita sian persoalan dohot angka sitaonon. Jadi, songon jolma na gale hita, jotjot do mabiar jala marsak molo ro masalah dohot parungkilon. Didok Jesus do muse ditangiangNa i, "Alai tahe, unang marguru tu rohangku; rohaM do!" (ayat 39b). Artina, nang pe dipangidohon Jesus asa salpuhonon ni Debata siinumon i sian Ibana alai unduk do Jesus di sangkap ni Debata. Laho mangantusi tangiang ni Jesus on, William Barclay mandok: "Jesus bangkit dari lututNya untuk menghadapi pertempuran kehidupan. Itulah gunanya doa. Dalam doa seseorang berlutut di hadapan Allah supaya ia bisa berdiri tegak di depan manusia. Dalam doa seseorang masuk ke surga supaya ia bisa menghadapi pertempuran bumi". Jadi adong do "Getsemane" di ganup hita jolma, ima sangkap ni Debata martontangan/masialoan tu sangkap hajolmaonta. Ditingki sisongoni ma hita ingkon marsiajar martangiang songon tangiang ni Jesus on, "ale Amang unang marguru tu rohangku; roham do!". Artina unduk jala marpangoloion tu sangkap di Debata huhut marpos ni roha ai sangkap ni Debata do na dumengganan di ngolunta.

5. Diayat 40 – 41, Tuhan Jesus maminsang angka siseanNa i. Pola tolu hali martangiang Tuhan Jesus tu Debata AmaNa, hape sai tongtong tarpodom angka sisean i, ndang margogo nanggo satongkin. Didok : "Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!" On ma hagaleon ni jolma di portibion, sihol do rohana naeng burju uju di ngoluna alai gale do dagingna, mura tartait tu dosa. Suang songoni do nang hita, ndang boi manahan sahat ro di ujung ni ngolunta. Alai tuani ma ro Tondi Porbadia na tongtong mandongani hita ganup ari, gabe boi ma hita marpangalaho hombar tu lomo ni roha ni Debata. Alani ingkon "dungo jala martangiang do hita asa unang bongot tu pangunjunan". Pandohan i ndada mandok asa dipasiding Debata hita sian pangunjunan alai asa unang madabu hita tu dosa molo tung pe ro pangunjunan i jala dipargogoi jala didongani Debata mangadopi pangunjunan. Di dirinta on adong dua hagogoon na masialoan (bd. Gal　5:17　 Rom 7:18-20), alani ingkon martangiang do hita asa margogo hita maralohon hagiot ni daging jala didongani huhut dipargogoi Tondi ni Debata mangulahon na hombar tu lomo ni rohaNa i (bd. Ef 6:18).

6. Dipangido Jesus di Getsemane i asa rap angka sisean i dohot Ibana huhut dungo raphon Jesus. Nanihilala ni Jesus di Getsemane i ra boi do tahilalahon. Diparngoluonta on olo jala boi do marsak, bobonosan huhut manghilalahon ndang adong donganta mangadopi parungkilon dohot sitaonon na ro di parngoluonta. Apalagi molo taboto naeng masa na buruk di ngolunta. Disituasi na songoni tontu sahali marsak jala lungun rohanta, biahaton huhut bobonosan hita. Alani ringkot di hita dongan na mangalehon gogo huhut pangapulon mangadopi parungkilon manang sitaonon i. John White mandok, "kita sangat memerlukan dukungan manusia karena kita tak pernah betul-betul belajar untuk bersandar kepada Allah’. Diparngoluonta manontong do pangelaelaon ni sibolis i asa madabu hita tu pangunjunan, ragam ni angka sitaonon dohot parungkilon na ro di ngolunta na naeng mangalononghon hita tu arsak ni roha, biahaton jala mambahen rohanta bobonosan, dihatiha i ma hita pajumpa dohot Tuhan Jesus Sipalua jala Siparmonang – molo tahangoluhon songon haporseaon sahalak dakdanak na marpos niroha huhut manghaposi Debata Amanta i di sangkap dohot lomo ni rohaNa, Songon tangiang ni Tuhan Jesus ma tangiangta, "Ale Amang, ndang guru di rohangku alai di rohaM do". Ditangiang na songoni ma gabe margogo hita mangadopi ragam ni parungkilon dohot sitaonon nang pangunjunan. Kepasrahan dan ketaatan, itulah kunci dari segala yang harus dilakukan pada saat kita mengalami penderitaan dan persoalan hidup. Boi do hita martangiang sian roha na tulus dohot ikhlas tu Debata songon tangiang ni Jesus, "Ale Amang, ndang guru di rohangku alai di rohaM do" ? Ra, gumodangan do hita mandate jala frustasi huhut manungkun boasa dipaloas Debata parungkilon dohot sitaonon i songgop di ngolunta. Jotjot do ra hita mandok, na so dihaholongi Debata be hita molo ro parungkilon dohot sitaonon i. Di roha na marpangoloion dohot marhaporusan tu Debata disima boi taida pandonganion dohot pangaramotion ni Debata di ngolunta. Marhite sitaonon dohot parungkilon na masa dingolunta dipapatar Debata do huaso dohot holong ni rohaNa i. Marhite parsorion dohot parniahapan i dipangido Debata tu hita asa lam pajonokhon diri tu Ibana huhut asa lam marpangunsandean tu Ibana. Molo tajalo parsorion nang parungkilon i sian roha na ias dohot na bulus tu Debata disi ma boi idaonta angka nauli dohot na denggan dibalik ni angka parniahapan i. Songon sitaonon dohot parungkilon na masa di Jesus, hinorhon ias, roha na bulus tu Debata dohot roha na marpangoloion manjalo huhut mandalani angka sitaonon i gabe taruli di haluaon dohot hasesaan ni dosa jolma i sian Debata (bd. Fil 2:8). Marhite roha na marpangoloion di sangkap ni Debata, ditaluhon Ibana do ihot ni dosa dohot hamatean i (bd. Roma 6:23;8:10; Gal 1:4; Kol 1:14). Amen.

Jamita Parningotan Ari Hamamate
Tgl. 10 April 2009

Nats : Johannes 19 : 23 -30
Redaksi

Ala ni Dosanta JesusMate Tarsilang

I. Patujolo

Barita Nauli taringot tu Jesus na diparsilanghon, dibaritahon angka na opat Evangelium di Padan na Imbaru do i, ndang pola adong perbedaan ni Evangelium na berarti asing ni variasina, lao patoranghon lapatan dohot tujuan panurathonon i do. Sude do nasida manghatingdanghon jala pasintonghon, na tutu do peristiwa Jesus na tarpajal i, Asa saluhut angka na manjaha barita i porsea tu Debata. Hamamate ni Jesus Kristus ido na mamboan haluaon, nang ngolu di angka jolma pardosa. Nangpe di angka ugamo/haporseaon na asing, mamperdebathon: "Dia ma mungkin Debata boi diparsilanghon ?" Alai di hita halak Kristen, sada jala hot do haporseaonnta na mandok: Jesus tereksekusi mati ala ni dosanta do, songon na binaritahon ni opat Evangelium di Padan na imbaru i.

Molo ta telusuri di Padan Na Robi, mamparsilangkhon angka parjahat na mangolu ndang hea masa i di Padan na Robi. Uhuman mate dilaksanahon; mangalempar dohot batu. Alai boi do digantunghon di sada hau sebagai tanda parningotan ( 5 Musa 21: 22-23). Bangke na songonon ma na dianggap na hona bura ni Debata.

Penyaliban dipraktekhon angka bangso Fenesia dohot Kartago, dungi dipraktekkon muse secara luas di bangso Roma. Alai angka hatoban, penduduk asli setempat dohot angka parjahat kelas rendah do, na diparsilanghon, jala mansai maol do dapotan warga negara Roma na diparsilanghon gabe parjahat. Panurat na sarupa manggurithon opat Evangelium on mangarangkumhon: Hamatean di hau pinorsilang, ima hamatean na mansai parir jala bernit manang mengerikan. Jesus Kristus mandalani hamatean na cukup mengerikan on do. Ndang adong hamatean na paling mengerikan sian hamatean di hau pinorsilang. Halak Romawi sandiri mamerengsa gabe angka hitir jala tahutan. Bangso Fenesia mandok: "Tano on ima tano na badia na nilehon ni Debata", jala ndang olo nasida mambahen ramun tano na i dohot bangke ni angka parjahat. Asa angka parjahat dipakuhon ma di hau pinorsilang jala mangharophon parjahat i mate di silang i, manghirim asa pidong Nazur dohot pidong Gagak ro manganhon bangke i. Hamatean na songon on ma na didalani Jesus sebagai Halak naso mardosa jala ndang parjahat Ibana.

Seharusna, jolma i do na mardosa jala patut diparsilanghon. Ndada tumanda dosa Ibana ala jolma i do na mardosa. Holan ala panghophopna i do dosa ni jolma i, gabe tereksekusi Ibana. Hamatean na di hau pinorsilang i do na paling dihabiari angka jolma di padan na robi termasuk hamatean ni angka parjahat dohot angka hatoban.

*. Eksekusi : Pelaksanaan putusan hakim; pelaksanaan hukuman badan peradilan, khususnya hukuman mati:

II. Hatorangan

Ayat 23-24 : Jesus diparsilanghon ndada ala ni hasalaanna alai alani tuntutan nang desakan ni angka halak Jahudi na niputushon si Latus aleale ni Kesar sekaligus Gubernur Romawi ibana, Di natarpajal i Jesus, kesempatan ma angka soldadu i na laho mambuat abitna laos diparopat nasida, dunghon ni sampesampena naso marpanjaruman. Abit ni angka na taruhum ima pandapotan tambahan di angka soldadu na mangula tugasna di hatiha i. Evangelium Johanes mamareng on sebagai hagogonop ni Psalmen 22: 18: "Dibagi nasida do angka ulosHu, mandabu tondung do nasida taringot tu bajubajungHu".Nata pe dibagasan angka Kitab Sinoptik ndang dipabotohon angka on.

Ayat 25 : Secara langsung mamereng ulaon on ima angka parompuan: Maria, inang ni Jesus, Salome, pariban ni si Maria dohot Maria ripe ni Kleopas, dohot Maria Magdalena. ( bdn. Mrk. 15:40). Nasida ma angka na setia jala patuduhon holong ni rohana tu Jesus na tarpajal i. Hape angka sisean ni Tuhan na 12 i, ndang barani nasida ro mandapothon Jesus di hau pinorsilang i. Baliksa, ala dibagasan biar do nasida, lari do nasida mangalului haluaonna sandiri asa unang parsidohot nasida didok sisean ni Jesus. Ndang dipatuduhon nasida holong ni roha nasida, hasatiaon dohot tanda na sisean ni Jesus do nasida. Andul do songon Johannes panurat ni Evangelium on, na sai jotjot digoari sisean na hinaholongan ni Jesus na rap dohot angka parompuan i mandapothon Jesus huhut tariluilu.

Ayat 26-27 : Soara ni hajolmaon ni Jesus tu si Maria na mandok: Ndi ma Inang, anakmi ! Sada pamikirion na mansai uli do on tu si Maria, ina ni Jesus na sai disarihon Ibana dihabernitonna i, dohot soaraNa tu sisean i na mandok : ndi ma, inang mi! Alai laos ditambahon panurat Evangelium Johannes ma muse dihatoranganna: Jadi olat ni i ma dijangkon sisean i ibana tu jabuna". Ala Anak ni Debata do Jesus, na dibagasan parungkilon na luar biasa i, boi dope Ibana marhobas dohot denggan, disarihon Ibana do si Maria, inana i.

Tutu do Ibana Anak ni Debata, Mesias na Nimiahan, na naeng mangula ulaon ni Amana na marsuru Ibana asa gabe jolma Ibana, gabe lam mura ma taantusi songon dia do panghilalan ni si Maria di sitaononna na manubuhon Jesus gabe jolma dohot parsirangonna tu Jesus. On hasasaut ni sangkap ni Debata na mandok: Gabe daging ma hata i (Joh. 1: 14). On ma dalan ni Debata na laho manghilalahon parsorion, parungkilon nang sitaonon na naeng siadopan/boluson ni jolma di portibi on.
　
Ayat 28-30 : Saat-saat terakhir di hau pinorsilang i sian ngolu ni Jesus di portibi on, boi do tabereng marhite dua hal, ima :

1. Na berhubungan tu panghilalaan ni hajolmaonNa, na mandok" "Mauas Ahu"(Psalm. 69:21) . Na marlapatan ma on, boi do mauas secara alamiah, mangido aek siinumon laho pasombu uasna, ala naung suda gogoNa na manuhuk silang i, natape disingkat si Simon na sian Kirene i do Ibana na laho manuhuk silang i sian pantaran ni habangsa ni si Latus sahat tu dolok Golgata. Alai boi do muse mauas mida haluaon ni angka ruasNa/jolma na hinaholonganNa.
Taparrohahon ma muse di ayat 29, pamingkirion ni angka natorop tarlumobi ma soldadu i, umbege pangidoan ni Jesus : idaon songon na burju jala humalaput do nasida mambuat aek siinumon ni Jesus, hape sasintongna, ndada aek siinumon na dilehon nasida tu Jesus: Tuak na asom(asam/cuka) do na dilehon marhite na mambornohi limut na dibaen di ujung ni tolong(hisop= na umpuna tangkai na langsing) (bdn. Mrk. 15:36). Angka teolog mandok hata gorik na di ayat on ima: "hyssos", tombak soldadu ndang ’hisop’. Sangkap nasida tontu asa bulus do mago panghilalaan ni Jesus. Ai na mangagohon panghilalaan na hansit do tuak na asom i.

2. Na berhubungan tu panimpuli ni ulaonNa, dipandohanNa : "Nunga Marujung".
Dung sun Ibana manginum tuak na asom i, didok Ibana ma: Nunga Marujung". Nunga sidung be dibolus angka na hansit i. Nunga be saluhut diae jala ditaon Jesus angka na bernit i. Dungi dipaunduk ma uluna, pasahathon tondina, jala tos ma hosana. Molo tabereng di evangelium Lukas tangkas do didok: "Dungi Marsoara na gogo ma Jesus, di dokma: Amang, Tu bagasan tanganMu ma hupasahat tondingku!", dungi tos ma hosana (Luk. 23:46). Tangkas ma taboto sian on, misi ni Jesus nunga sae, Lomo ni roha ni AmaNa dilaksanahon saluhutna, Huaso ni dosa nunga salpu, Haluaon na binoanNa nunga sae marhite hamamatena asa tartobus saluhut dosa ni jolma. Ai marhite silang i do, tanda holong ni roha ni Debata dohot panghophopon ni Debata marhite Jesus Kristus tu jolma pardosa i.
　
III. Panimpuli

Silang (yun: Stauros, Latin: Crux) ima dalan na diporsan Jesus asa dapotan haluan saluhut jolma. Didalani Jesus do silang i dohot ias nang bulus ni rohaNa. Nangpe, dihilala rohaNa do sada haporluon naso tu Ibana do i, alai hasasaut ni lomo ni roha ni AmaNa do. Alai sadar do Ibana di ulaonNa di tingki na tarpajal i Ibana jala dituhuk Ibana do i saluhutna. Jesus na tereksekusi i, simbol hasesaan ni dosanta do. HamamateNa di hau pinorsilang i, ima sahali untuk selamana. Laos hamamateNa i do gabe patujolo ni haluaon jala symbol harajaon ni Debata. Harajaon i, ima: Parsadaan ni angka jolma naung tinobus ni Jesus marhite mudarNa na durus di silang i. Alani i, di Jumat Agung on, tatanda ma hadirionta diadopan ni Debata, dohot tongtong ma taingot jala taulahon, songon pandohan ni Apostel Paulus: "Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna i". (I Korint. 6:20). Amen

Jamita Pesta 1 Ari Haheheon

Tgl. 12 April 2009u. apostel10 : 39 - 43

Pdt. R. Simanjuntak, BD

Parhobas di Kantor Pusat

Nunga Hehe Tuhan i

I. Patujolo.

1. Pesta na balga do pestanta sadarion, pesta Parningotan Haheheon ni Tuhan Jesus. Ai marhite haheheonNa sian na mate, laos i do patuduhon paboa andul tumimbo do huasoNa sian huaso ni hamatean i. Nunga ditaluhon Tuhanta huaso dohot sorop ni hamatean (cf. 1 Kor.15:54-55). Ala ni i, gabe ndang margogo be huaso ni hamatean i maniopi Jesus asa torus di toru ni tanoman i. Nunga talu hamatean, nunga soluk hamonangan. Kristus Parmonang, ima na tapestahon sadarion.

2. Balga do panghorhon ni HaheheonNa i di pardalanan hajolmaon. Ai anggo na jolo – andorang so ro Jesus tu portibion/ andorang so haheheonNa – molo mate jolma, torus hian do naung mate i di toru ni tanoman. Ndang mullop, ndang hehe ibana sian i. Alai dung ro Tuhan Jesus, dung peristiwa Paskah, gabe diuba ma pardalanan ni hajolmaon. Gabe dibuka Ibana ma lembaran baru. Lapatanna, dung haheheonNa i, ndang salelengna be jolma naung mate i di tanoman i. Alai gabe hehe songon Kristus naung hehe sian tongatonga ni angka naung mate (cf. 1 Kor. 15:20).

3. Nuaeng on, torop dope na so mamparhatutuhon haheheon i. Ai sai disubo manganalisa proses ni haheheon i marhite pingkiranna sambing. Dipingkiri ma songon dia ma proses biologis tu spritualis ni daging naung mate/busuk gabe mangolu. Gabe didok, ndang adong kemungkinan ni i. Alai dohononta ma, na lupa do nasida di kelemahan dohot keterbatasan ni pingkiran ni jolma. Tung so taranalisa pingkiran ni jolma do ulaon na pinatupa ni Debata. Na pasti, nunga mulak mangolu Tuhanta sian na mate. Buktina, nunga rumar tanoman i. Nunga hehe Ibana, i do barita Sorgawi na pinaboa ni surusuruan i. Alai bukti na tumangkas, nunga pajumpang siseanNa i dohot Tuhan Jesus naung mate jala naung hehe i. Opat pulu ari lelengna siseanna i dibina/dipersiapkan (sian haheheon tu hananaek) asa gabe sitindangi ni Kristus nasida di Jerusalem, Judea, Samaria sahat ro di ujung ni tano on (cf. ulaon 1:8).

II. Hatorangan ni Turpuk

1. Sitindangi ni Kristus tu saluhut halak

Borhat si Petrus sian luat Joppe tumopot si Kornelius di Kesarea. Tujuanna, mamaritahon baritanauli i, taringot tu Jesus. Mansai dao do nian sian Joppe tu Kesarea; dungi kondisi sosial di tingki i, ndang adong pardomuan ni halak Jahudi tu pangisi ni luat Kesarea – ai halak Jahudi do si Petrus, hape goaron halak kafir do pangisi ni Kesarea. Alai Tondi ni Debata do na mangula huhut margurasa di hadirion ni si Petrus (cf.10:3-8; 10:20), asa ndang adong alasan mandok dao sian Joppe tu Kesarea; jala ndang gabe pangambati kondisi sosial i (antara Jahudi dohot non Jahudi). Sandok, ingkon hatindanghononhon do taringot tu Jesus tu saluhut halak. Ndada holan tu halak Jahudi, alai tu saluhut bangso. I do namangonjar roha ni si Petrus umbahen las rohana mamaritahonsa.

2. Tutu do Hehe Tuhan i

Dung sahat si Petrus di Kesarea, nunga pungu hian natorop i – rap dohot si Kornelius. Pintor dipungka si Petrus ma mamaritahon taringot tu Jesus: ulaon, partinaonan, dohot hamamateNa. Laos dihatindanghon ma muse naung mulak mangolu sian na mate. Ndang sae holan i, laos diboan/ditogu si Petrus ma natorop i tu haporseaon paboa tutu do hehe Ibana sian na mate. Ndang holan di hata Ibana hehe. Buktina, dipapatar/ dipatuduhon do diriNa paboa naung mulak mangolu. Nunga rumar tanoman i. Rap Ibana dohot siseanNa. Dungi, dung mulak mangolu, opatpulu ari lelengna angka siseanNa dibina/ dipersiaphon asa gabe sitindangi ni Kristus tu saluhut halak.

III. Pokok Renungan

1. Atik adong dope sian ruas ni hurianta na so mamparhatutuhon haheheon ni Tuhan Jesus. Songon i dohot haheheon ni keluargana naung monding. Ra, hinorhon ni sai marojahan di parbinotoan/ ratio ibana mamingkiri proses ni haheheon i. Gabe i ma mambahen ganggu rohana di hasisintong ni haheheon i. Na pasti, nunga hehe Tuhan i sian na mate. Dungi laos haheheonNa i do jaminan gabe hehe muse angka na porsea i. Tusi do hita ditogihon turpukta. Marhite i, gabe hot ma panghirimon di ngolu na manongtong i.

2. Saleleng dipaloas Debata hita mangolu, gabe sitindangi ni Kristus ma hita. Lapatanna, saluhut hata nang pambahenan saluhut na ma i dibagasan Ibana naung hehe i. Molo masa pe paias kuburan di masa Paskah, na boi do i asal ma haporseaonna mandok, Tuhan Jesus naung hehe i, laos i do jaminan paboa na mulak mangolu do muse angka keluargana naung monding i. Alai molo gabe mamele do disi dohot motifasi asa mamasumasu sumangot ni na dikuburan i, jelas nunga sala. Molo i dope diula, gabe sitindangi ni unsur kekafiran do ibana disi – dipahehe unsur hasipelebeguon.

3. Molo mangolu Jesus, lapatanna disi: na rap do Ibana dohot ruas ni huriaNa. Ndang dipasombu hita Ibana manguluhon huhut manarihon na ringkot. Kristus Victor – Kristus Parmonang – laos Ibana do mangalehon gogo dohot pamonang hita uju masa hamaolon dohot boban na borat. Laos tatiop ma gomos, molo krisis pe ekonomi laos disi do Ibana naung hehe i patukhon na ringkot i di ngolunta. Amen.

Jamita Pesta 2 Ari Haheheon

Tgl. 13 April 2009

Nats : Jesaya 25 : 6 - 9
Pdt.Andar Lubis, S.Th

Pdt. HKI Res. Hajoran

Marhuaso do Debata Paluahon hita sian Ruhut ni Portibion

I. Patujolo

Pesta na balga do pestanta sadarion, pesta parningotan haheheon ni Tuhan Jesus. Ai marhite haheheonNa sian na mate laos i do patuduhon paboa andul tumimbo do huasoNa sian huaso hamatean i. Nunga ditaluon Tuhanta be huaso dohot sorop ni hamatean i. Alani ndang margogo be huaso ni hamatean i maniopi hangoluan na sian Jesus asa torus di inganan paradianan i, marhitehon i nunga soluk hamonangan na hinamonanghon ni Jesus Kristus. Laos marhite haheheonNa i do pardalanan ni hajolmaon di portibi on. Ai anggo na jolo andorang so hehe Jesus, molo mate joma torus do Ibana di toru ni tanoman i. Alai dung hehe Jesus nunga gabe muba pardalanan ni hajolmaon lapatanna ndang di hamatean i be ujung ni pardalanan ni hajolmaon on. Ima habalgaon ni ulaon ni Jesus na mampanghorhon tu pardalanan ni hajolmaon.

Di turpuk on dipatorang do pardalanan ni hajolmaon na sai holan marpangunsandean tu na adong di portibi on. Dang dihaporseai bangso Juda paboa Jahowa do partanobatoan ni hajolmaon. Ai goar Jesaya marlapatan Jahowa do haluaon manang partanobatoan di ahu. Marhite sian pandohan on, ia pangarimpunan ni isi ni buku Jesaya ima taringot tu haluaon sipatupaon ni Debata dohot joujou ni panurirang Jesaya tu bangso Juda asa tongtong Jahowa gabe patanobatoan. Ia jamita on ima songon respon ni jolma siala tindakan ni Debata di dolok Sion. Disuriranghon si Jesaya do hata on tu sude bangso tagan so sahat dope nasida tu habuangan i. Jadi sada apulapul do ayat on tu pardalanan ni bangso i na sai mengalami penindasan ni bangso na gogo na marhuaso di tingki i. Jala sian gejolak na songon i ma adong tindakan sian Debata laho paluahon na dangol.

II. Hatorangan

1. Haroan nanaeng ro (esktologis)

Ala ndang porsea be bangso Juda dihagoon ni Jahowa na boi paluahon nasida disuru Jahowa ma panurirangNa pasahathon hataNa dohot apulapulNa. Dihatiha i nunga gumodangan panghaposion ni Raja Ahab tu harajaon Assur, dipangido ibana pangurupion tu Rja Tigale Pileser. Nian diorai panurirang Jesaya do sangkapna i alai ndang ditangihon raja i. Mamungka sian i ma harajaon Assur marhuaso maradophon harajaon Juda. Dipaksa ma harajaon Juda manggarar upeti songon sada bentuk amal pangurupion ni harajaon Assur tu nasida. Laho paluahon diri sian gomgoman ni Assur dipangido raja Ahab ma muse pangurupion sia Misir hape ndang marlapatan pangidoanna i, ai ingkon tu Jahowa do nasida mangido pangurupion. Mandate nasida di pardagingon lumobi ma dipartondion, hira naung ditadinghon Debata nasida di pardangolan nasida. Penguasaan Assur dirajumi nasida songon uhum na pinamasa ni Debata tu nasida.

Disituasi na songon i ma disuru si Jesaya paingothon Juda asa unang mangunsande nasida tu harajaon portibi, alai tu Jahowa ma. Dibagabagahon Debata angka silas ni roha ima haroan bolon. Padirion ni Jahowa sada haroan bolon tu saluhut bangso di dolok Sion. Sian Sion do Debata marhuaso dohot mangomgomi bangsoNa. Tu Sion nasa bangso ro marudurudur manjalo pangajarion dohot marsomba tu Ibana. Dipapatar ma disi inganan las ni roha, nasa bangso ro mangalului parlinggoman di Sion, disi ma Debata manamuei (memberi makan dan minum) nasida marhite sipanganon na dumenggan ima sipanganon na talmis, siinumon sian tuak anggur naung leleng.

Haroan manang sipanganon songon symbol ni halalas ni roha ni bangso ala Debata na patupahon. Tarida disi parpadanan na imbaru marhite sipanganon, na ingkon masa dilaonlaon ni ari uju songgop harajaon ni Debata. Ndang marbatas holan tu sada bangso, alai dohot do tu sude bangso na di portibi on. Dang holan mangalului sipanganon pardagingon na dilului bangso Israel di dolok Sion alai dohot do mangalului pangapulion, ala di Sion do Debata pasisihon tujungtujung (hirehire) na mambahen marsak, tariluilu bangsoNa. Buaton ni Jahowa ma nangalut i. Asa ndada holan sipanganon pardagingon diparade Debata dohot do disarihon hasonangan ni partondion nang hangoluan salelengnilelengna. Ai bonduton ni Jahowa hamatean asa taripar na porsea i tu hangoluan na manontong i.

Boaboa hamonangan maradophon hamatean salelenglelengna tanda ulaon ni Debata di hajolmaon. Jala ndang holan hamonangan maradophon hamatean ulaon ni Debata di portibi on alai dohot do manghamonanghon angka jolma na ginosagosa ni dosa i. Apulapul marhite ulaon ni Tuhanta na mangapusi iluilu jala padaohon haurahon ni bangsoNa. Tarida do dua pangalaho ni Debata di turpuk on: mangalo hamatean dohot mangapuli na dangol manang padaohon haurahon ni bangsoNa.

Halalas ni roha i do na boi pasisihon arsak ni roha,ngalut ni roha. Bangso Israel na mian di tongatonga ni portibi on, baik mai na tinggal di pangarantoan na pinaburuburu, dipalealea naeng manghaposi apulapul ni Debata. Ala ndang adong sian parhuaso na di portibi on na boi pataruhon angka na porsea tu hangoluan sogot i. Ima tanda pangampinon ni Debata mida halak na tariluilu, na dangol, na sai marsak, na pogos, na pinasiding ala ni hametmetonna/hagaleonna. On do naung gabe panindangion laos pamujion ni halak na porsea di Ibana.

2. Panindangion na marisi impola ni haporseaon dohot ende pujipujian.

Haroro ni Debata marhite pandohan : "Ida ma on do Debata, na itahaposi, na mangurupi hita, dison do Jahowa na itahaposi…. Marhata "hita" dapot di ayat on. Tagamon hahonaanna tu halak Israel dohot tu angka bangso na di portibi on. Panandaon dohot pandaion ni bangso ni Debata di ulaon ni Debata marpardomuan tu haporseaon. Ndang tarbahen so ro alus ni haporseaon nasida manghaposi Debata ala tangkas pangurupionNa tu nasida. Jonok do Debata di tongatonga nasida. Panindangion ni haporseaon I sosososo mandok mauliate tu Debata marhitehite olopolop dohot las ni roha mida haluaon i. Haluaon i do na mangonjar angka na porsea gabe marolopolop mandok mauliate marhite ende pujipujian. Tangan ni Jahowa pabotohon huasoNa na mangula di Sion laos patuduhon huaso ni harajaonNa di dolok na badia i.

Bagabaga ni Debata taringot tu haluaon ni bangsoNa gabe sunggulsunggul do i tu bangso Israel asa mulak nasida tu panandaon taringot tu hadirion ni Jahowa. Haheheon ni Tuhan Jesus manungguli hita mamuji dohot manghatindangkon huaso ni Tuhan i naung hehe sian na mate. Barita las ni roha do di hita barita sitaonon na haheheon ni Jesus sian silangNa. Ai molo taingot sude parniahapan ni Jesus andorang so mate tarsilang Ibana, taantusi ma songon dia bagas ni holong ni Debata di portibi on. Ai asa saluhutna i, ima: "asa jumpang songon na ni dok ni panurirang Jesaya" Ibana do mangusung pardangolanta jala angka sahitta diporsan".

Sasintongna dosa do na mambahen mangae na dangol hita. Dosa ima ndang parduli be di Debata manang disoadahon Debata di ngoluna. Dilaosi parentaNa dohot uhumNa. Dosa ima mambahen putus hubungan tu Debata. Jala Ibana na gantung di hau pinarsilang jala naung hehe sian na mate gabe mediator (penghubung) manang penyambung hubungan tu Debata. Ibana ma rekonsiliator (sipatupa pardengganan) antara ni hita jolma pardosa dohot Debata na badia i. Naeng ma hehe hita sian ngolu na buruk tu ngolu na imbaru ima ngolu na mamparbuehon hata ni Debata. Sada semangat na imbaru ma haheheon ni Jesus di hita laho manghobasi ulaon na hombar tu lomo ni rohaNa huhut menata haporseaonta asa lam gomos, dimpos, jala uli laho manungkoli ngolunta on maradophon saluhut na masa.

Nuaeng molo taauhon jala tahangoluhon panobusion dohot panghophopon ni Jesus tama do lam tatingkathon ngolu haporseaonta. Holan roha dohot dirinta do lehononta laho manghaporseai Jesus naung hehe i. Dung i taihuthon ma Ibana, marhite na rade hita mamelehon diri, gogo dohot tingki tu ulaon na hombar tu lomo ni roha ni Tuhanta i. Jala marpos ni roha ma hita tu Debata, ai "Debata sandiri do naung manghatahonsa". Amen.

Jamita Minggu Quasimodo Geniti

Tgl. 19 April 2009

Nats : Johannes 21 : 15 - 19
Pdt.M.P. Siregar, MTh
Pdt. HKI Resort Huta Bayu

Holong do Roham di Tuhan Jesus ?

I. Patujolo

Na laho do angka sisean ni Tuhan Jesus mardengke tu tao Tiberias. Mansai loja situtu do nasida laho patulushon sangkap ni roha nasida, ai pola saborngin manipat nasida manghalojahonsa, alai tung so adong na dapot nasida agia aha pe.

Di na torang ari di ida nasida ma sada halak jongjong di pasir i; alai ndang adong sian nasida na tumandasa. Dung i didok sisean haholongan ni roha ni Tuhan Jesus i ma tu si Petrus: "Tuhan i do i!". Jadi dung dibege si Simon Petrus, Tuhan i do i hape, dialithon ma abitna, dung i ditimbung ibana ma tu tao i jala marlange ma ibana tu darat. Na marparau do ianggo donganna sisean i sahat, huhut sumarat jala nasida naung marisi dengke i. Dung sahat nasida ro di darat, di ida nasida do gara disi api dohot dengke peak di ginjangna, angkup ni roti.

Sai hohom do nasida sahat tu na nidok ni Tuhan Jesus hataNa mamangkulingi nasida mandok: "Boan hamu ma tuson deba dengke sian angka na dapot hamu nangkin!" dung i marudut ma muse didok Tuhan Jesus tu nasida, mandok: Ro ma hamu mangan! Alai ndang adong manang ise sian angka sisean i, na hum roha manise Ibana, ai nunga diboto be paboa na Tuhan i do Ibana. Dung pungu nasida sude, mangan ma nasida.

II. Hatorangan

1. Ujian na tumimbo (ayat 15-17)

Tardok hita do, sungkunsungkun ni Tuhan Jesus na bersifat spesifik na tu si Simon Petrus on, nang pe naung tung tangkas situtu do naung ditanda jala diboto Tuhan i do harohaon ni si Simon Petrus manang songon dia do responna na langsung tu Tuhan i. Tung mansai ringkot situtu do i diroha ni Tuhan i, tarida do i ai pola sampe tolu hali sungkunsungkun na sarupa dipasungkunhon Tuhan i tu ibana, mandok: "Holong do roham di Ahu?" Ringkot do tolu hali panghatindangkonon ni si Simon Petrus paboa na tutusitutu holong do rohana di Tuhan i, huhut dohot manungguli rohana dohot laho memulihkan/padengganhon "pamorsoonna" na tolu hali i.

Marhite na masa i ma diigil Tuhan i na "tumimbo" jala na ummarga sian si Simon Petrus, ima: holong ni roha na polin sian sandok ngoluna, i ma daging dohot tondina. Holong ni roha ndada holan dipamanganna sambing, alai ingkon dohot do dipambahenan.

2. Ginoaran do on: "Ujian Partondion"

Marsiala do sungkunsungkun ni Tuhan i na tu si Simon Petrus, jala molo tung songon i pe pangalaho ni sungkunsungkun ni Tuhan i na tu ibana, ndang na laho asa pailahon si Simon Petrus manang menyudutkan, alai manogunogu dohot marmahani do Tuhan i di siseanNa asa mulak rata parsaoran na denggan i songon na sai laonna i mangolu do tondina. Nang pe naung tolu hali tinggang si Simon Petrus, di na tolu hali i ibana marsoadahon Tuhan i, alai taida ma: ditogu jala dipajongjong Tuhan i do ibana muse, marhite na pahothon partinandaanna dohot patoguhon haporseaonna, huhut na paposhon rohana na marganggu ni roha i, asa tu udut ni parngoluon ni si Simon Petrus, gabe hot di hata nang pambahenanna jala ingkon tutu situtu ibana molo mangihuthon Tuhan i.

Holan na puas sian holong ni rohanta di Tuhan i do na patauhon angka jolma na porsea i laho pasangaphon Debata, ai molo ndang songon i, tagamon ingkon tinggang do hita songon si Simon Petrus i, ai na marojahan tu holong ni roha ni Tuhan Jesus do na paborhathon angka na porseai laho mamaritahon Barita Nauli, ima barita "Haluaon" i na pinatupa ni Tuhan Jesus (Boi do tapatudos tu sejarah ni Pdt. DR. I.L. Nommensen na ro tu Tano Batak).

3. Sai panogunoguon dibagasan roha holong

Sai panogunoguon dibagasan roha holong do dipatupa Tuhan Jesus manogihon jolma i asa ro mangihuthon Ibana. Ndang marhite na pinaksa manang hasutan Ibana manogihon jolma i asa olo ro laho mangihuthon Ibana, alai tung ditogutogu, diajari, didongani, diramoti jala diparmudumudu Ibana do jolma i marhite holong ni rohaNa.

Tung na so olo do Tuhan i mempengaruhi manang mangelaela songon na binahen ni sibolis parjehe i, alai tung ingkon marhite ungkap ni roha ni jolma i sambing do. Ingkon jolma i do na manodo dohot na mangalehon holong ni rohana tu Ibana, ai holan parsaoran na songon on do na hot, na togu jala na manongtong.

Ai taboto do, holong ni roha ni Tuhan Jesus do naung mian dibagasan rohaNa umbahen na olo Ibana ro tu Portibion, marsaor dohot hita, manaon haporsuhon/na bernit ala ni hadosaonta i, jala apala puncak ni holong ni rohaNa di hita jolma idaonta ma i na tangkas di hau pinorsilang ni Tuhan Jesus, disi ma torang taida panghongkopon ni Tuhan i dihita jolma pardosa, di "silang" ni Tuhan i ma dapot hita "haluaon" i.

4. Alai marhite sian hataNa, dipalumba do ibana tu Ulaon ni Tuhan i! (Ay.18-19)

Tabege do soara ni "lonceng Gereja", dung i tabege ma "Soara ni Tuhan i", on ma sada timbangan na tinggil na mandasing roha ni jolma, lumobi angka pangula di porlak anggur ni Tuhan i! Na manjou dohot na mangonjar rohanta laho mangaradoti angka ulaon i di tongatonga ni huria i.

Molo di hita: aha do na mangonjar rohanta tu ulaon ni Tuhan i? Holong ni roha di Tuhan i do manang panghilalaan kewajiban sambing do? Ianggo angka parhalado na sintong, ni onjar holong ni roha di Tuhan i do umbahen olo ibana manghobasi ulaon ni Tuhan i, ima angka ulaon na ringkot ditongatonga ni huria i. Ndang songon na manggohi sada kewajiban na so tarjua i, manang holan mangulahon songon i sambingma ala naung tajalo do tohonan i, manang ala lapangan kerjana do huria i.

Alai, suang songon si Simon Petrus na di turpukta on do, marhite sian hata ni Tuhan Jesus i dipalumba do ibana manang songon dia parmatena laho pasangaphon Debata. (vide, Johannes 19:16-20)

III. Aplikasi/Hahonaanna

1. Torop do nuaeng angka Pangula ni Huria na olo mangaradoti dohot manghalojahon ulaon ni Tuhan i, alai atik beha do laos adong nanggo satonga sian i na manghaholongi Tuhan Jesus. Nang angka ruas ni huria i pe, boi do torop na mangharingkothon dohot mangaradoti ulaon parmingguon i dohot mangulahon angka ruhutruhut ni parhuriaon i, alai holan na didurusambing, ndang manorusi tu bagasan rohana lumobi partondionna. Torop do halak na tigor jala na sintong do ibana di roha nang dipingkiranna, hape gabe partuktuhan do ibana digodangan halak, ala sai holan na dirohana i do na tigor jala na sintong, alai anggo holong ni rohana di Tuhan i tung so adong do panarihonna sahat tusi, umbahen na didok Apostel Paulus sahali, mandok: "Aut sura hupasahat dagingku asa ditutung, tung so marguna i di ahu, anggo so parholong ni roha ahu". Jala taingot ma muse ni dok ni Tuhan i: "Sihaholonganmu do Tuhan Debatam sian nasa ateatem, sian nasa hosam dohot sian nasa roham!". Haholongon salelenglelengna hubaen manghaholongi ho, dibahen i hutogu ho marhitehite asi ni roha (vide, Jeremia 31:3b).

2. Saonari on pe, didok Tuhanta do manungkun huriaNa i, mandok: "Holong do roham di Ahu?" Diigil roha ni Tuhanta i do sian ganup hita huriaNa alus na tama, ima: Alus partondion i, songon alus ni si Simon Petrus, na mandok di ayat 17 i: "Saluhutna, ale Tuhan, diboto Ho: ditanda Ho do holong ni rohangku di Ho!", ima alus na hot, alus na polin, alus na manongtong do i sahat ro diujungna. Dung i, didok Jesus ma tu ibana: "Parmahani ma angka birubirungKu!". Antong, denggan ma taalusi Tuhan i, jala taulahon ma hombar tu alusta na denggan i tu Tuhanta, asa tarpasupasu ma ngolunta. Amen.

IV. Usul Pangarimpunanna

Didok Tuhanta do mandok tu hita: "Holong do Roham di Ahu?" (vide, 1 Joh 4:19)

1. Ta alusi ma Tuhan i marhite alus partondion i, paboa na manongtong do holong ni rohanta di Ibana.
2. Tanda holong ni rohanta i, ta ulahon ma lomo ni rohaNa).

Jamita Minggu Misericordias Domini

Tgl. 26 April 2009
Nats : Mika 7 : 14 - 20
Pdt.Hotman Hutasoit, S.Th
Pdt. HKI Resort DEPOK

Margogo Situtu do Tangiang ni Partigor

I. Patujolo

Di partingkian parpudi on, nunga lam maruba panatapan ni jolma taringot tu na marende. Boi dohonon, marende ndang be dibatasi umur (na metmet sahat ro di matua), ndang dibatasi ugamo (di tingki parpudion di Masojid pe nunga sai tarbege marende na digoari nasida "Salawat"), ndang dibatasi inganan (di istana pe nunga sai diontang angka parende menghibur angka tamu Negara), ndang dibatasi jabatan manang pangkat (molo adong diangkat gabe sada uluan = jaha: Pimpinan sai didaulat do marende). Bahkan molo ingot do pe hita di opat taon naung salpu, uju Susilo Bambang Yodoyono kampanye, sai marende do ibana. Mangihuthon penelitian, torop halak mamillit ibana gabe Presiden, ndada ala ni isi ni kampanyena (narasi) manang program na hinatahonna, alai ala ni ende na sai ni endehonna ganup kampanye, 　mangonai tu roha ni jolma na umbegesa. Ai marhite ende i, sai songon na dipajojor do parsorionna na mansai marungkil dibahen Uluanna (jaha: Presiden) uju i. Ai didok ndang olo Presiden pasiat ibana pajumpang nanggo apala lima menit, nangpe ibana sahalak Menteri Kordinator Politik, Hukum dohot Kemanan (menkopolhukam). Suang songon i do nang di halak Batak, molo adong pesta, manang pesta dia pe i, bahkan di pesta unjuk nunga sai diiringi organ tunggal, laos ditingki pasahat ulos pe nunga diiringi ende, holan pamuhai ni na pasahat ulos i nama dibahen umpasa manang umpama. 　

Boasa ? Ido tutu. Ia, ende marguna do laho patubegehon angka na masa di parngoluon, isara ni na tabo, manang na hansit pe, na tonggi manang na paet pe, dohot lan na asing. Laos ende pe, sekaligus do dipangke laho patubegehon angka sihol ni roha manang sinta-sinta pe. Hinorhon ni i, nangpe sasahak ndang apala malo manang ndang apala denggan sorana marende, olo do sai dipala-palai marende manang so i, molo dibege halak marende, sai diihut-ihuthon do di bagasan rohana, bahkan tahe sai diauhon tu dirina hata ni ende i. Ido na tarida di turpuk jamita on, boi dohonon, ia turpuk on targoar do ende psalm na marisihon tangiang pangidoan.
　
II. Hatorangan

1. Tuhan Jesus siparmahan (14 -15).

Sahalak ruas ni huria HKI sian Jakarta mulak tu bona pasogit melalui jalan darat marcerita, paboa sepanjang dalan, sai diparrohahon ibana do angka bangunan gereja, laos sai ditangkasi do atik na gereja ni HKI do i. Boasa pola sai dipamanat gereja HKI, ala ruas ni HKI ibana. Songon i do uju bangso Israel haruar sian parhatobanon Misir, godang do huta na binolus nasida. Di ganup luat na binolusna i, sai di pamanat do didia inganan na denggan pangulaan (subur) dohot parmahanan (padang rumput). Sai dipamanat nasida i, ala ngolu nasida di uju i, di na dua ulaon i do, ima martani dohot marmahan. Sian angka pengalaman i ma, disoarahon tangiangna, mangido asa Debata gabe si parmahan di nasida, na marlapatan na manogu dohot patolhas nasida sahat tu sambulo ni tondina.

Somalna Parmahan sai tongtong maniop batahi (tongkat) songon i do dipar-hatopot roha nasida, Tuhan i maniop batahi, namarlapatan ia Tuhan i, ima panogu-nogu dohot pangondian di nasida. Laos bangso i sandiri dipatudos songon dorbia na hapuloan di Karmel. Karmel na marlapatan do i hutan rimba. Ia hutan rimba ima inganan ni angka babiat dohot panangko na boi mengancam ngolu ni angka dorbia i. Ndada holan i, ia di punsu ni dolok Karmel pe, godang batu na terjal na gabe patamba ancaman tu ngolu ni angka dorbia. Alani i molo so diparmahan angka dorbia i, olo do lilu ndang diboto mulak manang molo tarsulandit dorbia i boi mengancam ngoluna.

Dipardalanan ni bangso Israel uju mulak sian Mesir, nunga tangkas didai jala diida nasida, angka tanda halongangan na pinatupa ni Debata. Alani i, di bagasan pos ni roha nasida mangido, asa Debata sandiri parmahan nasida, laos diloas Debata nasida marjampal di inganan na ombuk tu kebutuhan nasida ima, na parjolo di Basan, ima sada huta tungkan timur Yordan na tarbarita ala ni "kesuburan" dohot "rumput" na bidang na mansai ombuk inganan pangulaan (Pertanian) dohot inganan marjampal angka dorbia (Peternakan). Na paduahon di Gilead ima sada luat, khususna na tungkan selatan Sunge Yabok, jumpang do disi dataran tinggi na mansai ombuk inganan mangula (pertanian) dohot marmahan (Peternakan). Songon i ma sihol ni roha ni bangso i, na dituri-turihon di ende laos sekaligus tangiang pasahat isi ni roha ni bangso i, asa　 Debata parmahan di nasida.
　
2. Nasa ulu ni tot marsomba tu Tuhan Jesus (16 -17).

Molo jut roha marnida sasahalak, sai diusahahon do asa unang pajumpang dohot halak i.. Alai nang pe naung diusahahon songon i, olo do sian na so panagaman pajumpang, tarlobi muse molo na dihasogohon marsangaja manang sai songon na mambeatbeati, patamba jut roha.

Molo dung songon i, olo do gabe marsoara na gogo (berteriak) mandok "pergi…….." jala molo sai tongtong martahan na pinalaona i, olo do lam dipabalga soara na, huhut ditutup simalolongna, ditutup parbinegeanna huhut dipabungkuk dagingna huhut didok "pergi……..",　 ima ekspresi ni jolma molo dung di puncak ni emosina.

Pengalaman ni bangso Israel uju mulak sian tano Mesir, torop do huta manang bangso na so olo mangaloas　 bangso Israel mamolus huta i. Sipata ragam di dibahen mangambati, alai ala so tarambatan nasida, sipata ditutup nasida na ma pamanganna dohot sipareonna, ndang tarpaida-ida nasida bangso i mamolus huta nasida. Pangalaman on, na so tarhalupahon nasida, jala na tongtong diharaphon dope jumpang masa na songon i, patupaon ni Debata di ngolu nasida. Lan dope na asing, dipatudos do musu ni bangso i songon ulok, na manggombarhon bangso na hona bura (terkutuk), alana ia ulok ima sada binatang na terkutuk. Lobi sian i dope, musu nasida gabe mandilat orbuk na marlapatan angka jolma na mangulahon na so gabeak (terhina) jala halak na lea. Dohot hata na asing, ganup musu ni bangso Israel, ima bangso na hona bura dohot na lea situtu.

Apala na umbagas dope, diparhatopot bangso Israel do paboa angka musu nasida sasintongna ndada holan musu ni bangso i, alai sekaligus do musu ni Debata. Laos molo dung jumpang tingkina muse, masa ma hamubaon. ima ro be ma angka musu nasida hian tu Debata, huhut marhatopothon Ibana do Tuhan (Bdk. Filipi 2: 10 - 11).
　
3. Tuhan Jesus Parholong na lumobi (18 -20).　

Sekitar 3 taon na salpu, hea do sada pesawat madabu laos lonong tu laut. Sahat ro di tingki on, ndang jumpang dope bangke ni pesawat i, songon i nang saluhut panumpang dohot kru ni pesawat i. Tudoshon i ma pangidoan ni bangso Israel, asa dibahen Debata tindakan asi ni rohaNa taringot tu dosa (ulaon na manirpang dalan na denggan) dohot pangalaosion (Ind. Pelanggaran yaitu dosa yang bersifat pemberontakan) ni bangso i. Asi ni roha ni Debata dihirim roha ni bangso i, asa saluhut dosa dohot pangalaosion nasuda direongkon tu laut na umbagas (Ind. tubir laut).

Ndada olat ni i, ia asi ni roha ni Tuhan i, lobi sian angka debata na asing. Ianggo angka debata na asing, ingkon jolo bahenon ni angka na mangido i do angka sombaon (sesajen), asa berhak na marsomba i mangido. Hape ianggo Tuhan Jesus, ndada ala na binahen ni jolma na denggan umbahen na ro Ibana, baliksa Ibana gabe korban laho humongkop jolma. Laos saluhutna i masa, ndada na mangalului sangap Ibana, alai ala naung dijanjihon Debata hian do sangkap haluaon i tu si Abraham, si Jakob dohot si Ishak. Nang pe mose jolma i di angka padan naung niihotna tu Tuhan i, ianggo Tuhan i ndang olo muba ndang olo mose di padan naung niwarihonna. On ma deba sian holong ni roha ni Debata na pinatupana tu bangsoNa, na andul marasing sian angka sombaon na asing i.
　
III. Panimpuli

Di bagasan sabulan na bagas jamita di hita marojahan "……Gogo ni tangiang ni angka partigor…." Alai sotung sala mangalapati ojahan on. Alana ndada ala ni tangiang ni partigor i umbahen dipamasa Jesus angka na marragam i, alai na sasintongna nasa partigor sai dipargogoi huhut diajari Jesus do martangiang (Ind. Bukan doa orang benar yang membuat Yesus bertindak, tetapi Yesuslah yang menggerakkan orang benar untuk berdoa).

Nunga nania lelengna diparhatopot halak Kristen paboa tangiang ima hosa (nafas) di ngoluna. Molo tahangoluhon do pandohan on, sasintongna ndang adong be jumpang di halak Kristen na so diboto martangiang. Alana ummaol do manahan ndang marhosa (menahan tidak bernafas) sian na tongtong marhosa (terus bernafas). Alani i na masa sasintongna, ndang na so boi (bisa) sasahalak martangiang, memang na so olo (mau) martangiang (bukan tidak bisa berdoa tapi tidak mau berdoa, sebab kalau seseorang mau berdoa, pasti Tuhan memampukan dia berdoa)

Molo tangiang ima hosa (nafas), pataridahon ia hosa ndada holan diantara paru-paru sahat tu parnianggoan, alai sasintongna di sandok mudar, na mengalir di sandok pamatang i, disi ihut do hosa/udara. Lapatanna, molo martangiang hita, na marlapatan do i na taloas do Tuhan Jesus masuk tu sandok pamatangta, molo tatangianghon keluarganta marlapatan do i, italoas Jesus masuk tu saluhut keluarganta, molo tatangianghon hurianta, bangsonta dohot negaranta, marlapatan do i, itajou Jesus masuk di Hurianta, di bangsonta dohot di negaranta.

Tangiang ndada na imbaru di ngolunta, ndada na maol ulahonta, ndada na arga tuhoronta. Alai nunga gabe si partangiang na tigor hita ? Martangiang ima basa-basa naung nilehon ni Jesus Kristus, laos gabe parhiteanta do i manghatindangkon pambahen ni Debata, huhut gabe dalanta mansoarahon angka na ringkot di ngolunta. Taingot ma saluhut do tangiangta di tangihon Tuhan i, asalma na tapangido i laho pasangap Debata. Amen.