Jamita tu Minggu Quasimodogeniti - Tanggal, 30 Maret 2008 Oleh : Pdt. Tony L. Hutagalung, MSc (Parhobas di Kantor Pusat)Patujolo
Halak na imbaru mananda Kristus manang porsea di Kristus tontu ndang apala bagas dope parbinotoanna di Hata ni Tuhan i. Alani i, olo do mura rohana ganggu molo ro poda (ajaran) na maralo tu Hata ni Tuhan i tarlumobi ma molo songon na sarupa ajaran i. Disi ma olo ganggu roha ni jolma i gabe maol mambedahon na dia do ajaran na sasintongna jala dia do na sala. Suang ma songon na masa di huria Kolose, di naung jongjong huria i marhitehite ulaon parbaritanaulion ni angka naposo ni Tuhan i. Nasida marharoroan sian halak sileban na so adong dope pangantusion nasida di Hata ni Tuhan i, hape sian na so panagaman nasida ro ma angka parpoda haliluon tu tongatonga nasida na mambahen ganggu roha nasida.
Hatorangan
Masa ganggu ni roha di deba ruas ni huria na di Kolose taringot tu ringkot ni parsunaton ala adong parpoda haliluon na ro tu tongatonga nasida na mandok ia tanda ni halak naung mananda Kristus ingkon do tarsunat songon na hisomalhon ni halak Jahudi. Dihatahon tu ruas ni huria i angka hata bisukbisuk dohot hata lensem na so marimpola, na hombar tu tona ni jolma, mangihuthon sisiasia ni hasiangan, na so mangihuthon Hata ni Kristus. Ala angka Apostel i marharoroan sian halak Jahudi, jala torop do nang halak Kristen di luat na asing na marharoroan sian halak Jahudi, gabe dirimpu natorop i na ingkon dohot do halak Kristen mangulahon parsunaton. Dipabotohon si Eprapas do na masa i tu apostel Paulus (bindu 1: 8), dibahen i ma ditongos apostel Paulus ma suratna tu huria Kolose ima na adong di turpuk jamita on. Dipatorang do disi lapatan ni parsunaton di ngolu ni halak Kristen na marojahon tu ngolu ni Kristus i. Ditangiangkon apostel Paulus do huria i huhut ditongos ibana surat laho padasiphon pangantusion nasida. Di na so haru bagas dope parbinotoan nasida taringot tu haporseaon ni halak Kristen, alani i porlu dipodai unang lilu jala ganggu rohana binahen ni angka poda na ro manang ala ni angka na masa di ngolu nasida.
Halak naung manjangkon Kristus tubu di bagasan ngoluna, nunga tartanom pardagingon na parjolo na gok dosa i rap dohot Kristus naung tartanom ala ni dosa i jala hehe laho manghamonangkon dosa i. Asa ido umbahen na didok : “di bagasan Ibana do rap hamu dipahehe, di na gabe porsea hamu di hagogoon ni Debata na pahehehon Ibana sian angka na mate” (2: 12). Sunat ima pangidoan ni patik i nunga disesa marhitehite parsunaton ni Kristus. Ai marhitehite na mangulahon Patik malua bangso Israel, alai dung ro Kristus na sinuru ni Debata tu portibi on, holan marhitehite na manghaporseai Kristus do boi malua sian uhum ni Debata. Asa nunga digohi be patik i marhitehite haroro ni Kristus tu portibi on. Dibahen ima, molo porsea jala mangulahon tona ni Kristus ido haluaon. Ia parsunaton, ima sada bagian sian na nidok ni patik i, diganti ma i marhitehite pandidion ai pandidion mangalehon ngolu na imbaru na sian Kristus. Andorang so ro Kristus, parsunaton do tanda di na masuk halak sipelebegu tu ugamo Jahudi, jala parsunaton i tanda manggotaphon pangalaho na robi na maralo tu Hata ni Debata. Alai nuaeng, pandidion na badia i do tanda di na masuk halak sipelebegu tu ugamo Kristen jala tanda manggotaphon pangalaho na robi na maralo tu Hata ni Debata. Asa, pandidion i ima parsunaton na so marhite sian tangan ni jolma. Pandidion na marhitehite aek mardongan Hata ni Debata, ima na paiashon daging pardosaon i asa gabe imbaru di adopan ni Tuhan i. Asa ndada aek i na rumingkot, tanda do i. Molo holan aek boti do, na paiashon pamatang do i sian na rotak ni tano on, alai molo mardongan Hata ni Debata, pandidion i na paiashon daging pardosaonta i do na nidokna disi.
Hombar tu na masa di halak Jahudi, angka ianakkon nasida disunat tingki metmet, ima diihuthon huria i sahat tu ombas na parpudi on: ianakkon ni na porsea di Kristus tardidi hombar tu tona ni Kristus. Pandidion na marlapatan do i mambolongkon pardagingon pardosaon sian pamatangta ai “nunga tarsilang hadirionta na buruk raphon Ibana asa pinasohot daging pardosaon, asa unang be hita mangadop di dosa” (Rom 6: 6). Kristus do ulu ni daging i, ima huria i, Ibana do parmulaan, naung parjolo tubu sian angka na mate, asa Ibana parjolo di na saluhutna (bindu 1:18). Halak naung porsea jala tardidi, dosana nunga disesa Tuhan i. Ima inti ni ngolu na imbaru : hasesaan ni dosa sian Tuhan i. Pangantusion na songon i ma dipasahat apostel Paulus tu huria Kolose, ima ngolu hakristenon na marojahan di Kristus, ndada marojahan di Patik na pinasahat ni si Musa. Ai ndang adong jolma i na rimpas boi mangulahon patik i, holan Kristus i do na tuk patupahonsa. Holan marhitehite na maporus do hita tu Ibana pasahathon ngolunta, ido asa talup hita dapotan haluaon.
Sipahusorhusoron
Sahat tu ombas na parpudi on, sai godang do ro mangelaela haporseaon ni ruas ni huria i. Ndada holan tu angka na baru porsea songon na masa di huria Kolose alai dohot do tu angka naung leleng gabe Kristen. Mansai godang nuaeng poda (ajaran) na maralo tu Hata ni Debata na boi begeon ima marhitehite mass media isarana majalah, surat kabar, radio, televisi nang pe marhitehite buku cetakan na mura dapot di toko buku. Molo ndang bagas pangantusionta di hata ni Debata olo do gabe ganggu rohanta jala adong do deba sian ruas ni huria i naung manadingkon Tuhan i (beralih ke agama lain). Ndada gabe ukuran lelengna gabe Kristen sasahalak alai bagas ni pangantusion dohot panghaporseaon di Hata ni Tuhan i do. Godang do nang halak naung leleng ibana gabe Kristen alai ndang bagas dope parbinotoanna di Hata ni Tuhan i ai so hea diguruhon, tu parpunguan ni halak Kristen na mangguruhon Hata ni Tuhan i pe so ringgas ro suang songon i nang manjahai buku na badia i.
Godang nuaeng ajaran na marbagabagahon haluaon di ngolu ni jolma i. Di ugamo Jahudi, disosohon do na holan na marhite Patik do dapotan haluaon jolma manisia. Di bagasan pangidoan ni Patik i termasuk ma parsunaton. Poda na songon i ma adong tarbege di tongatonga ni ruas ni huria Kolose. Haluaon na ringkot di ngolu ni hajolmaon, jumpang do i holan di Kristus Jesus. Marhitehite pandidion na badia, boi hita malua sian bura ni Debata ala ni dosa. Unang gabe lilu haporseaon nasida, tung diharingkothon apostel Paulus do mangajari huhut manogunogu nasida. Songon i ma nian na naeng sitiruon ni angka parhalado ni huria di ombas si saonari on. Pangajarion, panogunoguon naeng gabe sada ulaon na prioritas di tongatonga ni huria. Ndang mansohot dope sibolis mangelaela huria i.
Mansai ringkot kerjasama na denggan antar parhalado marhitehite na masiurupurupan laho mamodai ruas ni huria i, pabotohon angka na masa di huria i asa boi dipatupa langkah-langkah na hombar tu pergumulan i ruas ni huria i. Songon si Eprapas na hatop paboahon tu apostel Paulus aha na masa di huria Kolose, jala apostel Paulus pe hatop mambahen panogunoguon nang pe tarhurung ibana, songon i ma nian naeng patupaon ni hurianta hombar tu angka na masa di angka huria-huria. Ndang pola porlu jolo sanga sega huria i asa adong dohonon bukti, keterbatasan ni parhepengon manang kondisi na dia pe taho ndada gabe pangambati di siulaon. Molo ndang boi ulaon na balga, nanggo apala ulaon na metmet. Songon na masa tu apostel Paulus, nang pe tarhurung ibana, alai ndang gabe dohot tarhurung Hata ni Tuhan i. Di ombas na parpudi on, sasaran na empuk di pangelaelaon ni parpoda haliluon ima angka generasi muda (naposo bulung), angka parsikola, angka na pogos, masyarakat na tertindas. Dipertentangkon ma tu nasida ma Hata ni Tuhan i hombar tu angka pergumulan ni ngolu nasida. Situasi ni ngolu nasida, ima dibahen mamparsoada Hata ni Tuhan. Dison ma naeng hatop hurianta manogunogu ruas ni huria i jala porlu mambahen langkah-langkah mangurupi dohot langkah-langkah antisipasi unang sanga masuk parpoda haliluon tu ruas ni huria i, asa dohot nang nasida mamparsaulihon haluaon na sian Tuhan i, ima haluaon ni tondi dohot daging. Amen.
Halak na imbaru mananda Kristus manang porsea di Kristus tontu ndang apala bagas dope parbinotoanna di Hata ni Tuhan i. Alani i, olo do mura rohana ganggu molo ro poda (ajaran) na maralo tu Hata ni Tuhan i tarlumobi ma molo songon na sarupa ajaran i. Disi ma olo ganggu roha ni jolma i gabe maol mambedahon na dia do ajaran na sasintongna jala dia do na sala. Suang ma songon na masa di huria Kolose, di naung jongjong huria i marhitehite ulaon parbaritanaulion ni angka naposo ni Tuhan i. Nasida marharoroan sian halak sileban na so adong dope pangantusion nasida di Hata ni Tuhan i, hape sian na so panagaman nasida ro ma angka parpoda haliluon tu tongatonga nasida na mambahen ganggu roha nasida.
Hatorangan
Masa ganggu ni roha di deba ruas ni huria na di Kolose taringot tu ringkot ni parsunaton ala adong parpoda haliluon na ro tu tongatonga nasida na mandok ia tanda ni halak naung mananda Kristus ingkon do tarsunat songon na hisomalhon ni halak Jahudi. Dihatahon tu ruas ni huria i angka hata bisukbisuk dohot hata lensem na so marimpola, na hombar tu tona ni jolma, mangihuthon sisiasia ni hasiangan, na so mangihuthon Hata ni Kristus. Ala angka Apostel i marharoroan sian halak Jahudi, jala torop do nang halak Kristen di luat na asing na marharoroan sian halak Jahudi, gabe dirimpu natorop i na ingkon dohot do halak Kristen mangulahon parsunaton. Dipabotohon si Eprapas do na masa i tu apostel Paulus (bindu 1: 8), dibahen i ma ditongos apostel Paulus ma suratna tu huria Kolose ima na adong di turpuk jamita on. Dipatorang do disi lapatan ni parsunaton di ngolu ni halak Kristen na marojahon tu ngolu ni Kristus i. Ditangiangkon apostel Paulus do huria i huhut ditongos ibana surat laho padasiphon pangantusion nasida. Di na so haru bagas dope parbinotoan nasida taringot tu haporseaon ni halak Kristen, alani i porlu dipodai unang lilu jala ganggu rohana binahen ni angka poda na ro manang ala ni angka na masa di ngolu nasida.
Halak naung manjangkon Kristus tubu di bagasan ngoluna, nunga tartanom pardagingon na parjolo na gok dosa i rap dohot Kristus naung tartanom ala ni dosa i jala hehe laho manghamonangkon dosa i. Asa ido umbahen na didok : “di bagasan Ibana do rap hamu dipahehe, di na gabe porsea hamu di hagogoon ni Debata na pahehehon Ibana sian angka na mate” (2: 12). Sunat ima pangidoan ni patik i nunga disesa marhitehite parsunaton ni Kristus. Ai marhitehite na mangulahon Patik malua bangso Israel, alai dung ro Kristus na sinuru ni Debata tu portibi on, holan marhitehite na manghaporseai Kristus do boi malua sian uhum ni Debata. Asa nunga digohi be patik i marhitehite haroro ni Kristus tu portibi on. Dibahen ima, molo porsea jala mangulahon tona ni Kristus ido haluaon. Ia parsunaton, ima sada bagian sian na nidok ni patik i, diganti ma i marhitehite pandidion ai pandidion mangalehon ngolu na imbaru na sian Kristus. Andorang so ro Kristus, parsunaton do tanda di na masuk halak sipelebegu tu ugamo Jahudi, jala parsunaton i tanda manggotaphon pangalaho na robi na maralo tu Hata ni Debata. Alai nuaeng, pandidion na badia i do tanda di na masuk halak sipelebegu tu ugamo Kristen jala tanda manggotaphon pangalaho na robi na maralo tu Hata ni Debata. Asa, pandidion i ima parsunaton na so marhite sian tangan ni jolma. Pandidion na marhitehite aek mardongan Hata ni Debata, ima na paiashon daging pardosaon i asa gabe imbaru di adopan ni Tuhan i. Asa ndada aek i na rumingkot, tanda do i. Molo holan aek boti do, na paiashon pamatang do i sian na rotak ni tano on, alai molo mardongan Hata ni Debata, pandidion i na paiashon daging pardosaonta i do na nidokna disi.
Hombar tu na masa di halak Jahudi, angka ianakkon nasida disunat tingki metmet, ima diihuthon huria i sahat tu ombas na parpudi on: ianakkon ni na porsea di Kristus tardidi hombar tu tona ni Kristus. Pandidion na marlapatan do i mambolongkon pardagingon pardosaon sian pamatangta ai “nunga tarsilang hadirionta na buruk raphon Ibana asa pinasohot daging pardosaon, asa unang be hita mangadop di dosa” (Rom 6: 6). Kristus do ulu ni daging i, ima huria i, Ibana do parmulaan, naung parjolo tubu sian angka na mate, asa Ibana parjolo di na saluhutna (bindu 1:18). Halak naung porsea jala tardidi, dosana nunga disesa Tuhan i. Ima inti ni ngolu na imbaru : hasesaan ni dosa sian Tuhan i. Pangantusion na songon i ma dipasahat apostel Paulus tu huria Kolose, ima ngolu hakristenon na marojahan di Kristus, ndada marojahan di Patik na pinasahat ni si Musa. Ai ndang adong jolma i na rimpas boi mangulahon patik i, holan Kristus i do na tuk patupahonsa. Holan marhitehite na maporus do hita tu Ibana pasahathon ngolunta, ido asa talup hita dapotan haluaon.
Sipahusorhusoron
Sahat tu ombas na parpudi on, sai godang do ro mangelaela haporseaon ni ruas ni huria i. Ndada holan tu angka na baru porsea songon na masa di huria Kolose alai dohot do tu angka naung leleng gabe Kristen. Mansai godang nuaeng poda (ajaran) na maralo tu Hata ni Debata na boi begeon ima marhitehite mass media isarana majalah, surat kabar, radio, televisi nang pe marhitehite buku cetakan na mura dapot di toko buku. Molo ndang bagas pangantusionta di hata ni Debata olo do gabe ganggu rohanta jala adong do deba sian ruas ni huria i naung manadingkon Tuhan i (beralih ke agama lain). Ndada gabe ukuran lelengna gabe Kristen sasahalak alai bagas ni pangantusion dohot panghaporseaon di Hata ni Tuhan i do. Godang do nang halak naung leleng ibana gabe Kristen alai ndang bagas dope parbinotoanna di Hata ni Tuhan i ai so hea diguruhon, tu parpunguan ni halak Kristen na mangguruhon Hata ni Tuhan i pe so ringgas ro suang songon i nang manjahai buku na badia i.
Godang nuaeng ajaran na marbagabagahon haluaon di ngolu ni jolma i. Di ugamo Jahudi, disosohon do na holan na marhite Patik do dapotan haluaon jolma manisia. Di bagasan pangidoan ni Patik i termasuk ma parsunaton. Poda na songon i ma adong tarbege di tongatonga ni ruas ni huria Kolose. Haluaon na ringkot di ngolu ni hajolmaon, jumpang do i holan di Kristus Jesus. Marhitehite pandidion na badia, boi hita malua sian bura ni Debata ala ni dosa. Unang gabe lilu haporseaon nasida, tung diharingkothon apostel Paulus do mangajari huhut manogunogu nasida. Songon i ma nian na naeng sitiruon ni angka parhalado ni huria di ombas si saonari on. Pangajarion, panogunoguon naeng gabe sada ulaon na prioritas di tongatonga ni huria. Ndang mansohot dope sibolis mangelaela huria i.
Mansai ringkot kerjasama na denggan antar parhalado marhitehite na masiurupurupan laho mamodai ruas ni huria i, pabotohon angka na masa di huria i asa boi dipatupa langkah-langkah na hombar tu pergumulan i ruas ni huria i. Songon si Eprapas na hatop paboahon tu apostel Paulus aha na masa di huria Kolose, jala apostel Paulus pe hatop mambahen panogunoguon nang pe tarhurung ibana, songon i ma nian naeng patupaon ni hurianta hombar tu angka na masa di angka huria-huria. Ndang pola porlu jolo sanga sega huria i asa adong dohonon bukti, keterbatasan ni parhepengon manang kondisi na dia pe taho ndada gabe pangambati di siulaon. Molo ndang boi ulaon na balga, nanggo apala ulaon na metmet. Songon na masa tu apostel Paulus, nang pe tarhurung ibana, alai ndang gabe dohot tarhurung Hata ni Tuhan i. Di ombas na parpudi on, sasaran na empuk di pangelaelaon ni parpoda haliluon ima angka generasi muda (naposo bulung), angka parsikola, angka na pogos, masyarakat na tertindas. Dipertentangkon ma tu nasida ma Hata ni Tuhan i hombar tu angka pergumulan ni ngolu nasida. Situasi ni ngolu nasida, ima dibahen mamparsoada Hata ni Tuhan. Dison ma naeng hatop hurianta manogunogu ruas ni huria i jala porlu mambahen langkah-langkah mangurupi dohot langkah-langkah antisipasi unang sanga masuk parpoda haliluon tu ruas ni huria i, asa dohot nang nasida mamparsaulihon haluaon na sian Tuhan i, ima haluaon ni tondi dohot daging. Amen.