Bina Wanita : Edisi Nopember 2008

Minggu, XXIV Dung Trinitatis
JAGA MA HAMU
Markus, 13:14 – 23


1. Marende : BE. No. 238 : 1 + 3
2. Tangiang Pamuhai
3. Manjaha dohot manangkasi Turpuk.

Torop do sian halak Jahudi na manghaporseai, ia Jesus ima sahalak panurirang (Bdn. Mat. 21:11; Luk 7:16; Joh. 9:17). Dipatangkas pangulaon ni Jesus do Ibana songon sada panurirang. Di suriranghon Ibana do taringot tuhalelengse ni huta Jerusalem dohot ari ni hasiangan on. Masa ma haporsuhon godang jala lam torop angka panurirang pargapgap laho mangaliluhon haporseaon ni torop jolma i. . Lam tubu ma na so so uhum, jala lam holang ma jolma i sian holong ni roha Sada jaminan didok do: jolma na jaga, jala namanahan ro di ujungna do paluaonNa. Dibahen Jesus do gombaran ni hataridaan hinajorbut ni na naneng masa songon patujolo ni ajal ni hasiangan on. Na masa ma hinajorbut ni na so uhum tu inganan na badia i, na mampangkorhon tu ngolu ni hajolmaon, mangaliluhon roha ni jolma i dao sian Debata. Alai Jesus mangalumbahon molo tung masa pe hinagaor ni na jorbut i asa sude jolma i jaga jala dungo.

Tung tangkas do di paingot turpuk on hita, asa hita maporus tu dolok batu na togu ima napinatupa ni Debata (Bdn. Pslm 30:8), alana molo masa hasusaan, parungkilon holan Debata do na gabe haporusan ni hita naporsea manang na boha pe jurbut ni i. Alani angka jolma naung porsea di Debata unang olo be di ihoti, dilohoti arta na diportibion. Jotjot do masa diportibion , molo masa hagunturon jala mangihut ma muse masa hagogoon mangalului pangomoan di dirina sambing. Alani do didok umpama ni halak batak: mandurung di nalitok na marlapatan do i mamangke kesempatan dalam kesempitan. Donganna susa, marsitaonon alai ianggo ibana mangalului pangomoan sian na masa didonganna do. Mamangke tingki mambuat, manangko arta ni dongan molo ro hasuaan sarupa do i na parsidohot do hita disi mangaori jala manusai nasida. Alani do didok: “Na di bilut parginjang ni jabuna, unang ma dialap angka ugasan na di jabui, di na mijur i ibana” (Ay.15).

Somanal hita jolma ndang hea marnasae ianggo arta na dihasiangan on do. Sarupa do i songon na manginum aek ni laut, lam godang ta inum lam mauas. Alani do pola didok: Na di ladang unang ma pola humusor mambuat ulos na di tingki na bahaya situtu. Unang adong istilah paima jo satongkin, sanga dope i, alai bissan adong tingkim malua, palua dirim. Ndang porlu marulos dua manang na bagak, ndang dapot haluaon di Jesus. Alani do hita ingkon mangulahon partangiangon. Martangiang i ma sada jantung ni jolma manjalo sian Debata mambahen mangolu jala margogo di ngoluna. Ai masa ma di partaonan ngali na porsuk dohot halojaon so adong gogo apalagi di partaonan ngali na mangkorhon borat sundat jala borat mangalangka. Manang di ari sabbat mardalan dao, molo ditaringoti muse angka na gabegabean jala panarusan, sudena i manggombarhon adong penghalang, adong na mandokdok i gabe sungkot mangalangka, manang mandapothon Tuhan Jesus.

Refleksi/Meditasi.
Jaga ma hamu, sada kalimat parenta na maralasan jala pasti. Asa ndada holan dipardangingon marungkil di panosak ni hagagaor i alai dohot do nang marungkil di haporseaon. Tubu angka kristus pargapgap, nang angka panurirang pargaggap na manogu roha tu haliluon na mandok, disan, dison do kristus i, i ma na ro sian sibolis (2 Tes. 2:9). Haroro ni Kristus i patar do, ai songon hilap na mullop di habinsaran marnalanala ro di hasundutan. Ingkon sude marnida Kristus i di haroroNa i ndang marsibuni, alai patar do diida saluhut.
Pahot ma haporseaonmu di Tuhan i unang mungilungil, dungo ma unang tarpodom ai nunga di palumba hian i tu hita marhitehite hataNa. Haporseai ma hata i ai do haluaon, haposi Tuhan Jesus i, mudarNa i ma golom. Alani i ulahon partangiangon mangido gogo sian Debata asa adong hasanggupanmu mangalangka, asa adong kemampuanmu humusor molo tung borat parungkilonmu. Alani jaga ma ho, ulahon ma partangiangon asa songop tu ho asi ni roha, asa malua ho sian angka na jorbut i, ai bangso na pinillit do hita.

4. Diskusi.

1. Mansai godang do di ngolunta on na gabe pangambati hita boi marsaor tu Debata. Boha do bahenonta mangalo angka pangambati i, asa boi hita marsaor tu Debata?
2. Di ari na parpudion mansai godang angka ajaran boi mambahen hita tersesat. Boha do bahenonta mangalo angka ajaran, parpoda haliluon i?
3. Molo ro pangunjunan tu ise do hita marsihohot? Boasa?

5 Tangiang pangondianon/Syafaat
6. Marende : BE. No. 230: 2-3 (Papungu Pelean)
7 Tangiang Panutup.

Pdt. Eben Hutasoit, STh (HKI Resort Panei Tonga)

Minggu, XXV Dung Trinitatis
DUNGO MA HAMU
Amos 6: 1 – 7

1. Marende: BE. No. 202: 2-3
2. Tangiang Pamuhai
3. Manjaha dohot Manangkasi Turpuk

Marhite turpuk on ditogihon do hita asa di sude ngolunta naeng jumolo manungkun lomo ni roha ni Debata, jala tatangihon hataNa. Tapangke ma ngolunta on gabe inganan partangiangan mandapothon Debata. Unang adong di partingkianta, hita mencoba mandapot mamang aha pe songon na binahen ni halak na so marugamo laho mandapot manang aha pe. Ala boi masa do ndang manpangkorhon patangiangon tu praktek ngolu siapari, di bahen i do mansai tajom dialo, di kritik si Amos nasa bentuk ibadah na munafik. Na di halomohon Debata masa di tongah-tongah ni bangso i ima: hatigoran dohot hasintongan songon parbue ni partangiangon ni nasida. Alana holan alani hasintongan dohot hatigoran umbahen na di palua Debata jolma i sian angka ragam ni parmaraan dohot hagogoton. Sintuhuna, si Amos mangalo praktek “Kesalehan” ni halak na ringgas tu partangiangan, hape realitas, praktek ni ngoluna siganup ari dao manang dipasiding do Debata nang uhumNa. Mansai torop do bangsoi songon na tingkos berengon ulaon na hape laho manegai, dohot patubu parbolatbolahan do di tongah-tongah na humaliang na.

Boi do di sada partingkian masa pahosing uhum ala ndang marlakku uhum i. Molo masa pe na sisongoni, ndang pasombuon ni Debata kondisi i mardalan torus mardalan. Unang ma hita gabe songon bindorang (Bunglon), na sai manolopi angka na hurang denggan di bagasan ngolunta on. Sai songon siboan dame berengon hape na jat do diualahon. Alai talehon ma dirinta gabe alat ni Debata pasauthon keadilan i marhitehite na tamulai sian dirinta be pataridahon hatigoran dohot hasintonganNa. Molo di hasogohon halak pe nuaengon halak sipamodai, alai halak Kristen ingkon do manghatahon, mangulahon hasintongan i. Molo pe so ditangihon i nuaeng, anggo di tingkina parhatutuonna do na sintongi. Taingot ma, di tingki na nang pe sada bangso disurirangi si Amos, holan sahalak na do manghatahon hatigoran i, alai mampu do ibana merubah keadaan lam tu denggan na. Alani marroha na dungo ma hita laho patupahon hasintongan, hatigoran nang uhum na sian Debata.Unang ma ngolunta on ngolu na bersandiwara, alai ingkon na tongtong do marojahan tu hata nang uhum ni Debata. Ipe ingkon saut do hasintongan i marhitehite hita di lingkungan, gereja, rumah tangga nang tu saluhut bangso na di portibion. Ingkon sian hita do mamungkamangulahon hatigoran, sian i ma olo Debata pahothon hatigoran tu hita, molo so olo hita mangulahon hatigoran tontu sahali ngolunta on gok dohot hapalsuon. Ai marhite na taulahon do hatigoran gabe dapot hita ma tua nang las ni roha sian Debata. Alani marroha na dungo ma hita, mangihuthon Debata, unang lilian binaen ni panagit ni portibion
.
Refleksi/ Meditasi
Mansai ragam do dilului jolma di portibi on asa sonang mangolu nian. Molo ro sitaonon, sahit dohot angka na asing sai dilului do dalan asa malua sian i. Alai marhite turpuk on, tung tangkas do disoarahon: lului hamu ma hasintongan dohot hatigoran, uhum ni Jahowa asa mangolu hamu. Asa ngolu ni jolmai unang ngolu na gok sipalensem, na songon simarememe sai songon na uli berengon hape ndang hasea. Unang ma dirajumi rohanta, portibion silehon hangoluan, ndada hamoloon ni jolma i, tung mangasahon Jahowa do. Alani so tung olo hita lilu gabe manulahon hajahaton holan mangalului hangoluan sian portibion. Baliksa di soarahon do asa hita “Marroha na dungo” laho mangului jala mangulahon hasintongan, hatigoran na sian Debata dungi dapotan tua dohot haluaon ma hita.
Disoarahon do tu ganup ngolunta ganup marsada-sada:”hagigihon hamu ma na jat i, jala haholongi hamu na denggan, jala hajojonghon hamu uhum di ganup tingki”. Debata do hagogoonta, Debata ma pangalualuanta. Molo tung ingkon marsitaonon pe hita alani haporseaonta, alai gabe parjambar do hita di hangoluan sisalelengna. Sangkap hatuaon do disangkapi Debata tu angka na mian jala na olo dungo mangulahon hasintonganNa. Alani dokma di bagasan ngolum:”Ale Debata, hasintongan do lomo ni rohaM, jala dihasogohon Ho do hajahaton, jala sai Ho do ihuthonon nami. Sai paimbaru jala padungo ma rohanami asa tau hami manimbangi lomo ni rohaM, asa huboto hami mamolati na denggan sian na roa”.

4. Diskusi:

1. Songon sada ina hamu jotjot do di bereng hamu pangalaho ni donganmu, ndang gabe tiruan, alai gabe sisurahan/sihasogohonon. Boha do sikap muna tu angka ina sisongoni?
2. Godang do ngolu ni angka jolma saonari on ngolu na marsipalensem (Pura-pura) jala mangolu ndang di bagasan hasintongan. Boha do baenonta manogu nasida asa olo marhamubaon?
3. Boha do bahenonta asa dungo hita mangulahon hasintongan dohot hatigoran nasian Debata?
   

5. Tangiang Pangondianon/Syafaat
6. Marende : BE. No. 171: 1+3 (Papungu Pelean)
7. Tangiang Panutup.

Pdt. Eben Hutasoit, STh (HKI Resort Panei Tonga)

Minggu XXVI Dung Trinitatis
ARGA BAEN BARITA NA ULI I
Nats : 1 Tessalonik 5: 12-22

1. Marende: BE. No. 140: 3-4
2. Tangiang Pamuhai
3. Manjaha dohot manangkasi turpuk

Rap do hita umbotosa, nasa parbarita nauli na mamaritahon barita nauli i ndang mamboan sinjata, manang bohal ni pardagingonna. Molo ditulak jolma i barita nauli i borhat do ibana tu inganan na asing. Godang do insak-insak, reherehe tu parbarita nauli; pola do deba sian halak Kristen i adong do na barani mambadai, paroaroahon parbarita nauli i. Somalna molo masa hatiha nasongoni tung tangiang na do dipasahat tu adopan ni Debata siala sude na nialamanna i. Dipangido do tu Debata asa muba roha ni jolma i, di uba jala dipaimbaru Debata. Pangalaho ni Tuhan Jesus do na pinatuduna disi. Alana molo marbarita nauli jamitana do ngoluna, ngoluna do gabe jamitana. Lapatanna: Parbarita nauli i gabe sorminan tu ganup na humaliang.
Sude do halak Kristen tarjou gabe parbarita nauli (Bdn. Mat28:19-20) mamaritahon barita haluaon i marhitehite pangalaho na denggan, panghataion na lambok jala marimpola. I do ulaon ni Tuhan Jesus umbahen na ro Ibana tu portibion. Manaluhon hajahaton marhite ulaon na denggan, manaluhon riting manang muruk ni roha marhitehite halambohon dohot na olo patoruhon raha . Sandok, ulaon ni halak Kristen ingkon maniru pambahenan ni Tuhan Jesus do di nalaho marbarita nauli. Alai anggo barita na uli i ma hagogoon ni Debata laho paluahon, na tuk mangaramoti angka na hot jongjong di bagasan haporseaon di Jesus Kristus. Alani i, hak dohot kewajipan ni halak Kristen do manjalo barita na uli i, jala tanggung jawab na do laho mamaritahon i tu halak na asing na olo manjalosa. Naeng ganup halak mangantusi dohot mamboto, ia nasa ngoluna manang dibasan las ni roha manang arsak ni roha pe ingkon tongtong mian hata ni Debata. Alana holan asi ni roha ni Debata sambing do imana boi hita sanga mangolu sahat tu tingkion. Jala di situasi hangholuantai sai tongtong do adong angka perubahan-perubahan tu na lam mambahen na denggan dohot las ni rohanta. Ndada na gabe hurangan hita molo laho hita marbarita nauli, alai sebalikna sai gok hasonangan, pasu-pasu do hadirion ni jolma naolo mambarita nauli.
Tanda ni halak naung mian di Tuhan i do molo olo ibana manghamauliatehon hangoluanna. Jala halak angka na songoni i ndang olo be i gintalan ni angka hagiothagiot ni rohana laho mangangkali, manangko na di donganna. Alai jolma naung manghangoluhon barita nauli itongtong do sabam rohana di nasa tumpal dohot pasupasu naung diturpukhon tu ibana huhut tongtong mandok mauliate saluhut ngoluna tu Debata di nasa pandonganion na binahen ni Debata di bagasan ngoluna. Ai marhite na sai tongtong marsaringar hata mauliate i di ngolu ni jolma disi ma tandana naung mian jala mangolu hata ni Debata.

Refleksi/Meditasi
Na manghuling do hata on tu hita nueng huhut paingothon hadirionta. So tung do holom rohanta di panjouon ni Tuhan di ulaonta laho marbarita nauli huhut patupahon na denggan i. Marguru tu roha na hombar mangihuthon panjouon ni Tuhan i taulahon angka barita nauli i, asa boi hita gabe sorminan tu ganup na humaling hita. Ingkon olo do hita pasiathon hata ni debata di bagasan ngolunta. Pasiathon hataNa berarti mangalehon sandok ngolunta diantoi jala diasi i Ibana. Ai haposan do hata i manogunogu hita sahat tu ujung ni ngolunta. Hata ni debata mangungkap rohanta laho mangargahon barita nauli i, jala huhut i do na papitahon haporseaonta.Hinorhon ni haporseaonta gabe togu, pita ma hita mangulahon huhut paboahon barita nauli i. Pos ma roham, laos boha pe sangkap ni portibion laho mangambat ho marbarita nauli sai na dongan ni Debata do ho. Alani ihuthon ma bagasNa i, ai hamonagan dohot haluaon do jaloonmu.

4. Diskusi.

1. Songon sada ina hamu, boha do cara muna laho marbarita nauli?
2. Mansai godang do jolma na mangambati hararat ni barita nauli i. Boha do sikapta mandompakhon jolma sisongoni?
3. Songon jolma naung mian hita di hata ni Debata (barita nauli), molo pangunjunan di bagasan ngolum hea do di hamauliatehon hamu i? Boasa?

6. Tangiang pangondianon/Syafaat
7. Marende : BE. No. 361: 1-2 (Papungu Pelean)
8. Tangiang Panutup.

Pdt. Eben Hutasoit, STh (HKI Resort Panei Tonga)

Ujung Taon Huria, Minggu IV Nopember 2007
NA MONANG I DO SOGOT MANEAN HARAJAON NI DEBATA
Turpuk : Pagungkapon 21: 1 – 7

1. Marende : B.E. No. 344: 1 + 8
2. Tangiang Pamuhai
3. Manjaha dohot manangkasi turpuk
Di balik ni na tarida on adong dope inganan na dumenggan. Ndang tarpatudos gombaran ni na di banuaginjang sogot dohot naummuli di tano on. Sai marhusorhusor jala mubauba do las ni roha nang sitaonon di tano on. Tung so adong do na hot. Alai di Banuaginjang i: ndang adong be iluilu, hamatean, arsak, anggukangguk dohot na hansit.
Diparade Debata do hasonangan na somartudosan. Diarahon do asa ganup jolma olo mangeahi jala masuk manginganhon. Dalan laho mamongoti ndada marhite huaso, hagogoon, habongaton manang marhite angkal bisuk ni hajolmaon. Ndang boi tuhoron marhite godang ni hepeng, manang dipahundul alani huaso na marhagogoon. Jala tung so boi do i jaloon mangasahon hahurangan manang marhite halosohon dohot halembaon. Sandok ndang boi masuk tu si halak na so marsitutu, na marlembalemba, na losok, na jais jala na raus.
Ala Harajaon ni Tuhan i do na tumimbo, na umbalga, na dumenggan, na sumonang jala na sohatudosan ingkon marsitutu jala lam margogo do hita mangeahi. Ndang jadi hita tondan manang lalap di tano on. Nang pe godang hasonangan dohot na uli di tano on, holan sangombas jala sambolus do i. Molo tung adong pe hasangapon dohot parsaulian di tano on, pesan do saluhutna i. Martingki do saluhut na adong di tano on, alai na hot ro disalelenglelengna do na naeng ro sogot.
Diarahon do hita manghamonangkon losok, manghamonangkon biar, manghamonangkon hagiot, manghamonangkon roha na holongan di hepeng. Uju rongom sitaonon boi do papeol sieahan, uju dileai halak hita, naeng do hita tarela laho mamaloshon. Nang pe taboto sala olo do gabe taulahon binahen ni sitaonon. Olo do tarela hita maninggalhon hasintongan manggohi hasonangan parsatongkinan.
Hata ni Debata do panungkoli asa unang talupahon sieahan na dumenggan. Sotung tondan hita pasolhot diri tu hasonangan na manongtong binahen ni hasonangan parsatongkinan. Sotung talu hita binahen ni hajahaton ala ndang margogo haporseaon. Sotung putor pardalanan na tigor holan ala manghabit gogo dohot sinadongan. Ndang jadi sundat masuk tu hangoluan na manongtong binahen ni dai hataboon na pamogaphon.

4. Siauhonon
Godang do sipatinda rupa pangalalapi diportibi on. Dipaullophon portibi on do haulion sumansuman pasambarhon haporseaon. Marhite ragam ni tontonan (hiburan), ulaon dohot pangomoan, nunga godang halak manggadehon haporseaonna. Nunga lam torop na paonjaphon haporseaonna jumpa manjalo huaso dohot pangomoan. Olo do sundat halak marsaor dohot Debata ala ni adat, ala ni bisnis, alani kepanitiaan.
Jotjot do ndang margurasa haporseaon i mangadopi sitaonon. Sitaononta i gabe bonsir mandao sian Debata. Molo so gabe na niula mandele jala mandao sian punguan. Molo masa bala isara ni sahit tu pinahan, laos torop do nampunasa lilu mangantusi. Olo ma gabe mulak tu hasipelebeguon: manungkun datu manang mamangke ulaon haholomon asa malum sahit, asa sinur na pinahan, asa tamba pangomoan. Hape diigil turpuk on do hita asa tahamonangkon angka parungkilon i mangasahon Yesus Siparmonang i. Mangasahon Hata ni Yesus manahan ma hita mangadopi pangela ni portibi on. Botoonta ma: “umagon do marhansit di dalan hasonangan sian marsonangsonang manopot dalan hamagoan”.

5. Bahan Diskusi
1. Angka dia ma na mangguga haporseaon ni halak Kristen di tingki na parpudi on?
2. Aha do sibonsiri umbahen olo halak paonjaphon haporseaonna?

6. Tangiang Pangondianon
7. Marende: B. Ende No. 348: 1 + 4
8. Tangiang Panimpuli

Pdt. Jansen Simanjuntak, STh (HKI Resort Siantar I)

Bina Wanita Minggu Advent I Tgl. 30 November 2008

1. Marende : B.E.

2. Tangiang Pahumai Turpuk : Maleaki 3 : 1-4
3. Manjaha dohot Manangkasi Turpuk

“NA ROMA TUHAN I”

Di ganup bulan Maret ta taringoti do “Doa Sedunia” dohot ari ‘Wanita Internasional”. Na dua namasa on diuluhon manang dipimpin sahalak parompuan do (Ina). Disiala on, gabe sada semangat do on di angka Ibana/parompuan laho patuduhon bahwa nasida selain ibu rumah tangga, berperan do nasida di segala bidang. Perikop on patorangkon tu hita, ima haororo ni sahalak pinarbaga-baga ni Debata, na gabe sahalak ‘Suruan” na ta paimaima laho paluahon angka keterikatan di ganup hak-hak ganup pribadi. Perikop on ditujuhon do on tu sude jolma, alai ditingko on godang do halak sala persepsi, seolah-olah holan tu ama manang baoa. Dibahen i, keberadaan ni boru-boru disandok inganan, dimasyarakat, di pemerintahan, tarlumobidi gareja peranan ni boru-boru gabe hurang tarida manang hampir di tiadahon. Aha do ulaning umbahen terjadi na songon i :

1. Susunan masyarakat na paternalistik (Ama) sangat mempengaruhi bidang mitra kerja boru-boru.
2. Persepsi naung gabe tradisi, bahwa boru-boru lobi berperan mangurusi rumahtangga.
3. Memang boru-boru sandiri namambahen keberadaan na hurang berpengaruh di setiap inganan.
4. Gareja ndang mampu mangalehon kedudukan tu angka boru-boru.
   

Di tingki on, nunga berusaha masyarakat manang pamarenta suang songon i nang gareja laho pamajuhon pihak parompun songon na pinarbaga ni ganup boru-boru. Alai nyata tabereng antara masyarakat dohot gareja sangat jauh bedana kedudukan ni boru-boru. Di masyarakat/pamarenta nunga torop na gabe uluan, bahkan Presiden nunga adong boru-boru, alai di gareja hampir so adong na gabe sahalak uluan.

Hatorangan
Ayat 1,
Dison dipatorang perikop on tu hita ima sahalak pinaorbaga ni Debata, pataridahon sada hubungan ni Debata tu jolma. Didok dison “Suruangku” ima sahalak suruan na manatas angka dalan, padaohon angka abat-abat di haroroni Debata.
Ayat 2-4,
Ari harorona (Hari Tuhan), on ma ari na tung mansai holom situtu, alai tujuanna ndang na laho menghancurhon alai napaiashon, pataridahon, dia do na ias. Jadi hundul ma Ibana songon sipangalala dohot sipapita perak. Diharoro na i ma tangkas tarida ise do na ias manang nadaong. Jala ro Ibana laho manangkasi angka naung so ias, jala dung masa songon i haruar ma marhilong-hillong. Di haroro-Nai, masa ma angka panguhumi on di angka naung tarida (na so ias). Panguhumon masa ma tu angka Malim na di Bagas ni Debata, jala paiasonna ma nasida laho mangula ulaon na pinasahat ni Debata tu nasida.

APLIKASI
Torop do halak nuaeng paima-ima na jinanjihon ni Debata, ima suruan na naeng ro laho paiashon manang mamisahon na ias sian na so ias. Apalagi dibagasan tingki on hita manomunomu hatutubu ni Jesus. Nunga songon dia haradeonta manjangkon partingkion i. Manang asal ma marpesta. Adong do ta rasahon haroro ni Jesus di rohanta?. Turpukkon patorangkon, ima haroroni na pinarbaga-baga ni Debata, suruon nama sahalak sitastas dalan laho padaohon angka abat-abat. Beha do ulaning haradeonta, tarlumobi di angka boru-boru naung patar tabereng di tano on hadirionna na sai dianggap nomor pribadi. Torop do halak beranggapan bahwa molo ro hata mandok jolma, selalu husus baoa.
Jadi boru-boru hurang difungsihon. Sialani dipatorang do tu hita marhitehite turuk on. Ima pinarbaga bagani Debata laho mansoadahon manang manastas pandangan ni jolma taringot tu boru-boru, bahkan perlakuan ni jolma maradophon boru-boru naung mangkorhon tu diskriminasi. Jadi marhite turpuk on, asa unang be angka persepsi na beranggapan bahwa parompuan ima pengurus Rumah Tangga. Gabe patar ma hata ni Debata. “Manusia dalh perempuan dan laki-laki”. Adong baoa dohot boru-boru na pataridahon kesempurnaan ni jolma do i di sude dalan di rencana ni Debata. Ai molo taida sian segi panompaan, na parpudi ditompa Debata do na tumimbo derajat na, tontu boru-boru do na tumimbo derajat-na sian baoa, siala boru-boru di parpudi sian baoa di tompa Debata. Jadi ndang adong istilah direndahkan manang di junjung-junjung. Di bahen boru-boru ndang sian taplakni pat ni baoa, asa didege-dege, jala ndang sian simajujung na laho jujungon/sombaon na. Alai sian holi-holi parsitongaan, asa gabe sadalan udur mangula siulaon.
Dizaman on nunga tapaihut-ihut perkembangan ni angka boru-boru. Digoari ma i “Emansipasi-Emansipare = paluahon: hasadaron na tubu, bahwa boru-boru adong do hak pribadi selain songon isteri/ibu harus tetap pada tempatnya, asa gabe unang sipanegai hasadaron i. Jadi perikop on, ditujuhon tu sude jolma, borua dohot baoa. Rap rade ma baoa dohot boru-boru manjangkon haroroni ‘Suruan” na jinanjihon ni Debata. Ta parade ma sandok ngolunta di haroroni Ibana laho paluahon hita na so boi pataridahon hadirionta nasailaon di portibi on. Taulahonma nasa na boi ulaonta sahat ro diujung ni partingkian on. Hehe ma hamu angka boru-boru sian podomanmuna laho papatarhon hadirionmuna songon na didok ni Kristus tu hamu na.

4. Diskusi:
- Patorang hamu ma jolo na niantusanmuna taringot tu Kesetaraan Genden (Jaka Jender) ?!

5. Tangiang Pangondian (Doa Syafaat)
6. Marende : B.E. No.
7. Tangiang Panimpuli.

Pdt. Jansen Simanjuntak, STh (HKI Resort Siantar I)