Thursday, April 03, 2008

Jamita 06 April 2008


Jamita tu Minggu Miserecordias Domini
Tanggal, 06 April 2008
Nats : Psalmen 33:4-9
Pdt. Gom F.H Tampubolon, S.Th
Pendeta HKI Resort Siantar IV

Ditatap Jahowa do angka Partigor
1. Psalmen (Tehillim=bhs Heber) ima sada bentuk sastra ni halak Israel marummanghon angka ende-ende na marisihon ungkapan perasaan ni parsalmen, domu tu pengalamanna di parsaoranna dohot Debata. Alani i do umbahen na gabe masuk (dipangke) Psalmen on di ibadah ni Israel. Marragam do isi ni psalmen i, hombar tu angka pengalaman na parpsalmen i sandiri. Adong do i marummang puji-pujian tu Debata (bd. 145-150), tangiang laho mangido sipangidoanna (bd 6+7), tangiang mangido hasesaan ni dosa (bd. 51+85), tangiang namanganggukhon parniahapanna (bd. 13&0, dna. Adong do sifat na khusus jumpang di buku psalmen, ima na mansai tangkas mangondolhon taringot tu Debata, ndada taringot tu hajolmaon, atik pe dihatahon i marhite kesaksian secara pribadi, punguan manang bangso pe. Mansai tangkas do hajongjongan ni psalmen dibagasan peribadahan ni bangso Israel. Boi dohonon sada bagian utama jala na terpadu do ibadah dohot psalmen i, jala ganup psalmen manghatindanghon Debata hombar tu situasi parngoluon ni bangso Israel di penderitaan nang di las ni roha pe.

2. Pujipujian di hagogoon, habasaon dohot hatigoran ni Debata i do na gabe judul ni turpuk on. Memang mangihuthon naskah asli Heber ndan adong judul ni psalmen on jala dianggap na so karangan ni si David. Mangihuthon isi dohot rumangna termasuk tu ende pujipujian ni ruas/bangso Isarel do psalmen on jala somal diendehon di tingki ari Pesta di Bagasjoro di Yerusalem, na marojahan tu angka barita ni angka panurirang dohot guru habsuhon. Ia psalmen 33 on boi do dibagi tu bagasan 3 bagian :
1. Ayat 1 – 3 : Patujolo : Joujou laho mamuji Tuhan i.
2. Ayat 4 – 19 : Isi ni pujipujian. Ayat on boi dibagi muse gabe :
- ayat 4 - 9 : Debata marhite HataNa manompa nasa na adong
- ayat 10 - 12 : Debata do na manontuhon pardalanan ni ngolu (sejarah) bangsoNa.
- ayat 13 - 15 : Ditatap Debata do saluhut jolma manisia.
- ayat 16 - 19 : Malua do jolma na mabiar mida Debata.
3. Ayat 20 – 22 : Panutup : Panindangion haporseaon.

3. Marpsalmen manang marende ima sada sian marragam cara mamuji Deata. Jala pujipujian ingkon pasahaton do dibagasan las ni roha, pola ingkon marolopolop (bersoraksorai), tarlumobi tu angka jolma partogor dohot angka na unjur marroha. Ai nasida do na talupmarende. Dihalomohon Debata do angka partigor dohot angka na unjur marroha jala marhasurungan do nasida diadopan ni Debata (bd. 33:1, 1:6; 5:13, dna). Partigor dohot naunjur marroha ima angka halak na dibagasan las ni roha mangoloi lomo ni roha ni Debata jala olo manolsoli dosana huhut mangido hasesaan ni dosa sian Debata. Holan angka partigor dohot na unjur marroha do na boi mangulahon dohot na mandalanhon uhum i dibagasan hatigoran jala uhum na tigor i, i ma na marojahan di Hata ni Debata. Hata ni Debata ndada holan marisihon jamita alai dohot do haburjuon, hatigoran dohot uhum na marojahan tu hasintongan. Ndang tarsirang hatigoran sian uhum. Dipatupa uhum jala didalanhon dibagasan hasintongan asa dapot tujuan ni uhum i, ima hatigoran (keadilan). Molo mardalan do uhum dibagasan hatigoran, gabe gok hamuliaon dohot asi ni roha ni Debata ma portibion (ayat 4 – 5).
Marhite Hata ni Debata na marhasintongan i, manjadi do portibi on ro di nasa isina. Jala saluhutna i mardalan dibagasan hadengganon (keteraturan). Sude ditompa Debata jala tipak do diinganan na be dibahen (ayat 6-7). Hombar tu panompaon i, jumolo do di tompa Debata sude angka na ringkot di ngolu ni jolma, i ma portibion dohot nasa isina, baru pe parpudi di tompa Debata jolma i. Dibagasan hadengganon (keteraturan) do portibion di tompa Debata, tangan ni jolma do na manegai na dibagasan hadengganon i ditompa Debata. Marhite panompaon ni Debata tu portibion dohot nasa isina i, pataridahon pargogo na so hatudosan do Debata. Holan manghuling do Ibana, gabe manjadi do sian na so adong gabe adong (creation ex nihilo), mandokhon do Ibana jadi jongjongma. Portibion ro di nasa isina, pamatang ni joma ro di tondina, Debata do na manompa jala holan Debata do na mangarajai. Ndang adong tudosan ni Debata, alani i ingkon marhabiaran tu Debata do jolma i nang sandok tano on. Jala pangisi ni portibion pe ingkon marsomba do tu na manompasa. Biar mida Jahowa dohot marsomba tu Ibana, ima songon respon ni jolma dohot portibi on di hagogoon ni Debata di atas ni sandok portibi on. (ayat 8-9).

4. Las do roha jala mansai lomo do roha ni Debata tu angka partigor dohot na unjur marroha, alani i dipasupasu Debata do angka na tigor roha (bd. 5:13) jala ditatap Jahowa do angka partigor i (bd. 34:16). Alani i tama do pujion ni jolma i Tuhan i, ai pujipujian sian angka jolma na sisongon i do na dihalomohon ni Debata. Patar do saluhutna i diadopan ni Debata, ai pargogo na so hatudosan do Ibana jala na manompa na sa na adong di portibion. Alani i tama do pujion jala sombaon ni jolma i Tuhan Debata. Ai Debata do na manompa, manarihon jala marmudumuduhon nasa na tinompaNa i. A m e n.