Minggu, XI Dung Trinitatis - 03 Agustus 2008UNANG HO MABIAR DONGANAN NI DEBATA DO HO
GABE SITINDANGINA
Ulaon Apostel 26: 19 – 23
1. Marende : B.E. No.142: 1
2. Tangiang Pamuhai
3. Manjaha Huhut Manangkasi Turpuk
Somal do di goari buku Ulaon ni Ualaon ni Apostel on buku panuratan ni ulaon ni Tondi. Tangkas do i saluhutna digurithon Apostel Lukas di napinasahat ni Tuhan Jesus ulaon i tu angka sisean i (Bdn. Ulap. 1:8). Gogo dohot semangat di angka sisean i laho patulushon ulaon panindangion i ala tung didongani, diajari Tondi Porbadia do. Alani i, saluhut ulaon ni sisean i na mardomu tu panindangion i, tung Ualon ni Tondi Porbadia, jala di surathon do sude di buku on. Alani gogo ni Tondi Porbadia i, tibu jal tung doras do pardalanan ni Barita na uli i tu angka luat di Jerusalem, Judea, Samaria ro di ujung ni tano on tahe.
Tangkas do marsiaturan angka apostel i, marsagi di angka siulaon. Apostel Paulus ma gumodang tu luat ni sipelebegu. Ragam do pangalaho na masa di pardalanan ni Apostel Paulus laho pararathon Barita na uli i. Adong do na mamolus las ni roha, alai laos adong do mamolus arsak ni roha. Adong do na ungkap manjanghon ibana tu sada luat. Alai laos adong do na sai mangogo mangalo, mangunturi jala martahi na jahat tu Apostel i, dohot sangkap asa unang rarat nian didok rohana Barita na uli taringot tu Jesus Kristus. Di deba luat tung hira dihasiholi nasida do haroro ni Apostel Paulus laho mamboan Barita na uli i. Isara ni na tu luat Makedonia. Ndang apala disangkapi rohana hian nian topoton na laut i. Alai di pabotohon Tuhan i tu Apostel Paulus di parnidaan ni haporseaonna, asa taripar tu luat i.
Nuaeng sahat ma Apostel Paulus tu huta Roma. Alai ndang apala sude pangisini huta Roma manjanghon Barita na uli na binaritahon ni Apostel. Bangkona ma i. Ai sai adong do na porsea jala adong muse na so porsea. Angka na so porsea, na so manjangkon Jesus Kristus gabe Tuhan, di tahi ma angka na roa. Isara ni hat nuaeng, diprovokasi, digintali, jala digunturi ma na sahuta i asa manghasogohon haroro ni Apostel paulus. Di patubu ma tuhastuhas na mandok: “Nunga ro tu hita on angka si gunturi liat portibion” (Ulap. 17:6). Jala angka angka sintua ni malim, ro mangalualu tu si Festus dohot tu raja Agrippa asa tung di uhum si Paulus. Didok nasida:”didok si paulus do: Ndang na mardosa ahu manang dompak patik ni Jahudi, nang dompak bagas joro i, nang dompak raja kesar pe” (Ulap. 25: 8).
Alai nang pe songoni hina jorbut ni na masa i, ndada gabe mabiar si Paulus . Ai di parhatopot roha na do, Debata do na mangurupi, margogoihon ibana laho pararathon Barita na uli i. Jala ndang hea si Paulus manirpang sian hata ni Jesus. Ai di parhatopot ibana sude na jiamitahonna i na mardomu do i tu aha na ni ajarhon ni angka Panurirang dohot si Musa. Nunga tung tangkas di boto si Paulus molo mangihuthon Jesus i, ingkon godang do adopan angka ragam ni hamaolon dohot mara na balga. Ai i do Silang ni Tuhan i. Ai marhitehite sitaonon ibana i, ingkon lam tamba bilangan halak na porsea mandapothon Jesus i. Ndang hea si Paulus mabiar mamboan jolma si pelebegu sian haholomon tu hatiuron.
Refleksi/Meditasi.
Debata do marsuru angka parbarita na uli, na dijou jala dipillit Tuhan Jesus Kristus (Joh 15:16). Dipabangkit do nang hita marhite huria tu sadasada ulaon panghobasion laho mamaritahon Barita na uli na sian Jesus Kristus. Ala Debata do marsuru, jala Jesus kristus do na manjou jala mamillit, di lehon tu hita huaso na sian Ibana patulushon parsuruonNa tu hita. I do pos ni rohanta, jala i ma nang haporseaonta laho mangula ulaon na sahat tu hita. Songon i do nang apostel Paulus i. Atik pe hansit do diae, pola dilele jala disusai ibana. Alai ndang hea ibana mandele. Ndang sumurut pangoloionna laho pararat Barita na uli i. Siuduthon ni huria do pamaritahonon ni angka Apostel i sahat tu tingkion. Jala tusi do sitindangi ni Kristus i do hita, i ma angka na porsea di Jesus Kristus. Diondihon jala diurupi Debata do angka naposoNa asa unang marmara, asa tolhas Barita na uli i. Alani i, na so hasundatan do sangkap haluaon na pinatupaNa tu hajolmaon. Sahat tu sadari on tongtong do masa angka sipatupa hagoron, laho paroaroahon halk Kristen dohot asa manogihon torop halak manusai halak Kristen. Dilele, disurbu do bagasna, ditembak, disurbu gareja, dohot sangkap unang rarat hakristenon i. Songon i do na masaa sian mula ni parjongjong ni huria ni Kristus di portibion. Alai songon na taboto lam disusai halak Kristen i, lam martamba do bilangan ni na porsea. Lam rarat do huria, jala lam tu tambana do angka gareja parmingguan marjongjongan. Lam tamba muse parbarita na uli. On ma tanda na sai torus do Debata mandongani huriaNa i, dohot angka jolma na porsea tu Ibana.
4. Diskusi.
1). Boha do pengalaman muna di na laho marbarita na uli i ?
2). Boasa jotjot jolma i mabiar laho manghajongjonghon hata ni Debata?
3). Boasa ndang manahan jolma i molo hamaolon di nalaho marbarita na uli ?
6. Marende Sian B.E. No. 26: 1 – 2 HG (Huhut Papungu Pelean)
7. Tangiang Panimpuli.
EH
Minggu XII Dung TrinitatisTangal : 10 Agustus 2008
Nats : Pilippi 3:12-16
1. Marende : BE. No. 125:1+3
2. Tangiang Pamuhai
3. Manjaha dohot manangkasi turpuk
Hamonangan ni Jesus ido Pandang ni Naporsea
Hatorangan
Tung gok do las ni roha ni apostel Paulus atik pe godang haberniton diae ibana hinorhon ni barita nauli. Na pos do rohana di pangurupion ni Debata. Sada tanggungjawab na balga do di ibana na ingkon rarat barita haluaon i tu saluhut jolma. Pola didok ibana marjea ma au molo so hubaritahon barita nauli i (pat. 1 Kor. 9:16b). Marhite pangurupion ni Debata sahat do barita nauli i tu halak na adong di Pillippi. Marragam do tantangan na ni adopan halak na porsea di Pilippi, hinorhon ni barita nauli i. Alani i, dipangido ibana asa marsada ni roha nasida di laho manghadopi parungkilon jala tongtong marpos ni roha tu Tuhan i.
Margogo pe apostel Paulus patariparhon barita nauli tu huria i nang marhite suratna ndada namanghirim ibana di ngolu tano on alai na manghirim do ibana di banua ginjang rap dohot Kristus i. Di parungkilhon apostel Paulus do unang dapot di ibana na mamintori diri di ganup ulaon nang di panindangionna pe. Jala ndang didok ibana paboa angka ulaon naniulana i naung singhop mai. Lapatanna ndang hea ibana merasa puas di angka keberhasilan naung dicapai ibana, jala ndada keberhasilan duniawi tujuan akhir ni sude nahinalojahonna i.
Di bagasan turpuk on jumpangta sada panindangion ni Apostel Paulus taringot tu ngoluna. Didok : Huhalupahon na dipudingku, hueahi angka na di jolo. Disalpuhon apostel Paulus do sude pangalaho ni angka na marsogohon ibana hinorhon ni barita nauli. Manghalupahon na di pudi i ma na olo manghalupahon hahurangan ni dongan, dohot paubahon sikap na jotjot mambahen sogo roha ni dongan. Manghalupahon na dipudi, ingkon rade do hita manesa angka dosa ni dongan. Songon Debata naung manesa angka dosanta. Ndang be mata abul ni mata, ipon abul ni ipon sandok ndang adong be dendam. Ndang be sai pamalosan tapingkiri maradophon dongan na marsala tu hita, alai naeng tahaholongi nasida. Molo nunga talupahon na dipudingta nuaeng taeahi ma na di jolo. Ap. Paulus memastikan titik pandangna tu jolo, i ma dompak upa hamonangan na sian panjouon ni Debata di bagasan Kristus. Ido inti dohot sasaran ni panghirimon ni halak na porsea di Kristus. Aha do gogo asa tau hita tu si? Holan marhite barita nauli jala ndang manimbil sian i. Molo asing pingkiranmuna taringot tu manang aha pe, nang i pe papataron ni Debata do. Lapatanna, ianggo mutu ni haporseaon ni halak Kristen ingkon do togu jala pita. Tongtong marsihohot di hata ni Debata. Molo tung pe ro marragam parungkilon hinorhon ni barita nauli i ndang jadi ganggu haporseanta. Jala saluhut sitaonon hinorhon ni barita nauli Debata do mamaloshon i. Dibagabagahon Debata ngolu na sonang tu angka jolma na porsea jala tongtong marsihohot di Tuhan i.
Repleksi/Meditasi
Sada bangko na maol longkangan do sian hajolmaon tarlumobi di hita halak Batak, i ma bangko na sai mamintori diri dohot na sai mangalului hasurungan sian dongan. Maol do hita marhatopothon hahuranganta, alai jumotjot do hita holan marningot hahurangan ni donganta maradophon hita, alai ianggo hahuranganta tu dongan mura do i tahalupahon.
Molo holan namamintori diri nama taulahon boi do lam ganggang parsaoranta tu donganta, hasadaon lam dao, jala lam sogo roha ni halak tu hita. Alai molo marsiadu do hita patutoruhon diri boi do lam jonok jala solhot parsaoranta maradophon donganta. Mansai uli do molo lam tatambortambori bangko dohot parngoluon na olo manghalupahon masa lalu, ndang adong balas dendam tu angka dongan na marsala. Alai lam tau ma hita mamereng naummuli tu masa depan. Asa marhitehite parsaoran na denggan gabe jumpang hadameon. Tahalupahon ma angka na marsogo ni roha tu hita hinorhon barita nauli. Jala unang mabiar hita tung pe taadopi ragam ni angka sitaonon i. Nunga jumolo Kristus manaon i saluhutna.
Ngolu ni halak Kristen i ma ngolu na marpanghirimon. Panghirimonta ndada di tano on, alai di inganan na ummuli i ma Surgo hasonangan. Asa boi jumpangta surgo hasonangan i tongtong ma hita mian dibagasan hataNa. Tahalupahon jala tatadingkon ma saluhutna parange dohot ulaon na so tama diadopan ni Debata. Mian ma hita dibagasan Kristus jala tatiop ma hataNa asa las roha nang tondinta.
4. Diskusi
1. Aha do sipatupaon asa jumpang hasadaon jala sepenanggungan ditongatonga ni huria?
2. Boasa tung maol hita mangalupahon hasalaan ni donganta?
3. Songon dia do pandapotmuna taringot pandohan “ia ngolu ni halak Kristen i ma ngolu na marpanghirimon”?
5. Tangiang Pangondianan/Doa syafaat
6. Marende : BE. No. 149 (HG) : 1+3 (ihut papungu pelean)
7. Tangiang Panimpuli
Cln. Pdt. Darwin Agustus Saragi, S. Th
MINGGU XIII DUNG TRINITATIS, 17 AGUSTUS 2008BAHAN ALKITAB: Titus 2: 1-10
1. Marende: B.E. No. 125: 1+4
2. Tangaiang Pamuhai
3. Manjaha dohot Manangkasi Turpuk
Hatorangan
Porlu botoonta saotik haroroan ni surat Paulus on tu si Tirus ima na ampit tu pardalanan ni Apsotel Paulus. Dung sian Makedonia, ditorushon Apostel Paulus ma laho tu Asia na metmet, jala manogihon si Titus bahen donganna, marbarita nauli, laho ma nasida tu Efesus mamolus sian Troas, laho ma muse nasida tu Miletus, sian ima nasida tu Kreta. Di luat Kreta Apostel Paulus rap dohot si Titus jala antar leleng do nasida mian di luat i laos mambahen panogu-noguon partondion, ala nunga deak angka panghorhon ni poda haliluon na mangaelaela bongot tu huria na di Kreta. Borhat ma si Paulus tu Akwila manuat sian huta Korintus. Jala ditinggalhon ibana ma si Titus di Kreta laho manorushon ulaon nasida-patupahon pangajarion tu ruas na adong di Kreta tarlobi dibagasan haporseaon laho mangadopi angka parpoda haliluon.
Di hata aslina bahwa heber hata “poda” ima”mashal” di bahasa Indonesia “amsal”: “in a”, umpama manang ibarat (tudosan), na marlapatan “angka hata poda” sian halak angka na bisuk. “angka umpama manang angka hata na marhabisuhon. Angka poda na diperikop on ima pangajarion dohot panogunoguon na marojahan di hata ni Debata. Surat on Termasuk tu horong parmahanion ima nanaeng mangaramoti huria na adong di Kreta, asa berubah status sian angka pangaradoti gabe songon ama marmudumuduhon angka ianankhonna. Digoari do pangisi ni Kreta angka pargapgap, binatang pamusa, parroha butuha, angka na losok. Tung roa do panglaho nasida, jotjot margabus, mangulahon parmainan, marpangomohon na so ture. Angka naung masuk tu Hakristenon naeng ma muba pangalahona sian hasomalon na adong hian ditongatonga nasida siganup ari. Sandok asa dipajongjong dirina songon halak Kristen gabe tiruan di angka ulaon na denggan, polin dipangajarion, marhatomanon asa maila saluhut angka na mangulahon hajahatoni.
Haradeon na marsiajar dohot na marguru do dalan asa dapot parbinotoan dohot habisuhon nang hapantason sada halak. Marhite na masiajar sian pengalaman ngolu siganup ari, sian alam, sian binatang-binatang asa dapotan parbinotoan, hapistaran dohot habisuhon i. Dipodai do jumolo si Titus asa tong boi ibana muse sebagai pamodai di tonga-tonga i huria na mangadopi angka pangajari naung adong di luat i mamodai natorop marhite angka poda na lipe. Isarana; ajaran gnostisime na mangondolhon parbinotoan ni hajolmaon laho mangantusi hata ni Debata dohot na mangajari asa paholangkon diri sian angka nahumaliang asa lam solhot tu Debata, mangondolhon angka turiturian na so marimpola jala pangajari na so manghangoluhon podana sandiri. Poda siajarhonon ni si Titus I angka ruas i ingkon poda na sintong na marojahan di hata ni Debata asa unang hona insak hata ni Debata jala asa lam badia, marparange na tama diadopan ni Debata.
Namatua naeng marroha na torang manang hidup sederhana asa patut ditiru, daulat manang sehat dalam iman, toman manang bijaksana jala marbenget ni roha. Pangalaho ni natuatua naeng ma na patut sitiruon asa arga ibana jala patut pamodai. Parompuan Natuatua: marparenge na tama in a badia i (hidup sebagai orang yang beribadah) di jabu dohot di luar ni jabu, unang panihasnihas (pemitnah), angka natuatua digoari naung godang pengalaman alani i naeng ma gabe tiruan di hatomanon. Unang hatagian dianggur; angka sipodahon na denggan. Naeng mamodai angka parompuan na umposo, ima manghaholongi angka sinondukna nang mangharingkothon ulaon di jabu unang marlanggelangge. Halak Kristen di parsaripeonna diajari do asa lam ture jala lam denggan gabe sahalak ina na burju. Mengakui jala menghormati parsinondukna songon sada ulu di rumahtangga.
Baoa angka na umposo, asa marhatomanon (menguasai diri dalam segala hal). Angka anak somang asa mangoloi induk simangna be, ima patupahon lomo ni roha ni tuanna. Ndang na mandok asa menjilat manang sipaula, alai in a mangula ulaonna naeng sian las ni roha jala haposan, unang mangahuti (curang) di arta nang di tingki, asa gabe lomo roha ni induk somangna. Dipatuduhon ma nasida haposan di sude asa sandok marsangap poda ni Debata, Sipalua hita, dibahen.
Sude ulaon ni halak Kristen naeng ma gabe hataridaan ni bohi ni Debata. Asa pangalaho hasurahan di angka naung mandok dirina halak Kriten, na paurakhon Debata do ibana disi. Ai ndada be angka paisolat angka na porsea i, alai dongan saharajaon raphon angka nabadia i nama jala dongan sabagas ni Debata.godang do na mangarajumi, ia pasangap Debata ima marhitehite na ringgas marminggu jala marpahean na pantas. Marhite turpuk on disude tingkatan parngoluon: umur, ulaon, parange boi do patuduhononhon na pasangap Debata. Antong marparange na tama ma di jolo ni Debata dohot jolma.
4.Diskusi
Aha do Alana, dia do bonsirna umbahen na mura gale haporseaonta tarlumobi ma mangulahon na tama di jolo ni Debata dohot angka dongan? Aha ma sibahenonta paturehon angka pangalaho na mambahen mura gale haporseaonta?
Di partingkian si saonari on nunga tung mansai maol hita mamoda angka dongan, songon dia nama bahenonta laho mamodai angka ianakhon asa tama nasida laho marnatuatua suang songoni natuantua lam tama tu angka dongan?
Aha do sibahenonta laho manungkoli huhut manumpahi ulaon ni Debata?
6. Marende : B.E. No. 15 (HG)/388: 1+5
7. Tangiang Panimpuli
Cln. Pdt. A.Lubis. S. Th
Minggu, XIV Dung Trinitatis - 24 Agustus 2008PASANGAP MA DEBATA DI BAGASAN NGOLUM
Pangungkapon 14: 6-13
1. Marende: B.E. No. 257: 1 + 6
2. Tangiang Pamuhai
3. Manjaha dohot manangkasi Turpuk.
Sahat tu tingkion, mansai godang do halak Kristen mangarajumi ia buku na paling membingungkan di sude buku di Bibel i, ima buku pangungkapon on. Boasa didok buku Pangungkapon on membingungkan ?. Ala parhataan na dipangke ni si johannes sandiri songon halak na gabe hasahatan ni Pangungkapon i, i ma gaya bahasa na mansai bagas na mengandung hahomion (misteri). Pangungkapon lapatanna ima: “sada haboion laho mangantusi maksud ni pernyataan na naeng masa tu na naeng ro na tinongos tu naposona si Johannes”.
Godang do sian angka punguan ni angka pande bisuk/na pistar mambahen pangantusionna be taringot tu buku Pangungkapon on. Alai sada sian angka punguan i ma: golongan Futuristus, mandok: Ia buku pangungkapon, godang do mamaritahon taringot tu angka na masa di ari parpudi”. Boi ma taida sada kesimpulan, ia buku Pangungkapon on i ma na gabe panurirangion taringot tu na naeng masa. Asa tung marasing do sian pangantusion ni angka punguan na asing na mandok: angka sejarah do isi ni Pangungkapon i ma angka naung hea masa. Pangungkapon on ima na sinurathon ni si Johannes di palau Patmos di tingki harajaon ni Kaisar Domisianus, hirahira di taon 96 Masehi (dung Kristus).
Saluhut do halak na di bagasan paraloan manang perjuangan ni ngoluna naeng monang. Jala molo dung sahat ibana manghamonanghon paraloan, i ma laho mangalo tahitahi dohot bisuk ni setan i. Molo halak na holan mangasahon gogo dohot pangantusion na sandiri do ndang adong na tuk boi monang i. Alai molo dipangasahon do huaso dohot hagogoon ni Tuhan ni laho mandongani ibana di paraloan i sahat ma ibana tu hamonangan na tinuju ni rohana. Marhite sian i do ro surusuruan ni Debata mamboan barita haluaon na pinatupa ni Jesus Kristus tu tano on. Tung di sangkapi Debata do asa sude jolma na tinobusNa i mian jala sonang di bagasan gomgomanNa. Alana Debata do na manompa, mandongani jala na paluahon jolma i. Tung sasada Ibana do tahe sitompa saluhutna jala ingkon marhaporusan tu Ibana do na tinompaNa i.
Marhite sian i do di paingot surusuruan i asa sude jolma “manghabiari jala pasangap Debata, huhut marsomba tu Ibana”. Halak naung mian jala mabiar mida Tuhan i ndang alang di paralangalangan alai ingkon sahat do ro di ujung na, i ma ro di ujung ni ngoluna. Jala uju di tano on dope hita nunga tarida, targombar i di bagasan ngoluna si ganup ari, na tongtong ibana pataridahon hasonangan dohot las ni roha marhitehite parsaoran na rongkin dohot Debata. Ndang olo i mangula ulaonna i so jumolo marparsaoran ibana dohot Tuhanta marhite na martangiang dohot manjahai hataNa. Tardok, na gabe hata dohot lomo ni roha ni Debata do na gabe ojahan ni nasa ulaon manang ngoluna.
Tung tangkas do di hatahon surusuruan i, asa jolma na tinompaNa i ndang manimbil sianadopan ni Debata. Unang nian jolma i gabe marsomba tu angka ganaganaan, binatang, hariara, baringin dohot angka na asing. Ai molo marbalik do haporseaon ni jolma i gabe uhumon ni Debata jala paporsukporsukonna ma jolma i. Tangkas do taboto parholong ni roha do Debata, alai di bagasan holong ni roha i, olo do Debata tarrimas. Alani i do disosohon asa ganup jolma i mangolu di bagasan habengeton, badia, huhut mangulahon patik nang tona ni Debata. Asa molo mangolu hita di basagasan dosa madabu ma hita tu parungkilon, alai molo mian di bagasan Tuhan i do hita tuttu tarpasupasu ma ngolunta.
Refeleksi/Meditasi
Tardok hira sude do jolma umboto ia jambar ni angka na porsea, mabiar, marsomba tu Jesus, i ma hasonangan salelengna do. Alai angka jolma na so porsea i tu inganan hasusaan do ala di pabali, di uhum Debata do nasida. Alai naung pe diboto jolma i, lam martamba dope bilangan ni angka parjahat na so satia, marhabiaran tu Debata. Jala nanung mandok dirina sihuthon Jesus Kristus tongtong do adong na mangolu di bagasan hajahaton. Molo pe sai di hirim rohana inganan na sonang i, alai ndada parjambar ibana disi molo hajahaton do ulaonna. Alai sebalikna ingkon uhumon ni Debata do angka jolma sisongoni. Tung so dihalomohon Debata do jolma i madabu tu bagasan pardosaon. Molo naung ungkap tu si Johannes, na rap dohot Jesus do angka na porsea i, i laho patuduhon tu jolma i tung ingan hasonangan do inganan ni angka jolma naporsea. Alani.Pasangap ma Debata di bagasan ngolum marhitehite na mangulahon hataNa, dungi tapuonmu ma hasonangan sisaleleng ni lelengna”.
4. Duskusi:
1. Boha do pandapotmu taringot tu hata na mandok: “molo nunga godang arta niba, sonang ngolu di portibion nunga gabe parjambar di surgo hasonangan i”.
2. Boha do caratta asa tung dihalomohon Debata ngolunta dohot keluarganta ?
3. Dia tumagon sonang ngolu di portibion alai ndang dohot ho di hangoluan sisaleleng ni leleng na ?. Boasa ?.
5. Tangiang Pangondiano/ Syafaat
6. Marende Sian B.E. No. 281: 1 + 6 (Papungu Pelean)
7. Tangiang Panutup.
EH
Minggu XV Dung Trinitatis - 31 Agustus 2008
Nats : Nehemia 5: 1-8
Thema : Urupi Donganmu Jolma, Unang Pasali (Bantulah sesamamu dan jangan bebani)
Tujuan :
- Asa lam diboto angka Ina tanggungjawabna molo tung dipaloas Debata ibana mararta, marhagogoon, marhasangapon.
- Mangurupi angka dongan na gale dohot na hurangan naeng nionjar ni biar mida Debata.
Marende : Buku Ende No. 277: 1, 3 & 6 (Las situtu rohangku)
Hatorangan:
Molo jumpa ro hamaolon ni ngolu, baik pe i ala ni bencana alam manang alani parmusuon, parsalision (krisis politik) manang pe ala ni krisis ekonomi di sadasada luat manang bangso, sai mura do di angka na deba mangahut paruntungan tu dirina sandiri. Isarana, molo masa bencana alam, godang ma halak na menderita kelaparan ala hurang persediaan ni sipanganon dohot maol manaruhon barang tusi. Di ujungna gabe godang ma marlomolomo manganakkokhon arga, ai sai tuhoron ni jolma ma i sadia pe taho argana asal ma mangan nasida. Suang songon i do molo masa krisis ekonomi, harga-harga barang nangkok ma satimbo-timbona. Di ujungna holan angka parhepeng na godang ma ba boi marusaha (martigatiga), mate ma usaha ni angka parmodal na metmet, gabe lam mamora ma angka na mora, lam marpogos ma angka na pogos. Boi ma gabe marlomolomo angka parhepeng dohot pamarenta di tongatonga ni masyarakat. Songon i ma na masa diadopi si Nehemia dung mulak ibana tu tano Juda laho pauli parik dohot harbangan ni Jerusalem.
Ia si Nehemia tarpillit do gabe sitahu anggur ni si Artasasta Raja Persia. Ibana ima sahalak sian pasipasi ni halak Israel na tinggal di tano habuangan i. Dung diboto ibana naung marbungbungan angka parik ni Jerusalem jala pintu harbanganna nunga ditutung dohot api, jadi lungun ma rohana, tumatangis ibana, margudompong rohana jala martangiang ma ibana tu Debata asa diurupi bangsona Israel. Jadi di na sai surbot panailina di adopan ni raja i, disungkun rajai ma ibana, ai ndang hea songon i ibana dibereng raja Artasasta. Jadi denggan ma dialausi ibana raja i jala dipangido asa disuruhon ibana tu tano Juda laho paulihon huta i.
Dung mulak si Nehemia tu tano Juda, ditingtingkon ibana ma asa sude pangisi ni huta i pauli parik dohot harbangan ni huta Jerusalem. Marsitutu do nasida saluhutna mangulahon parenta ni si Nehemia. Alai tarbege do tu ibana angguk badar ni halak Jahudi ai angka na sangap dohot angka induk ni bangso Jahudi nunga marlomolomo maradophon angka hahaanggina ima pangisi ni huta i. Pola do ingkon gadehonon nasida haumana, porlak anggurna dohot bagasnasida asa boi mangan nasida. Anak dohot boru nasida nunga pola ingkon gabe hatoban jala deba sian nasida nunga mangadop tu halak na asing. Na deba muse ingkon mangurang hepeng bahen garar ni rundo (membayar pajak) tu raja i. Alani ni angguk-angguk ni bangsoi naung sahat tu si Nehemia, gabe dipodai ibana ma bangsoi asa dipauba pangalaho nasida ala ni biar mida Debata dohot ala ni panginsahion ni halak parbegu angka musunasida.
Panimpuli
Panosak ni ngolu na sompit jotjot do i hinorhon ni politik dohot modal na mansai otik. Di ujungna, na jotjot gabe taruhan hidup ima hauma (sumber mata pencaharian), jabuna (inganan parlapelapean), ianakkon (na gabe generasi penerus). Molo pola salah satu sian i ingkon gabe mago, nunga tung parsorion godang i di bagasan ngolu ni sasahalak. Jala muse, molo mago sada pe sian i, tung lam bagas do parhorhonna ai gabe lam tu pogosna ma ibana. Di zaman na lam berkembang on, gabe lam meningkat ma muse persoalan molo marsali hepeng huhut marbunga mansai balga. Molo so ra digarar utang i, lam tu balgana ma utangi marlompitlompoit. Disi pe na boi masa do na pogos, na gale lam tu pogosna. Hape ro muse ma prinsip ni ekonomi, ingkon adong do na manghaporluhon asa adong na paradehon. Ingkon adong do pembeli asa adong panuhor. Memang toho do i, alai hata ni Tuhanta pe mandok: “Tung sura lam marpogos donganmu, lam surut tahe parbohalon di lambungmu, ingkon tolonganmu do ibana, nang halak dagang nang halak paisolat ibana, asa mangolu ibana di lambungmu. Ndang jadi buatonmu sian ibana bunga ni hepeng manang parlabaan na torbang, ingkon mabiar do ho mida Debatam, asa mangolu donganmu di lambungmu” (3 Musa 25: 35-36). Alai sebalikna pe godang do masa, angka halak naung diurupi gabe mansuasaehon angka pangurupion ni donganna, alani i gabe godang halak jora manang maol ungkap rohana mangurupi angka na hurangan. Dibahen i, tung sude do mangonai hata i, nang tu halak na sangap dohot paradongan, nang tu halak na hurangan di ngoluna.
Sungkun-Sungkun Diskusi
1. Mansai godang dope jolma na ungkap rohana mangurupi angka jolma na hurangan. Antong, aha do na mangonjar rohamuna molo tung diurupi hamu angka jolma na hurangan na adong di humaliang hamuna?
2. Marragam bentuk ni pangurupion tu halak na hurangan, adong do dalam bentuk materi (barang, uang) adong non-materi (pendidikan, pelatihan, mangalehon karejo, dll). Dang sai sude halak ungkap rohana mangalehon bantuan materi, songon i nang bantuan non-materi. Boasa maol sasahalak mangalehon bantuan Materi (Uang) jala sebalikna boasa maol mangalehon bantuan Non-materi? Lehon hamu ma jo pandapotmuna hombar tu angka na masa diadopi hamu.