Bina Wanita 6 April 2008 : Sangkabona dohot Kristus Jesus

MINGGU MISERIKORDIAS DOMINI, 06 April 2008
Nats : Rom 6 : 1-4

1. Marende. B.E. No. 122 : 1 + 4
2. Tangiang Pamuhai
3. Manjaha dohot Manangkasi Turpuk: Rom. 6 : 1 - 4

Pembahasan Nats

Teologia na sangat populer do teologia ni Ap. Paulus namandok; “Holan ala ni asi ni roha ni Debata do umbahen namalua jolma sian dosa” . Pandohanon tung maralo situtu do tu halak Kristen namarharoroan sian Yahudi. Ala dirajumi nasida ia haluaon i boi do tuhoron marhite angka ulaon nadenggan manang mangulahon patik . Gabe tubu ma pandohan sian nasida mandok; sai tadatdati ma mardosa asa lam ganda asi ni roha ni Debata di hita. Diturpuk on ndang mandok naso ringkot mangulahon na denggan dohot mangulahon patik. Alai naeng ma rajumanta, pangulahonon nadenggan i, songon alus do i naung tajalo asi ni roha ni Debata i ma haluaon di bagasan Jesus Kristus. Asa ndada hinorhon ulaon na denggan dapotan haluaon pardosa, ai ndang tartuhor hita haluaon marhite angka ulaon na dengan. Ai molo hinorhon ni ulaon na denggan do gabe malua hita, holan angka na burju na ma na malua. Antong ise nama tarbahen malua, ai ndang mardia imbar , saluhut do jolma mardosa, jala ndang dapot pujion ni Debata ( Rom.3:23). Ala ni i, turpuk on mangalehon alus tu hita. Parjolo. Angka naung manjalo asi ni roha mansohot ma mangulahon dosa. Sungkunsungkun do dibahen Ap. Paulus mangondolhon poda taringot tu dalan haluaon, i ma pandohan na mandok:” Antong, dia dohononta, datdatanta ma mardosa asa tung timbul asi ni roha ?”. Dibagasan sungkunsungkun i boi do dapotta alus na, ima naso tama do datdatan mardosa molo dung di tanda asi ni roha. Molo di asi i Debata hita pardosa, ndang na manambai asa lam mardosa hita ala ni asi ni roha i, baliksa ndang tama be mangulahon dosa angka naung manjalo asi ni roha i. Lapatanna dihorhon asi ni roha i do kesadaranta gabe tartogu hita laho manadingkon dosa. I do na ni dok ni si Paulus di dosa i, tung tarbahen hita dope mangolu dibagasan i ? Ala ni i, molo naung tajalo asini roha, unang be tadatdati mardosa. Paduahon. Angka naung tardidi marparange dibagasan ngolu naimbaru. Diulakhon si Paulus do muse dison marhite sungkunsungkun laho mangondolhon hajongjonganta, angka naung tardidi tu bagasan Jesus Kristus tu bagasan hamateanNa do hita tardidi. Di dok di turpuk on, “ naung tartanom do hita rap dohot Ibana marhitehite pandidion i tu bagasan hamateanNa”. Namarlapatan tahatindanghon do dibagasan pandidion i, paboa naung parsidohot do hita di sitaonon dohot di hamatean ni Tuhan Jesus, ala ni dosanta. Dibagasan pandidion i, tajalo do basabasa dohot asi ni roha ni Debata, ala ni i gabe holan kiasan manang lambang sambing na ma tabolus uhum dohot hamatean i dibagasan pandidion i, ai nungnga diganti Tuhan Jesus ingananta manjalo uhum dohot hamatean ala ni dosa i. Ibana do singkatta hona uhum tu hamatean asa malua hita di tobus sian dosa. Asa ndada hatoban ni dosa be hita, baliksa ala ni pandidion i, nungnga tajalo Tondi Parbadia manggogoihon hita mangalo nasa dosa, asa marparange hita dingolu naimbaru songon Kristus naung hehe sian na mate. Patoluhon. Sangkambona do hita dohot Ibana, rap mate, rap mangolu . Diuji si Paulus do patuduhon hadomuanta tu Tuhan Jesus na so tarsirang manang di tingki sadihari pe gabe sangkabona hita rap dohot Ibana, di bagasan sitaonon manang dibagasan las ni roha. Marhite na rap mate, na rap mangolu hita dohot Ibana naeng di papatar bagas parsaoranta dohot Ibana di ganup tingki. Dibagasan parsaoran i ndang be tarsirang hita sian Tuhan i, ai nungnga tangkas di hongkop Ibana hita marhite hamateanNa dohot haheheanNa. Udut tusi diigil do sian hita asa marparange dibagasan ngolu naimbaru, songon Kristus naung hehe sian angka namate hinorhonni hasangapon ni Debata

4. Refleksi:
Jojot do tubu angka sungkunsungkun taringot tu pandidion, mandok : dia do pandidion na sah ? Boi do holan ulu na tonu ,manang ingkon di usophon do tu sunge ? Adong muse do pe mandok: pandidion na magodang do na sah, anggo pandidion poso ndang sah i ninna. Ala ni i torop do ruas ni huria na laho tu gerakan Kharismatik, gabe dioloi muse tardidi paduahalihon. Di turpuk on di alusi si paulus do hita mandok: Naung tardidi tu bagasan Jesus Kristus, tu bagasan hamateanNa do hita tardidi. Lapatanna, naung tartanom do hita rap dohot Ibana marhitehite pandidion i tubagasan hamateon, asa marparange hita di bagasan ngolu na imbaru. Dibahen i , naung mate do hita di bagasan dosa, alai mangolu hita di bagasan Jesus. Ala ni i nungnga munsat hadirionta sian jolma naburuk gabe jolma na imbaru. Ido dihatindangkon marhite pandidion i. Ala ni i ingkon barani do hita manadingkon dosa na mamboan hita tu hamatean, jala ingkon rade do hita mangolu raphon Kristus di sitaonon dohot di lasniroha. Jala makna ni pandidion i, ndang di cara mangulahonsa manang ditontuhon umur ni jolma. Alai molo dididihon dibagasan goar ni Debata Ama , Anak dohot tondi Parbadia ido pandidion na sah. Ala ni i ndang ringkot dua hali tardidi.

5. Diskusi:
a. Molo dung do tajalo asi ni roha ni Debata, ulahononta dope mar dosa ?

b. Molo dung do taantusi lapatan ni pandidion i, loasonta do pe angka ianakhonta laho tu aliran kharismatik nasai patupahon pandidion paduahalihon ?

6. Tangiang Pangondian ( doa Syafaat )
7. Marende : 123 : 1 + 3 ( Papungu Pelean )
8. Tangiang Panimpuli.

Pdt. H . Purba S.Th