Tuesday, February 17, 2009

Bahan Jamita Bina Warga Bulan Maret 2009

Jamita Minggu Invokavit
Tgl. 01 Maret 2009
Psalmen 25 : 1 - 7
Redaksi


Jouonna Ma ahu, jadi Alusanku ma Ibana

Patujolo:
Saleleng di portibion tung so tarbahen dope malua sian hagigiot dohot pangelaela ni pardagingon, tung ise pe halakna, ai daging dope, ninna dongan. Alani sai jumpang do masa marhagaleon, nang ruas, nang angka partohonan. On ma sada sidalian na somal dipatubegehon asa boi patundal diri sian parngoluon na pinangido ni Tuhan i, sihangoluhononhon. Jala tung godang do tutu ngolu ni halak Kristen na sai tongtong paihutihut hasomalan (naso gabeak), nang ruas ni huria, songoni nang angka partohonan di huria. Na asing muse mandok sidalianna ndang ro tu parmingguon: so tung madabu maon giringgiring i, ai ramun dope parngoluon, jala so tartadingkon dope, ai ido dope dalan ni ngolungolu. Sai tioptioponta dope sidalian songon i ?

Hatorangan:
1. Ho do, ale Jahowa, dihalungunhon rohangku.
Hata ’dihalungunhon’ (heber ’kawah’) marlapatan panghirimon na tontu ingkon maralus, isara parhal (penjaga malam) na paimaimahon torang ni ari (Psalm 130), anak gajian napaimahon upana (Job 7:2), pangula napaimahon masa manggotil (Jesaya 5:4). Si David sahalak naposo ni Debata namangadopi angka hamaolon (pergumulan) di ngoluna. Ibana patolhashon saluhut na masa tu dirina i dibagasan tangiang pangidoan tu adopan ni Debata. Parmaraan na marrumanghon angka musu (musuh) i do na sai mangonggop si David. Ndang lilu jala mampar roha dohot pingkiranna mangadopi angka na masa i, alai ingot do ibana di si parorot jala pangaromoti dirina i ma Debata Jahowa.


Molo mamereng sian torop dohot gogo ni angka musu i tung so tarbahenna do maralohon i (ida ay.19: ‘Ida ma angka musungku, ai Ian do nasida,....). Tangiang do dipangasahon ibana laho mangalo sude angka musu na i (pat. 2 Musa 14:14 ‘Jahowa do marporang humopkop hamu, asal hohom hamu’; Jakobus 5:16.b ‘Na margogo situtu do tangiang ni partigor, molo dihaburjuhon’). Asa tung pos situtu do rohana di Jahowa, jala pos do rohana na alusan ni Debata do pinangidona i (pat. Heber 1:1 `Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida’), Alai, huaso, gogo na sian Debata holan i do dalan dohot sinjata na ampuh maralohon angka musu. Tung marsitutu do par-psalmen (Daud) mangompashon parungkilonna i tu Debata, asa tung malua ibana nian sian hasosakanna i.

2. Sai pabotohon ma tu ahu angka dalanmu, jala ajarhon

Haporseaon na so unduk tu angka dalan lomo ni roha ni Debata i ma haporseaon na palsu (pat. Mat. 7:21, 26; Jakobus 2:17). Molo naung pinasahat pangidoan tu Debata, udutna jaloon ma angka dia do dalan-Na dohot hasintongan­Na na patut sihangoluhononhon dohot siulahononhon (pat. 2 Musa 33:13; Psalm 86:11; Joh. 14:15). Niingot najolo uju masa kejayaan Bulu tangkis ni Indonesia, ro di huta nametmet godang halak semangat marbulu tangkis, gabe idola ma angka juara i jala tung angur goarna. Godang halak naeng gabe pebulutangkis, naeng gabe Rudy Hartono, Liem Sue King. Alai holan sangombas do i, dungi so muse paima adong masa pertandingan. Ima naginoaran na nionjar semangat emosional. Godang masa songon i di hakristenon: di angka namanghatindanghon haporseaon (namandohoti parguruan) tung semangat do dimulana i. Songon i diangka namanjalo tohonan, ianggo dimulana i so i nama las ni rohana, pola tariluilu masa manjalo tohonan i; hape ndang sadia leleng nunga mardandi manang so mangula tohonan i be. Boasa, ala adong saotik sibonsiri (namarragam). Ingot do ra hita angka naringgas mandohoti partangiangan Passion, di namarulaon nahohom i, so i nama ganda semangat di hita naeng mangihuthon Jesus marningot sitaononNa i. Alai holan mulak sian Gareja, mamintor lupa do. Doshon i ma ra, semangat dohot panghilalaan dihita uju martangiang masa angka hamaolon di ngolu on, alai holan ro hatiuron ni ngolu mamintor lupa do muse di angka tangiang i.

Ndang na laho mangajari manang manggurui Debata si David molo pe dipaandar ibana angka na uli na denggan na pinatupa ni Debata di angka ari naung salpu i. Alai naeng dohononna disi i ma na ingot do jala sai tongtong do dihangoluhon ibana saluhut pambahenan ni Debata di pardalanan ni ngoluna.


Panimpuli:

Sian narobi, asiasi dohot holong ni roha ni Debata tung so tarsirang do sian parngoluan ni bangso ni Debata. Tangkas do i di par-pesalmen, alai huhut do dipangido ibana asi niroha ni Debata laho manesa dosana sian haposoonna i. Tung olo do Debata manesa dosana ? Molo ingot do Debata di asi ni rohaNa, tung saguru di Debata sambing do hape (ay.6-10). Alai tung asi ni roha do Debata. Tung so margogo do jolma manahan pangela ni portibion asa tong hot mangolu di hasintongan jala marhabadiaon, alai sai asi do rohaNa jala dilehon do di hita partingkian laho paubahon diri.


Sian i on botoon ta ma, na sai tongtong dope hita mangadopi hamaolon (Rom 8:22) jala torop ‘musu’ (si bolis) na naeng mamolgak, manusai. Panuturion marhite Hata ni Debata, naeng ingot jolma i jala holan i do sinjata natarpangasahonsa. Invokavit,Jouonna ma Ahu, dung i alusanku ma ibana, Ps.91, 15a. Bagabaga ni Debata do i tu par-Pesalmen i, taringot tu haradeonNa mangalusi angka na manjou goarNa. Marhite goar ni minggu on dipapatar tu hita sai na alusan ni Debata do na mangido pangurupionNa. Mangihuthon Psalm 91, 15a, panguhalan ni goar Invokavit, na porsea i do na joujou tu Debata, dung i alusan ni Tuhan i ma na joujou i, songon na pinatuduhon ni turpuk jamita Psalm 25. Hape mamereng tu turpuk on, Tuhan i do na manjou hita mangoloi Ibana. Asa tau hita mangulahon panjouonNa i.


Sude angka uli basa na jinalo sian Debata holan marhitehite asi ni roha sambing do (‘...angka denggan ni basaM dohot asi ni rohaM, ai sian najolo do angkai’). Ndang alani pambahenan, haburjuonna manang hatahata ni tangiangna na tung mansai uli alai holan ala ni silehonlehon sambing do. Sada ajaran na tatiop jala tahangoluhon di hurianta Protestan sian amanta Martin Luther (Bapak Reformasi) i ma: Sola Gratia (pemberian Tuhan hanya oleh karena Anugerah). Jolma mardosa, marsitaonon, alai ndang tarpaias jala tarpalua jolma i dirina siai masa i tung beha gogona dohot malona dohot haadongonna. Alai boi pe ias sian dosa dohot malua sian sitaonon, holan alani Asi ni roha ni Tuhan i do (Anugerah/Grace). Asa ingkon marsitutu ma hita laho manundalhon nasa dosa ni parngoluonta, jala marsitutu pasahathon i tu Debata asa taruli hita di basabasaNa i. Amen



Jamita Minggu Reminiscere
Tgl. 08 Maret 2009
J o n a 4 : 1 - 11
Pdt. T.L. Hutagalung, M.Sc
Parhobas di Kantor Pusat

Sai Ingot ma ale Jahowa Denggan ni BasaM

Patujolo
Somal do diendehon angka dakdanak Singkola Minggu ende taringot tu Si Jona ala boi ibana mangolu di bagasan butuha ni dengke pola tolu ari tolu borngin. Tontu adong do sibonsirina boasa gabe sahat ibana tu butuha ni dengke i. Ai na disuru Jahowa do ibana borhat martingting tu huta Ninive ai nunga pola maungaung hajahatonnasida sahat tu jolo ni Jahowa (bindu 1: 2). Dipabotohon Jahowa tu si Jona asa dihatahon paboa opat pulu ari nai marongrong ma huta Ninive. Ditingtingkon do asa marpuasa nasida sadari jala marulos hori halak na magodang ro di na metmet.
Umbege hata na pinasahat ni si Jona, porsea ma angka jolma isi ni huta Ninive di Debata pola dohot raja ni huta i mangulahon hata i jala disuru raja i sandok jolma di huta i asa ingkon mulak sian dalanna na roa i dohot sian hatodosan na niula ni tangannasida. Manghirim do rohanasida anggiat tung marpangulahi roha ni Jahowa jala mulak Ibana sian parpiar ni rimasna. Toho do antong marpangulahi roha ni Jahowa ala pambahenan ni pangisi ni huta Ninive gabe ndang saut dipamasa Jahowa uhuman hombar tu naung hinatahonNa marhitehite si Jona. Marnida na masa i gabe sogo ma roha ni si Jona.

Hatorangan ni Turpuk
Ay. 1-2. Ayat on manggombarhon roha ni si Jona taringot tu angka na masa di huta Ninive. Mansai sogo situtu rohana pola piripirion ibana ala so saut madabu uhum ni Debata tu nasida. Marhadomuan do ayat on tu bindu 3, ai ala hamubaon ni roha ni pangisi ni huta Ninive gabe ndang saut marongrong huta i. Alai nang pe songon i, ndang boi martabuni si Jona sian jolo ni Jahowa alani i ma nang pe sian butuha ni dengke tongtong do ibana mangalualu tu Debata Jahowa. Pandohan ni Panurirang Jona di bindu 4: 2 mandok Debata Parasi roha jala pardenggan basa, lambat tararimas jala parasi roha godang, jala na olo sumolsol rohaNa taringot tu hamagoan, i do na mangonjar rohana gabe maporus tu Tarsis. Sai hira na mamintori diri ma ibana di na didok : "Nda i do hatangku hian uju di tanongku dope ahu?" Sian pengakuan ni si Jona boi tarida adong lima sifat ni Debata :
1. Parasi roha
2. Pardenggan basa.
3. Lambat tarrimas
4. Parasi roha godang (Berlimpah kasih setia)
5. Olo sumolsol rohana taringot tu hamagoan.

Ndang sonang roha ni si Jona ala ni sifat-sifat ni Debata na pinatuduhonNa tu halak Ninive. Ndang sonang rohana ai dihilala rohana ndang konsekwen Debata di HataNa ai ndang saut lalu uhuman i. Sai hira na tarhapit ma ibana di rohana, hape lupa si Jona ia na rumingkot di Debata i ma hamubaon ni roha do.

Ay. 3-4. Pandelean do dipatuduhuon ibana di tangiangna umbahen na didok "ua buat ma tagonan hosangku sian ahu" ala so saut marongrong huta Ninive. Panurirang Elia pe hea do mandele di na dipaingot ibana si Isebel hape ndang dipauba rohana (1 Raja2 19: 4). Hape di turpuk on, marhamubaon do pangisini Ninive tarlumobi rajana. Di ponjot ni roha ni si Jona, dialusi Debata do sungkunsungkun ni ibana marhite sungkunsungkun muse : "Tung turut ma ho marro ni rimas? (layakkah engkau marah) ?" Sungkunsungkun i manosoi asa ibana sandiri mengalusi dirina.

Ay. 5. Ruar do si Jona sian huta Ninive jala hundul tungkan habinsaran ni huta i. Ibana paimahon uhuman na naeng pamasaon ni Debata. Gabe pamerengmereng do ibana, ndang parduli di hinadokdok ni na naeng masa tu pangisi ni huta i na lobi saratus dua pulu ribu jolma ro di angka pinahan na sai deak. Ai sasintongna nasida "angka na so umboto parsirangan ni siamunna dohot sihambirangna" do (ay. 11). Hape pangisi ni huta i tung dijalo nasida do hata na pinasahat ni si Jona jala dipauba do rohana.

Ay. 6-11. Dibahen Debata muse tanda tu si Jona laho mangajari ibana marhitehite hau dulang. Tudos do i tu haroro ni ihan raja na diparo Debata jala boi si Jona mangolu di bagasan butuha ni ihan i. Las situtu roha ni Jona ala ni hau dulang i. Hape marsogotnai nunga malos hau i. Debata do na mambahen muse haroro ni sada gulokgulok suang songon i nang haroro ni alogo na mohop sian purba. Dung dipamasa Debata angka halongangan i jala adong alus ni si Jona didok Debata ma tu ibana taringot tu huta i : "Tung so marasi ni roha ma Ahu mida Ninive?" (ay. 11). Di mulana si Jona mandok na so konsekwen Debata di Hatana, i do umbahen na manolsoli rohana ala so dirongrong Jahowa huta Ninive. Alai anggo saonari tangkas ma tarida paboa si Jona do na so konsekwen di hatana ai holong do rohana di hau dulang i hape ndang holong rohana tu pangisi ni huta Ninive.

Panimpuli dohot Sipahusorhusoron ni Roha
Marhitehite pambahenan nang pandohan ni si Jona di bagasan turpuk jamita on dipatuduhon do songon dia parsaoran ni Debata dohot naposoNa. Si Jona tung sogo situtu rohana jala manolsoli ala sundat Debata mambahen naung sinangkapanNa maradophon jolma na jahat na di huta Ninive. Debata gabe paubahon sangkap pambahenanNa hian. Na boi idaonta, ndada na muruk si Jona ala adong haluaon (keselamatan) tu halak sileban na asing sian Israel. Sian angka pandohan na jumpang di turpuk on, na naeng dohonon ni si Jona ima kebebasan ni Tuhan Debata laho mangulahon sangkapna ndang tarjalo si Jona. Si Jona naeng mangatur huaso ni Tuhan asa konsekwen nian maniop haputusanNa. Sai hira na so sintong di rohana Debata maniop hataNa, i ma di roha ni si Jona alana na rumingkot di rohana holan uhuman naung hinatahon i Tuhan i do ndada Asi dohot Holong ni rohaNa.

Marragam dalan ni Debata Jahowa laho mamangkulingi si Jona di bagasan ulaonna i : marhite na marhopok (membuang undi) (1: 8), marhite alogo na gogo di laut i nang marhite na manghatai Jahowa dohot ibana (3: 1). Dungi ala mansai maol do Si Jona mangoloi parsuruon ni Debata Jahowa gabe ro ma teguran tu ibana (4: 4).

Na masa di parngoluon ni panurirang Jona gabe sada tudosan tu angka naposo ni Debata, ia na rumingkot ndada uhum na naeng sipasahatonnasida alai tung asi dohot holong ni roha ni Tuhan Debata di jolma na tinompaNa i asa mangolu nian nasida marhite na mulak tu dalan hatigoran i. Boi do tapatudos tu parumpamaan ni Tuhan Jesus taringot tu angka pangula di porlak anggur. Ai marmungutmungut do angka pangula na parjolo ro i ala dos upanasida dohot na parpudi ro hape nunga adong hian parjanjian nasida. Disi ma didok na mora i : "Ndang adong hubahen tu ho naso tigor", " Nda guru di ahu do ugasanki?" (Mateus 10: 1-16). Sai hira na so konsekwen ma di roha ni pangula i nampuna ugasan i, hape nunga adong hian parjanjian nasida, sahupang do jaloonna upana. Tudos do na masa i tu parumpamaan taringot tu Anak Namago (Lukas 15: 11-32). Anak sihahaan i ndang sonang rohana di pambahenan ni amana na manjangkon anggina ala mulak tu dalan na denggan i, disolsoli pangalahona na roa i. Mangihuthon anak sihahaan i, ndang adong hak dohot kebebasan i amana manjangkon anggina na olo paubahon rohana. Pambahenan ni amana sai hira na so konsekwen di rohana jala ndang ringkot di rohana naung mate i gabe mangolu, naung mago i gabe jumpang muse.

Dipatuduhon Debata do na guru di Ibana do sude laut, galumbang, ihan nang nasa na di portibi on. Marhite pardalanan ni ngoluni si Jona boi guruhononta, ia ibana sasintongna ndang konsekwen di hatana ai so dioloi ibana hata ni Jahowa (1: 2), ibana mangidohon tu Debata asa dibuat hosana (4: 3), sogo rohana ala so saut diparo Debata uhum hamagoan tu halak Ninive (4:1), hape didok ibana halak na mabiar mida Debata do ibana (1: 9).
Si Jona mangalusi sungkunsungkun dohot parsuruon ni Debata tu ibana. Di tongatonga ni alogo halisungung na rongom mambahen hamatean, manang di tingki paimahon uhuman hamatean pe martangiang do ibana suang songon na di bagasan parau i nang halak Ninive. Si Jona, nang pe naung di bagasan butuha ni dengke songon rura ni linggoman ni hamatean, tongtong do ibana martangiang tu Debata (2: 2). I ma sada pengakuan paboa nasa haluaon sian hamatean holan sian Jahowa do marharoroan.

Saonari dohononta ma, di na dialusi jolma i sungkunsungkun dohot joujou ni Debata marhite haporseaonna jala ditadingkon dalanna na roa i jala gabe pangoloi ibana di Hatana, disi ma Debata ro paluahon jolma i sian hamagoan naung jonok i. Saluhutna i dipamasa Debata holan ala asi ni rohana do. Si Jona berusaha mangambati asi ni roha ni Debata, alani i do dipamasa Debata tu ibana lan tanda nang hamaolon laho mamboan ibana tu pangantusion na togu taringot tu asi ni roha ni Debata. Ingkon marasi ni roha do nang hita tu manang ise pe nang mate na laho mate nama nasida, manang pe songon dia hajahaton nasida. Jotjot do nang halak Kristen marasi ni roha holan tu halak manang benda na ringkot tu hadirionna suang songon si Jona na marasi ni roha (peduli) tu hau dulang ingananna manisio. Hita pe ingkon peduli do nang tu angka ugasan, arta, alam jala ingkon jagaonta i asa unang sega. Nang pe i ampunanta manang ampuna ni ise pe tahe. Haru Debata tongtong do dipardulihon angka pinahan na sai deak na di huta Ninive asa unang ripas saluhutna i. Na boi masa do i nang di panogunoguon tu ruas manang sasahalak, jotjot do holan tu angka halak na mambahen paruntungan tu hita, tu gareja do tatogutogu, molo hira ndang apala adong na boi bahenonna mangurupi panghobasion di gareja, ndang apala peduli hita. Alani i, taoloi ma parsuruon na sian Tuhan i jala gomos ma tatiop Hatana jala konsekwen nang hita di hatanta pe. Amen




Jamita Minggu O k u l i
Tgl. 15 Maret 2009
Pilippi 3 : 13 - 16
Pdt. Hopol Sihombing, S.Th
Pendeta HKI Resort Bandung


Padompakhon Ngolu tu panjouon sian Debata


Sada do pardompahan jala holan di Debata
Holan sada do bohinta, alani gabe holan tu sada tujuan do boi dompakhononta jala sada ma tujuan di jolonta. Tarsongon i ma pangalaho laho pahantushon boha hita laho padompakhon ngolunta tu Debata. Di naung tapadompakhon ngolunta tu Debata tung so tarbahen be laho mangarahon ngolu tu sibolis i. Jala songon i ma sabalikna, molo taadophon dirinta tu sibolis gabe ta tundalhon ma Debata. Boasa ? ala tung so tarbahen do rap Debata dohot Sibolis i, na sai marsitundalan do i manang maralo.

Manang, na adong do jolma dua pardompahan/bohina ? tontu alusna, ndang adong. Asing ma molo naung cacat partubuna gabe dua pardompahan manang 2 (dua) kepala sada pandohan tu pangalaho na so patut (na jahat) na di goari ’ular kepala dua’. Alai tung so domu do i tu nanaeng sitaringotan na diturpuk jamita on. Ingkon tapadompakhon do ngolunta tu sada tujuan, tu Tuhan i dohot tu panjouanNa.

Di pabotohon ap. Paulus do pardalanan ni ngoluna andorang so manjalo Jesus Kristus (ay.4-7); tung holan tu na niida ni mata do ibana porsea, manusai huria atik pe naung marsunat ibana di ari paualuhon, sian tongatongan ni halak Israel, pomparan ni si Benjamin, Halak Heber, halak Farise, unduk tu Patik. Alai ndang di janghon ibana Jesus Sipalua i ala so tu Debata ibana mangadophon bohina.

Alai narumingkot ima ngoluna songon natarsurat ai ay. 7, " Alai naung paruntungan hian di ahu, harugian do i hujujur ala ni Kristus i". Hata on manungguli hita tu panjouon dohot hamubaon ni rohana di Ul. Apostel 9. di pardalananna (gorna uju i "Saulus") tu Damaskus na tung marapipurun laho manusai dohot mamunu siihuthon Kristus, napinaborhat ni Surat sian Sintua ni Malim. Alai uju di tongandalan ibana, mardonokkon huta Damaskus, tompu ma sumillam sondang sian ginjang humaliang ibana. Jadi tinggang ma ibana tu tano, dung i dibege ma soara na mandok tu ibana: Saulus, Saulus! Boasa leleanmu Ahu? Alai didok ma: Ise do Ho, Tuhan? Jadi didok Ibana: Jesus do Ahu, na nileleanmi. Dibege angka donganna sauduran do hata i, alai ndang di ida nasida ise na mandok i. Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama tanganna, manogu ibana tu huta Damaskus. Asa tolu ari lelengna ndang marnida matana jala ndang mangan manang minum ibana.Di huta Damaskus i sada sisean na margoar Ananias na tinurgashon ni Debata laho mangampehon tangan tu ibana, asa sumuang marnida. Didok Tuhan i ma tu ibana: Laho ma ho, ai hupillit do ibana ulaulangku, asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel. Dungi i ma si Paulus gabe ulaula ni Debata. Andorang i, sahalak parjahat do ibana, alai dung tarjou ibana, bage parbarita Nauli ma ibana atik pe ingkon mamolus godang hamaolon dohot hasusaan. Jala marhite ulaon ni ibana, gabe torop halak porsea di Tuhan Jesus. Jempek hata dohonon, Saulus namanundalhon Debata hian, nuaeng gabe gabe halak na mangadophon ngoluna tu Debata.

Nuaeng pe, tu Debata do tapadompakhon bohinta (Okuli= mangaranapi do matangku dompak Jahowa), ndang holan hamubaon ni roha huhut do mangido pangurupion sian Debata dimasa angka hamaolon dohot hasusaan songon na tarsurat di Psalmen 121:1-2; Sai mangaranapi do matangku dompak angka dolok: Sian dia do ulaning ro pangurupion tu ahu? Sian Jahowa Sitompa langit dohot tano on sambing ro pangurupion ianggo tu ahu. Naeng songon i ma nang hita; mangaranapi, padompakhon ngolu tu Debata, mangido pangurupion manang aha pe namasa. Tung rade do nang Debata padompakhon bohiNa tu hita, asal ma marsitutu paubahon diri mandapothon Debata.

Las ni roha Naimbaru di halak na Porsea
Di ayat 10-11 di dok: "asa hutanda Ibana dohot hagogoon ni haheheonna i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i; anggiat sahat ahu tu haheheon na sian angka na mate!" ada ayat 10-11 dikatakan; "Yang kukehendaki ialah mengenal Dia dan kuasa kebangkitan-Nya dan persekutuan dalam penderitaan-Nya, di mana aku menjadi serupa dengan Dia dalam kematian-Nya, supaya aku akhirnya beroleh kebangkitan dari antara orang mati." on ma halomoan dohot las nirohana naimbaru nuaeng. Mangihuthon na tarsurat di buku Ul. Apostel dohot surat ni Apostel Paulus tu angka huria tung marapipurun do ringgas ni ap. Paulus mamaritahon Tuhan Jesus Kristus dohot Barita Haluaon i. Jala tung godang huta naung dibongoti ibana laho mamaritahon i.


Melupakan hidup Lama (:13-14)
Tontu do adongbe ngolu haholomon (na jahat) di hita di angka ari naung salpu; pargabuson, mangahut tu diri, pangarimason, manangko, mardatu, pargadombuson, marbadabada dohot lan naasing. Alai nuaeng naung di jou Tuhan Jesus hita laho mangadophon bohi, ngolunta tu ibana. Hinorhon ni pamelehonon ni diriNa dohot holong ni rohaNa i, naeng ma hita mangolu hombar tu lomo ni rohaNa i.
Paulus bo gabe tiruan di ngolunta songon na ni dokna: "Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i." (ay. 14).
Manghalupahon ndang lupa ingatan (amnesia), pikun, kecelakaaan/ sakit, manang manghapus memori ingatan. Alani aha? Ala taboto do manirang na roa sian nadenggan. Jala ingkon ingotonta do pangalaho na holom i asa tangkas ingotonta naung dipalua do hita sian hajahaton dohot dosa i. Ala ndang tau hita mandok "nunga marhamubaon au, nunga dipalua" alai ndang taboto sian dia hita dipalua, manang sian dia hita marhamubaon. Jadi ’manghalupahon’ dison ndang marlapatan lupa sian parningotan, alai manadinghon, ndang patupahon alai marlojong mardompakhon Jesus Kristus.

Silehonlehon sian Debata (:14 a, )
Di portibi on, hea do hita manjalo silehonlehon; nametmet manang na balga, naarga dohot lan naasing. Tontu do tung las roha manjalo silehonlehon manang hadiah. Isara ni sahalak parsingkola namanjalo hadiah ala prestasina di singkola, manang kado ala ulang tahun. Tontu do tung mansai las rohana manang bangga manjalosa. Alai naeng ma umlas rohanta manjalo silehonlehon nasian Tuhan Jesus Kristus, ima; las niroha, dame, pasupasu partondion dohot pardangingon, lumobi tahe ngolu nasaleleng nileleng na di harajaonNa i. Silehonlehon i dipasahat tu na mangadophon ngoluna tu Tuhan i dohot panjounNa i.
Apostel Paulus mandok, ingkon marsiadu (marlojong) do hita mandapothon Ibana jala manadinghon pangalaho na holom i. Burju ma hamu marlojong, asa dapotan hamu!

Panimpuli
Naeng songon i ma nian hita marroha jala marpangalaho. Di minggu Okuli on (Sai tong mangaranapi matangku tu Jahowa) naeng ma pandang situjuon ni ngolunta mardompakhon Tuhan i. Holan tu Ibana ma hita mangido pangurupion jala tu Ibana ma tatujuhon ngolunta, ai holan dibagasan Ibana do dapot hita pangurupion, hamamalum, haluaon dohot haimbaruon ni ngolunta. Jala naeng tongtong mardompakhon Tuhan i hita di ngolunta i asa tundal sibolis sian hita rap dohot angka pangalaho haholomon i; hajahaton dohot dosa i. Manang ise na mambahen Debata gabe tujuan ni ngoluna, dompakhonon ni Debata do nang bohiNa maradophon hita; jala parsaulihononna godang pasupasu partondion nang pardagingon. Amen.


Jamita Minggu L e t a r e
Tgl. 22 Maret 2009
Jesaya 54 : 11 - 17
Redaksi



Sion Naimbaru Dibagasan Hatigoran


I. Patojolo :
Turpukta on pasal 54: 11-17 merupahon bagian sian "Deutro Jesaya" manang jotjot digoari Jesaya na paduahon ima Pasal 39-55 na manekanhon barita nauli taringot tu panghirimon tu haluaran na paduahon na gabe penentu tu hinalanjut ni sejarah ni parngoluon ni bangso Israel na dibagasan pangaramotion ni Debata. On ma na gabe peluang na tepat na sai dipaimaima bangso Isarael, dung sun nasida nasailaon diangka parungkilon nang haputusasaan jala di tingki masa habuangan. Sesuai dohot corak ni barita nauli ni Deutro Jesaya on, Suruhan nang panjouon na lao mandai haluaon na naeng papataron ni Jahowa, ima penyataan ni holong dohot asi ni rohaNa tu angka bangso na na hinaholongan ni rohaNa ala haluaon i gabe nyata holan ala Debata do na patupahonsa. Haluaon i ma na mamboan bangso i tu situasi na mansai bebas, disi ma nasida mandai songon dia do hinauli nang hinadenggan ni pangaramotion ni Debata tu angka halak na sasintongna olo hot marpangunsandean jala mamelehon dirina tu Debata dibagasan sude angka panggulmiton ni ngoluna.

II. Hatorangan

Undungundung na mansai sompit (ay. 2) dohot Sion na terpecahpecah, patuduhon suatu gambaran gareja na naeng bersinar songon na diuraihon di pangungkapon 21:10-21. Alai dipatorang dibagasan bentuk kiasan di ayat 13-17 ima hasintongan (ay. 14) dohot situasi naso tertaluhon (ayat 15-17) mansaor do sian pribadi sisean na universal (ay. 13; bdn 8:16; Jer. 31:34), na patuduhon sada tanda ni padan na imbaru i. On ma na gabe kekuatan na sasintongna sian huta ni Debata, na dijanjihon ndada tahan terhadap serangan alai sinjata hasintongan naso boi dimusuhi (ayat 17; bdn. Luk. 21:15).

Ayat 11-14 a : Sian persekutuan ni Debata dohot ruasNa, pamerengan mulak muse tu Sion na mansai uli marhite penambahan jumlah pendudukna (1-3) dipapatar ma muse pembangunanna. Angka na parir (Heber. ani) pinaburuburu, pogos dohot musuh si bondut ho (bdn.Jes. 49:19) jala ndang tarapul (Andung. 1:16-17) naeng pajongjongon ni Debata sandiri. Alasna batu na birong (Heber. puk) ima sada celak na birohng na dibaen sian batu na birong na digiling halus jala dicampur dohot miak jala memalit mata sada perekat hitam gabe menatah permata; dasar-dasarna sian batu na birong, batu nilam biru na sangat dihargai ditingki zaman kuno; Bungkulanna sian humala rubin, jala angka bahalna sian mata intan humala (batu manikam merah yang bercahaya seperti api); jala sandok parbalohanna sian angka batu hasudungan ni roha.

Ala Debata do mambangun Sion/Jerusalem na imbaru i, gabe dilukishon ma songon "oroan na sinanggulan mandapohon harajaanna", kota na gok hamuliaon ni Jahowa( Pangk 21:2, 11). Sude bangso gabe sisean ni Debata, nasida ma na mambege jala manjalo huhut manorushon hata ni Debata (Jes. 50:4-5). Balga asiasi ni Debata tu nasida.(ay.10), ala Jerusalem dipajongjong di ginjang ni hasintongan dohot keadilan (bdn.Jes. 45:21) na mangolu di huta i.

Ayat 14b-17 : Bangso na mulak sian habuangan on mampartentanghon gambar na mansai uli on dohot situasi na mansai parir di huta na niinganan nasida jala manungkun, bohama penggenapan ni padan ni Debata? Dapotsa do alus sian Debata dibagasan pasu-pasu: dao nama nasida sian pangarupaon (Jes. 52:4)" dohot dao sian hatarsonggoton, asa habiaran i ndang adong be ingananna. Nata pe, gok halak na na menyerang Jerusalem, alai ndang suruan ni Jahowa nasida, alani i do gabe marisuang do usaha nasida gabe madabu ma nasida. Asa lam hot haporseaon ni angka na umbegesa, dipaingot panurirang i ma tu nasida na Debata sambing do na marhuaso sian angka senjata dohot angka na mambahen huhut mampargunahon angka alat na naeng marpaorang. Ditompa Debata pande/tukang bosi laos Ibana do muse manompa sipangangago i laho mangango. Sian on ma boi berengonta hamaolon na manggunahon angka teknik nang kesenian baru sian asi ni roha ni Debata do; manang didia pe di Padan na Robi, ulaon mambaen bosi didok sebagai ulaon asi ni roha ni Debata. Ala ni nasa sinjata na jinadihon mangalo ho, ndang manjadi; jala nasa dila na hehe mangalo ho di paruhuman ingkon toruanmu do. On ma na gabe parjambaran ni angka naposo ni Debata jala angka anak nang boru ni Debata na tontong dipintori nang dapotan hatigoran nasian Debata. Ala ni i, las ma rohanta ala sai dipalua jala diparorot Debata do hita saluhutna. Nata pe Sion na tahirim i ndang tarida dope, alai na sai tongtong do dilehon Debata jaminan tu nasida na so jadi musnah marhite angka kekerasan manang maup alani fitnah. On na na gabe patugohon haporseaonta saleleng mangolu di tano on.

III. Penutup

Dibagasan Minggu Letare on, sude halak na porsea sian sundut ni si Abraham sahat tu hita halak na porsea di Jesus Kristus manuju tu "tano surgo i do", tu huta na direncanahon dibangun Debata (Heber.11:10-16); ala dibagasan kota i ma marharajaon Debata dohot birubiru ni Debata jala angka naposo ni Debata martangiang tu Ibana.

Padan na diboan ni Deutro Jesaya on taringot tu Sion na imbaru na ro sian surgo, sian Jahowa Debata do marharoroan, ndang dope digonopi saluhutna, alai sai tongtong do sepanjang sejarah ni halak Jahudi sai tongdo maimaimahon TUHAN i di Jerusalem, huta badia i, na manghatindangkon, songon dia ma tarida ngolu, hamatean nang haheheon ni Jesus Kristus jala mandorong hita saluhutna angka na porsea di Tuhan i, tongtong maimaimahon hagogonop ni Harajaon ni Debata. Ndada dijou hita asa paluahon dirinta sian portibi on, alai dijou do hita asa padirihon di portibi on tandatanda syalom/dame na songon Jerusalem na imbaru asa saluhut halak boi mambahen panghirimonna sambing tu Debata dibagasan ngoluna. Amen.


Jamita Minggu Judika
Tgl. 29 Maret 2009
Psalmen 43 : 1 - 5
Pdt.Berton Silaban, S.Th
Pdt. HKI ResortKandis


Haposi ma Debata

Patujolo
Deba sian angka na bisuk di Padan na Robi mandok, ia buku Psalmen 43 on i ma udut ni Psalmen 42: 1-12. Sarupa do isi ni na dua bindu i, i ma taringot tu Tangiang ni marsasahalak (Doa Pribadi) manang keluhan pribadi. Hasarupaan ni na dua bindu i pe tarida dipengulangan Refrein tolu hali: 42: 6,12 dohot 43: 5 na mangondolhon asa manghaposi jala marsihohot tu pangurupion ni Debata. Tarida panghalungunhonon ni par-Psalmen on diparsaoran dohot Debata, lumobi ala di bagasan hamaolon dohot hapariron bolon ibana, tarbuang tu tano Jordan gabe pulik ibana sian bangsona jala dao sian bagas joro ni Debata di Jerusalem. Dipasahat ibana ma sude holso ni rohana i tu Debata, asa Debata na mangantoi saluhut hamaolonna i.

Hatorangan ni Turpuk
1. Mangadopi musu do par-Psalmen on, i ma angka bangso na asing naso daulat, ditongatonga ni angka baoa sipaotooto dohot angka parroha na jengkel ibana. Marsak jala tumatangis ibana, lumobi ala sai direhei jala diissahi musuna na mandok: "Didia do Debatam?" (42:4). Saluhut na i mambahen maheu jala marunggkil par-Psalmen on. I do umbahen na martangiang ibana tu Debata, asa campur tangan Debata mangantoi parngoluonna na gok parungkilon i. Ndang adong na asing sipangasahononna, so holan Debata sambing. Umbahen i didok par-Psalmen on: "Luluhon ahu, ale Debata, jala badahon badangku…" Dipasahat ibana sude parsoalan ni ngolu na i tu tangan ni Debata, asa Debata na marlulu dompak musuna jala Debata na paturehon langkana.

2. Diparungkilon na mansai borat i, manghilala do par-Psalmen on sai hira na ditinggalhon. Debata ibana, hapunjungan jala merasa diambolongkon Debata. Ndang adong be na niarop ni rohana mangurupi ibana. Situasi tertekan, stress jala depresi panghilalaanna hinorhon ni na masa tu ngoluna. Mangolu ditongatonga ni bangso na so daulat, i ma bangso na mangulahon na ramun, na so marruhut, na so maradat, na so menghargai angka hak-hak ni donganna dohot na so marlangku uhum. Maol do mangolu halak partigor di situasi parsaoran na sogon i. Ai dang olo partigor papeol uhum. I do umbahen maheu do partigor di tongatonga ni hageduhon dohot hajahaton. Marsak jala marungkil ma partigor i paidaida na masa i, maon gabe terimbas ibana tu na masai. Umbahen i dijouhon par-Psalmen on: "tongoshon ma hatoranganmu dohot hatigoranmu, angka na manogu ahu, pataruhon ahu tu dolok ni habadiaomu dohot tu ingananmu". Nda holan Debata nama pengharapan terakhir na paluahon ibana sian hasosakan i. Tarpaima do ibana di haroro ni Debata paluahon ibana sian hagogotanna i. Debata na manghaholongi dohot na mangasi i ibana. Ala ni i do bulus ma rohana di saluhutna, dibagasan sihol ni roha situtu paimahon pangurupion sian Debata. Adong pnghirimon na mangolu di ibana.

3. Sada na mansai arga bohal ni partondion siidaonta sian pengalaman ni par-Psalmen on, lam nalnal ma di hita hinolsohonna dohot panghirimonna. Ndang moru pos ni rohana tu Debata, tung pe mansai godang jumpang na maol, patunda ni na masa. Debata do na tuk paulakhon parsaoran asa gabe mulak denggan. Manghirim di asi ni roha ni Debata na hatop mangurupi. Nangpe tung dokdok situtu sitaonon ni par-Psalmen on alai tongtong marsihohot manghaposi Debata jala tongtong sanggup patupa pamujion tu Debata. Didok ibana do: "Haposi ma Debata ai sai na pujionku dope Ibana, hatuaon ni bohingku jala Debatangku". Disituasi na maol, di partinaonan na parir ndang mago panghirimon jala ndang lilu haporseaon. Pos situtu do rohana di Debata, urupan ni Debata do ibana, paluaon ni Debata do ibana sian tangan ni angka sipaotooto dohot parroha na jengkel.

Sipahusorhusoron
1. Boi do masa tu hita songon na masa tu par-Psalmen on, di ngolunta be, saleleng di portibi on dope hita, i ma ragam ni parungkilon dohot sitaonon na dokdok. Dihaliangi musu, gabe tarsosak, lilu di dalanta ala ni angka dosa na taula di ngolunta. Tahasiholi do asa malua hita sian angka hamaolon i, malua sian angka hasomalan mangulahon dosa. Mangadopi saluhut na i, pasahat ma pangidoanmu tu Debata na mandok: Luluhon ma ahu, ale Debata, jala badahon ma badangku. Tapangido ma asa Debata na parjolo jala di jolo laho mangalo angka musunta. urupan jala paluaon ni Debata do hita sian tangan ni angka na manghasogohon hita ala hasintongan.

2. Ndang tarbaen angka patigor sonang ditongatonga ni hageduhon. Ingkon protes do hita molo adong angka na mangulahon hajahaton. Godang do jolma boi sonang jala ndang terganggu rohana nangpe maringanan, mangadopi angka dosa, bahkan gabe mendukung, menikmati dosa i. Marsak do angka partigor mamereng hageduhon, ai
ditangihon Debata do hoihoi dohot arsak ni angka partigor. Atik pe maol pajongjong hatigoran ditongatonga ni na mangulahon na jahat, pos ma rohanta urupan ni Debata do hita mangadopi i.

3. Bulus ma rohanta manghirim dipangantoion ni Debata di ngolunta, manghirim di asi ni rohaNa. Malungun jala masihol hita marsaor dohot Debata, ido tanda ni na mangolu haporseaonta. Amen