Bina Wanita - Edisi JUNI 2008

Minggu, II Dung Trinitatis - 1 Juni 2008
GABE SITINDANGINKU MA HAMU
Jesaya 43: 8 – 13

1. Marende B.E. No. 135: 1-2
2. Tangiang Pamuhai
3. Manjaha dohot Manangkasi Turpuk

Di papos do roha ni bangso i marhite na tongtong do bangso ni Debata. Molo tartaban sada bangso tu huta ni halak, ri jamui do i naung magohadirion (identitas) na songon sada bangso. Ala mangihuthon tradisi ni Timur tengah uju turpuk on, molo talu marporang sada bangso jala tartaban, dirajumi hataluon nidebatana do i jala ndang be digoari nasida sada bangso. Di turpuk on didok debata: “Nunga pola Hu jou goarmu”. Panjouon ni Debata di bangso i, di patuduhon i do na adong dope bangso Israel. Paboahon na mangolu do Debata ni Israel. Debata na mangolu i do mamboan nasida mulak gabe sada bangso. Di na manghuling Debata, ro do Ibana songon Debata na marhuaso, na mangolu jala na margogo paluahon nasida. Di paimbaru Debata do bagabaga napinasahatNa tu ompu nasida jala dipaingot do paboa nasintong jala haposan do bagabaga ni Debata. Didok Debata do marhite turpuk on: “Ahu do Jahowa, jala ndang adong silehon tua dungkon ni ahu”. Lapatanna, adong parsaoran na tung mnsai jonok di patupa Debata tu halak Israel. Debata sandiri do marmudumudu dohot parmahan di bangso i. Na mangalehon haluan dohot hatuaon di nasida. Molo dibereng sian sisi hajolmaon tontu naung dibagasan pangunjunan bolon do halak Israel di na tartaban i nasida di Babel. Alai marhite panurirangon on dipatuduhon ndang dipasombu Debata dibagasan pangunjunan, tung dibahen Debata do dalan laho pasonanghon roha nasida asa unang mago panghirimon nasida.
Dung di palua bangso i sian ragam ni parmaraan di suru Debata do bangso i asa gabe sintindagiNa. Laho mamaritahon hagogon ni Debata, asa tung sude jolma marsomba jala ma gigi mida dosa. Halak Israel tongtong do di suru Debata laho pajongjonghon hasintongan i. Mamboan saluhut jolma sian haholomon tu hatiuron. Manogihon bangso na mapintung asa marnida di haluaon na pinatupa ni Debata. Manogihon jolma na nengel tu hatiuron asa di bege jala tangi huhut mananda di asi ni roha naung pinatolhas ni Debata di bagasan ngoluna. Asa arian na i nasida mamaritahon hata ni Debata, borngin na i mamuji jala patimbulhon goarNa i. Ingkon parhatopotonta do holan Debata do na margogoihon hita gabe sintindangina. Ai ndang adong Debata dungkon ni Ibana, ido na jolo, i do saonari, laos i do nang haduan. Sada do Debata.
Ndang di halomohon Debata marserak bangsoNa, alai naeng ma asa di bagasan hasadaon. Ai i do tujuan ni Debata di panjouon dohot di pamillitonNa di hita marhite HuriaNa i. Naeng marsaringar nian sude halak Kristen gabe sintindangi ni Debata lomobi di tingki on, ingkon lam margogo, lam doras do hita mamuji dohot mambaritahon hata ni Debata. Tangkas do taboto lam maol do nueng posisi ni halak Kristen di Indonesia on, alai ndada gabe mintop mata ni haporseaonta. Naeng ma marhite hamaolon na taadopi i gabe tang jala matoras mata ni haporseaonta.

Refleksi/Meditasi.
Hira sude do marhatopthon ia na marbarita uli , i ma na marjamita, na manghatahon hata ni Debata. Ndang na sala i, alai hurang singkop. Alai na marbarita nauli ima: jamitana gabe ngoluna, ngoluna gabe jamitana. Alani i do sude ruas ni Huria i gabe sitindangi ni Debata marhitehite pangalahona asa gabe sorminan di angka na humaliangna. Alani do didok apostel Paulus: “Ai molo huhatahon Barita na uli i, ndang hasuranganku i” (I Korint 9: 16.a). Didok ibana, utangna do mambarita na uli. Molo tung utang marlapatan ingkon gararon. Pabotohonon tu humaliang.
Jadi, kewajipan ni halak kristen do mamaritahon/sitindangi di sude ulaon, tingki dohot kesempatan na adong. Ndang holan partohonan na marbarita na uli alai sude ruas ni Huria i. Ingkon tahaporseai do antong, paboa Debata Jahowa do na manjou jala mamillit hita gabe bangsoNa marhite Jesus Kristus di HuriaNa i na pinajongjongNa di portibion. Dung manaek Ibana tu banua ginjang jala di suru do Tondi Parbadia margogoihon angka siseanNa i (Mat 28; Mar 16; Ulaon 1:8).

5. Diskusi.
1. Di ari na parpudion marragam do carana di bahen laho menghambat perkembangan ni halak Kristen. Molo masa ma songoni tu ianakhonta gabe dipaksa anaktai masuk tu ugamo na asing dohot jaminan gabe karejo nasida. Boha do sikapta songon sada na toras hita?
2. Boha do cara muna gabe sintingdangi ni Debata di tongatonga ni keluarga dohot punguan?

6. Tangiang Pangondianon/Syafaat
7. Marende Sian BE. No. 133: 1-2 (Papungu Pelean)
8. Tangiang panutup.


Minggu III Dung Trinitatis - 8 Juni 2008
Mangolu Di Bagasan Kristus Jesus
2 Korintus 5 ; 11-15

1. Marende No, 97 HG/ 470 : 1-2
2. Martangiang
3. Manjaha Dohot manangkasi Turpuk

I. Patujolo
Halak naung mangolu jala manjalo na denggan sian Tuhan i dibagasan ngolu siganup ari, gabe paniru na denggan do i di sude hata dohot di ulaon ni Kristus Jesus. Diigil Debata do asa ndada holan dihata hita na gabe si ihuthon Kristus, alai ingkon tarida do dibagasan ngolu si ganup ari, ima na mangulahon lomo ni roha ni Debata songon na ni aturhonNa marhite patik I. Molo holan di goar do ibana sihaporseai Kristus, sarupa do i tu na ni dok ni di Yakobus 1 : 16-17 na mandok Haporseaon na mate do na songoni. Boi do dohonon lobi sian Kristen KTP molo ambal/ambalang sian hadaulaton.

1. Ganup jolma na manghaporseai Jesus Kristus, nunga di soadahon dirina. Lapatanna molo boi pe di ulahon ibana na denggan ndang di asang-asanghon i tu angka donganna. Ndang olo ibana patengatengahon i tu jolma na asing. Di panghilalahon ibana do paboa Tuhan i do nampuna na adong na di ibanai laos songoni ulaon na denggan na pinatupana. Alani molo tung adong pe donganna na mamuji, ndang pintor herbang sipareonna umbegei. Alai diparhatopot ibana do dibagasan rohana tung maol do dipatupa ibana na denggan anggo so Tuhani na mian dibagasan ibana. Hata mauliate do na adong di bagasan rohana maradophon Debata.
Tung mabiar do naporsea i di bagasan rohana molo diulahon angka na jat. Ai di etong rohana do jala sai dihilala ibana di rohana do Debata manggora ibana molo adong angka nasala diulahon ibana. Namangihut tusi molo adong hata na menyanjung ibana pintor spontanitas do haruar hata "puji Tuhan" Ndada holan di bagasan rohana tahe dipanghilalahon ibana adong Debata alai dohot do di na humalingna songon na ni dok ni umpasai; "Disi si tungguk di si do si tata, disi hita mardalan dohot juguk di si do Debata".

2. Dipanghilalahon Ap. Paulus do parngoluonna naung nigohan ni asi dohot angka denggan basa ni Tuhan i ibana, na mambahen panindangion na marisihon "Kristus do hangoluan di ahu, jala laba nang hamatean" (Filipi 1:21). Tung so adong be na asing na boi mangatasi hasurungan ni basabasa dohot silehonlehon na sian Debata. Diboto ibana do mangolu di bagasan Kristus na ingkon do mangolu dibagasan patikNa na imbaru jala ingkon di padao do nasa roha na geduk. Lobi sian i dope tahe, nasa na mangihuthon Jesus ingkon diporsan silang na tu ibana. Naso mamorsan silang na tu ibana ndang tama i di Tuhani jala tung naso dapotan hatuaon na sian Tuhan i.

3. Di ayat 13 di dok: "Alai molo tung songon na so marroha hami, di Debata mai; jala molo tung marroha hami di hamu do". Molo tarajumi dibagasan haporseaonta secara sadar dohononta do ra, tung so boi do adong na holip di adopan ni Debata. Molo di hita jolma masa hata na mandok: "Madabu jarum tu na pompot, ndang di ida mata alai di ida roha. Sumurung dope tahe Debata na lobi tuk mangida na di bagasan roha ni jolma i. Ai anggo diadopan ni Debata hape tung so adong do na holip nanggo sa­da obuk jala ndang adong na halang nasa eme. Alani ndang boi ala roha­rohanta tu Debata, alai tung ingkon saluhut do roha, pingkiran, ateate tapasahat tu Debata. Jala ala ni ido asa boi hita diboan tu sangkap haluaon dohot hatuaon. Nunga diparrohahon Debata hita, jala disarihon do angka na ringkot di ngolu­ta on. Alani hitape ingkon naeng rap mamparrohahon dongan na so haru gok haporseaonna.

4. Pangarimpunan ni ayat 14-15 ima; Asa unang be mangolu di dirina angka jolma na dihangoluanon. Molo Kristus nunga pasahathon saluhut sangkap dohot ulaonNa laho patulushon na hinalomohon ni Ama i, dipangido Tuhan i do nang hita pe asa songon Ibana. Molo taparrohahon Endenta no 103 HG/ 476 ; 1-4 (Ndada Au Guru Di Au Be), di dok:
1) Ndada au guru di au be, Jesus do nampuna au...
2) Ndang di au di Tuhan Jesus, daging dohot rohangki ...
3) Ulaongku nang artangku pangke ma baen sangapmi ...
4) Naung tarsurat do goarhu, di baen Ho to tanganMi,,.

Hombar tusi boi do paampitonta muse tu logu ni Endenta na di nomor; 97 HG / 470:1+6 (Jesus Ho Nampuna Ahu)
ay,1) Jesus Ho nampuna au, dohot na adong di au. Gogo dohot hosangki, sahat ma tu tanganMi
ay.2) Pinangido ma tu Ho, rohangki pe dohot do, BahenonMu Tuhanki, tong tu HarajaonMi.
Apostel Paulus padasiphon pos ni rohana marhite haporseaon, Galatia 2:19-20: ."Ai nunga mate au di patik i hinorhon ni patik i, asa mangolu ahu di bagasan Debata. Raphon Kristus i do ahu tarsilang. Ndada ahu be na mangolu i nuaeng; Kristus do mangolu di bagasan ahu. Ia ma­ngolu pe ahu nuaeng di bagasan daging, mangolu marhitehite hapor­seaon di Anak ni Debata, na manghaholongi ahu jala na mangalehon diriNa humongkop ahu.

III. Sipahusorhusoron
Ise do hita naung marhatopothon manang mandok di bagasan roha dohot haporseaonta songon naung ni dok ni Apostel Paulus i ? Ndada ahu be na mangolui nuaeng, Kristus do mangolu di bagasan ahu. Molo nunga adong Motto (Niat) na
songoni, ndang olo be i muramura "Mangumpati tungko dohot manegai gadu" baliksa tahe gabe pauliulihonsa.

IV. Diskusi:
- Songon dia do hataridaan ni jolma naung marhatopothon paboa naung mian Tuhan i di ngoluna?
- Mabiar do hita mandok songon na di Endeta no 97 HG: "Jesus Ho nampuna au, dohot na adong di au". Laos situtu do taparhatopot i?

Marende No 103 H3/ 476 : 1-4 (Papungu Pelean)
Tangiang Panutup.
TG


Minggu IV Dung Trinitatis - 15 Juni 2008
Holong ni roha do Siparangehonon ni naporsea.
Kolose 3:12-17

1. Marende : B. Ende No 09 : 1-2
2. Tangiang Pamuhai
3. Manjaha Dohot manangkasi Turpuk

I. Patujolo
Ganup jolma naung tarjou, naung gabe Kristen ima na manghangoluhon ulaon dohot tiruan na ni ajarhon dohot na ni ulahon ni Jesus Kristus. Dibahen Ibana do tiruan na denggan tu angka jolma lumobi tu angka si seanNa. Di pabotohon Ibana paboa haroro ni Ibana tu portition, ima na mangulahon lomo ni roha ni Debata Ama. Laos tarida do i di haoloonNa, pola sampe mate tarsilang Ibana di dolok golgota holan laho manghongkop jolma na mardosa i. Tung mansai tandap do holong ni Jesus tu hita angka na marhatopothon haluaon na pinatupa-­Na i di hita.

II. Hatorangan
ay.12-13) Angka na marparsoran di bagasan Kristus ima angka na tarjou tu bagasan "Nabadia". Lapatan Nabadia di turpukta on ndada na so hea mangulahon kesalahan/dosa, Alai molo tarsor ibana manimbil sian patik ni Tuhan i pintor di pasesahon ibana do dosa na niula na i tu Debata. Ihut tu si di niathon ibana do di bagasan rohana naso ulahononna be dosa na songon i di ari na naneng ro. Laos songon i ma ibana tu angka donganna, sai di usa­hahon do patuduhon parbue ni Tondi songon na di Galatia 5:21-22 i. Ndang muramura pangarimason/murukmuruk molo tung pe adong hahurangan ni donganna tu ibana. Dao do sian ibana roha hosom apalagi pamaloson. Didophon iba­na do dibagasan rohana paboa ibana pe godang do keterbatasan na olo mamba­hen panghurangi tu donganna jolma, lumobi ma tu Debata. Di auhon angka na porsea i do hasesaan ni dosa na pinatupa ni Jesus dingoluna. Ala naung dijalo ibana hasesaan ni dosa sian Tuhan i, laos songon i do nang ibana ndang pola maol manesa dosa ni donganna, molo hea jut rohana di bahen apalagi ma i molo so di sengaja dongan. Sandok hira sada nato­ras na burju (na denggan roha) do tu angka gellengna di tongatonga ni jabu, laos songon i do nang maradophon donganna jolma, lumobi dongan sa haporseaon.

ay.14-15) Ciri khas ni halak Kristen ima na sai tongtong pataridahon ulaon holong. Ndang holan sebatas kamuflase manang holan di bibir. Molo holan di bibir do gabe tubu do pandohan "holan pancur do i" anggo so i tubu ma hata na mandok "Nadila parende". Molo adong jolma na gale, na hurangan, na marsahit pintor dilehon do pangurupion intap ni na tarpatupana. Ido bahagian ni holong molo pe, ndang tartiru hita holong na pinatupa ni Tuhan Jesus na mangalehon diriNa humongkop hita. Sandok na manghangoluhon holong na sian Kristus nunga dao di ibana prin­sip songon na ni dok ni umpama on: ”Hoishon laklak unang ma dohot pahu, mago pe taho halak, unang ma dohot ahu”. Ala ni i sai tongtong do gok dame rohana jala dilului ibana jalan kelu­ar tanpa mambahen parbolatbolaton nangpe merasa diperlakukan tidak adil ibana. Dunghon ni sai gabe sitiruon do hata dohot pambahenananna ala nunga gok holong ateate, roha dohot pingkiranna. Dipahusorhusor ibana do di pingkiranna molo godang mambahen/mangulahon holong gabe lias do i sian dosa (pat. 1 Petrus 4:8)

ay. 16-17) "Gugun ma hata ni Kristus maringanan di tonga-tongamuna". Molo di Alkitab (BIS) lebih kompleks do bahasana dohot lapatanna; "Hendaklah per­kataan Kristus diam dengan segala kekayaanNya di antara kamu ...”. Molo di lapati muse hata 'hendaklah' na martujuan do i asa torus, manongtong, ganup tingki ndang marparsohotan. Nasa jolma manontong mambahen rohana parmianan ni hata ni Kristus nunga dao sian nasida sahit HOTEL (Hosom Teal Elat Late). Sandok diparsilanghon ibana do dirina rap dohot silang ni Kristus i. Mangolu do hahonaan ni logu na di Buku Ende no 103 HG/ 476 1 na mandok: "Ndada au guru di au be, Jesus do nampuna au". (pat. Galatia 2:20, Pilippi 1:21).

Sude do ra hita umboto ianggo holong na dimaksud ni turpuk ta di son ima holong na mamolin, holong na so marlindang (Kasih yang tidak mengharapkan balasan /imbalan dari temannya tetapi hanya dari Tuhan Allah). Molo poda Parjamitaon mandok: Jamita na mangolu ima pangalaho, sebalikna muse di dok pangalaho mi do gabe jamita na mangolu. Laos songoni do nang tujuan ni ayat parpudi on, naeng ma nian pangalahonta i gabe endenta. Endenta na ummangolu an ima di panghataion dohot pangulaon na denggan, ndang holan ende/koor na­di parmingguon. Sadalan tusi ndang muramura haruar hata, ungutungut dohot na manggosip manang paroaroa donganna. Baliksa sai manongtong do ibana mangida jala mamunten sian sudut positif. Namangihut tu ui molo tong pe dipanggar donganna ibana, dihinadenggan ni laguna dohot pambahenanna ndada pintor hembang (Bolak sipareonna), alai pintor di dok do mauliate ma di Jahowa.

III. P animpuli
Nunga jumolo hita di haholongi Tuhanta, aha jala nga songon dia alusta tu balian di ngolu ta on? Taendehon jala jala taulahon do songon na di Ende ta no 88:1 na mandok: "Jesusku naung manobus ahu sai naeng haholonganku Ho. Hupuji nasa asiMi alai gumodang holongMi". Antong nasa na manghaholongi Tuhan i, ingkon nunga dihaholongi donganna jolma. Ai didok Tuhan Jesus do nasa na marholong ni roha di Ahu radotanna do patikKi. Alani radoti jala u­lahon ma patik raya na ni ajarhon ni Jesus i. Amin.

Diskusi:
- Taparhatopot do paboa adong do di hita sahit HOTEL?
- Molo tung mumpat pe taluktuk, sega gadugadu, pintor dohononta do hata na mandok: "Mardomu di tano rara pe ahu tung naso jadi marsiantoan"?
- Heado di dok angka dongan na so ringgas marminggu to hita: E.e.., baen ma nian asal na markoor do i, percuma do i parari kamis jala parminggu? Boasa masa i ?

Marende No. 212 : 1+5-6
Tangiang Panimpuli
TG


Minggu V Dung Trinitatis - 22 Juni 2008
Jesus do paluahon angka pardosa
Lukas 5: 22-32

1. Marende : No.59 HG/ 432 : 1-2
2. Tangiang Pamuhai
3. Manjaha Dohot manangkasi Turpuk

I. Patujolo
Godang dope angka hita be na sala persepsi sarupa songon cara berpikir ni halak Parise dohot Siboto Surat na di turpuk on. Molo nunga populer gabe sada guru/ pangajari, ndang boi be rap hundul/ sadalanan dohot angka­ panangko,apalagi boruboru tuna susila. Hape memang di Padan Narobi pe dohot di Endenta di dok do: "Martua baoa ina-ina naso sahundulan dohot angka parjahat. Molo to paadop na dua bagian i, songon na ambalang do pangantu­sionta dohot cara pangulaon ni Tuhanta Jesus songon natarsurat di Padan Naimbaru i.

II. Hatorangan
1. Di jolo ni turpuk on dipatorang, dipatupa Tuhan Jesus do tanda halongangan. Tanda halongangan na parjolo pinatupa ni Tuhanta Jesus ima na pamalumhon sahalak na marsahit huliton. Holan marhite na di surdukhon Jesus do tanganNa tu na marsahit huliton i, pintor longkang ma huliti sian ibana (5:13). Tanda halongangan na mangihut ima na pamalumhon sada halak na pampang/ sarion (BIS= lumpuh). Holan marhite hata do Jesus pamalumhon na pampangi: "Hehe ma ho, boan ma podomanmi, laho ma ho muli! Asing sian sisean ni Tuhan Jesus dohot angka naposoNa tung naso boi do patupaonna huaso do­hot tanda mujizat songon na pinatupa ni Jesus.

2. Sian tanda halongangan na pinatupa ni Jesus na holan marhite hata, sian i tanda do paboa tung naso dao do huaso ni Anaki sian Ama I. Holan marhite sada hata do Debata manompa langit, holan sanghata pamangan do di dok jadi ma ho na tiur, jadi tiur ma tutu songoni angka na asing. Dikesetaraan ni ha-Debataon ni Ama dohot Anak dipabotohon Jesus do hadi-rionNa di ayat 24 di turpukta on; "Alai asa di boto hamu, marhuaso do Anak ni jolma i ditanoon manesa angka dosa". Hasesaan ni dosa na pinatu pa ni Jesus tu angka na mardosa ndada holan sekedar hasomalan na nisesa ni dongan jolma tu na mangulahon hajahaton. Molo situtu do Jesus naung manesa dosa ni hita jolma pintor terjadi neang ni holiholi dohot girgir ni tondi. Boi do tapatudos songon na masa tu na marsahit pampang i pe. Alani i mansai porlu do rajumanta molo tarsor hita mardosa nunga nian ta pasesahon dosanta tu Tuhanta, hape tong ndang adong dope tandatanda manang panghilalaan songon i, aha dope pangambati?

3. Molo tapatangkas di Injil Synopsis (Matius, Markus, Lukas dohot Johanes) godang do hasesaan ni dosa di patupa tu angka na mardosa. Turpukta na di Lukas 5: 22-32 on, adong do paralelna/tudosanna ima naro Jesus patupa hasesaan ni dosa dohot haluaon tu halak na berprofesi gabe Sijalo beo. Impola hasesaan ni dosa na pinatupaNa, gabe ditinggalhon do sifat-sifat, karakter dohot ulaon na buruk i. Suang songoni dohot tu sada boruboru na targombang (Dursila) di buku Johanes 8:1-11. Diting­ki diboan na torop boruboru na targombang i tu adopan ni Jesus laos di pangido asa gabe Jesus manguhumi hatihai. Ala ta boto marhite turpuki, nang pe Anak ni na sun Badia i Jesus, ndang lomo rohana mate boruboru i di hadosaonna. Dibahen Jesus do pangondianan na maol di antusi na torop i alai na mura diulahon nasida. Dibahen Jesus do pangondianan marhite na mandok; “Manang ise hamu na so mardosa, ima jumolo maningganghon batu to ibana”. Alai ndang adong na barani mandanggurhon batu tu boruboru na­targombang i, gabe ditinggalhon do nasida nadua rap dohot Jesus. Dungi didok Jesus ma; "Ahu pe ndang uhumonhu ho, unang be ho mardosa to joloanon !

4. Molo tabahen pangarajumion taringot tu hasesaan ni dosa dohot haluaon na pinatupa ni Jesus, masa ddang holan tu boruboru na targombang i, ndang holan tu si Lepi, ndada holan tu si Zakheus, alai tu sude jolma do songon i; nang tu hita na punguon. Nunga dilehon Jesus diriNa humungkop hita, gabe silua jala pelean na hushus tu Debata (Patangkas Ef. 5:2, Heber 2:17). Songon jolma na porsea, taparhatutu do jala ta jalo do ha­sesaan ni dosa na di basabasahon Debata marhite AnakNa Jesus Kristus (I Joh 2:1-2). Alani i do umbahen di dok hata ni Endenta 39 HG/ 412 : 2 (Ndi di dolok adui): “Dileai jolmai silang ni Tuhan i hape halu­aon do i. Nang godang dosagki, alai sesa do i di baen mudar na durus di si, Dibaen i ...”.

III, Sipahusorhusoron:
Molo di dok Jesus pe ndang ro Ahu manjou angka partigor, asa dipauba ­rohana, alai tu angka pardosa do! Laos songoni ma nian nang hita, asa unang holan tu angka na ringgas marminggu be tabahen panogunoguon. Tu angka dongan ruas na gale jala na losok ma hita umgodangan mambahen harahara asa gabe ringgas tu parpunguan (Heber 10:25). Molo olo do jolma i muba sian halembaonna apalagi dosana, na dapotan hangoluan na manontong i ma nasida jala dapotan uli basa nang hita. Nang partohonan Pandita, guru, sintua hita, alai sude do hita gabe parmahan ni Debata. anggo parmahan na tutu sada do ima Parmahan Bolon I : “Jesus Kristus”. Tatiru ma Ibana na olo mangalului birubiru si sadasada i sian si saratus i. Ndang lomo roha ni Debata mida hamatean ni halak parjahat, so ingkon mida hamumulak ni parjahat i tumadinghon dalanna, asa mangolu ibana.

D i s k u s i :
- Taparhatopot do paboa sude do hita mardosa? Jala dia do perbedaan ni na mardosa dohot pardosa?
- Aha do si ulahononta mambahen hasesaan ni dosanta ?
- Molo ro Jolma pardosa isarana boruboru na targombang, songon dia do res­ponta? Boi do bahenonta songon na pinatupa ni Tuhan to Jesus?
- Anggo holan na mamereng natorang di jolma do hita, hape hahuranganta pau­la so di ida, sarupa do hita dohot Farisi nang dohot Siboto surat! Setuju do hita di si angka inang?

Marende no 62 HG/ 435 : 1+4 (Papungu Pelean)
Tangiang Panimpuli

Minggu, VI Dung Trinitatis - 29 Juni 2008
DEBATA DO PATULUSHON SUDE NA SIANGKAPANMU
PODA 16: 1 -3

1. Marende Sian BE. No. 30: 1-2
2. Tangiang Pamuhai
3. Manjaha dohot Manangkasi Turpuk

Di Timur Tengah (termasuk di Palestina) na jolo manasai timbo do kedudukan ni angka pande bisuk. Jojot do angka pande bisuk maniop jabatan na hormot (penting) di negera. Andorang so dibuat raja keputusan jotjot do jolo dipangido sian angka pande bisuk pandangan manang pamingkirion/pertimbangan. Ala ni i maju mundurna sada harajaon jotjot do i ditontuhon haboion ni pande bisuk menpengaruhi raja dohot mangalehon angka panimbangion (Bdn. 2 sam 8:16-18; 1 Choron 27:32-34). Nang pe digoari raja salomo songon raja na umbisuk sian raja di portibion, alai ibana sandiri pe godang do diurupi angka pande bisuk na adong di harajon na, mangaehon panimbangion laho mamutushon sadaparkaro (Bdn. 1 Raja 4: 1-6). Alai hombar tu habisuhonna i dohot hinaarga ni habisuhon i, gabe di goari buku on: Buku poda sipaingot sian Raja Salomo. Ndamg apalah si Salomo na manurat sude angka poda on. Alai ala habisuhon ni si Salomo marharoroan sian Debata. Ndada hamaloon manang hapistaran na niajarhon ni angka parpande bisuk tu angka siseanna, gabe mansai ampit do goar Salomo on naneng mangondolhon asa sude halak na manjaha buku on on tangkas mangalului habisuhon na sian Debata. Tontu ndang diorai jolma i mangalului hapistaran sian angka pande bisuk ni portibion. Alai dao dumenggan jala gumugo mangalului habisuhon na sian Debata martimbanghon habisuhon ni angka pande bisuk na di portibion.

Hamoraon na sian Debata di pangke ibana laho mangurupi angka na di portibi on. Ndang songon hamoraon na adong di bagas ni halak na jahat, na paro arta sian dalan na so turut. Molo pantun do ngolu ni jolma i pasti do dapotan jambar ibana sian Debata. Didoka “ Pantun do hangoluan, tois do hamagoan”.Lapatanna: molo taulahon do ngolu na denggan, pasti mandao do hamagoan i sian hita. Alana tongtong do manatap, manonggor mata ni Jahowa tu liat portibi on, marnida halak na jahat dohot na denggan marroha. Nang pe sipata idaon sipata suhar do pambahena ni Debata di pingkir roha ni hita jolma. Alani do didok “Roha ni jolma marsangkap dalanna, alaiJahowa do patontu langkana” (16:9). Ndang na so lomo roha ni Jahowa mida ulaon, pingkiran ni jolma i, alai laho patulushon dohot manangkapi i tontu sahali Debata mambahen panimbagion dia do na dumenggan, na porlu di bagasan ngolu ni jolma i. So tung gabe pintor tubu tu bagasan rohanta na so lomo roha ni Debata marnida hita, alai sebalikna na holong situtu do roha ni Jahowa di angka jolma na tinompaNa i. Alani do Jahowa sai tongtong patandahon dalan laho ihuthonon ni Jolma i. Molo tung ro pe parungkilon tu ngolu ni jolma i ndada na tarrimas Debata, alai boi sajo do i dalan ni Debata laho mangaramoti , manjaga tondi ni jolma i asa unang lam bagas madabu, manirpang sian dalan ni Jahowa.

Di ngolu haportibion na mubauba nuaeng, boi tarida ndang dibagasan hasintongan be ngolu ni jolma i. Nunga masiboan lomo na angka jolma na di portibion. Asa, marbiasbias do roha ni Jahowa marnida angka pangalaho na so tingkos; alana nang pe hira parugamo hape ndang na tingkos angka ulaonna. Hape na jinalo ni Debata sian jolma i ndada ngolu na marsipalensem, alai ngolu na tongtong marhaposan, satia maradapohon Debata jahowa. Ingkon tu jahowa do gilingonta nasa panggulmit ni ngolunta on. Marhitehite na tatompashon hadirionta tu Debata tontu sahali urupanNa ma hita laho mangalului angka na ringkoti di bagasan ngolunta. Sai na patulushon ni Debata do pasupasuNa tu angka jolma na marhaposan tu Ibana. Ndang paloason ni Debata jolma i torus madabu tu hamagoan, sorimago, alai sai napatulusonna jala pasautonna do sude na tinahi jal na hinirim ni jolma i.

Refeleksi/Meditasi.
Di tongatongah ni ngolunta na gok ketidak-pastian di tingki parpudi on, disosohon do tu hita sada kepastian. Debata Jahowa do mangurupi dohot masumasu ganup halak na marhaposan tu Ibana. Di pasupasu Debata do ganup halak na mangoloi hataNa. Ndada holan ngolu sihirimon di ari sogot dilehon Debata, alai dohot do nang angka las ni roha di portibion. Ala ni i, ndang adong alasanta so ingkon tangkas manompashon (manggiling) ngolunta on tu Ibana. Ndang adong alasan di hita so ingkon tangkas mangulahon na niigil ni Debata sian hita. Sai matua pasupasuon ni Debata do ganup halak na porsea tu Ibana. Nang pe be sipata suhur didok rohanta pambahenan ni Debata di bagasan ngolunta, alai sude i manumpak tu na denggan do saluhutna pambahenan ni Debata. Jadi, sotung marbiasbias angka dalan na tadalani nuaeng. Muba ma roha dohot pingkiranta mulai nuaeng, paboa naug tatanda Debata Jahowa parasi roha i. Siala ni i “hatigoran do dalan na dumenggan ulahononta saleleng mangolu di portibion”.

4. Diskusi.
1. Boasa, jolma i godang ndang olo manompashon hadirionna tu Debata ?.
2. Boasa, godang jolma i mandok molo ro tubagasan ngoluna hasusaa, hamaolon pintor didok uhuman di Debata ?
3. Boha do baenonta, asa dapot hita na tahirim dohot na sinangkapan ni rohatanta ?

5. Tangiang Pangondianon/Syafaat
6. Marende: B.E. No. 261: 1 -2 (Papungu Pelean)
7. Tangiang Panutup.
EH