Jamita Pesta I Ari Haheheon - Tanggal, 23 Maret 2008
Oleh : Pdt. M. Lumban Gaol, STh (Parhobas di Kantor Pusat HKI)
Patujolo:
Ganup taon do ta pestahon ari Paskah songon angka ari parningotan naung tontu gabe ari rea di huria (ari haheheon, pentakosta, natal). Martimbangkon Natal, andul do marasing pamestahonon di ari paskah, tung sumalin do pamestahonon di ari Natal, martimbangkon Paskah; ndang apala adong angka persiapan dohot hariburon dison. Boasa songon i ? Naumbalga do lapatan ni Natal sian Paskah ? tauji ma jo tongkin mangarihiti.
Angka pesta rea napinatupa ni huria sinuaeng (asing ni Natal), tutu mangihuthon hasomalan pesta rea ni halak Jahudi. Alai di halak Jahudi, parningotan di Paskah do pesta na umbalga; ima parningotan di haluaon nasida sian Misir dohot parningotan di haluaon nasida sian hamatean napinaro ni Debata di Misir, diborngin parpudi nalao bungkas Israel sian i (2 Musa:12:1-30).
Huria naparjolo (gereja mula-mula) sai dipatupa nasida do parpunguan siganup minggu marningot dihaheheon ni Kristus ganup ari parjolo siganup mingguna (di halak Jahudi ari parpudi siganup minggu ima ari sabat (sabtu), asa ari parjolo ima ari Minggu. Sian angka piga hatorangan naasing muse dapot do alasan mandok; ia parpunguan parmingguan siganup ari minggu ido Pesta Paskah na asli dihalak Kristen (ari ni Tuhan, di hata Gorik ’kuriakhe hemera’). Nang pe songon i sai tongtong do dipatupa sada parningotan di ganup taon tu ari paskah sada partingkian dohot halak Jahudi (sian abad 1 sahat tu abad 2), alai marasing do impola ni parpunguan i (halak Jahudi manaringoti paskah namasa di Misir, huria manaringoti hamongangan ni Kristus sian hamatean). Alai lam leleng gabe ndang sada ari be parningotan i dohot halak Jahudi, ai dirajumi ia anak ni birubiru nasineat i nunga naimbaru (pat. 1 Kor.5:7-8).
Di pamestahonon ni Huria di abad na paduahon, 2 (dua) do naumbalga, ima Paskah dohot Pentakosta. Alai tarlumobi ma Paskah, ido nagabe induk ninasa pesta ni huria. Masa ni Leo I, digoari do Paskah gabe pesta ni nasa pesta (festum festorum). Natal dohot pesta na asing digoari do pangaradeon laho manomunomu Paskah. Asa, Paskah do nagabe patokan (titik berangkat) laho mamestahon angka ari pesta di huria. Jala sian abad 4 (paopathon), Pesta Paskah dohot Pentakosta di Gereja Barat sai dipatupa tongon di ari Minggu.
Hatorangan ni Turpuk:
Martimbanghon parngoluon ni angka panurirang napinabangkit ni Debata di Padan Narobi, tung andul do marasing parniahapon (parsorion) ni panurirang Hosea; ai disuru Debata ibana maripehon boruboru sibabijalang (bindu 1)jala tubuan anak sian i. Muse, ndang marhamubaon boruboru naung gabe sinondukna i, pola ingkon tobusonna muse sian baoa naasing (3:1-2).
Pangalaho ni boruboru nagabe jolma ni si Hosea (si Gomer) ido gombaran ni pangalaho ni halak Jahudi masa ni turpuk on, songon pangalaho ni boruboru naso satia tu baoana; laho mandapothon baoa naasing mangoloi hisaphisap ni dagingna. Ndang puas boruboru i di ngolungolu siapari naung pinarade ni sinondukna (2:10), lao do ibana marroharoha dohot baoa naasing mangoloi hisaphisap ni dagingna. Ise ma baoa naolo manjalo pangalaho nasongon i ? nda doshon napaurakhon baoana pangalaho ni si Gomer i ? Doshon pangalaho si songon i ma pangalaho ni bangso Israel maradophon Debata. Naung marpadan do bangso Israel dohot Debata; naso jadi marangkup manang bahenon sumansuman tu Debata nagabe sisombaon jala sioloan (13: 1-2, pat. 2 Musa 20:3-5). Dirajumi do parsaoran ni bangso Israel dohot Debata di Padan Narobi doshon parsinonduk (istri) tu sinondukna (suami) (Israel gabe parsinonduk jala Debata gabe Sinondukna). Dimasa ni si Hosea, marhademahon do bangso i; gabe na diula, sinur nang pahanpahanan, dao angka parmaraan. Hape laos hasil ni gabe naniula dohot gabe ni pahanpahanan i do dibahen nasida mambahen ganaganaan Baal sian perak dohot sere, sisombaon nasida, jala patupa ari rea panombaon di Baal i (2:13-15, 4:8-19). Lam martamba muse hasongiron ni pangalaho ni bangso (4:1-2) na tung pasogohon roha ni Debata parohon rimasNa.
Molo pinatomutomu pandapot ni pigapiga pande bisuk ni Bibel; terjemahan asli ni ayat 14 on jumonok do tu terjemahan BIS (Bahasa Indonesia sehari-hari): Bangsa ini tidak akan Kuselamatkan dari kuasa dunia orang mati. Hai kematian, sebarkanlah wabahmu! Laksanakanlah pekerjaanmu yang menghancurkan itu! Aku tidak mengasihani bangsa ini lagi. (suang songon i di TEV (Todays English Version) CEV (Contemporary English Version)). Molo taparrohahon terjemahan ni Bibel ta (suang songon I Alkitab) songon na hurang domu do bagian naparjolo di ayat 14 tu hata namangihut sahat tu ayat 15. Sian terjemahan on, nunga gotos roha ni Jahowa mamereng pangalaho ni bangso i, ndang paluaonNa sian hamatean.
Sian terjemahan ni Bibelta on, molo dipatomutomu muse dohot pandohan ni Ap. Paulus (1 Kor.15:5), naeng dohononna do huaso dohot hagogoon ni Debata boi mangatasi huaso ni hamatean jala manait jolma i sian gomgomanna. Jala molo tapatomutomu muse hata on tu Pesta Paskah na tahalashon sadari on: tung tangkas do margogo Debata manaluhon hamatean i, jala ndang tartiopi hamatean i Tuhan Jesus. Haheheon ni Jesus sian hamatean (inganan parmianan ala dosa jala inganan harajaon ni Dosa) pabotohon naung talu do hagogoon ni dosa i, jala gumogo do huaso ni Debata sian huaso ni dosa. Panghorhon ni hamonangan ni Jesus manaluhon huaso ni dosa bahen di hita jolma, nasa naporsea di Jesus Kristus taruli do nang dihamonangan ni Kristus, naung dohot monang naporsea i sian gomgoman ni dosa dohot hamatean. Jala tung ringkot situtu antusan jala sihaporseaonta ima: Natutu do Jesus mate, tuat tu banua toru tu hamatean i jala mulak mangolu, hehe sian hamatean i. Molo so i, dos do hita dohot portibi on naso porsea di hamamate ni Jesus dohot naung heheon Ibana sian hamatean. Tung tangkas ma hasasaut ni hata ni Debata: “ndang adong naso tarpatupa Debata”.
Siauhononhon:
1. Tung tarida do sian turpuk on parpiar rimas ni Debata diangka naung marpadan dohot Ibana, hape diose, dibahen marangkup Debata, ndang mangulahon hasintongan nang holong ni roha, ndang dihalomohon parbinotoan tu Debata; gabe tolontolon, gabus, bunubunu, tongkatongka dohot pangalangkupon di hangoluhon (4:1-2). Hamatean do upa ni namanghangoluhon nasongon i, jala hamusuon tu Debata do harohaon di daging; ndang tarhalomohon Debata angka parroha daging (Rom 8:7-8).
2. Marhite Paskah on, dipatuduhon do hamonangan ni Debata, naung diatasi Debata do huaso ni dosa hamatean i. HaheheonNa i mangalehon di hita hamongan manaluhon huaso dohot hagogoon ni dosa nasai tongtong manaiti hita asa masuk tu gomgomanna. Alani i, unang be hita mangadop di daging, marparange marguru tu daging (Rom 8:12). Nunga tajalo Tondi ni haanakon naung gabe anak ni Debata hita (Rom 8:15-16).
3. Taadopi do godang hamaolon ni parngoluon dohot hamaolon ni partondion di portibi on; sai hira naso boi muba i saluhutna. Molo marharajaon pe nuaeng musu ni Jesus, gumogo huasona sian uhum, lam tu rundutna nuaeng pangalaho ni jolma, porsuk parniahapanta, ngalut parngoluonta: Unang Mandele. Gari hamatean nunga ditaluhon Jesus, tangkas ma tahaporseai: “ndang adong naso tarpatupa Debata”. Amen.
Oleh : Pdt. M. Lumban Gaol, STh (Parhobas di Kantor Pusat HKI)
Patujolo:
Ganup taon do ta pestahon ari Paskah songon angka ari parningotan naung tontu gabe ari rea di huria (ari haheheon, pentakosta, natal). Martimbangkon Natal, andul do marasing pamestahonon di ari paskah, tung sumalin do pamestahonon di ari Natal, martimbangkon Paskah; ndang apala adong angka persiapan dohot hariburon dison. Boasa songon i ? Naumbalga do lapatan ni Natal sian Paskah ? tauji ma jo tongkin mangarihiti.
Angka pesta rea napinatupa ni huria sinuaeng (asing ni Natal), tutu mangihuthon hasomalan pesta rea ni halak Jahudi. Alai di halak Jahudi, parningotan di Paskah do pesta na umbalga; ima parningotan di haluaon nasida sian Misir dohot parningotan di haluaon nasida sian hamatean napinaro ni Debata di Misir, diborngin parpudi nalao bungkas Israel sian i (2 Musa:12:1-30).
Huria naparjolo (gereja mula-mula) sai dipatupa nasida do parpunguan siganup minggu marningot dihaheheon ni Kristus ganup ari parjolo siganup mingguna (di halak Jahudi ari parpudi siganup minggu ima ari sabat (sabtu), asa ari parjolo ima ari Minggu. Sian angka piga hatorangan naasing muse dapot do alasan mandok; ia parpunguan parmingguan siganup ari minggu ido Pesta Paskah na asli dihalak Kristen (ari ni Tuhan, di hata Gorik ’kuriakhe hemera’). Nang pe songon i sai tongtong do dipatupa sada parningotan di ganup taon tu ari paskah sada partingkian dohot halak Jahudi (sian abad 1 sahat tu abad 2), alai marasing do impola ni parpunguan i (halak Jahudi manaringoti paskah namasa di Misir, huria manaringoti hamongangan ni Kristus sian hamatean). Alai lam leleng gabe ndang sada ari be parningotan i dohot halak Jahudi, ai dirajumi ia anak ni birubiru nasineat i nunga naimbaru (pat. 1 Kor.5:7-8).
Di pamestahonon ni Huria di abad na paduahon, 2 (dua) do naumbalga, ima Paskah dohot Pentakosta. Alai tarlumobi ma Paskah, ido nagabe induk ninasa pesta ni huria. Masa ni Leo I, digoari do Paskah gabe pesta ni nasa pesta (festum festorum). Natal dohot pesta na asing digoari do pangaradeon laho manomunomu Paskah. Asa, Paskah do nagabe patokan (titik berangkat) laho mamestahon angka ari pesta di huria. Jala sian abad 4 (paopathon), Pesta Paskah dohot Pentakosta di Gereja Barat sai dipatupa tongon di ari Minggu.
Hatorangan ni Turpuk:
Martimbanghon parngoluon ni angka panurirang napinabangkit ni Debata di Padan Narobi, tung andul do marasing parniahapon (parsorion) ni panurirang Hosea; ai disuru Debata ibana maripehon boruboru sibabijalang (bindu 1)jala tubuan anak sian i. Muse, ndang marhamubaon boruboru naung gabe sinondukna i, pola ingkon tobusonna muse sian baoa naasing (3:1-2).
Pangalaho ni boruboru nagabe jolma ni si Hosea (si Gomer) ido gombaran ni pangalaho ni halak Jahudi masa ni turpuk on, songon pangalaho ni boruboru naso satia tu baoana; laho mandapothon baoa naasing mangoloi hisaphisap ni dagingna. Ndang puas boruboru i di ngolungolu siapari naung pinarade ni sinondukna (2:10), lao do ibana marroharoha dohot baoa naasing mangoloi hisaphisap ni dagingna. Ise ma baoa naolo manjalo pangalaho nasongon i ? nda doshon napaurakhon baoana pangalaho ni si Gomer i ? Doshon pangalaho si songon i ma pangalaho ni bangso Israel maradophon Debata. Naung marpadan do bangso Israel dohot Debata; naso jadi marangkup manang bahenon sumansuman tu Debata nagabe sisombaon jala sioloan (13: 1-2, pat. 2 Musa 20:3-5). Dirajumi do parsaoran ni bangso Israel dohot Debata di Padan Narobi doshon parsinonduk (istri) tu sinondukna (suami) (Israel gabe parsinonduk jala Debata gabe Sinondukna). Dimasa ni si Hosea, marhademahon do bangso i; gabe na diula, sinur nang pahanpahanan, dao angka parmaraan. Hape laos hasil ni gabe naniula dohot gabe ni pahanpahanan i do dibahen nasida mambahen ganaganaan Baal sian perak dohot sere, sisombaon nasida, jala patupa ari rea panombaon di Baal i (2:13-15, 4:8-19). Lam martamba muse hasongiron ni pangalaho ni bangso (4:1-2) na tung pasogohon roha ni Debata parohon rimasNa.
Molo pinatomutomu pandapot ni pigapiga pande bisuk ni Bibel; terjemahan asli ni ayat 14 on jumonok do tu terjemahan BIS (Bahasa Indonesia sehari-hari): Bangsa ini tidak akan Kuselamatkan dari kuasa dunia orang mati. Hai kematian, sebarkanlah wabahmu! Laksanakanlah pekerjaanmu yang menghancurkan itu! Aku tidak mengasihani bangsa ini lagi. (suang songon i di TEV (Todays English Version) CEV (Contemporary English Version)). Molo taparrohahon terjemahan ni Bibel ta (suang songon I Alkitab) songon na hurang domu do bagian naparjolo di ayat 14 tu hata namangihut sahat tu ayat 15. Sian terjemahan on, nunga gotos roha ni Jahowa mamereng pangalaho ni bangso i, ndang paluaonNa sian hamatean.
Sian terjemahan ni Bibelta on, molo dipatomutomu muse dohot pandohan ni Ap. Paulus (1 Kor.15:5), naeng dohononna do huaso dohot hagogoon ni Debata boi mangatasi huaso ni hamatean jala manait jolma i sian gomgomanna. Jala molo tapatomutomu muse hata on tu Pesta Paskah na tahalashon sadari on: tung tangkas do margogo Debata manaluhon hamatean i, jala ndang tartiopi hamatean i Tuhan Jesus. Haheheon ni Jesus sian hamatean (inganan parmianan ala dosa jala inganan harajaon ni Dosa) pabotohon naung talu do hagogoon ni dosa i, jala gumogo do huaso ni Debata sian huaso ni dosa. Panghorhon ni hamonangan ni Jesus manaluhon huaso ni dosa bahen di hita jolma, nasa naporsea di Jesus Kristus taruli do nang dihamonangan ni Kristus, naung dohot monang naporsea i sian gomgoman ni dosa dohot hamatean. Jala tung ringkot situtu antusan jala sihaporseaonta ima: Natutu do Jesus mate, tuat tu banua toru tu hamatean i jala mulak mangolu, hehe sian hamatean i. Molo so i, dos do hita dohot portibi on naso porsea di hamamate ni Jesus dohot naung heheon Ibana sian hamatean. Tung tangkas ma hasasaut ni hata ni Debata: “ndang adong naso tarpatupa Debata”.
Siauhononhon:
1. Tung tarida do sian turpuk on parpiar rimas ni Debata diangka naung marpadan dohot Ibana, hape diose, dibahen marangkup Debata, ndang mangulahon hasintongan nang holong ni roha, ndang dihalomohon parbinotoan tu Debata; gabe tolontolon, gabus, bunubunu, tongkatongka dohot pangalangkupon di hangoluhon (4:1-2). Hamatean do upa ni namanghangoluhon nasongon i, jala hamusuon tu Debata do harohaon di daging; ndang tarhalomohon Debata angka parroha daging (Rom 8:7-8).
2. Marhite Paskah on, dipatuduhon do hamonangan ni Debata, naung diatasi Debata do huaso ni dosa hamatean i. HaheheonNa i mangalehon di hita hamongan manaluhon huaso dohot hagogoon ni dosa nasai tongtong manaiti hita asa masuk tu gomgomanna. Alani i, unang be hita mangadop di daging, marparange marguru tu daging (Rom 8:12). Nunga tajalo Tondi ni haanakon naung gabe anak ni Debata hita (Rom 8:15-16).
3. Taadopi do godang hamaolon ni parngoluon dohot hamaolon ni partondion di portibi on; sai hira naso boi muba i saluhutna. Molo marharajaon pe nuaeng musu ni Jesus, gumogo huasona sian uhum, lam tu rundutna nuaeng pangalaho ni jolma, porsuk parniahapanta, ngalut parngoluonta: Unang Mandele. Gari hamatean nunga ditaluhon Jesus, tangkas ma tahaporseai: “ndang adong naso tarpatupa Debata”. Amen.