Jamita tu Minggu Estomihi - 03 Pebruari 2008
Oleh : Pdt. M. Lumban Gaol, S.Th (Parhobas di Kantor Pusat)
I. Patujolo:
“Hidup Adalah Perjuangan” sada pandohan sian angka nabisuk marrohahon pardalanan ni ngolu tagan diportibion. Tutu saleleng diportibion sai jumpang dope angka hamaolon siadopan ni hita jolma, ndang mardia imbar tu naso manghaposi Debata nang tu ngolu ni angka naporsea i, lumobi ma tahe jotjot masa tu ngolu ni angka na porsea di Tuhan Jesus Kristus songon naung pinalumbahonNa i “Haporsuhon do jambarmuna di portibi on” (Yohanes 16:33, pat. Heber 10:32). Lam tamba do hatahuton diangka dongan namanghaporseai horoskop ni halak China (godang nang halak Kristen na terpengaruh di ramalan on), namandok ia taon 2008 di goari tahun tikus namangalumbahon tung lam posi do hamaolon nanaeng masa di taon on. Alai boha panjaloonta disaluhut hamaolon namasa siadopanta ?
Hamaolon nang haporsuhon na binolus i, ndada holan masa ditingki sinuaeng on be, nunga masa sian najolo nang tu bangso ni Debata. Turpuk jamita on patuduhon tu hita na hea masa hamaolon bolon tu bangso Israel di pardalanan nasida mandapothon tano bagabaga i, pola ingkon marporang nasida maradophon sada bangso na gogo. Naeng putihanta mutiha naarga sipangkeonta laho mangadopi saluhut angka hamaolon naung masa jala nanaeng masa dope.
II. Hatorangan:
Dijolo ni turpuk on dibaritahon do ganggu ni roha ni bangso i dipandonganion ni Debata di nasida di nabungkas nasida sian tano parhatobanan i. Ai tung lomos roha nasida di sipanganon dohot siinumon naso ni ida mata nasida talpak di jolona di pardalanan i, jala aladi ingot nasida uju di Mesir atik pe gabe hatoban alai ndang pola holsoan nasida di sipangon dohot siinumon.
Halak Amalek nunga adong hian dimasa ni Abraham (1 Musa 14:7), jala nabinoto nasida naro bangso Isarel jonokhon huta nasida; bangkit do nasida laho mamorangi asa unang bolas bangso i mamolus sian luat i, jala sotung maon dilaum luat nasida. Asa tung merasa terganggu do bangso Amalek di haroro ni bangso Israel, jala pintor tubu pingkiran nasida (praduga) nanaeng mambahen najahat bangso i tu nasida, hape holan nanaeng mamolus sambing do bangso Israel i. Diadopi godang dongan angka na ditongatonga ni parugamo na asing do tongtong masa si songon i dipartingkianta on; ndang dipaloas patupa parmingguon, pajongjonghon gareja dohot angka ulaon na marpardomuan tu ulaon hakristenon. Di dok Ap. Paulus di II Korintus 1:5a “Ai muba do godang ni haporsuhon ala ni Kristus songgop tu hami”. Asa ndang sada naimbaru be molo jumpang hamaolon tu halak Kristen nanaeng pajongjonghon hamuliaon ni Debata di liat tano on.
Mangadopi sangkap hamusuon nanaeng dibahen halak Amalek mamorangi nasida disikapi si Musa na gabe uluan di bangso i dohot marsagi ulaon; marsuru si Josua manguluhon parporangan mangadopi halak Amalek (secara fisik), Musa, Aron dohot si Hur nangkok tu punsu ni dolokdolok martangiang mangido pangurupion ni Debata. Strategy na pinangke ni si Musa songon sahalak pemimpin di son, dos ma dohot istilah ora et labora (martangiang huhut mangula).
Di na sinuru si Josua tu parporangan i didok do “pillit ma di hita baoa” (Ind. Pilihlah orang-orang bagi kita). Asa ndang sude nasa baoa diboan tu parporangan mangadopi halak Amalek. Hata “pillit” mandok, ndang rambase bahenon angka nanaeng pahundulon hombar tu angka ulaon, asa denggan ulaon i. Tontu tu ulaon parporangon pilliton do angka na togos, barani manang na ahli strategi, ndang pola ala ni hatoropon asa tung dapot hamonangan. Nang si Musa pe holan 2 halak do donganna nagkok tu dolokdolok i laho martangiang, jala nasida pe angka naung masiantusan ( di na lenduk tangan ni si Musa, singkap do na dua i laho manungkoli asa tongtong tigor tangan i jala dapot nasida ma hamonangan). Tangkas do di ondolhon di turpuk on, ia hamonangan ni Israel mangalo Amalek ndang di tontuhon hagogoon ni nasida, alai di tontuhon Debata (ay. 11). Saleleng tigor (herbang) tangan ni si Musa dompak ginjang monang do nasida, alai molo lenduk; monang ma halak Amalek. Saleleng masa parporangan i, ndang mansadi si Musa martangiang dompak Debata.
Nang pe jolma naung pinillit ni Debata si Musa, tongtong do adong keterbatasan ni si Musa ala jolma dope ibana. Alai sada naringkot si rohahononhon i ma, olo do hape sada uluan (nang na pinillit ni Debata) marhagaleon. Alai jumpang masa sisongon i mamintor do singkap si Aron dohot Hur laho manungkol, ndang dipasombu, manang digantihon (di soluk). Tung pangalaho na jotjot andul masa di tingki on di naung torop halak jalukjaluk naeng manggantihon sada pemimpin na marhagaleon. Na masa diturpuk on, di tungkoli do tangan ni si Musa sahat tu na marujung parporangan. Sahali nai, dipapatar Debata do huaso dohot hagogoonNa tu halak Israel na tuk mangaramoti pardalanan ni ngolu nasida mamolus angka hamaolon di pardalanan nasida i sahat tu tano parpadanan i. Monang do nasida marporang maradophon Amalek, ala Jahowa do na mandongani jala mangalehon gogo tu nasida. Ala ni i ma, ndang dipatupa si Musa sada parningotan di hamonangan ni bangso i asa adong si ingoton ni angka sundut nanaeng ro naung monang bangso i marporang, baliksa, gabe sada langgatan di Jahowa do dipajongjong laho marningot pandonganion ni Debata i di nasida. Ai holan ala pandonganion ni Jahowa do boi monang nasida. Di goari langgatan i “Jahowa Nissi” marlapatan Jahowa do partonggol hu (Ind. Tuhanlah panji-panjiku).
III. Sipahusorhusoron:
Digoari do minggu sadari on minggu Estomihi marlapatan Jahowa do Partanobatoan di ahu (jaha Psalm 31:3). Sada tangiang dohot panindangion mandok Jahowa do parlinggoman jala na gabe partanobatoan di angka naporsea. Asa di namangadopi godang hamaolon hita hinorhon ni angka namasa bencana alam, borat ni parngoluan siapari diarahon hita asa tongtong manghaposi jala mangolu dibagasan hata ni Debata. Jala ringkot rohahononta pandok ni Ap. Paulus “Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i” (Efesus 6:12). Molo gabe terpengaruh do hita di angka pangajarion na asing isara horoskop ni halak China (na mandok tahun tikus) dohot lan naasing, maon madabu ma hita tu bagasan pandelean gabe holang sian Tuhan i, na tuk mangalehon hamonangan di hita disaluhut angka hamaolon siboluson di hasiangan on. Naeng nian hita masitungkoltungkolan uju jumpang hagaleon di na deba, asa unang lam mandabu nasida, alai lam boi dirgak jongjong jala marpanghirimon tu Debata naung gabe amanta dibagasan Jesus Kristus (jaha Ul. Ap. 14:22), asa unang diunggilhon angka haporsuhon i na deba sian hamu; ai diboto hamu do, tusi do hita dipadiri.( I Tess. 3:3).
Dibahen i, angka na marhaporsuhon mangihuthon roha ni Debata, dipasahat ma tondina tu Panompa haposan i, marhitehite na mangulahon na denggan.(I Petrus 4:19) Gabe dongan manaon haporsuhon ma ho, songon parangan na denggan di Kristus Jesus! (II Timotius 2:3). Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. (I Petrus 5:10), alai pos ma rohamuna: Nunga talu hubahen portibi on. (Yohanes 16:33). Amen.
Oleh : Pdt. M. Lumban Gaol, S.Th (Parhobas di Kantor Pusat)
I. Patujolo:
“Hidup Adalah Perjuangan” sada pandohan sian angka nabisuk marrohahon pardalanan ni ngolu tagan diportibion. Tutu saleleng diportibion sai jumpang dope angka hamaolon siadopan ni hita jolma, ndang mardia imbar tu naso manghaposi Debata nang tu ngolu ni angka naporsea i, lumobi ma tahe jotjot masa tu ngolu ni angka na porsea di Tuhan Jesus Kristus songon naung pinalumbahonNa i “Haporsuhon do jambarmuna di portibi on” (Yohanes 16:33, pat. Heber 10:32). Lam tamba do hatahuton diangka dongan namanghaporseai horoskop ni halak China (godang nang halak Kristen na terpengaruh di ramalan on), namandok ia taon 2008 di goari tahun tikus namangalumbahon tung lam posi do hamaolon nanaeng masa di taon on. Alai boha panjaloonta disaluhut hamaolon namasa siadopanta ?
Hamaolon nang haporsuhon na binolus i, ndada holan masa ditingki sinuaeng on be, nunga masa sian najolo nang tu bangso ni Debata. Turpuk jamita on patuduhon tu hita na hea masa hamaolon bolon tu bangso Israel di pardalanan nasida mandapothon tano bagabaga i, pola ingkon marporang nasida maradophon sada bangso na gogo. Naeng putihanta mutiha naarga sipangkeonta laho mangadopi saluhut angka hamaolon naung masa jala nanaeng masa dope.
II. Hatorangan:
Dijolo ni turpuk on dibaritahon do ganggu ni roha ni bangso i dipandonganion ni Debata di nasida di nabungkas nasida sian tano parhatobanan i. Ai tung lomos roha nasida di sipanganon dohot siinumon naso ni ida mata nasida talpak di jolona di pardalanan i, jala aladi ingot nasida uju di Mesir atik pe gabe hatoban alai ndang pola holsoan nasida di sipangon dohot siinumon.
Halak Amalek nunga adong hian dimasa ni Abraham (1 Musa 14:7), jala nabinoto nasida naro bangso Isarel jonokhon huta nasida; bangkit do nasida laho mamorangi asa unang bolas bangso i mamolus sian luat i, jala sotung maon dilaum luat nasida. Asa tung merasa terganggu do bangso Amalek di haroro ni bangso Israel, jala pintor tubu pingkiran nasida (praduga) nanaeng mambahen najahat bangso i tu nasida, hape holan nanaeng mamolus sambing do bangso Israel i. Diadopi godang dongan angka na ditongatonga ni parugamo na asing do tongtong masa si songon i dipartingkianta on; ndang dipaloas patupa parmingguon, pajongjonghon gareja dohot angka ulaon na marpardomuan tu ulaon hakristenon. Di dok Ap. Paulus di II Korintus 1:5a “Ai muba do godang ni haporsuhon ala ni Kristus songgop tu hami”. Asa ndang sada naimbaru be molo jumpang hamaolon tu halak Kristen nanaeng pajongjonghon hamuliaon ni Debata di liat tano on.
Mangadopi sangkap hamusuon nanaeng dibahen halak Amalek mamorangi nasida disikapi si Musa na gabe uluan di bangso i dohot marsagi ulaon; marsuru si Josua manguluhon parporangan mangadopi halak Amalek (secara fisik), Musa, Aron dohot si Hur nangkok tu punsu ni dolokdolok martangiang mangido pangurupion ni Debata. Strategy na pinangke ni si Musa songon sahalak pemimpin di son, dos ma dohot istilah ora et labora (martangiang huhut mangula).
Di na sinuru si Josua tu parporangan i didok do “pillit ma di hita baoa” (Ind. Pilihlah orang-orang bagi kita). Asa ndang sude nasa baoa diboan tu parporangan mangadopi halak Amalek. Hata “pillit” mandok, ndang rambase bahenon angka nanaeng pahundulon hombar tu angka ulaon, asa denggan ulaon i. Tontu tu ulaon parporangon pilliton do angka na togos, barani manang na ahli strategi, ndang pola ala ni hatoropon asa tung dapot hamonangan. Nang si Musa pe holan 2 halak do donganna nagkok tu dolokdolok i laho martangiang, jala nasida pe angka naung masiantusan ( di na lenduk tangan ni si Musa, singkap do na dua i laho manungkoli asa tongtong tigor tangan i jala dapot nasida ma hamonangan). Tangkas do di ondolhon di turpuk on, ia hamonangan ni Israel mangalo Amalek ndang di tontuhon hagogoon ni nasida, alai di tontuhon Debata (ay. 11). Saleleng tigor (herbang) tangan ni si Musa dompak ginjang monang do nasida, alai molo lenduk; monang ma halak Amalek. Saleleng masa parporangan i, ndang mansadi si Musa martangiang dompak Debata.
Nang pe jolma naung pinillit ni Debata si Musa, tongtong do adong keterbatasan ni si Musa ala jolma dope ibana. Alai sada naringkot si rohahononhon i ma, olo do hape sada uluan (nang na pinillit ni Debata) marhagaleon. Alai jumpang masa sisongon i mamintor do singkap si Aron dohot Hur laho manungkol, ndang dipasombu, manang digantihon (di soluk). Tung pangalaho na jotjot andul masa di tingki on di naung torop halak jalukjaluk naeng manggantihon sada pemimpin na marhagaleon. Na masa diturpuk on, di tungkoli do tangan ni si Musa sahat tu na marujung parporangan. Sahali nai, dipapatar Debata do huaso dohot hagogoonNa tu halak Israel na tuk mangaramoti pardalanan ni ngolu nasida mamolus angka hamaolon di pardalanan nasida i sahat tu tano parpadanan i. Monang do nasida marporang maradophon Amalek, ala Jahowa do na mandongani jala mangalehon gogo tu nasida. Ala ni i ma, ndang dipatupa si Musa sada parningotan di hamonangan ni bangso i asa adong si ingoton ni angka sundut nanaeng ro naung monang bangso i marporang, baliksa, gabe sada langgatan di Jahowa do dipajongjong laho marningot pandonganion ni Debata i di nasida. Ai holan ala pandonganion ni Jahowa do boi monang nasida. Di goari langgatan i “Jahowa Nissi” marlapatan Jahowa do partonggol hu (Ind. Tuhanlah panji-panjiku).
III. Sipahusorhusoron:
Digoari do minggu sadari on minggu Estomihi marlapatan Jahowa do Partanobatoan di ahu (jaha Psalm 31:3). Sada tangiang dohot panindangion mandok Jahowa do parlinggoman jala na gabe partanobatoan di angka naporsea. Asa di namangadopi godang hamaolon hita hinorhon ni angka namasa bencana alam, borat ni parngoluan siapari diarahon hita asa tongtong manghaposi jala mangolu dibagasan hata ni Debata. Jala ringkot rohahononta pandok ni Ap. Paulus “Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i” (Efesus 6:12). Molo gabe terpengaruh do hita di angka pangajarion na asing isara horoskop ni halak China (na mandok tahun tikus) dohot lan naasing, maon madabu ma hita tu bagasan pandelean gabe holang sian Tuhan i, na tuk mangalehon hamonangan di hita disaluhut angka hamaolon siboluson di hasiangan on. Naeng nian hita masitungkoltungkolan uju jumpang hagaleon di na deba, asa unang lam mandabu nasida, alai lam boi dirgak jongjong jala marpanghirimon tu Debata naung gabe amanta dibagasan Jesus Kristus (jaha Ul. Ap. 14:22), asa unang diunggilhon angka haporsuhon i na deba sian hamu; ai diboto hamu do, tusi do hita dipadiri.( I Tess. 3:3).
Dibahen i, angka na marhaporsuhon mangihuthon roha ni Debata, dipasahat ma tondina tu Panompa haposan i, marhitehite na mangulahon na denggan.(I Petrus 4:19) Gabe dongan manaon haporsuhon ma ho, songon parangan na denggan di Kristus Jesus! (II Timotius 2:3). Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. (I Petrus 5:10), alai pos ma rohamuna: Nunga talu hubahen portibi on. (Yohanes 16:33). Amen.