Bahan Jamita Bina Warga Bulan Mei 2009

Jamita Minggu Jubilate
Tgl. 03 Mei 2009

( Pesta Olopolop 82 Taon HKI )

Nats : Jeremia 31 : 7 - 14

Pdt.Dr. Burju Purba
Parhobas di kantor Pusat

Olophon Hamu ma Denggan Basa ni Jahowa

Panurirang Jeremia tubu hira-hira saratus taon dung Panurirang Jesayas, i ma hira-hira di abad papituhon andorang so Kristus. Dipillit Debata do ibana gabe Panurirang hirahira di taon 627 andorang so Kristus. Mangula do ibana hirahira 40 taon, sahat tu hadadabu ni Harajaon Juda, hadadabu ni kota Jerusalem, sahat tu na tarbuang bangso i tu Babel. Ndang dohot anggo Panurirang Jeremia di buang tu Babel (Jeremia 39:11-14), alai diboan bangso Israel angka na tinggal (na so dohot tarbuang) do ibana tu Tano Misir, jala marujung di Tano Misir do ibana (Jeremia 43-44). Sada halak Panurirang na gok parungkilon do si Jeremia alani ulaon na i.

Gumodang do panurirangon ni Panurirang Jeremia na maminsang. Dipinsang ibana do angka panurirang pargapgap na so sinuru ni Debata, alai tongtong manurirangi (Jer.23). Marulakulak do dipaingot ibana dosa ni bangso i na manghorhon uhum ni Debata. Ima dosa na manomba debata na leban (Jer 2), dohot angka pangarupaon (ketidakadilan sosial) na niula nasida (Jer 22: 13-19). Hea do ibana ditudu penghianat, ala disosoi ibana bangso Juda menyerah tu bangso Babel (Jer 27), hape asa malua do bangso i dibahen na disosohon ibana i, ai mansai holong do rohana di bangso na i, ima bangso Juda.

Alai, nangpe gumodang maminsang panurirang Jeremia, adong do tongtong barita las ni roha, barita olopolop disuriranghon ibana. Disuriranghon ibana do bagabaga ni Debata na paulakhon bangso Israel tu tano Palestina (tano na sida) dung masa habuangan Babel, jala pajongjong "padan naimbaru" dohot bangso i (Jer 30-33). Di bagasan padan naimbaru i, pasingkopon ni Debata ma "pardomuan-Na na sumurung dohot bangso i, songon naniuarihon-Na tu ompu nasida Abraham". Deba sian padan na imbaru i, i ma jamita di minggunta, minggu olopolop di Huria ni Tuhanta HKI sadarion, mandok: "Olophon hamu ma denggan basa ni Jahowa".

1. Ibana do Debata namanobus hita gabe bangso-Na (7-9).

Dipapatar Debata Jahowa do bangko-Na, ima, naumbalga do holong ni roha-Na tu hita jolma sian rimas-Na. Hinorhon ni dosa pangalaosion ni bangso Israel, bangso napinillit na i, diuhum Debata do nasida marhite bangso na leban, ima bangso Assur. Diloas Debata do bangso na leban i marhuaso maradophon bangso napinillit Na i, jala dibuang do nasida tu Babel.

Alai, dung hira 49 taon nasida di habuangan i (pembuangan Babylon taon 587-538 andorang so Kristus), dihilala Debata nunga sae be pangajarion i tu nasida. Disuru Debata ma Panurirang Jeremia pabotohon tu nasida, na ro ma Debata paluahon nasida. Debata mandok:" Marhiras ni roha ma hamu...Pangiar hamu ma soaramuna mamujimuji..." (ayat 7). "Ida ma, ingkon Ahu manogihon nasida sian tano na tungkan utara jala Ahu papunguhon nasida sian angka ujung ni tano on rap dohot angka na mapitung dohot na pangpang, na gabegabean dohot pangintubu di tongatonga nasida" (ayat 8).

Hamumulak nasida sian habuangan Babel i tu huta nasida Palestina, ndada alani gogo nasida, alai tung holan alani gogo ni Debata do. Pandohan "na mapitung, na pangpang, na gabegabean, dohot pangintubu, di ayat 8 i, tung tangkas papatarhon asi ni roha ni Debata sambing do na paluahon nasida sian habuangan i. Ai tung boha ma bahenon ni halak na opat ragam on ("na mapitung, na pangpang, na gabegabean, dohot pangintubu), mardalan mulak di dalan na mansai dao i. Alai ala Debata do na paluahon, dohot namanogihon, ro di na manogunogu nasida (ayat 9), ndang tagamon tarsulandit manang hurangan nasida. Debata do napaluahon, laos Debata do namanogunogu dohot namanguluhon nasida mulak tu Tano Pusaka nasida, ima Tano Juda dohot Israel (Palestina).

Songon bangso Israel uju ni panurirang Jeremia, tarbuang ala ni dosa nasida tu Debata, songon i do hita tarbuang di bagasan huaso ni sibolis, haholomon, dohot hamatean ala ni dosa i. Alani dosa i, sirang, jala dao do hita sian Debata. Alai, hinorhon ni holong ni Debata na lam patar di bagasan Jesus Kristus (Joh. 3:16), dipalua Debata do hita sian habuangan i, dipaulak tu abingan-Na. Marhite hamamate ni Tuhanta Jesus Kristus di hau parsilang dohot marhite haheheon-Na sian na mate, dipatupa Debata haluaon i di hita (2 Korint 5:22). Marhite Barita Nauli, i ma Hata ni Tuhanta, dijou hita sian saluhut bangso, houm, sian desa na ualu di portibion, jala dipapungu hita gabe bangso ni Debata (ayat 8), ima Huria i. Di bagasan Huria i, ndang halak na leban be hita di Debata, alai gabe anak dohot boru ni Debata nama hita. Nunga salpu ngolu na buruk, ro ngolu naimbaru (2 Korint 5:17). I do alana, ingkon marolopolop jala marlas ni roha hita songon napinangido ni hata ni Tuhanta di jamita on.

2. Ibana do Debata naumpasupasuhon ragam ni pasupasu di hita (10-14).

Nunga dipalua huhut diuluhon Debata bangso Israel sian habuangan i mulak tu tano pusaka nasida ima Tano Kanan (Juda dohot Israel, manang Palestina). Dung sahat nasida marpungu di tano nasida i, gabe sada bangso namerdeka muse, dibagabagahon Debata do tu nasida ragam ni pasupasu, ima: Debata gabe Parmahan di nasida (ayat 10 ); ndang mandate be nasida (ayat 12); muba ma arsak gabe las ni roha (ayat 13); marlobilobi ma nasida di sipanganon dohot siinumon (ayat 12,14).

Sian on taida, tung na so hasuhatan do asi ni roha ni Debata di bangso napinillit Na i. Ndada holan "derajat" ni bangso i dipatimbo marhite namanobus nasida sian parhatobanan, alai dohot do nang angka na ringkot di ngolu siganup ari disarihon Debata. Diparmahan do nasida asa unang marmara, diapuli do nasida na marsak, diparade do angka sipanaganon dohot siinumon, sahat tahe tu namarlobilobi nasida.

Debata na manobus dohot naumpasupasuhon ragam ni pasupasu tu bangso Israel uju ni Panurirang Jeremia on, laos i do Debata na manobus hita dohot na umpasupasuhon ragam ni pasupasu di ngolunta siganup ari. Ibana do Debata na so hea muba na so hea mose sian salelengna ro di salelengna (Heb. 13:8). Dung dijou, dipillit, ditobus Debata hita gabe bangso nahinaholongan-Na, gabe anak dohot boru-Na marhitehite Tuhanta Jesus Kristus, diboto Debata do, na mardalan dope hita (arak-arakan) manuju Jerusalem naimbaru, i ma Surgo hasonangan i. Di pardalananta on, manang di parlojongonta on, diboto Debata do angka dia ma na ringkot di hita. Diparmahan Debata do hita (ayat 10) asa unang lilu hita, jala asa monang hita maralohon nasa hamaolon na taadopi di pardalanan i. Diapuli do hita uju marsak (ayat 13), diajari do hita asa marlas ni roha hita di bagasan Tuhan i (Pil. 4:4). Disarihon do angka na ringkot di hita, isara ni sipanganon-siinumon, parabiton, dohot angka na asing.

Minggunta sadarion, margoar "Jubilate", na marlapatan: "Marolopolop tu Debata ma sandok tano on". Di Huria ni Tuhanta pe, Huria Kristen Indonesia, minggu olopolop do minggu on. Sadarion, boho ma umur ni Huria ni Tuhanta HKI 82 taon (01 Mei 1927- 01 Mei 2009). Mansai balga do, jala ndang hasuhatan asi ni roha ni Debata tu HKI, tu ParhaladoNa dohot tu RuasNa saleleng na 82 taon on. Alani, tung tama do hita marlas ni roha jala marolopolop mamuji Debata dohot mamaritahon denggan basa-Na sude na. Tadok ma songon nanidok ni parpesalmen i:

" Puji ma Jahowa, ale tondingku,
jala nasa rohangku di bagasan mamuji
goarna na badia i.
Puji ma Jahowa, ale tondingku, jala
Unang tung halupahon denggan ni basana sudena."
(Psalmen 103:12).

Jamita Minggu Kantate

Tgl. 10 Mei 2009　

Nats : I Kronika 16 : 7 - 12

Pdt.Dr. Batara Sihombing
New Havent, Amerika Serikat

Mamujimuji Debata

Mansai porlu do di angka na porsea mamuji Debata. Sada ulaon na so muba do i di angka na porsea laho mamuji Debata di portibion nang di surgo. Ai angka surusuruan ni Debata pe, Serapim, marende mamuji Debata do dipatudu ulaonna di surgo (Yesaya 6:2-3). Antong andar siani, marende mamuji Debata ima sada ulaon na so muba di portibion nang di surgo. Asa domu to goarnni minggunta sadarion, ima minggu Kantate, na marlapatan "endehon hamu ma di Jahowa, disoarahon tu hita saluhutna asa tapuji Debata marhitehite ende pujian. Na marlapaton do on, sude do halak na porsea dipangido marende mamuji Debata. Ido bingkasna siberengonta di hita halak Kristen, molo marpungu hita di Gareja manang di jabu kebaktian, sai tapuji do Debata marhite-hite ende puji-pujian. Antong tangkas ma taboto ia halak na porsea ima halak na mamuji Debata.

1. Debata do sipujion

　Di turpukta sadarion tarida do bingkas na boasa hita dipangido mamuji Debata. Marmula ma on sian pardalanan ni bangso Israel na mangusung poti parpadanan tu Jerusalem. Ia poti parpadananon digoari do tong poti ni Jahowa ala uhum manang hata ni Jahowa do di bagasan poti parpadanani, tarmasuk ma dohot patik na sampulu i. Jadi songon padan do patik ni Jahowa tu halak Israel (1 Kronika 16:15-16). Molo marpadan hita nuaeng di ngolunta sonarion ingkon satia do hita mangihuthon isini padani, molo so satia hita mangoloi padan na tabahen gabe pangose padan ma hita. Jala halak si ose padan mansai porsuk do dijaloi tohapna. Asa molo marpadan hita, satia ma hita mangoloi padan na tabahen. Taingot ma hata ni na tuatua na mandok, "Togu urat ni bulu, togu an urat ni padan." Di bangso Isarel pe, molo dilaosi nasida padan naung jinalo nasida sian Debata, gabe muruk do Debata tu nasida jala uhumonNa do nasida.

　Dilehon Debata pe patik manang padan tu bangsa Israel asa dapotan las ni roha, pasu-pasu, jala dao sian parmaraan do bangsa Israel. Jadi hinauli do na ro sian patik ni Jahowa. Alani do mansai las rohani raja Daud dohot bangso Israel tingki diboan nasida poti parpadanan ni Jahowa sian jabu ni Obed-Edom (1 Kronika 15:25) tu huta ni si Daud, ima huta Jerusalem (1 Kronika 15:26-29). Di ari na sasada on, didokhon si Daud ma, asa dipujipuji nasida Jahowa (1 Kronika 16:7), siala naung dipatudu Jahowa Debata asi ni rohaNa naung paluahon bangso Isarel sian parhatobanan ni Misir, manogu ompu nasida taripar sian parhorsihan, jala pangalehon ni Debata tu bangso Israel tano Kanaan (1 Kronika 16:12-15, 18). Jadi Debata do na parjalo patudu asi ni rohaNa marhite-hite pambahenanNa tu bangso Israel. Mardomu tusi ma gabe dipangido raja Daud bangso Israel pasahathon hamauliateonnasida tu Debata marhite ende pujipujian. Mamuji laho mandok mauliate tu Debata. Mamuji laho pasangaphon Debata. Mamuji laho mangoloi Debata. Jadi mamuji ndang na laho patuduhon na malo marende. Mamuji ndang na laho asa dibege halak　 soarana. Mamuji ndang na laho patudu bakat manang hobby.

　Di sada sisi mansai las do roha ala ditanda do bangso Batak songon halak na malo merende. Alani do mansai godang endenta manang koor molo ro hita tu Gareja marminggu. Marhite bakat na adong di hita marende, boi taulahon ulaonta marende mamuji Debata denggan. Alai sabalikna mansai lomos do roha molo masa angka parendeon di huria na so dimotivasi laho mamaritahon Debata (1 Kronika 16: 8,12). Gabe tarida angka motivasi naasing tingki marende dongan di huria. Isarana, olo ma sipata binege na gabe sundat marminggu anggota ni punguan koor ala so marende parkoori di parmingguan. "Marhua iba marminggu molo so markoor do," songoni hata binege. Hape sabotulna boi do tong ibana marende di parmingguani marhite-hite ende pujian ni ruas. Alai disangkapi ma huroha ingkon ende marhite sian koor do na sabas marende ala dibege dongan soarana. Ujungna hira gabe pamer nama na marende i, hape hata ni Debata mandok na mamaritahon dohot mamuji Debata do hita molo marende di huria (1 Kronika 16:7-9). Jadi ndang laho patuduhon uli ni soaranta hita tingki mamuji Debata. Domu tusi, molo tabahen angka perlombaan koor di huria, porlu manat tapingkiri asa marsangap goar ni Debata. Unang ma gabe tubu late dohot jut ni roha di angka na marende dohot na mamereng. Taingot ma, Debata do sipujion dohot sibaritahononhon molo marende hita mamuji Debata.

　Udutna muse, adong do na porlu tarimangi taringot tu hinamalonta merende di huria. Ala malo jala las rohanta marende, boi do on hira sada kekuatan di hita alai sekaligus kelemahan. Nidok kekuatan ala ndang pola maol di hita laho mamuji Debata di angka acara ni huria na tapamasa. Alai binereng gabe sada kelemahan do tong i, ala holani do binereng program ni huria. Tiap minggu marpungu punguan ina, ama, remaja, pemuda, di hurianta HKI alai godangan binereng holan na marsiajar marende. Mansai jarang do punguanta i didongani acara asa bertumbuh hita di bagasan haporseaon, holong, nang panghirimon. Hape molo tajaha di turpukta sadarion ima di ayat 9 di dok do: "marnonangi ma hamu taringot tu halongangan angka na binahenna i sudena". Dungi di ayat 10-11 muse didok, "ingkon marlas ni roha ma angka na mangulului Jahowa." Sian angka ayat on tangkas do berengonta, ia mamuji Debata ndang na holan marsiajar marende, alai tong do paingot dohot mangalului Jahowa. Lapatanna, ingkon adong do program pendidikan manang diskusi ni haporseaonta taringot tu ulaon nang huaso ni Debata. Asa marhite i lam magodang haporseaon, holong, dohot panghirimonta. Porlu hita marsiajar hata ni Debata. Molo lam togu jala bidang haporseaonta, lam denggan ma hita mamuji Debata ndang holan marhite ende, alai dohot ma marhite ulaon nang pangalahonta di portibion. Antong asa lam simpul jala uli pamujionta di Debata, di samping marsiajar marende, tapangido ma asa tong dohot hita marsiajar hata ni Debata molo marpungu hita di angka punguanta be di huria.

　Songon anggota Gereja Lutheran hita, adong disurathon punguan ni Gereja Lutheran Sedunia (LWF) sada buku taon na salpu taringot boha ma angka Gereja Lutheran laho menghadapi angka gerakan kharismatik na godang mambahen angka ruas gabe bingung (Lutherans Respond to Pentecostalism, 2008, hal. 155). On do didok, Gareja Lutheran ima gareja na mendidik. Ala na mendidik do si Martin Luther uju i, gabe tulus jala didongani Debata si Martin Luther dohot pengikutna laho bersaksi jala berpisah sian Gareja Katolik Roma nang pe dokdok dibolus parungkilon. Alai di godangan Gereja Lutheran tingkion, songon di Afrika dohot di Asia, mansai minim do dibahen program pendidikan manang pembinaan tu angka ruas. Ujungna gabe mura angka ruas i terpengaruh ajaran ni angka kharismatik, pentakosta, dohot persekutuan doa. Jadi asa satia jala mangolu haporseaon ni angka ruas, taharinggashon ma mambahen program pendidikan dohot pembinaan iman di hurianta asa marhite i lam marbungaran pamujionta di Debata.

2. Tapuji ma Debata marhite budaya ni musikta.

　Aha do dipangke bangso Israel marende mamuji Debata? Tabereng ma di 1 Kronika 15:28 songonon, "Jadi sandok Israel mamboan nangkok poti parpadanan ni Jahowa mardongan olop-olop dohot soarani sarune, sordam dohot arbap dipagogo huhut soara ni hasapi dohot tulila". Dungi di 1 Kronika 16: 9 didok muse, "palu hamu ma parhinaloan umpuji Ibana". Jadi marhite alat musik na adong di bangso Israel do ujui dipangido bangso i mamuji Debata. Jala Debata na tahaporseai ima Debata na mangido na adong di hita do. Ndang dipangido Debata hita mangalehon na soada di hita. Jadi ndang marhite alat musik na arga baru tingkos mamuji Debata. Dia na adong di hita, ima tapangke mamuji Debata. Molo ogung, suling, tagading, gitar, dohot na asing do na adong di hita, ima tapangke mamuji Debata. Hape saonarion di huarianta holan organ nama dipangke laho mandongani endenta. Hape molo tajaha hata ni Debata, ndang adong didok organ, alai sarune, sordam, hasapi, tulila, dohot na asing do. Na marlapatan do on, sude do alat musik na adong di hita boi pangkeonta mamuji Debata. Ndang adong na salah di alat musiki, ai benda mati do sudenai. Jolma do na mardosa, ndang hea alat musik mardosa.

　Dipaingot turpuk sadarion hita taringot tu hinajongjong ni Garejanta HKI di mulai nai. Molo tajaha buku sejarah ni HKI na parpudion, (Baja Berpijar, 2007) ditaringoti do disi ia Gereja HKI ima Gareja na mamboan hata ni Debata melekat tu konteks ni ruas. Jadi HKI ima gareja na parjolo sahali di Indonesia memakai alat musik ni ruas laho mamuji Debata, isarana songon gondang, sordam, hasapi, dohot na asing. Molo sian mulana nunga dipungka angka na parjoloi dalan mamuji Debata di HKI marhite alat musik na kontesktual, sai anggiat ma pamujion ni hurianta HKI sahat tu sadarion tongtong lam kontekstual, marhite ragam ni alat musik na tapangke laho mamuji Debata di huriaNa HKI.

　Jadi tapuji Debata marhite ende dohot pangalaho na denggan, ala pambahenan ni Debata na sahat tu hita. Tahatindanghon ma na asi roha ni Debata humongkhop hita marhite naung ro Kristus tu portibion laho paluahon hita sian sumbia ni dosa (Yohanes 3:16). Molo halak Israel mamuji Debata ala naung dipalua Debata nasida sian parhatobanan Misir, hita pe patut pujionta Debata marhite ende dohot ulaonta ala naung malua hita sian sumbia ni dosa dibahen Tuhan Jesus Kristus (Roma 6:23).

Jamita Minggu Rogate
Tgl. 17 Mei 2009　

Nats : II Musa 32 : 9 - 14

Pdt.Amran Simangunsong, S.Th
Pdt. HKI Resort Ujung Batu Rokan

Ditangihon Jahowa do Tangiang Namanghaposi Asi ni RohaNa

1. Sada ulaon na borat do paimaimahon ala bosan do jolma dibahen i. alai nang pe ulaon na borat ndang gabe tatinggalhon angka na ringkot di hita, isarana ndang gabe ditadinghon jolma ruang tunggu pasien tingki naeng majumpangi dokter, manang ditadinghon jolma na melamar karejo kursi ni pelamar ala paimahon alus sian pewawancara. Apalagi ma molo paimahon tona ni Debata, ai ringkot doi di ngolunta. Jala i do na masa di bangso Israel di barita turpuk on ai ndang na holan ditinggalhon Debata ai lam mardosai do bangso i ala ditompa lombu tuangan sisombaonna. Molo dirajumi do nian holong dohot asi ni rohani Debata mida bangso i, mahatophu do nasida manadinghon Jahowa, jala didok Jahowa do: "satongkin i do lupa bangso i tu Ahu naung paluahon nasida sian tano Misir" (ay 8). Ndang tama be dibereng Debata bangso i, jala pasahatonna ma uhum di nasida, ai nunga dipabangkit rimasNa, tumagon nama holan si Musa sekeluarga na mangolu asa manean pasupasu sian Ibana, alai ndang tarjalo si Musa pasupasu i, dielek do Jahowa asa unang lalu rimasNa asa hot pasupasu naung pinarbagana hian marhite ompu ni Israel, ima si Abraham, si Ishak dohot si Jakkob. Ndang gabe mabiar si Musa pasahathon i ala pos do rohana tu Jahowa parasiroha.

2. Tung godang jala balga do dosa ni bangso Israel tu Jahowa, alai sebalikna muse tung godang jala balga do muse holong dohot asi ni roha ni Jahowa na tongtong lambas rohana manesa dosa ni bangsoNa. Ndang tarbilangi be holong ni roha ni Jahowa mulai sian namangharuarhon bangso i jala didongani di halongonan mardalan manuju tano Kanaan. Ditanda Jahowa do bangso Israel na tangkang rohana. Alai alani sahalak na satia, ima si Musa gabe marpangulahi roha ni Jahowa. Si Musa tampil mangondihon bangso i asa unang mago. Ndang na sundat hape bagabaga ni Jahowa holan alani hatangkangan ni Israel. Tangkas do Jahowa mananda bangso na pinillitNa jala tongtong dilehon tingki parasian, antong hita pe bangso na ditanda Tuhan i do, ndang adong na buni di jolo ni Jahowa na marhuaso di sandok portibion. Antong molo dilehon do tingki parasian so tung salpu i holan alani hisaphisap ni daging dohot parange na so ture.

3. Haroro ni si Musa na mangondihon bangso Israel manggombarhon sada uluan na bertanggung jawab do ibana, jala patandahon naung jonok jala denggan do parsaoranna tu Jahowa. Dipangido rohana asa marpangulahi ma Jahowa tu bangso Israel. Adong do 3 dasar na dipasahat si Musa marhite turpuk on, ima:

• Ai nunga dijanjihon Jahowa laho paruarhon bangsoNa sian tano Misir asa tinogihon tu tano Kanaan, so tung gabe sundat janji i holan alani rimasNa
• Gabe las ma roha ni halak Misir molo rimpas sude bangso Israel alani uhum ni Jahowa DebataNa. Jala lam dao ma annon halak na asing manghaporseai Jahowa, Debata ni Israel, ai parrimas situtu do hape tu bangso na pinillitNa.
• Nunga dijanjihon Jahowa muse tu ompu ni Israel ima: si Abraham, si Ishak dohot si Jakkob namamasumasu dohot patorophon pinomparNa.

4. Sude dasar i na patuduhon hasatiaon ni si Musa do tu Jahowa ndada na naeng maralo tu lomo ni rohaNa, alai naeng patuduhon tanggung jawab do ibana demi reputasi ni Jahowa maradophon sude bangso dohot demi Israel na gabe sentral haporseaon tu saluhut bangso di portibion.

5. Holong dohot asi ni roha ni Jahowa mangatasi rimas dohot uhumNa. Sasintongna tama do nian hona uhum bangso i ala balga jala godang do dosa nasida naung mangalo patik 1-2. Alai holong do roha ni Jahowa jala diingot Ibana angka padan naung diuarihon i. Molo sai dirimangrimangi do turpuk on boi do manggombarhon hatangkangon ni halak Kristen nuaeng on na sai olo mangulahon dosa di sude aspek ni ngoluna. Nunga godang nian angka rambu dohot peraturan alai tong do ndang mabiar. Alai tahilala dope nuaeng holong dohot asi ni roha ni Jahowa na tongtong mangalehon tingki parasian di hita. Antong unang ma lemba jala tarlalap hita disi tatuju ma asi ni roha i jala gabe bangso na satia ma hita mamuji dohot pasangaphon Ibana songoni di angka ulaonta naeng ma gabe pamujian di Ibana.

6. Songon naung dipatuduhon si Musa tanggung jawab na tu bangso israel, naeng ma nian hita pe gabe jolma na bertanggung jawab. Godang do pemimpin nuaeng on na so bertanggung jawab, holan na mamingkiri diri sandiri jala dipasombu marhasusaan angka ruasna hira anak ni manuk na so marina. Ingkon ringgas do hita mangondihon angka na tagomgomi, secara khusus tu keluarga dohot tu dirinta sandiri, ai boi do hita gabe pemimpin di dirinta sandiri. Ringgas ma hita mangido di bagasan tangiangta di bagasan pos ni roha, ai asi do roha ni Jahowa di angka jolma na pasahathon dirina di bagasan ias ni roha. Amen.

Jamita Pesta Parningotan Ari Hananaek

Tgl. 21 Mei 2009　
Nats : Heber 1 : 3 - 8

Pdt. Ance I br. Simanjuntakl, S.Th
Pandita HKI Res. Sipahutar 2

Kristus do Anak Ni Debata Napinatimbo Jala Marhuaso

I. Patujolo

Ia surat Ibrani on disurathon sasahalak tu angka halak Kristen Jahudi na maringan di Kerajaan Romawi hatiha i. Halak Kristen Jahudi sai sungkun-sungkun taringot haporseaon dohot ngolu. Songon halak Kristen generasi na paduahon, nasida porlu mangantusi taringot tu halobian ni Kristus (keunggulan Kristus). Panurat ni Surat Ibrani naeng patoranghon ia Jesus Kristus Anak ni Debata. Jesus Kristus do na gabe puncak ni hataridaon ni Jahowa (Penyataa Diri Allah). Ibana do na manompa saluhutna. Molo tung pe masa angka parungkilan dohot hasusaan alani mamparhatahon haporseaon, diingotma parungkilon ni Kristus nagabe sitiruon. Adong sungkun-sungkun na gabe sipingkiran ni huria ima :

• Didia do titik temu ni pangungkapon ni Debata (Wahyu Allah) tu angka ompu na parjolo dohot pangungkapon ni Debata (Wahyu Allah) tu huria marhitehite Kristus?
• Ise do sasintongna perantara: surusuruan do manang Kristus?
• Ise do na utama: surusuruan do manang Kristus?

Mangalusi sungkunsungkun ima Surat Ibrani disurathon.

II. Hatorangan Ni Turpuk
1. Ayat 3-4

Di ayat 1 dohot ayat 2, panurat manggoari 4 hal na porlu: parjolo: ima taringot Debata do mula ni pangungkapon (Allah adalah sumber Wahyu), paduahon: objek ni pangungkapon (wahyu) ima angka ompu na parjolo (nenek moyang), patoluhon: pangungkapon (wahyu) nunga marulang-ulang dipasahat melalui maragam cara. Napaopathon: Debata patandahon dirina marhite Jesus Kristus. Nang pe dipatandahon Debata diriNa sian na robi marhite angka panurirang alai puncakna ima Jesus Kristus. Di surat Ibrani on khususna pasal 1 disurathon do taringot tu halobian (Keunggulan) ni Kristus ima:

- Pangungkapon (wahyu) marhite Kristus tumimbo do sian nenek moyang.
- Lobi marmulia do Kristus sian surusuruan. Halobian ni Kristus: ala Ibana do Anak ni Debata na gabe pewaris ni saluhutna jala Ibana do sitompa saluhut (Heb.1:2). Ibana do panondang, wujud (gambar) ni Debata na menopang saluhutna, manobus dosa ni jolma, manggohi bagabaga (Heb.1:3).

2. Ayar 4-5
Di ayat on membandingkan Hadebataon ni Kristus sian surusuruan. Halak Kristen Jahudi jotjot membawakan Hadebataon ni Kristus sian surusuruan. Di halak Jahudi surusuruan digombarhon songon on: Kesaksian ni padan na robi taringot surusuruan na mandok surusuruan ima ciptaan na lebih berkuasa sian jolma (Mzm. 103:20; 148:2-5). Marhite na disuru Debata, Surusuruan sering mangurupi, melindungi manang paluahon umat ni Debata (Kej.19:11, Mzm.91:11). Surusuruan disuru Debata pasahathon kehendakNa tu jolma (Dan 7:16, Za:1:9).
- Konsep dohot sikap ni halak Jahudi pada zaman ni Tuhan Jesus. Injil na 4 i halak Jahudi adong hubunganna dohot surusuruan (Mat.1:20, Luk.1:26-28, Mat.2:13, Mat.2:19-20, Mat.26:5-3 dna)
- Pengalaman ni halak Kristen abad permulaan dohot surusuruan.
Apostel mengalami mujizat taringot tu surusuruan na paluahon nasida sian hurungan (Kis.5:19, Kis.8:26). Adong do sebagian halak nalilu nanaeng marsomba tu surusuruan (Kol. 2:8). Alai surusuruan setia tu Debata jala menolak parsombaon tu ibana (Why. 22:8-9). Secara khusus di surat Heber on dipatorang ia surusuruan ingkon manomba Debata (1:6). Surusuruan ima pelayan ni Debata (1:7). Surusuruan ndang marhuaso di siamun ni Jahowa (1:13), surusuruan na melayani na porsea nanaeng malua (1:14).

Perbandingan Hadebataon Kristus sian Surusuruan.
Hadebataon ni Kristus lebih unggul sian surusuruan :

1. Perbandingan goar: sian mulana nunga ditetaphon mewarisi saluhutna. Ibana do Anak ni Debata, molo surusuruan holan sebagai hamba, ndang layak mewarisi na adong (Heb.1:4-5).
2. Perbandingan Penyembahan : Kristus do penguasa ni saluhut gabe menerima penyembahan (Heb.6:7).
3. Perbandingan kekuasaan tahta : Kristus do Debata tahta kekuasaanna hot do salelengna. Suruan ima hamba tanpa tahta, tanpa kuasa (Heb.1:8-9).
4. Perbandingan ni namaompa dohot na ditompa Kristus ima na manompa alai surusuruan na ditompa (Heb.1:10-12)
5. Perbandingan antara na monang dohot na gagal. Kristus ima na monang sian hamatean, sian haporsuhon, sian parporangan surusuruan olo do talu tu setan (bdk Judas 9) ala surusuruan i sebagai hamba (Heb.1:13-14).

III. Panutup.

Kristus do Anak ni Debata, nunga dipasahat tu Ibana nasa huaso na di banua ginjang dohot na di tano on (Mat 28:18). Ibana do na paluahon hita sian dosa. Ingkon naeng ma tangkas panandaonta di Ibana. Ibana do na dipatimbo Debata. Ibana do Debata na ro tu portibion. Kristus do Tuhanta na tumaon na bernit holan alani dosanta. Na manaek tu surgo hundul di siamun ni Debata Jahowa na patandahon Ibana do namarmulia. Amen.

Jamita Minggu Exaudi

Tgl. 24 Mei 2009
Nats : 2 Raja 20 : 1 - 7
Pdt. Togos Sinaga, S.Th
Pdt. HKI Resort Jakarta II

Ditangihon Jahowa do Tangiang ni Namanghaposi Ibana

I. Patujolo.

Ditangihon Debata do soara niganup naro tujolona dibagasan haporseaon dohot hapolinon. Minggu sadarion ima Minggu Exaudi (tangihon au), namarlapatan ia Debata satia do mangalehon asi dohot holong ni rohana tuangka namanghaposi Ibana. Hizkia sada raja di Juda dinamasa parsahiton renge pola didok si Jesaya ia ibana nalaho mate nama, alai dihaporseai rohani si Hizkia do taringot tu denggan basa ni Debata, jala tangi do Ibana dijoujou ni ganup naro tu Ibana dibagasan haporseaon. Ndang mansadi si Hizkia tumatangis ala didok nalaho mate nama ibana alai laos dison ma tarida ndang dialang Debata holongNa tu si Hizkia. Di natumatangis ibana gabe dilehon do nagabe alus ni ilu (tangiang) nai. Sada do pangidoan ni si Hizkai asa marningot Debata di nadenggan nabinahenna nasailaon, jala ido gabe haluaon dohot hangoluaon do ibana, jala saluhut ngoluna naeng pelehononna laho patupa nadenggan diangka bangsona. Lapatanna, dipangido raja Hizkia pe asini roha sian Debata ala naeng patupahon nadenggan dope ibana disaluhut Juda, jala hapolinon ni rohana ido mambahen Debata patupa halongangan diibana gabe tamba umurna 15 tahun.

II. Hatorangan

Hizkia ima sada halak raja namanggomgomi di tano Juda, jala didok do ibana sada raja nadaulat (saleh) dinamangulahon harajaonna. Tarida doi ai dipaias ibana do joro ni Debata sian pardebataon sileban, jala diparhatopot rohana do Jahowa do tongtong namangurupi dohot namandongani ibana mangulahon saluhutna i. Molo tung adong hamaolon diadopi ibana dinalaho mangula ulaoni, laho do ibana martangiang tu Debata asa dilehon dalan haluaon dibangsona ( Patud.19:1). Jala marhitehon haporseaon dohot joujou ni ibana tu Debata gabe malua do nasida sian mara dinaro Sanherib (raja Assur) laho marporang dohot nasida. Ditingki harajaonna ndang olo ibana sarombang dohot raja naparjolo sian ibana, ima: raja Ahaz namambahen parugamoon ni Israel ternoda marhite napamasuk ajaran (pengaruh agama kafir) tu parugamoon ni nasida, jala dipatupa raja Hizkia do laho paiashon joro ni Debata sian ragam ni pardebataon sileban (patud. Jes.2:6). Hasatiaon ni Debata dohot pangaramotionNai tarido i dipardalanan ni ngoluni Raja Hizkia ai dilehon jala tangi do Debata disaluhut pangidoanna.

Ayat 1-2. Dibagasan jamita sadari on, dipaboa do taringot tu namasa dingoluni raja Hizkia, dinaro parsahiton pola naeng mate, jala Jesaya sada halak ni Debata paboahon tu ibana ia sahitna i ndang be malum jala didok asa rade ibana managam hamatean. Dison ma diuji haporseaon dohot panghaposionna tu Debata, asa nian Debata olo marningot saluhut angka nadenggan napinatupana, jala mangalehon hamamalum huhut ganjang ni umurna dope. Dipaboa si Jesaya "pature ma bagasmu, ai naeng mate ma ho, ndang tagamon mangolu be" (ay.1). Mamereng sian naro tu ibana ima sada halak ni Debata, berarti tingkos do nalaho masa i, asa ditanggapi si Hizkia doi songon sada hasintongan ai naposo ni Debata do namangkatai dohot ibana. Alani ido umbahen natariluilu ibana martangiang tu Jahowa ( patud. Hana martangiang tu Debata di bagas joro laho mangido hatubuan ni anak 1 Sam.1:1-28 ) asa dipalua ibana sian hagogotan i.

Ayat 3 " Oe ale Jahowa sai marningot ma ho namarpangalaho i ahu diadopanmu, dibagasan hasintongan dohot punia ni roha ". Hizkia paboahon jala mangalualuhon saluhut na dirohana tu Debata asa ditimbang Jahowa nalaho sipatupaonNa, jala barani pe si Hizkia mandok namasa on tu Debata ala dioparhatopot rohana do angka nauli binahenna nasailaon tu Debata. Hasatiaonna ido namangonjar haporseanna mangido asi niroha sian Debata, ai ndang tagamon tarurak angka siula hadengganon di diadopanNa. Ndang haruar dope si Jesaya sian huta i, nunga ro hata ni Debata paboa naditangihon do tangiang ni si Hizkia, ai didok Debata do "pamalumonku ma ho, di ari patoluhon i tarbahen ho ma nangkok tu joro ni Jahowa" (ay5). Ndang dialang Debata holongna tu si Hizkia, jala Debata selalu bertindak cepat dohot tepat waktu ai ndang dipasombu Ibana halak naporsea i biahaton mangadopi ngoluna. Alani do laos dibagasan pangalehonon ni Debata, dibahen ibana do sada bukti panghaposionna molo dung malum sahitna ingkon parjolo do ibana laho tu joro ni Debata, laho mamuji dohot martangiang tu Jahowa (patud Jes.38:9-20). Parbue ni tangiangna i dilehon Debata ma umurna 15 taon nari jala boi dope ibana patupa angka ulaon namambahen sonang harajaonna (dipatupa si Hizkia do nagabe las ni roha ni bangsona) ndang ahut ibana dingolui ai boi dope ibana papungu arta laho pahot harajaonna dohot nagabe bohalni bangsona tu angka ari nalaho ro.

III. Aplikasi.

Jotjot do molo adong hamaolon dingolunta, ndang taboto be mamingkiri jalan keluar, gabe holan ilu nama tarpatupa hita. Hizkia mangadopi sada parmasalahan natung borat ai dipaboa nalaho mate nama ibana, jala porsea do ibana dinamasa i, ai halak ni Debata do napaboahonsa. Tarida do panghaporseaionna di Debata, dipergumulhon ibana do namasa i dibagasan tangiang pangidoan tu Debata asa dilehon Debata asinirohaNa tu ibana. Didok dijamita on si Hizkia mangidohon asa marningot Debata diangka nadenggan pinatupana nasailaon, jala disi do ibana dialusi Debata. Minggu sadarion digoari Exaudi (Tangihon au), jala naboi berengonta dijamitaon, ia halak natinangihon ni Debata ima angka halak naung patupa angka nadenggan dingoluna do. Sotung tagam rohanta nasai tongtong Debata tangi ditangiangta molo ndang hea tapatupa angka nadenggan, jala sada janji (nazar) ni si HIzkia dingoluna molo dilehon Debata saluhutna; tu Debata do ibana jumolo mandok mauliate. Molo dihalak Batak mandok mauliate nunga ragam tujuanna, ima napatudu haboion (keberhasilan) jala somal dipio ima angka sisolhot, molo tu gereja holan hata mauliate pe. Marhite jamita on boi do sungkunonta dingolunta molo adong dapot hita sada keberhasilan (pasupasu) nunga hea hita jumolo laho tu joro ni Debata martangiang jala mandok mauliate tu Jahowa?.

Minggu sadarion, molo naeng tangihonon ni Debata do hita dingolunta, tapatupa ma nadenggan asa tangi nang Debata ditangiangta siganup tingki. Tangi do Debata dihita asalma ro hita tu Ibana dibagasan roha namagopu dohot haporseaonta paboa Debata do silehon ngolu nang las ni roha dihita. Dibagasan jamita on di patuduhon do bagasni holong ni Debata natongtong mangalehon hangoluan ni jolma i, ai disangkapi Debata do naung gabe jolma naporsea hita hinorhon ni pambahenan dohot haluaon napinatupana i.

Diombas parpudi on, godang do hamaolon nang angka situasi na boi mambahen hita mandele dohot dao sian Debata, alai dipangido jamita on do ganup halak naporsea naeng gabe halak sipartangiang (jala porsea dihuaso ni Debata) asa malua sian hausaan (hamatean) na sai onggop dijolonta. Sude siparungkilhononta tapasahat ma tu Debata asa dialusi hita, ai ditangihon do tangiang ni halak naro tu joloNa asal ma porsea hita dihagogoon napinatupaNa i, jala aithon ma Debata disandok ngolum asa dipalua ho sian ragam ni hasusaanmu.

Jamita Minggu Pentakosta 1

Tgl. 31 Mei 2009
Nats : Ul. Apostel 10 : 44 - 48
Pdt. Darwin Saragi, S.Th
Pendeta HKI Res. Kota Bani

Songgop do Tondi Porbadia di Hamu

I. Patujolo
Sada barita na mansai paltak dihatahon di buku Ulaon ni apostel i, i ma taringot "HARORO NI TONDI PARBADIA", na di goari "pentakosta" (pat. Ulaon 2:1-13). Hata pentakosta marharoroan sian hata Gorik, pentakoste, lapatanna: ari palimapuluhon. Paretongan pentakoste gabe ari palimapuluhon dienet do i sian kalender ni halak Israel songon na pinatorang di buku 5 Musa 16:9-17. Di mulana najolo, anggo diaturan dohot pangantusion ni ugamo Jahudi, ia pentakoste i ma di tingki pangunjungi ni Pesta Paskah jala boi do tong goaran pesta i gabe "pesta gotilon". Somal do ditingki pesta sisongoni, sude halak Jahudi mamboan pelean sian hasil gotilon: naparjolo sian ganup porlakna, sada sian anak parjolo ni angka pinahanna dohot sipanganon manang siinumanna naung diaturhon ni angka malim ni Jahudi. Angka sisongon i ma dipamasa uju i di ugamo Jahudi.
Alai anggo hita halak Kristen nuaeng, ndang apala maniru secara harafiah be hasomalan pesta na pinatupa halak Jahudi i. Alai haroro ni Tondi Parbadia do na tahalashon, molo pe tong tagoari pesta di ari sadarion gabe Pesta Pentakosta, songon hata buku ende No. 108: ………Ai nuaeng ma jumpang Ari parningotan, pentakoste i; haroro ni Tondi do, i ma Tondi Parbadia, masuk tu huria. Tondi Parbadia i do na mangajari parhalado ni huria i pasahathon hata ni Debata gabe taruli pasupasu saluhut pangisi ni huria i.
II. Hatorangan Turpuk
Dung songgop Tondi Parbadia tu si Simeon Petrus, gabe marsahala situtu do parjamitaonna, mambahen jolma na torop gabe tarholomong. Marhite Tondi i, tarpatupa ibana do nang angka tanda halongangan, dipamalum do na marsahit margoar si Eneas, na sarion, naung peak dipodomanna, lelengna ualu taon. Eneas, dipamalum Jesus Kristus do ho; hehe ma ho, duduk ma podomanmi! Jadi manigor hehe ma ibana (Ulaon 9:34), dipangolu do naung mate margoar Tabita manang Daekas; didompakhon ma bangke i, didok ma : O Tabita hehe ma ho! Jadi dipabidok ma matana; dung i na niidana si Petrus i, hundul ma ibana (Ulaon 9:34).
Siala ni panghatindanghon ni si Petrus taringot tu Tuhan Jesus, gabe gok Tondi Parbadia ma na torop i, ndada holan tu halak Jahudi alai dohot do nang tu halak sipelebegu. Halak sipelebegu na nimaksud diturpuk on, ima diluar ni halak Jahudi. Dihata Gorik halak sipelebegu didok dengan istilah "ta ethne", manang di hata Heber didok ma i goyyim, na marlapatan angka bangso na diluar halak Jahudi. Dison taida ndang siida bohi Debata lao mangusehon TondiNa. Rade do Ibana mangusehon TondiNa tu angka na olo manjanghon Tondi i. Songon na masa tu si Kornelius. Sian on idaonta ndada ala ni parbangsoon ni sasahalak umbahen na tau ibana manjangkon haluaon, alai ala ni haporseaonna dohot sihol ni rohana di haluaon na sian Debata.
Dung songgop Tondi Parbadia tu saluhut na jinamitahon ni Apostel Petrus sude ma nasida marlas ni roha mamujimuji Debata di bagasan Tondi. Di na sangombas i, torop ma halak na tardidi tu bagasan goar ni Tuhan Jesus. Ulaon ni Tondi Parbadia mambaen angka na torop i olo didihon di bagasan Goar ni Tuhan Jesus Kristus. Molo nunga tardidi dibagasan Goar ni Tuhan Jesus Kristus na marlapatan ma i na rap partohap di haluaon na sian Jesus naung hehe jala manaek i, rap manjalo Tondi Parbadia, dongan sahaporseaon dibagasan goar ni Kristus rap parjambar dihaluaon na sian Tuhan Jesus

Marhite namasa i boi ma dohononta, parjolo gabe patar do tarida kebebasan ni Debata sandiri laho mangusehon sileholehonNa i nang tu halak na di luar ni bangso Jahudi, na so masuk tu sejarah haluaon na pinatupa ni Debata tu Israel (keselamatan secara khusus) mamungka sian angka ompunasida. Paduahon, ndang adong sada cara dipatuduhon dison dibahen si Kornelius raphon donganna lao mangido dohot manjalo Tondi Parbadia i, ai ulaon jala inisiatif ni Debata sandiri do mangusehon TondiNa tu halak nasiasianNa.
.
III. Sipahusurhusoron

1. Tondi Parbadia mangalehon huaso tu angka na porsea laho manghatindangkon haporseaonna, ima Jesus Kristus Anak ni Debata. Marhite haroro ni Tondi Parbadia ari Pentakosta gabe margogo angka sisean i songon sitindangi manghatindanghon harajaon ni Debata. Songon panindangion Ap. Petrus marhite Tondi ni Debata gabe margogo ibana lao manghatindangkon Jesus Kristus marhite jamita nang patupahon angka tanda halongangan. Hinorhon ni panindangionna di huaso ni Debata gabe torop jolma mangihuthon Kristus. Gabe sude marlas niroha mamuji Tuhan i, ala naung songgop tu nasida Tondi ni Debata.

2. Ari pentakosta sadari on naeng tangkas rajumanta na dibasabasahon do tu hita Tondi ni Debata. Molo songgop Tondi Parbadia tu hita namarlapatan do i Debata do na mangatur ngolunta. Ingkon　tandi do pangalaho dohot ngolu ni angka jolma naung ginohan ni Tondi Parbadia. Ndang be mangolu holan mangasahon pingkiranna; ai nunga dirajai Debata do ngoluna. Molo taida dipartingkian on, torop do jolma na mandok "naung digohi Tondi Parbadia" ibana, hape ndang dirajai Tondi ni Debata ibana. Ndang dipataridahon parbue ni Tondi i dibagasan ngoluna. Halak naung ginohan ni Tondi Parbadia, ingkon mian ma ibana di Debata, jala Debata mian di ibana. Molo nunga taparhatutu mian Debata dibagasan ngolunta, taparbuehon ma parbue ni Tondi i. Songon na didok Ap. Paulus tu huria Galatia; alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon (Gal. 5:22). Alai molo mian di ibana parulaon ni daging, isarana, parmainanon, hahodaron, parmusuon, parbadabadaon, rimasrimas (pat. Gal. 5:19-21) ndang tama i mandok naung songgop tu ibana Tondi Parbadia. Ala ni i, tapangido ma tongtong asa saor Tondi Parbadia tu hita laho pasidingkon angka pangalaho sisongon i, jala marparbuehon angka pangalaho na denggan.

3. Sude do hita tarjou asa gabe parjambar di haluaon na pinatupa ni Tuhan Jesus. Na disuru do hita songon apostel Petrus, marbarita nauli, ndada holan tu naung mananda Jesus, alai lumobi tu halak na so mananda Ibana dope, songon na pinatupa ni Petrus tu si Kornelius. Ndada pola lomos rohanta disi, ala taboto Jesus Kristus do na marsuru hita, jala Tondi Parbadia do na paborhathon hita tu ulaon i. Ala ni, di na marningot hita di hasasaor ni Tondi Parbadia, taingot ma na so singkop jala ndang sidung dope taulahon tona ni Tuhan Jesus Kristus, i ma patubegehon holong ni roha ni Debata, asa sude jolma manjangkon Kristus gabe Sipalua ibana. Unang ganggu hita dihuaso ni Tondi ni Tuhan i. Amen.