Tuesday, May 27, 2008

Bina Wanita Edisi JULI 2008


Minggu, VII Dung Trinitatis - 06 Juli 2008
JESUS KRISTUS DO PALUAHON JALA NA MNDONGANI HITA
Efesus 1: 7 – 14


1. Marende : B.E. No. 166: 1 + 3 HG
2. Tangiang pamuhai
3. Majahat dohot manangkasi Turpuk

Tongon di penjara do si Paulus manurathon surat on, ala ni barita na uli i. ndang alani ulaon na so tama mambahen ibana di penjara (3:1; 4:1; 6:20). Nangpe di penjara ibana, tongtong do dipatuduhon ibana parsihohotanna, las ni rohana, panghirimonna dohot holong ni rohana tu debata dohot tu Huria i. Tarida do sian pandohan ni ibana di surat on, naso adong pandelean dohot sumurut sian haporseaon nang pe adong angka pangambati ala ni haporseaon tu Tuhan Jesus. Maksud ni si Paulus manurathon surat on, tontu dolaho pahothon panjouon, pamilliton ni angka na porsea, angka na badia na ro sian hasipelebeguon marhitehite Kristus, sian asi ni roha ni Debata.
Nunga dipatupa Debata di hita haluaon marhitehite Kristus i, Ibana do gabe parhitean na patauhon hita manjalo asi ni roha ni Debata. Taruli ma jolma i diangka pasupasu partondion tu na hinophopNa. Molo adong pe hahuranganta tu Debata, nunga gabe disingkati Tuhanta Jesus, jala dipatupa i sian asi ni roha, ndang ala ni parulanta, alai silehonlehon ni Debata do di bagasan hadirion ni jolma i. Nunga ditodo, dijou, dipintori jala diparbadai hita marhitehite panghophopon ni Tuhanta Jesus Kristus, asa gabe mulak hita anakhonNa, partohap di hangoluan sogot, i ma nampuna Harajaon na saleleng ni lelengna (2: 8-9). Tung silehonlehonNa do i, asa gabe parasi roha, pardenggan basa hita, mangulahon na denggan, mamparbuehon angka ulaon na tau halomoan ni Debata, manang di dia, sadihari pe, na metmet manang na balga, naeng patupaonta di keluarga, huria, masyarakat.
Dipasada do angka na pnillitNa i di bagasan Kristus. Kristus ma pardomuanta, disi ma hita sada marhitehite pandidion, asa ndang be ni rahutan, pinasada ni marga, suku, ugamo alai nunga di pasada mudar ni Kristus i (Gal 3:26-28). Kristus ma partalian tu Debata dohot tu donganta jolma naung tinodoNa, jala naung disangkapi Debata hian do. Jesus Kristus ima “barita nauli” haluaon. Ndang pardomuan alani kepentingan pribadi, kelompok dohot sittasitta ni hajolmaon umbahne na sada hita di basagan Kristus. Alai ala ala ni mudar ni Kristus do asa saluhut hita ndang holan mamingkirhon dirinta be, jala asa somba tu goar ni Jesus nasa ulu ni tot, na di banua ginjang dohot na ditano, nang di toru ni tano (Pilipi 2:3-11).
Marhitehite jesus i do malua hita jala taruli hita di haluaon, na so tarpatupa ni portibon di hita. Nunga di patupa na dumenggan i di hita jl hita pe gabe habaoran ni uli basa dohot na denggan saluhut, ala nunga tajalo na denggan, asi ni roha ni Debata. Dipasahat do TondiNa (Tondi Porbadia) na pinarbagabagahon mandongani, pohothon haporseaon huhut mangapuli angka n porsea i. Tanda jaminan na so dipsombu Debata angk na porsea, jala patujolona nunga dipasahat tu hita, ima Tondi Porbadia. Tondi Pormadia ma na gabe pahothon pangkhirimonta, laho mnuturi dohot mandongani angka na porsea i, paima sahat hita tu hasngapon sogot (Bdn. Rom 8:14-17). Tondi Porbadia do dilehon patujolo ni arta siteanonta. Tondi Porbadia laho manogihon hita tu haluaon na pinatupana, asa tarpuji hasangaponNa.

Refleksi/Meditasi
Asi ni roha ni Debata do patauhon jolma i gabe panean di harajaonNa. Ai nunga dibagasan gomgoman ni dosa hian sude jolma, hinorhon ni angka pangalosion. Alai di bagasan Kristus, na hinaholonganNa i, gabe ias jala so hasurahan do ganup na porsea di Ibana. Sude do jolma di todo Debata bahen anakNa. Manang ise na ro tu Tuhan jesus, mangundukhon pambahenanna na so tama, jala olo paubahon rohana, sai dapotsa do haluaon sian asi ni rohaNa. Dihungkupi holongNa na songkal i do sude dosa ni angka na ro manopoti dosana ( 1 Joh 1:9). Holan Kristus do na marhuaso manghuphupi dosa ni jolma na manolsoli jala paubahon rohana. Ai Ibana do naung mangusehon mudarNa bahen hasesaan ni dosa ni angka n porsea. Asa, “ndang adong haluaon sian na asing, tung holan di bagasan Kristus do” (Ulaon 4:12). Diusehon do holongNa i mardongan hapistaran dohot habisuhon godang. Lapatanna: dipapatar do holongNa i marhite pangantusion na tangkas taringot tu uhum dohot asi ni roha na pangoluhon. Dung di tobus Jesus jolma i sian ragam ni pardosaon i, di suru do Tondi Porbadia laho maniroi, mangajari jolma i asa boi padaonna hadirionna sian dosa i.

4. Diskusi:
1. Jotjot do sumbia ni sibolis i naneng margogo laho mangaithon hita tu bagasan dosa. Boha do caramu laho mangalo sumbia ni si bolis i ?.
2. Godang di tingki nuaengon jolma madabu tu bagasan dosa ala arta na di portibion. Dia do tumagon sonang di bagasan hapogoson parartaon, dari pada susa ala ni hamoraon ni portibion ? Boasa ?.

5. Tangiang Pangondianon/Syafaat.
6. Marende : B.E. No. 210: 1+3 (Papungu Pelean)
7. Tangiang Panimpuli
EH




Minggu VIII Dung Trinitatis - 13 Juli 2008
HAHOLONGI DEBATA SIAN SANDOK NGOLUM
5 MUSA 6: 1 – 9

1. Marende : B.E. No. 195: 1-2
2. Tangiang pamuhai
3. Manjaha dohot manangkasi Turpuk.

Ia buku 5 Musa on, i ma jamita na marudutudut sian si Musa, na jinamitahononna tu bangso Israel di tano Moab. Inganan paradianan nasida dung leleng marpindapinda di padang pasir, jala sian tano Moab on naeng masuk nasida tu tano Kanaan laho maringanan disi. Adong do 4 (opat) barita na pokok sian bukku 5 Musa on i ma: (1) Ditaringoti si Musa angka masa di opat pulu taon naung salpu. Disosohon ibana ma tu bangso i, marningot panogunoguon ni Debata di nasida di na mamolus padang pasir jala dipodai nasida asa marpangoloion dohot satia tu Debata. (2). Dipahantus si Musa patik na sampulu i jala diondolhon lapatan ni patik parjolo, mandokhon tu bangso i holan tu Jahowa sambing. (3). Dipasingothon si Musa tu bangso i lapatan ni parpadanan nasida dohot Debata. (4). Dipillit si Josua gabe gantina, laho manguluhon bangso ni Debata. Apala na diondolhon di bukku on, i ma na pinalua jala na pinasupasu ni Debata bangso na pinillitNa i.
Patik ni Debata marguna do i mangaramoti parrohon ni bangsoNa, jala gabe diboto angka na denggan dohot na roa. Halak Kristen gabe songon sorminan di ganup partingkian di ragam ni pangalaho na maralo tu lomo ni roha ni Debata. Patik i do na manogunogu ganup halak tu lomoni roha ni Kristus, asa lam tangkas mananda Kristus na gabe pamusatan ni haporseaon na marojahan di bagasan holong ni roha ni Debata. Di bagasan patik i do partinandaon ni bangso i tu Debata huhut mangaramoti habadiaon ni bangso i sian ragam ni haramunon ni portibi on. Patik i do na gabe songon handang na paasingkon bangso i sian sude bangso na di portibi on huhut manogu nasida tu dalan lomo ni roha ni Debata. “Tangihon ma, ale Israel, anggo Jahowa Debatanta i, Johawa sasadasa do”.
Sada do Debata na marlapatan asa manat maradophon pengaruh-pengaruh angka ugamona asing songon hasipelebeguon. Dihaoloon ni bangso israel tu Jahowa dohot di hasatiaon mangoloi patik dohot aturan ni Debata, dijalo nasida do asi ni roha na sumurung, na so hasuhatan godang na. Asa molo didok di bagasan turpukta on: Anggo Debatanta i, jahowa Debata sasadasa do; i do Debata na sintong, na so marmula na so marujung. Laos panindangion i do na ingkon di soarahon bangso Israel ganup ari, jala i do disurathon nasida di tohang ni jabuna, na gabe sidohonon di bagas ni halak Israel. “Ibana na sasada i do jumadihon saluhut, marhite huasoNa jala marhposan tu Ibana” (Kolose 1:16). Turgas dohot tanggungjawab ni bangso ni Debata/halak Kristen i ma manghaholongi Debata sian nasa ateate dohot gogona. Tarida do i nang di pamungkaan lapatan ni patik na sampulu i, didok ingkon di habiari rohanta Debata, jala ingkon holong rohanta di Ibana. Holong ni roha tu Debata do kunci pangulaon di patik i, ndada mangasahon gogo ni jolma na terbatas. Molo jumolo jolma i mabiar jala humolong tu Debata asa tu nasa na adong, diajari biar dohot holong na songon i do hita asa boi mangulahon patikna. Asa ndang mangasahon moral naumporlu na pinangido ni Debata sian jolma, alai holong ni roha i do, na marparbuehon moral na marojahan tu patik ni Debata.

Refleksi/Meditasi
Marragam do ajaran di portibi on na sai mangondolhon asa marparange na denggan. Isara ni adat, na borhat sian gogo ni jolma i sandiri, alai ndang trjamin hadengganonna, ala ndang borhat sian holong ni roha ni Debata. Alai angka ulaon na denggan na borhat sian holong ni roha ni Debata, diparbuehon i do ulaon na denggan namarpardomuan tu patik ni Debata. Ingkon di gomgomi patik i do sandok dagingta on, asa sude pangulmitonta, parsaoranta, ingkon tongtong patuduhon na halak sihaholongi Debata do hita, na mardalan dibgasan patik ni Debata.Ndang mubauba patik ni Debata, na hot do i ro di saleleng ni lelengna. Holong ni roha i do dasor ni patik i, jala i do makna na umbagas ni patik. Jala Tuhan Jesus sandiri pe, lam dipabagas do lapatan ni patik i di jamitaNa. Di Mateus 22: 37, 39 didok: “sihaholonganmu do Tuhan Debatam sian nasa atematem, sian nasa hosam dohot sian nasa roham.Alai dos do arga ni na paduahon on: sihaholonganmu do donganmi doshon dirim”.


4. Diskusi:
1. Boha do di bahen hamu cara mangaholuhon patik ni Debata ?
2. Boha do cara na di bahen hamu laho mangajarhon patik tu angka ianakhonta ?
3. Boi do diulahon hamu patik ni Debata secara rimpas di bangasan ngolumuna ?

5. Tangiang Pangondianon/Syafaat
6. Marende : B.E. No. 202: 1-2 (Papungu Pelean)
7. Tangiang Panimpuli
EH




Minggu IX Dung Trinitatis - 20 Juli 2008
HASADAON PAROHON HAGOGOON
Ulaon Apostel 2: 41-47


1. Marende: B.E. No. 102: 1-2
2. Tangiang Pamuhai
3. Manjaha dohot Manangkasi Turpuk

Hatorangan
Buku Ulaon Apostel manaringoti ulaon ni Tondi Parbadia di huria na parjolo i. Marhabiaron do angka apostel i tu angka jolma naung mamparsilangkon Jesus sotung tong muse dipusa nasida sahat tu haroro ni Tondi Parbadia. Marpungu dibalik ni pintu naung tarhunci di Jerusalem ari parjolo dungkon hananaek ni Yesus Kristus. Diboto angka sisean i do paboa na maol manghatahon taringot tu harajaon ni Debata tu jolma na asing, alani i gabe martabuni nasida. Alai dang pola sadia lelengna, sada hal terjadi na pola mangubah dalan ni pingkiran nasida mambahen barani nasida laho patuduhon haporseaon nasida marhite-hite na mambaritahon goar ni Jesus Kristus.
Hagiot ni roha ni angka Apostel mambaritahon barita nauli tung mansai bersemangat, marhitehite parbaritaon i gabe godang ma angka jolma manjangkon jala porsea tu barita nauli. Diprioritashon angka Apostel i do panghobasion nasida tu ulaon manjamitahon Hata ni Debata mamaritahon taringot tu Jesus Kristus na manaon na hansit ala ni dosa ni jolma manisia pola tung mate tarsilang dohot taringot tu haheheonNa. Jala tangkas situtu do tarida panghorhonna, ima na nlam martamba torop ni sisean i, lam godang ma angka na porsea di Jesus Kristus jala lam torop na gabe parjambar di harajaon ni Debata.
Tongtong do ditiop angka Apostel i tona dohot janji naung dijanjihon ni Jesus di tingki ngoluna naeng donganna nasida marhitehite na manuru Tondi Parbadia laho mampargogoi nasida mambaritahon baritahon nauli i. Dung ari pentakosta lima puluh ari dung hamamate ni Jesus Kristus, jongjong ma si Petrus di jolo ni torop halak di Jerusalem jala marhabaranion no roha ibana manajmithon taringot tu harajaon ni Debata. Dijamitai Apostel Petrus ma angka na torop i asa paubaonna rohana dohot pandidihononna nasida di bagasan Goar ni Jesus Kristus, bahen hasesaan ni dosamuna, asa dialo hamu silehonlehon n, ima Tondi Parbadia. Asa godang do halak na tardidi di na satingki i pola tolu ribu halak torop na. Mansai balga do ulaon pandidion i ditingki i. Pandidion na ni ulahon nasida ima songon naung ni bahen ni si Johannes na marhitehite aek, dibagasan goar ni Jesus Kristus dohot Tondi Parbadia, diihoti dohot parange na paubahon roha.
Rumang ni parngoluon ni ruas na parjolo ima na paubahon roha nasida. Marparange nasida songon jolma naung manjalo pandidion dohot manjangkon pangulaon ni Tondi Parbadia dibagasan ngoluna ima marhabiaron dompak Debata Jahowa huhut mamuji goarNa, satia marpasaoran laho membege pangajarion ni angka Apostel i, marulaon na badia nasida dohot martangiang, dibahen nasida do parsaoran i songon ulaon hatopan na dirajumi nasida saluhutna artanasida ima na marsisagian marguru tu haseaanna be. On ma hajonjongan ni huria na parjolo i. Ganup ari do nasida tongtong saroha di bagas joro jala jojor jabu do nasida marulaon na badia, marlas ni roha jala marbulus ni roha nasida marsipanganon. Huhut mamuji Debata jala lomo do roha ni nasa natorop mida nasida. Marhite pambahena ni nasida i gabe dihalomohon angka situan natorop do angka pangulaon nasidai gabe saksi-saksi ni Jesus Kristus nasida, gabe parbarita nauli nasida.
Parsaoran ni huria i tung mansai togu jala sada alani hasetiaon ni ruas i manjangkon jala mambege pangjarion ni angka apostel i. Marhitehite hasatiaon dohot hasadaon do gabe mangolu ma partondion jala laho mangula angka silaon di tongatonga ni huria, songon ni ruas ni hruia na parjolo i. Ngolu partondion nasida i tarida di parngoluonna siganup ari. Perbedaan status sosial dohot ekonomi terjembatani marhitehite na saling marsisagian. Dang pola adong jurang pemisah na tung mansai lebar antara ni na mora dohot na pogos na marhahurangan. Ngoluon ndang holan tu dirinta sandiri, alai kebesamaan. On ma parsaoran na togu jala sihalashononhon. Di ruas ni huria di tingki i, arta dohot ugasan ndang gabe tujuan ni ngolu, alai arta dohot ugasan ima sada alat laho marparsaoran dohot angka dongan na marparsaoran tu Debata.


4. Diskusi
1. Molo tapatudos tu hurianta sisaonnari on tu huria na parjolo i, angka dia do na tarida songon hahurangan ni ruas laho mamuji Debata?
2. Dia do sihirimonta nanaeng sibahenonta tu huria di tingki saonnari?
5. Tangiang pangondianon/Doa Syafaat
6. Marende : B.E. No. 114:1+3
7. Tangiang Panimpuli

AL




Minggu X Dung Trinitatis
Tanggal 27 Juli 2008
Nats: Heber 5:5-10


1. Marende : BE. No. 12:1-2
2. Tangiang Pamuhai
3. Manjaha dohot manangkasi turpuk

Jesus Gabe Pelean Pardengganan

Hatorangan

Molo tapamanat surat ni apostel Petrus i ma natarsurat di 1 Petrus 2:9, salahut do hita tarjou na laho parbarita nauli. Marga napinillit do hita asa manghobasi huriaNa. Asa marhitehite barita nauli na tabaritahon patar haluaon i tu saluhut bangso. Dipillit jala dijou Debata hita di laho papatarhon barita haluaon in dada ala naung singkop jala bonar hita di adopan ni Debata. Alai holan asi ni rohaNa sambing do i. Debata manjou jala mamillit angka na porsea di Ibana i ma laho patulushon sangkapNa. Marragam do goar ni angka na manghobasi ulaon na pinasahat ni Debata. Adong do i gabe panurirang, raja, malim, apostel, sintua, pandita, diakones, dna. Tu angka na manghobasi ulaon ni Debata di lehon do tondi hagogon, habisuhon dohot pangurupion. Songon na masa di Padan Narobi dohot Padan Naimbaru.
Ia turpuktaon naeng pabotohon tu hita, songon dia tugas angka sintua ni malim. Di Padan Narobi tugas ni malim ima na manghobasi di bagas joro ni Debata. Namartugas pasahathon pelean situtungan tanda hasesaan ni dosa. Ibana ma perpanjangan tangan ni Debata. Jesus do Malim na sasintongna. Ibana do Malim na umbalga jala na parpudi padasiphon dohot mangungjungi tohonan hamalimon. Marhitehite diriNa gabe pelean tu Debata. Debata sandiri do na mamillit jala mangojakhon Ibana gabe Malim. Hamalimon ni Jesus tongtong do mangihuthon hamalimon ni Jahudi di Padan narobi ima na mangihuthon horong si Melkisedek.
Aha do hasurungan Hamalimon ni Jesus dohot angka malim naung salpu? Malim angka naung salpu tontu dibatasi oleh waktu hombar tu tingki dohot ngolu ni malim i. Alai Hamalimon ni Jesus manontong do i ro di salelenglelengna. Hamalimon ni Jesus ndada mangaradoti pelean tu Debata songon angka malim na pinillit Debata alai diriNa do na gabe pelean na denggan jala hushus tu Debata i ma marhitehite naung durus mudarNa di dolok Golgata. DiriNa do na gabe dipelehon asa malua hita sian dosa. Marhite na dipelehon diriNa humonghop hita gabe denggan parsaoranta dohot Debata. Sada muse hasurungan ni hamalimon ni Jesus, i ma dipartangiangonNa. Mardongan angguk dohot iluilu do Jesus martangiang uju di Getsemane. Di angguk dohot iluiluNa i tarida ma hajolmaon ni Jesus manaon sitaonon. Marhitehite Jesus, gabe taruli haluaon salelenglelengna do angka na manghaporseai Ibana. DiriNa di pasahat gabe pelean asa malua hita sian dosa.

Refleksi/Meditasi
Debata sandiri do na manjou jala mamillit sada halak na gabe sintua ni malim. Pamilliton ni ndada ala naung pintor jala denggan ulaonta, alai asi dohot holong ni rohaNa sambaing do i. Songon i do nang angka parhobas di hurianta, ima pandita, guru huria, sintua, diakones, dna. Ingkon Debata do na manjou asa gabe parhobas. Lapatanna, syarat na utama di angka halak naeng marhobas di huria i ma paonjouon ni Debata, ihut tusi ma pangoloion tu na manjou i. Olo do hamu di jou Debata laho manghobasi huriaNa? Halak naung tarjou jala dipillit Debata ndang boi marlomolomo dilaho manghobasi huriaNa. Ingkon dibagasan unduk dohot serep ni roha do hita mangulahon ulaon ni Tuhan i. Ingkon songon parrohaon ni Kristus do parrohaonta (pat. Pilp. 2:5). Ndang jadi tapangasahon gogonta, pingkiranta di na laho manghobasi huria ni Tuhan i. Alai taula ma i holan mangasahon pangurupion sian Debata.
Ulaon dohot panghohopan ni Tuhan Jesus tu hita gabe mambahen hita targoar anak ni Debata. Angka ianakhon ni Debata ingkon do mian di bagasan Ibana. Jala tongtong mangulahon lomo ni rohaNa. Ndang jadi hita manimbil sian dalan ni Ama i. Molo mardalan dope hita dibagasan hagiot ni daging berarti ndang be targoar hita anak ni Debata. Marhite naung dipelehon Ibana diriNa nunga gabe denggan parsaoranta dohot Debata. Alani i, ingkon rade do rohanta mangalusi dohot mangulahon panjouon ni Tuhan i. Sude hita tarjou asa taula lomo ni roha ni Tuhan i. Taulahon ma panjouon i marhite na manghangoluhon dohot mangulahon hata ni Tuhan i di bagasan ngolunta. Asa merhitehite pangoloionta i, lam rarat barita nauli i di portibion. Jala pos ma rohanta di hagaleonta songon jolma hita, molo songgop pe hamaolon, parungkilon manang pangunjunan di panghobasionta i, tajou ma Tuhan i, dung i alusanNa ma hita marhite pangurupionNa, asa tulus sangkapNa marhite panghobasionta. Unang mabiar jala sumurut hita manghobasi huriaNa tung peg ok sitaonon na taadopi. Ingkon rela do hita berkorban, di laho patulushon sangkap ni Debata. Songon Kristus na berkorban pola mate Ibana di hau pinorsilang asa mangolu, malua sian dosa jala gabe parsidohot hita manean harajaon ni Debata.

4. Diskusi
1. Songon dia do haradeonta molo tarjou hita laho manghobasi huriaNa i?
2. Aha do na boi taula dilaho manghobasi huria ni Tuhan i?
3. Boha do sikapta, molo ro ragam ni angka parungkilon hinorhon ni panghobasionta di huriaNa i?

5. Tangiang Pangondianan/Doa syafaat
6. Marende : BE. No. 91 (HG):1 …. (Ihut Papungu Pelean)
7. Tangiang Panimpuli

Cal. Pdt. Darwin Agustus Saragi, S. Th