Evangelium Edisi Juni - Juli 2009

Jamita Minggu 4 dung Trinitatis

Tgl. 05 Juli 2009

1 Musa 1 : 11 - 13

Pdt.Eben Hutasoit, S.Th

Pendeta HKI Resort Panei Tongah

Argahonma Panompaon ni Debata dibagasan Ngolum

1. Debata do manompa pangisi ni portibion

Sada sungkunsungkun na tung mansai bagas do molo didok: Ise do namanompa portibion? Hira sude ugamo di sandok portibion mambahen sada rumusan/pamingkirion taringot tu panompaon. Isara ni halak Batak rupani, tagan so hakristenon dope adong do konsep na appit taringot tu panompaon ni portibion. I ma Ompu Mulajadi Nabolon. Alai dung masuk hakristenon diparhatopot halak Batak do paboa Debata do sitompa portibi on dohot nasa isina. Laos songon i ma na jumpang di halak Israel, sada pangantusion na tangkas taringot tu panompaon i. Marhite pangajarion ni angka malim dohot panurirang gabe diparhatopot bangso i do Jahowa do na manompa portibi on. Dipatubegehon do i dohot angka ende (Psalm 33:6,9). Sahat tu pudian ni ari gabe masuk do tu horong ni ibadah, jala gabe sada pokok theologi na so boi tarsirang sian panindangion ni haporseaon ni bangso Israel. Jala mangihuthon angka pande bisuk ni Padan na robi, panompaon ni portibi on i do pamuhai ni sude angka panindangion na adong di buku na badia i. "Israel memuji penciptaan dunia sebagai tindakan, di mana Allah mulai menyatakan dirinNya dengan FirmanNya yakni selaku pencipta, Raja dan Terang seluruh dunia". Dihatindanghon nasida do paboa Debata do namanompa saluhut portibion dohot nasa isina. Laos tarida do i dipamuhai ni buku na badia i. "Dimula ni mulana di tompa Debata ma langit dohot tano on (1 Musa 1:1).

Mangihuthon pande bisuk Padan Narobi, ia barita panompaon ni jolma adong dua bagian rumangna ima: Parjolo: ima di 1 Musa 1-2:4a, dapot idaonta disi paboa di mulana i ditompa Debata langit dohot tano halongonan jala holom dope di atas lung i, jala mangareapreap dope tondi ni Debata di atas angka aek i. Dung i di mulai Debata ma mangula/manompa laho pasingkophon angka pangisi ni langit dohot tano marhitehite hataNa, didok: "Dung i manghuling ma Debata: jadi ma ho..", jala jotjot do jumpang hita hata na mandok:"Jadi nunga denggan di ida Debata". Diari paonomhon ma ditompa Debata jolma. Dung sun onom ari mangula Debata manompa nasa na adong, di ari papituhon maradian ma ibana, di pasupasu jala di parbadia i ma ari papituhon i (2: 1-3). Paduahon: Ima di 1 Musa 2:4b-7; tong do dimula i di tompa Debata langit dohot tano di tingki holongonan jala holom. Alai di na paduahon on, awal mula kehidupan adalah ketika ada kabut naik keatas dari bumi dan membasahi. seluruh permukaan bumi. Martimpul ma uap sian tano i, gabe dibornohi sandok tano on. Ditingki tano on dibornohi ombun disi nunga adong be tandatanda hangoluan, alana nunga di tubuhon tano i be angka ragam ni suansuanan.

2. Parhaseang ma angka na tinompa ni Debata.

Di turpuk jamita on tung nalnal do pambahenan manang pangulaon ni Debata di angka na tinompaNa i. Jotjot do didok tano i gabe ina (ibu) na pasoranghon sude angka na manggulmit, mangolu di portibi on.Tano i do inganan hatubuan ni angka suansuanan ni Debata. Alani do manang aha pe na adong di bagasan tano i ingkon unduk do tu hata ni Debata. Gabe pasupasu do angka na tinompa ni Debata di bagasan ngolu ni jolma i, isarani aek, suansuanan dohot tano, ala nunga malua jolma i sian bagasan dosa. Sebalikna, gabe hasusaan do paroon ni angka na tinompaNa i di angka jolma na mian di bagasan dosa. Jotjot jolma i mangolu di bagasan hamongkuson laho mangahut sude tu dirina angka na tinompa ni Debata di portibion. Ujungna gabe madabu jolma i tu bagasan hasusaan. Molo didok parhaseang na tinompa ni Debata ndada na marlapatan gabe marlolomo jolma i menegai aha na tinompa ni Debata. Alai sebalikna, asa dao do jolma sian usaho, ulaon na manegai siklus dohot ekosistem ni portibi on.

Mamparhaseang na tinompa ni Debata, ingkon jaga, ramotanta do i asa gabe pasupasu dibagasan ngolunta. Angka suansuanan, tano, aek i do na gabe bohal ni ngolu ni jolma i di pardagingon. I do alana jumolo di tompa Debata portibion dohot pangisina baru jolma i. Asa rade do sude angka na tinompaNa i laho parhaseangon ni jolma i, asa unang gabe anturaparon jala laos mate. Molo tung rade pe i sude ndada na gabe so mulaulaon jolma i, alai ingkon torus do karejo, marpingkir huhut pauliulihon na tinompa ni Debata. Alana uju madabu jolma i tu bagasan dosa nunga didok Debata hian: ingkon hir hodukmu laho mangalului sipanganonmu. Panompaon ni Debata ndada sarupa i dohot sada masin na manghasilhon/manghaluarhon godang bilanganna alai sarupa mansam na, gabe mambosanhon. Alai Debata marragam do di tompa. Asing rupana, asing parbuena, jala asing do pembiakanna. Molo denggan di tompa Debata sasude naparlapatan do i ndang hadodoan jala ndang hasuhatan pambahenan ni Debata di nasa na tinompaNa i. Sian i boi taida panompaon ni Debata ima patupahon na denggan, boha asa uli jala denggan situtu. Alai sega do na denggan alani dosa, sega parsaoran ni jolma tu Debata, parsaoran ni jolma maradophon donganna, sega parsaoran ni jolma tu hadirionna sandiri, parsaoran ni jolma maradophon portibi on manang lingkungan hidup. Hape tung uli situtu do dibahen Debata pangisini portibion asa adong pangkeon, hangoluhonon ni jolma i dibagasan ngoluna. Tung di haholongi Debata do angka na tinompaNa i, hita pe ingkon haholonganta do nang panompaon ni Debata i. Marhitehite panghaholongitta di na tinompa ni Debata i gabe sada pamujion do i di adopanNa. Asa ndada boi hita marlomolomo sambing tu isi ni tano on. Ingkon rajumanta do ia hita dohot tompaan na asing i rap arga do di jolo ni Debata. Jadi ingkon denggan do bahenonta parsaoranta dohot pangisi ni portibion. Tano i do ingananta, jala na mangalehon dalan ni ngolunta marhite ragam ni isi na.

Ulaon ni angka na porsea do patureturehon dohot pauliulihon manang aha pe na tinompa ni Debata di portibi on. I do songon tanda na marsitutu jala na marsihohot do hita laho manjagai, mamparhaseang pangisini portibion. Jotjot hita laho mambuat angka isi ni portibion ndang marpardulihon kelanjutan ekosistem alam. Ndang tarajumi molo holan na mambuat do taboto sarupa do i na manegai dalan ngolu ni angka sundut na umposo. Alani gabe tarrimas ma Debata marnida hita. Molo gotap parsaoranta dohot Debata silehon hangoluan i, gabe patubu hamatean ma. Jala jolma na mangalului ngolu, ingkon luluanna do i holan tu Debata si lehon hangoluan i. Songon na nidok ni Parpsalmen i :olo ditabunihon Ho bohiM, holsoan ma nasida; ditait Ho ma hosa ni nasida, monding ma nasida, jala mulak nasida tu orbuk nasida hian" (Psalm 104: 29) Dilehon Debata do mandat tu jolma laho mangarajai saluhut na tinompaNa. Ditogihon Debata jolma i laho paojakhon ibana tu porlak Eden asa dipaulaula jala di ramoti. Molo dilehon Debata pe mandat tu jolma i ndada laho parlomolomohonon na, alai sipertanggungjawabhonon na do i tu Debata silehon mandat i. Mandat yang diberikan adalah bukan untuk merusak alam semesta tetapi mengelolah atau mengusahakannya serta memeliharanya untuk kelestarian alam dan kesejahteraan manusia. Karena keistimewaan tersebut maka krisis ekosistim (Lingkungan hidup) adalah merupakan tanggung jawab manusia sebagai yang dipercayakan untuk mengolah dan memelihara ciptaan. Mansai arga do hape jolma i diadopan ni Debata. Nalnal do muse haargaonta i dipatuduhon Debata marhite Jesus kristus, ai ingkon mate Jesus laho humongkop hita. Didok apostel Paulus tu huria Korintus "ai arga do hamu di tobus; dibahne i pasangap hamu ma Debata marhitehite dagingmuna dohot marhitehite tondimuna, ai Debata do nampuna i". Antong parhaseang ma di bagasan ngolum angka na tinompa ni Debata, marhitehite na jaga, ramot hita di sude na tinompaNa i asa adong dalan ni ngolunta dohot pinomparta ro di ari sogot pe. Amen.

Jamita Minggu 5 dung Trinitatis

Tgl. 12 Juli 2009

3 Musa 25 : 1 - 7

Pdt.H. Purba, S.Th

Pendeta HKI Resort Siantar III

Tapangke ma Tingkinta Pasangap Debata

I. Patujolo

Nasa na mangolu na jinadihon ni Debata na aktif bergerak olo do loja. Jala dang maol olo mate ala ni halojaonna i. Suang songoni do nang jolma molo ganup tingki karejo dang olo istirahat gabe olo ma maradian salelengnilelengna. Ala ni i, mandok mauliate ma hita tu Debata naung manjadihon saluhut jala namanglehon dihita jolma, ima ari paradianan ima ari sabbat dohot taon sabbat i. Di partingkian na mansai maol on mangalului parngoluan, godang do jolma dang diboto be maradi jala mamangke tingki naung pinasahat ni Debata tu hita jolma on. Alani na mangalului arta haportibionon. Godang do jolma dang diulahaon be hombar tu hata ni Debata, ima ari paradianan naung diparbadiai Debata. Tung tangkas do taboto Debata na manjadihon langit dohot tano dohot nasa isina dibagasan onom ari, jala maradian do Ibana di ari papituhon i. Gari Debata maradian, lam ma hita jolma na dibagasan ketidak sempurnaan on dang olo loja? Marhite turpuk on porlu naeng botoonta diado lapatanni ari sabbat i.

II. Hatorangan niturpuk.

Marhite turpuk on tubu do sungkunsungkun tu hita, aha do lapatanni sabbat on? Molo di Padan na robi dohot di padan na imbaru sabbat on ima ari na papituhon di son ma maradi angka parkarejo, baen dalan pasangap Debata (bnd. Patik IV). Hata sabbat di buat sian hata heber lapatanna, "ari papituhon" manang dibahasa latin di dokma sabbatum. Napaduahon, tubu do sungkunsungkun boasa di ari minggu halak kristen marminggu manang maradi sian parkarejoanna, hape takkas do ia ari papituhon i ima ari sabtu do i? Hombar tu naung niulahon ni panurirang na parjolo didok (Ula, 20:7 (tangkas dibahasa indonesia); I Kor. 16:2), halak Kristen marminggu di ari minggu alani ari minggu, ima ari haheheon ni Tuhan Jesus sipalua jolma sian saluhut dosa i. Jala on do na tahalashon dohot napaingothon hita diari haheheon ni Tuhan i jala tama hita marlas ni roha disi. Jadi marhite on, nungga taboto boasa hita marminggu di ari minggu.

Na mangihut muse porlu naeng botoon ta ia ari sabbat I memiliki dua makna:

1. Ari sabbat ima ari paradianan di ganup jolma na porsea di Ibana. On ma tingki naung pinasahat ni Debata tu saluhut jolma I, dungkon karejo dibagasan onom ari manang onom taon.

2. Ari sabbat marpardomuan do i tu diakonia sosial. On ma sebagian sian padan narobi namanaringoti diakonia sosial. Hatorangan naparjolo patorangkon ima taringot tingki pamujian tu Debata. Na mangihut ima na marpardomuan tu pangaradotion tu saluhut jadijadian ni Debata manang secara holistik. Disuru Debata do jolma i mulaulaon dibagsan onom ari manang onom taon. Jala ingkon maradian dibagsan sadari, ima ari mingggu. Di tingki on ma hita papungu gogo dohot patenangkon pikkiranta, asa margogo hita mangula diari na mangihut muse.
Ndang dihalomohon Debata jolma i karejo ganup ari, alai dipasahat do tu hita tikki paradianan. Ala ni I ta pakke ma tikki naung nilehon nai tuhita ganup marsadasada. Unang songon namasa di Jepang, na godang nasida marujung ngolu ala ni loja ni nasida karejo, didok ma on workkoholik. Alani i, unang ala ni sadari di nalaho mempertahankan ngolu on, gabe malah sebalikna, gabe hatop marujung. Asa i do asa didok Jesus ai na marhamaolhon ngoluna, ngolu ni i do na mago sogot, alai nasumeahon ngoluna alani Ahu ido jumpangan ngolu sogot (Mat. 10:39). Namarpardomuan tu sabbat on ima ari pangaradotion di saluhut jadijadian ni Debata, molo parjolo di patorang taringot tu hadirion ni jolma i, sonari taringot tu jadijadian ni Debata diluar diri ni jolma i, ima taringot tu pangurupion tu saluhut jolma humaliang hita naso boi dope dapotan mangan dohot angka hal na asing, napatut boi urupanta. Naeng nian taruli saluhut jolma na adong ditongatonganta, dipasupasu naung pinasahat ni Debata tu hita. Jala porlu botoonta ndang ingkon sude nataula i panganonta, ingkon marsileanan do hita ganup marsadasada songon napinangido ni Debata sian hita. Saling berbagi dalam wujud nyata diakonia sosial yang diperintahkan Allah kepada kita adalah implementasi kasih kita kepada Allah secara nyata.
Marhite taon sabbat on diajari hita manghaholongi donganta jolma marhite pambahenan. Songon natarsurat i na mandok, hamu angka anaha unang ma hatanta dohot dilanta manghaholongi, naeng ma marhite pambahenan dohot hasintongan (I Joh. 3:18), ari manang taon sabbat on marlapatan do on mangalehon tingki tu tano asa subur, gilokgilok pengurai asa mangolu laho mengurai tano i asa subur. Jadi adong masa pause di tano i, dang tapaksa jala dang manontong hita laho mangula tano i. Molo taulahon sisongonon dang gersang be tano i jala ndang be tercemar hinorhon ni pupuk kimia dohot bahan-bahan kimia na lain.

Ditingki on marak do begeon ima tanaman organik namamangke pupuk alamiah manang pertumbuhan alamiah. Saluhut na on ingkon dukungonta dalan mangaradoti ekosistim hidup ni nasa na mangolu di portibion. Alani i marhite turpuk on, asa taradoti jala taulahon naung pinatikkon ni Debata tu hita saluhutna. Ai nasa naung sinuru ni Debata tu jolmai marpanghorhon doi tu nadenggan saluhut na.

III. Panimpuli.

1. Taulahon ma nasa naung pinatikhon ni Debta tu hita
2. Taradoti ma, ima ari sabbat i dalan laho mamuji dohot pansangap goarNai
3. Taradoti ma ari sabbat dalan mangaradoti saluhut namangolu na adong di tano on.
4. Ndang ingkon sude na ni ula ni tanganta ingkon panganonta alai ingkon boi ma hita berbagi dohot dongan ta jolma.
5. Nunga jumolo Debata mangalehon tu hita, ala ni i talehon ma tu dongganta.

Jamita Minggu 6 dung Trinitatis

Tgl. 19 Juli 2009

Parjamita 5 : 9 - 11

Pdt.Charles M.E. Siregar, S.Th

Pendeta HKI Resort Huta Tinggi

Silehonlehon ni Jahowa do Hamoraon

I. Patujolo

Hamoraon ima arta manang sinamot na gabe hak milik ni sasahalak. Godang do halak ala ni pangonjar ni haporluon dohot nahinirim, gabe holan arta manang sinamot (hepeng) nama dipingkiri; beha do asa godang artana; manang aha pe diula, manang aha pe dipingkiri holan hamoraon (arta, sinamot) do di roha nang pingkiran ni jolma i.

Hape Apostel Paulus mandok, "Ai urat nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina" (I Tim.6: 10). Jala Parjamita (Hbr: Qohelet) mandok tung so marguna do hamoraon jala na holong roha di hamoraon (arta, sinamot), ai ndang tagamon gabe parsaulihononna i molo gabe dipardebatahon do.

II. Hatorangan

Ringkot do arta, sinamot di ngolunta di hasiangan on. I do tutu ! hombar tu falsafah di hita halak Batak, ima Hasangapon, Hagabeon, dohot Hamoraon. Sada tujuan hidup do hape hamoraon i, ima asa mamora ngoluna. Jala tangkas do dipandohan umpama Batak na mandok, "Tumbur ni pangkat ma tu tumbur ni hotang, manang tudia pe hamu mangalangka, si tusi hamu dapotan". Unok ni pandohan i asa gabe dapotan hepeng, nampuna hepeng na godang, si jama hepeng; mararta, mamora ngoluna manang tudia pe mangalangka.

Tung pe tujuan ni jolma i asa mamora, alai ndang gabe tunduk jolma i tu hamoraonna i. Ai arta, sinamot na adong di hita boi do gabe hatoban na burju, alai boi do i gabe induk na jahat (pat.Jes 10:15). Lapatanna, arta, sinamot na adong i gabe ulaulanta do i. Jala sipangkeon do nasa ulaula; saguru di hita do mamangke ulaula, ima hamoraonta i.

Molo gabe roha hepengon (na holongan di arta, sinamot) jolma i, ima urat nasa hajahaton / dosa. Gabe mardebatahon arta ngoluna, gabe hatoban di sinamot ibana. Manang aha pe siulaon, ulahononna do i asal ma dapotan hepeng, tamba artana. Manangko, korupsi, mangemur, marmihimmihim dohot martahitahi na roa pe rade ibana mangulahon holan asal ma tamba arta, sinamotna (hamoraonna).

Hape ndang gabe parsaulian i di jolma na mora na so sian dalan na sintong, na so patut gabe pangomoanna arta, sinamotna i. Ai hamoraon i sian Tuhan Jahowa, Pardengganbasa na sumurung. Nunga diaturhon TUHAN haroroan ni arta, sinamot marhite basabasa-Na i tu ganup hita jolma hombar tu lomo ni roha-Na. Jala tung pe godang arta, sinamot ni sasahalak; tongtong ndang adong boi di parsaulihon jolma i, ala tongtong godang halak na mamparsaulihon (manganhon, mamangke) hamoraonna i. Jala ndang tarpasuda manang olo pasudahon halak na mora i molo dung mamora ibana, baliksa holan manambai artana, sinamotna i do di roha nang pingkiranna, gabe holan paidaida hamoraonna do ibana disi.

Hamoraon, ima arta, sinamot na gabe hak milik sasahalak. Ndada salah manang mardosa halak molo mararta manang godang sinamotna. Alai gabe salah jala mardosa huhut marisuang sambing do i molo dipardebatahon. Molo ndang marbisuk halak mangalului jala mamangke hamoraonna i, gabe i do na mangalononghon jolma i tu bagasan jea dohot hamagoan. Sahat tu parmodomna pe gabe terganggu, ndang boi renge (sonang) laho modom, alai gabe baisaon do anggo mata ni halak na mora ala holan tu arta, sinamotna i do roha nang pingkiranna.

III. Panimpuli

Parjamita mandok na laho salpu do luhutna jala pangeahion di alogo sambing do na mangeahi hamoraon. Alani i, unang adong na manengahon hamoraonna (pat. Jer 9:22-23), siala ndang tarbahen jolma i manambai manang mangorui arta, sinamot di ngoluna, ai silehonlehon ni Jahowa sambing do i.

Na hinalomohon ni Jahowa sian halak na mora, molo diparhatopot rohana do ianggo hamoraonna i saluhutna marharoroan sian Hamoraon-Na na sian Banua Ginjang. Mamora pe hita siala hamoraon ni Tuhanta do i na mangalehon Basabasa-Na ala asi dohot holong ni rohan-Na mida hita. Molo na mamora pe hita, tongtong tapangke ma hamoraonta i laho mamuji pasangaphon Goar ni Tuhanta Jesus. Ai Tuhanta Jesus Kristus, na mamora hian, gabe pogos ala ni hita, asa gabe mamora hita hinorhon ni pogos-Na i (pat. 2 Kor. 8: 9).
Sude na mandok dirina angka na porsea di Goar ni Tuhanta Jesus, na mamora do ibana di adopan ni Tuhan i. Hamoraonta ndada holan di arta, sinamot na godang, ai molo i na laho salpu, na olo buruk do anggo i. Alai hamoraonta ima, di na satia jala tunduk, mangoloi huhut mangulahon lomo ni roha-Na, tontu jaloonta ma angka basabasa-Na di pardalanan ni ngolunta di hasiangan on,
Ai ndang adong taboan tu hasiangan on, jala ndang tarbahen mamboan agia aha laho ruar. Ai molo adong di hita sipanganon dohot parabiton (arta, sinamot = hamoraon), tahasabamhon ma i jala tama ma tapasahat mauliate ni rohanta tu Tuhanta Jesus laho marsaulihonsa; asa unang gabe so marguna, marisuang hamoraonta i, ima silehonlehon-Na di ngolunta on. Amen !

Jamita Minggu 7 dung Trinitatis

Tgl. 26 Juli 2009

Ul. apostel 18 : 1 - 5

Pdt.Eben Hutasoit, S.Th

Pendeta HKI Resort Panei Tongah

Masiurupan ma hamu Laho Mamaritahon Hata ni Tuhan i

1. Baritahon ma Hata ni Tuhan i.
Somal do di goari buku Ulaon ni Apostel on buku panuratan ni ulaon ni Tondi. Tangkas do i saluhutna digurithon Apostel Lukas di napinasahat ni Tuhan Jesus ulaon i tu angka sisean i (Bdn. Ulap. 1:8). Gogo dohot semangat di angka sisean i laho patulushon ulaon panindangion i ala tung didongani, diajari Tondi Porbadia do. Alani i, saluhut ulaon ni sisean i na mardomu tu panindangion i, tung ulaon ni Tondi Porbadia, jala di surathon do sude di buku on. Alani gogo ni Tondi Porbadia i, tibu jala tung doras do pardalanan ni Barita na uli i tu angka luat di Jerusalem, Judea, Samaria ro di ujung ni tano on tahe.Tangkas do marsiaturan angka apostel i, marsagi di angka siulaon. Apostel Paulus ma gumodang tu luat ni sipelebegu. Ragam do pangalaho na masa di pardalanan ni Apostel Paulus laho pararathon Barita na uli i. Adong do na mamolus las ni roha, alai laos adong do mamolus arsak ni roha. Adong do na ungkap manjanghon ibana tu sada luat. Alai laos adong do na sai manggogo mangalo, manggunturi jala martahi na jahat tu Apostel i, dohot sangkap asa unang rarat nian didok rohana Barita na uli taringot tu Jesus Kristus.
Di deba luat tung hira dihasiholi nasida do haroro ni Apostel Paulus laho mamboan Barita na uli i. Dung dipillit jala dipabangkit Debata do si Paulus gabe naposona. Dung dipillit, dipabangkit ibana gabe naposona sai torus do ibana manontong mian jala manghangoluhon hata ni Debata. Hirim do roha ni si Paulus marnida huta Korintus, ala di bege ibana nasailaon barita ni huta Korintus mian jala mangolu dibagasan hata ni Tuhan i. Didok ibana mauliate tu Tuhan i ala panjanghonon nasida di hata ni Debata. Alai di pudian ni ari di bege si Paulus ma barita ni halak Korintus naung mian dibagasan halumlamon (Bdn. 1 Kor 2:2-3). Hinorhon ni i ma di patuduhon si Paulus holongna tu huria Korintus, naeng nian di parmahan jala di tiroi nasida marhite hata ni Debata. I do ala sai digogohon borhat mangebati huria Korintus.

2. Sisada Ulaon ma Hamu.

Dung tolhas si Paulus tu luat Korintus so panagamanna jumpang do ibana dohot halak naporsea Tu Jesus Kristus i ma si Akwila dohot si Priskila na sian huta Pontus. Ditinggalhon nasida huta Roma i ma siala parenta Kaesar Kaludius (94 M) na mandok sude halak Jahudi ingkon bungkas sian huta Rom. Parentaon di suarahon Kaisar ala adong gangguan di huta Rom taringot tu halak Kristen. Ra, boi do dohonon sarupa na masa on songon na masa di bangsonta di taon 1998 uju masa reformasi. Torop halak mandok asa sude bangso na asing bungkas sian Indonesia, isarani halak China asa holan angka penduduk asli mangingani bangso on. Marhitehite parjumpaan ni nasida i, gabe sisada tahi nasida laho pararathon barita na uli i tu halak Jahudi dohot Junani. Molo sisada urdot, sisada ulaon nasida marhite parange nang panghation tontu sahali lam godang ma bilangan ni jolma di na laho tumangihon huhut mangulahon hata ni Debata. Sai di ganup tingki dohot inganan do di baritahon nasida hata ni Debata tu angka na torop i. Tung dihaposi nasida do molo sada nasida laho marbarita na uli lam tu ampitna, murana do hata ni Debata tarjalo ni na torop i. Jala molo nunga adong asa dua halak tontu sahali laho mambahen pagabahan taringot tu barita na uli i nunga ummura.

Tung marasing do tu angka naposo ni Tuhan i di ari parpudion. Godang nuaeng naposoNa i molo pajumpang angka parbalanjoon, politik na ma di hatai. Nunga sipata lupa idaon manghatai taringot boha do hararat ni barita na uli i. Na deba lam persaingan do di lului, ndang mian di bagasan hasadaon laho mangulahon ulaon parbarita na ulion i. Hape na porlu boha do angka na porsea i sada, sangkambona laho patolhashon barita na uli i. Si Paulus sai diusahahon ibana do laho manopot, patolhas barita na uli i tu ganup jolma. Ai tangkas do di parhatopot ibana utang na do i tu Debata molo ndang dibaritahon barita na uli i. Diparhaseang ibana ganup tingki laho marbarita na uli. Ndada holan marhite hata sambing alai dohot do marhite parulanna ima na martonun ibana dohot keluarga ni si Akuwila. Sian i taida ndada holan marhite hata marbarita na uli parulaon. Parulaon i do sada panindangion paboa na mian do hata ni Debata di bagasan hadirion na. Ai pangalaho i do gabe jamita, jamita i do pangalaho i. Molo didok sisada ulaon ma hamu, namarlapatan do i: ingkon rap marhobas, mangaradoti, marsiurupan manarihon angka na ringkot di hasasar ni barita na uli i tu liat portibion. Diusahon si Paulus dohot si Akuwila do tongtong di tongatonga ni ulaonna songon laho patotahon tu halak Jahudi dohot Junani paboa Jesus i do Kristus. Alana tung mansai lipe do pangantusion ni nasida na salelengon taringot tu Jesus siboan haluaon.Halak Jahudi mandok: hasesaan ni dosa, pasupasu dohot haluaon boi do i didapot, ditapu marhihite na marsaor (hubungan badan) sahalak baowa dohot parompuan. Hape hasesaan ni dosa, pasupasu dohot haluaon holan sian Jesus Kristus do i tapuon
ni jolma i. Ndang adong haluaon na asing so dungkon sian Jesus Kristus.

2. Masipaleanan Roha ma hamu

Mansai tangkas do diantusi apostel Paulus sude pangalaho na tubu di tongatonga huta Korintus, nang di hadirion ni angka naposoNa i. Songon jolma nasida, manang songon dia pe haburjuonna, tongtong boi tarsulandit tu dalan na so dihalomohon roha ni Debata. Alani do di porluhon sada hasadaon laho mangkobasi ulaon ni Tuhan i. Molo dapot do di tongatonga ni ngolu ni naposoNa i hasadaon tontu sahali nasida nunga boi marsitungkoltungkolan manang aha pe hamaolon di adopi. Marhitehite na marsipaleanan roha gabe dapot ma sada konsep pelayanan na terarah. Ala nunga boi nasida marsitungkar pingkiran. Hape godang do sian naposaNa i naso olo marsipaleanan roha laho manghobasi ulaon ni Tuhan i. Godang sidalian. Godang deak ni roha na, jala nunga jotjot marsiboan roring na, lehengna naposaNa i di tingki saonari on. Godang naposoNa i nunga sai holan mammon dipingkiri molo marbarita nauli. Nunga gabe dianggap sada persaingan, hamaloon ulaon marbarita na uli i. Ulaon marbarita na uli sada pengabdian do i di adopan ni Debata. Lapatanna, ndang maretong untung manang rugi di ulaon parbarita na ulion i. Alani i do ulaon marbarita na uli i, ndang adong perbedaan kelas. Parhuaso manang rakyat biasa, na mora manang na pogos, tuan manang pangurupi, sude do on dijou Jesus Kristus laho mambarita nauli. Alai boha do bahenonta laho paposhon roha ni jolma asa tartait mangihuthon jala manghangoluhon hata ni Debata. Songon na ni ulahon si Paulus maradophon halak Korintus dung ro si Silas dohot si Timoteus. Ala marsipaleanan roha do nasida lam margogo situtu do si Paulus manghatindanghon Jesus i do Kristus na gabe Mesias na ro tu portibi on paluahon jolma i sian pardosaon. Molo nunga mian dibagasan hasadaon jala tubu roha na marsipaleanan tontu sahali nunga boi be marsagi di angka ulaon, songon na pinatupa ni Si Paulus, si Silas dohot si Timoteus. Ala boi do nasida marsiaturan, marsagi tugas tontu sahali lam godang ma bilangan ni jolma mananda dohot mangihuthon Kristus i. Ulaon na borat situtu do marbarita na uli. Alani didok si Paulus: "Marsiurupan ma hamu mamorsan angka na dokdok i; i ma dalan mangaradoti patik ni Kristus" (Galatia 6:2). Jadi sian on tabereng ingkon marsiraingraingan do angka naposo ni Debata di ulaon pabarita na ulion i. Molo so adong kerja sama ni parhalado di tongatonga ni Huria i gabe maol do berkembang sada Huria. Alani tapadao ma angka roha na marsihosoman, na masiboan leheng na di ngolu ni angka parhalado, alai mian ma hita dibagasan hasadaon huhut masipaleanan roha asa tulus barita na uli i tu liat portibion jala las roha ni Tuhanta mida hita. Antong, marsiurupan ma hamu laho mambaritahon Hata ni Tuhan i. Amen