Jamita Jumat Agung - Tanggal, 21 Maret 2008
Oleh : Pdt. R. Simanjuntak, BD (Parhobas di Kantor Pusat)
I. Patujolo
Ndang adong be nanggo sada sian jolma i na so mardosa. Tung saluhutna do pinarhatoban ni dosa (pat. Roma. 3: 23). Hape, upa tinuhor ni dosa do hamatean (Rom.6:23). Ala ni i tung saluhutna do jolma hona uhum hamatean.
Anak ni Jolma i pe, ima Jesus, songon i do, mate. Alai asing do hamamateNa. Ndang songon hamamate ni hita jolma. Ianggo Jesus, digantung jala mate Ibana di hau pinarsilang i, laos disi do patar balga ni holongNa tu jolma manisia. Ai aturan jolma i do na ingkon hona uhum ala dosa i. Hape gabe ro Jesus. Gabe Ibana singkat ni hita jolma gantung di silang i. Olo Ibana sumeahon hosaNa humophop hita manisia. Jala ganup halak na mamereng huhut hot manghaporseai panghophopon dohot pangondihonon ni Jesus di hau pinarsilang i gabe mangolu huhut dapotan haluaon salelengna.
II. Hatorangan ni Turpuk
1. Mara ni ganup halak na gok ungutungut
a. Dipardalanan sian Misir tu tano Kanan dope bangso Israel. Nunga sahat nasida di dolok Hor. Laos ditorushon pardalanaanna sian Laut Arung – gabe mangaliat pasiding musuna di luat Edom. Nunga tung leleng nasida dipardalanan. Loja muse. So sundat gok hamaolon ro diangka mara nang musu di tongan dalan. Ndada holan i, sipanganon pe ndang adong ; siinumon pe so ada – ima pingkirannasida. Gabe murhing be ma huhut sai marmungutmungut tu Jahowa dohot tu si Musa. Ungutungutna on ma : ai sumonang hian do hami di tano Misir, hape gabe diboan si Musa haruar sian i. Gabe tinaon ma songon on di parhorsihan on. Sipanganon dohot siinumon pe so ada. Sagusagu (manna) pe nunga giakgiak mambahen ginegine ateate marnida.
Tarida sian ungutungut i, nunga ingkon lomona/salerana sipasauton ni Debata. Ndang boi be dirohana nanggo otik hamaolon. Holan hurang sipanganon dohot siinumon, pintor gok ungutungut. Gabe dihasogohon si Musa. Dungi laos dilupahon sambing pandonganion dohot panarihonon ni Debata di nasida.
b. Ndang lomo roha ni Debata marnida halak na gok ungutungut. Ungutungut ni halak Israel pe tong songon i, ndang dihalomohon. Ujungna, gabe diparo Debata ma ulok tulong api. Diparguti ma bangso i. Gabe torop marmamatean sian tongatonganasida.
2. Dijangkon Debata do ganup halak na magopu rohana sumolsoli dosana.
Dung ro mara, diparguti ulok i nasida, baru pe asa sadar dihahuranganna.
Diboto ma, paboa so dihalomohon Debata halak na gok ungutungut. Dungi sumolsol bagi ma nasida. Ditopoti ma dosana diadopan ni si Musa. Panopotionnasida songon on ma : “... nunga mardosa hami dompak Jahowa dohot dompak ho ; martangiang ma ho tu Jahowa, asa dipadao sian hami ulok tulong api i” (ay.7).
Dioloi si Musa do pangidoan i huhut martangiang tu Jahowa mangondihon bangso i. Dungi, dijangkon Debata do nasida, gabe dipaeleng sipareonNa tumangihon pangidoan i. Dungi, laos disuru Debata ma si Musa mambahen suman ni ulok tulong api sisangkothononna tu ’hau partonggol”. Jala Debata mandok : “...ia adong manang ise na hona pargut jala dibereng tusi, ingkon mangolu ibana”(ay.8). Dipatupa si Musa do songon i. Jala toho ma antong, ia adong na hona pargut jala diida suman ni tulong api na pinatimbo/sinanghothon di hau partonggol i, gabe mangolu ibana. Lapatanna, tudutudu do i tu Jesus na gantung di silang i. Jala ganup na mamereng Tuhan i di silang i, huhut hot manghaporseai panghophoponNa, i do na dapotan hangoluon/haluaon i.
III. Pokok Renungan
1. Tongka do sai murhing bohi huhut sai marmungutmungut tu dongan jolma lumobi tu Debata. Tung so dihalomohon Debata do jolma sisongon i. Ai halak na sai murhing huhut marmungutmungut dipatudu i do dirina siginjang roha. Taboto do, saleleng di portibion, ndang boi so ro hamaolon. Dungi molo tung hurang pe sinamot – hurang mangihuthon paretongan portibion - alai ingkon okuhonon do paboa so hasuhatan saluhut denggan basa ni Debata naung tajalo. Na pasti, ndada holan ngolu siapari na disarihon. Alai uju madabu hita tu dosa – termasuk dosa marmungutmungut – disi do hita naung nililit huhut pinargut ni ulok na robi, ima sorop/huaso ni dosa i. Gabe huaso ni dosa i na mamparhatobanhon hita. Ala ni i do ingkon hona uhum hian jolma i, ima uhum ala dosa i, hamatean salelengna. Alai ro Tuhanta Jesus, gabe Ibana manggatihon hita manjalo uhum i. Gabe Tuhanta Jesus ma singkat ni hita manisia digantung di hau pinarsilang i – suman ni ulok tulong api na sinangkothon di hau partonggol, laos tudutudu do i tu Jesus na gantung di silang i (pat. Joh.3:14). Ima balga ni holong dohot denggan basaNa humophop hita jolma naung gok dosa dohot ungutungut i.
2. Ndang adong sian jolma na sempurna. Saluhutna do gok hahurangan dohot dosa. Alai taingot ma : dijanghon Debata do ganup halak na sumolsoli dosana huhut dohot roha na magopu ibana manopotisa di adopan ni Debata. Na paling berbahaya di ngolu on, molo niula na sala/dosa, dungi gabe nihasolmalhon na sala/dosa i. Hape ala dihasomalhon i, gabe i dietong hasintongan. Pangalaho na songon i do na umborat. Nuaeng pe, bereng ma Tuhanmu na gantung di hau pinarsilang i. Haporseai ma panghophopNa i. Dungi gabe dapotan hangoluan dohot haluaon na hot salelengna ma ho. Amen.
Oleh : Pdt. R. Simanjuntak, BD (Parhobas di Kantor Pusat)
I. Patujolo
Ndang adong be nanggo sada sian jolma i na so mardosa. Tung saluhutna do pinarhatoban ni dosa (pat. Roma. 3: 23). Hape, upa tinuhor ni dosa do hamatean (Rom.6:23). Ala ni i tung saluhutna do jolma hona uhum hamatean.
Anak ni Jolma i pe, ima Jesus, songon i do, mate. Alai asing do hamamateNa. Ndang songon hamamate ni hita jolma. Ianggo Jesus, digantung jala mate Ibana di hau pinarsilang i, laos disi do patar balga ni holongNa tu jolma manisia. Ai aturan jolma i do na ingkon hona uhum ala dosa i. Hape gabe ro Jesus. Gabe Ibana singkat ni hita jolma gantung di silang i. Olo Ibana sumeahon hosaNa humophop hita manisia. Jala ganup halak na mamereng huhut hot manghaporseai panghophopon dohot pangondihonon ni Jesus di hau pinarsilang i gabe mangolu huhut dapotan haluaon salelengna.
II. Hatorangan ni Turpuk
1. Mara ni ganup halak na gok ungutungut
a. Dipardalanan sian Misir tu tano Kanan dope bangso Israel. Nunga sahat nasida di dolok Hor. Laos ditorushon pardalanaanna sian Laut Arung – gabe mangaliat pasiding musuna di luat Edom. Nunga tung leleng nasida dipardalanan. Loja muse. So sundat gok hamaolon ro diangka mara nang musu di tongan dalan. Ndada holan i, sipanganon pe ndang adong ; siinumon pe so ada – ima pingkirannasida. Gabe murhing be ma huhut sai marmungutmungut tu Jahowa dohot tu si Musa. Ungutungutna on ma : ai sumonang hian do hami di tano Misir, hape gabe diboan si Musa haruar sian i. Gabe tinaon ma songon on di parhorsihan on. Sipanganon dohot siinumon pe so ada. Sagusagu (manna) pe nunga giakgiak mambahen ginegine ateate marnida.
Tarida sian ungutungut i, nunga ingkon lomona/salerana sipasauton ni Debata. Ndang boi be dirohana nanggo otik hamaolon. Holan hurang sipanganon dohot siinumon, pintor gok ungutungut. Gabe dihasogohon si Musa. Dungi laos dilupahon sambing pandonganion dohot panarihonon ni Debata di nasida.
b. Ndang lomo roha ni Debata marnida halak na gok ungutungut. Ungutungut ni halak Israel pe tong songon i, ndang dihalomohon. Ujungna, gabe diparo Debata ma ulok tulong api. Diparguti ma bangso i. Gabe torop marmamatean sian tongatonganasida.
2. Dijangkon Debata do ganup halak na magopu rohana sumolsoli dosana.
Dung ro mara, diparguti ulok i nasida, baru pe asa sadar dihahuranganna.
Diboto ma, paboa so dihalomohon Debata halak na gok ungutungut. Dungi sumolsol bagi ma nasida. Ditopoti ma dosana diadopan ni si Musa. Panopotionnasida songon on ma : “... nunga mardosa hami dompak Jahowa dohot dompak ho ; martangiang ma ho tu Jahowa, asa dipadao sian hami ulok tulong api i” (ay.7).
Dioloi si Musa do pangidoan i huhut martangiang tu Jahowa mangondihon bangso i. Dungi, dijangkon Debata do nasida, gabe dipaeleng sipareonNa tumangihon pangidoan i. Dungi, laos disuru Debata ma si Musa mambahen suman ni ulok tulong api sisangkothononna tu ’hau partonggol”. Jala Debata mandok : “...ia adong manang ise na hona pargut jala dibereng tusi, ingkon mangolu ibana”(ay.8). Dipatupa si Musa do songon i. Jala toho ma antong, ia adong na hona pargut jala diida suman ni tulong api na pinatimbo/sinanghothon di hau partonggol i, gabe mangolu ibana. Lapatanna, tudutudu do i tu Jesus na gantung di silang i. Jala ganup na mamereng Tuhan i di silang i, huhut hot manghaporseai panghophoponNa, i do na dapotan hangoluon/haluaon i.
III. Pokok Renungan
1. Tongka do sai murhing bohi huhut sai marmungutmungut tu dongan jolma lumobi tu Debata. Tung so dihalomohon Debata do jolma sisongon i. Ai halak na sai murhing huhut marmungutmungut dipatudu i do dirina siginjang roha. Taboto do, saleleng di portibion, ndang boi so ro hamaolon. Dungi molo tung hurang pe sinamot – hurang mangihuthon paretongan portibion - alai ingkon okuhonon do paboa so hasuhatan saluhut denggan basa ni Debata naung tajalo. Na pasti, ndada holan ngolu siapari na disarihon. Alai uju madabu hita tu dosa – termasuk dosa marmungutmungut – disi do hita naung nililit huhut pinargut ni ulok na robi, ima sorop/huaso ni dosa i. Gabe huaso ni dosa i na mamparhatobanhon hita. Ala ni i do ingkon hona uhum hian jolma i, ima uhum ala dosa i, hamatean salelengna. Alai ro Tuhanta Jesus, gabe Ibana manggatihon hita manjalo uhum i. Gabe Tuhanta Jesus ma singkat ni hita manisia digantung di hau pinarsilang i – suman ni ulok tulong api na sinangkothon di hau partonggol, laos tudutudu do i tu Jesus na gantung di silang i (pat. Joh.3:14). Ima balga ni holong dohot denggan basaNa humophop hita jolma naung gok dosa dohot ungutungut i.
2. Ndang adong sian jolma na sempurna. Saluhutna do gok hahurangan dohot dosa. Alai taingot ma : dijanghon Debata do ganup halak na sumolsoli dosana huhut dohot roha na magopu ibana manopotisa di adopan ni Debata. Na paling berbahaya di ngolu on, molo niula na sala/dosa, dungi gabe nihasolmalhon na sala/dosa i. Hape ala dihasomalhon i, gabe i dietong hasintongan. Pangalaho na songon i do na umborat. Nuaeng pe, bereng ma Tuhanmu na gantung di hau pinarsilang i. Haporseai ma panghophopNa i. Dungi gabe dapotan hangoluan dohot haluaon na hot salelengna ma ho. Amen.