Thursday, April 03, 2008

Jamita 27 April 2008


Jamita tu Minggu Rogate
Tanggal, 27 April 2008
Nats : Psalmen 42:2-6
Pdt. Firman Sibarani, M.Th
Pendeta HKI Resort Medan I


Roha Namalungun Mida Bohi ni Debata

Patujolo
Psalmen 42:2-6 ima sada andung ni sahalak (Parpsalmen) sian bangso ni Debata (Israel) na tarbuang dao sian Jerusalem tu tonga ni bangso sipelebegu. Parsorionna na mansai dangol patubu lungun ni tondina (jiwa, roha) mida bohi ni Debata. Diandungkon ibana do lungun ni rohana i tu Debata dibagasan sada syair na mansai uli na marisi tangiang pos ni roha (rogate) tu Debata. Curahan lungun ni rohana naginurithonna songon na di perikop jamita on, gabe syair na dihalomohon di tonga-tonga ni halak Jahudi dohot Kristen sian angkatan tu angkatan jala berpengaruh tu liturgi dohot kesusasteraan ni Jahudi dohot Kristen. Perikop on gabe liturgi (jamita) tu hita par-HKI di zaman on laho manogu hita patubu jala pabalga roha na malungun mida bohi ni Debata.

Hatorangan
Ayat 1 - 4 : Andung Lungun Ni Roha Mida Bohi Ni Debata
Diandungkon Parpsalmen lungun ni rohana • mida bohi ni Debata. Songon dia panghalungunhon ni rohana dikiashon (dipatudos) tu panghalungunhon ni Ursa di guluan (ay.2). Tongon di logo ni ari masak do angka duhutduhut, koring do angka guluan, dohot deba angka batang aek (pah. Joel 1:20). Mansai maol do dapot guluan na marisi aek siinumon ni Ursa. Konon, sada sifat ni Ursa na mauas ima ndang olo so mangalului guluan, pola sahat tu na mate mangalului. Molo so dapot guluan mate do Ursa i. Ndang olo mate konyol, maoto so mangalului, alai mangalului sampe mate. Lapatanna mate mangalului dibagasan keyakinan dohot pangkirimon ingkon dapot. Suang songon ursa, siala lungun ni roha boi do sampe langan jala maras roha ni jolma (hancur jiwa - Psalmen 84:3). Ala lungun ni roha ni Parpsalmen mida bohi ni Debata sai tariluilu ibana arian dohot borngin. Didok ibana, “sai iluilungku do sipanganonku arian dohot borngin”. Tung iluiluna dipapanganhon Debata tu ibana (pah. Psalmen 80:6). Tingki dungo tariluilu, tingki modom tariluilu, tingki mangan pe tong tariluilu. Gabe dipasombu nama dohot iluiluna tarpangan ibana tingki mangan. Torus do lungun rohana saleleng so pajumpang dohot Debata.
Adong tolu hal na mambahen malungun roha ni Parpsahnen mida bohi ni Debata. Parjolo, ale tarbuang ibana dao sian Bagas Joro ni Debata na di Jerusalem”. Di tonga ni bangso sipelebegu do ibana maringan songon orang asing, ima di Siria di dolok Hermon (deba penafsir mandok di Aram manang Babel). Paduahon, sai tarsingot tu rohana angka kebaktian, pesta­pesta agama isara ni Paska, Pentakosta, Pondok Daun (3 Musa 23:4-44; 5 Musa 16:1-17). Patoluhon ima ale sai dipaburuburu angka sipelebegu ibana mandok “didia do Debatam?” (ay.4). Ai nang pe di tonga ni sipelebegu, marsihohot do haporseaonna tu Debata. Gariada ala ni haporseaonna i do ibana dipaburuburu. Masalah ima, porsea ibana tu Debata hape ndang hea ibana mida bohi ni Debata. Songon penganut agama Jahudi ibana dihaporseai do ia Debata maringan di bagas joro na di Jerusalem. Pajumpang dohot Debata ima molo masuk jala beribadah disi. Ndang diida ibana bohi ni Debata ala ndang boi masuk beribadah tu bagas joro di Jerusalem.
Tung bohi ni Debata do nahinalungunhon ni Parpsalmen. Di ayat 3 didok ibana, “asa huida bohi ni Debata”: Malungun mida bohi ni Debata nidokna ima malungun marudur rap dohot natorop dongan sabangso masuk tu bagas joro ni Debata, rap marolopolop mamujimuji Debata. Malungun ibana marsomba, pasahat angka pelean tu Debata, songon na somal diulahon ujui di tingki di Jerusalem lumobi di angka pesta agama.

Ayat 5 - 6 : Roha Na Manghaposi Debata
Marposniroha (marpangkirimon) tu Debata do Parpsalmen on. Tarida do i sian pandohan na di ayat 5, “Molo sepala marningot ahu disi” - “Inilah yang hendak kuingat” (LAI). Dipataridahon do disi ia na diingot ibana ndada peristiwa naung lewat, alai sada peristiwa nanaeng masa na manontuhon ngoluna. Jala sian pandohan na marrumang sungkun-sungkun di ayat 6, “boasa sai tungki ho, ale tondingku, jala boasa sai rusak ho dibagasan ahu?” tarida na so olo be ibana sai tungki (tertekan) jala sai rusak (gelisah) tondina (jiwana). Bergerak pos ni rohana na ingkon malua ibana sian jiwa na tertekan jala gelisah. Dipatangkas pos ni rohana i marhite pandohan “haposi ma Debata”. Dihaposi do na Debata manontuhon masa depan ni ngoluna, ai Debata na hinalungunhonna ima Debata na mangolu (pah. Jer. 10:10), sitompa jala sipalua, mataniari binsar di ibana jala mual ni aek hangoluanna (Pah. Psalmen 84:12; Jes.60:20; Jer.17:13). Pos rohana, mintop do muse na golap sian ngoluna jala binsar mataniari na tiur. Di sada tingki mulak do ibana tu Jerusalem jala masuk tu bagas joro ni Debata mida bohiNa, ima parsidohot ibana mamujimuji Debata.

Hahonaan Tu Jamita
1. Arahonon do rues tu roha na malungun mida bohi ni Debata, ima marhite na mauas di persekutuan dohot Debata nang dongan sahaporseaon, nang pe maringan di tonga ni parugamo na asing manang di tonga ni halak Kristen na jarang martangiang manang tu gareja. Unang agoan pegangan di tonga ni masyarakat na majemuk modern. Hot marhaporseaon (beriman tunggal) tu Debata. Hombar tusi ondolhonon do litlurgi - tangiang ima hosa ni naporsea, ai dibagasan tangiang i idaonna Debata (Ia hanya sejauh doa). Ndang salpu ari so dibagasan tangiang.
2. Pabotohonon do paboa molo ndang taalami persekutuan na mesra dohot Debata nang dohot dongan di tingki kebaktian, jala molo ndang tarasahon hita songon anggota keluarga ni Debata disi mura do hita tarboan arus zaman. Naeng tangkas diparhatopot ruas na ditongatonganasida do Debata ditingki parmingguon, pesta-pesta isara ni Natal, Paskah, rodi di angka partangiangan (pah. Mat. 18:20). Asa tingki kebaktian gabe sada pengalaman persekutuan na mesra dohot Debata nang dohot dongan sahuria nang dongan sahaporseaon. Ai marhite pengalaman na songon i tubu jala lam balga kesetiaan tu Debata.
3. Ondolhonon do tolu tanda ni na porsea. Parjolo, rade manjalo realitas (manang aha pe na masa) di parngoluonn siganup ari. Di las ni rohe manang arsak ni roha, di hamoraon manang hapogoson unang paholang dirinta sian Debata. Las ni roha dohot hamoraon patau haporseaon na mandok mauliate, arsak ni roha dohot hapogoson patau haporseaon na berserah. Paduahon, ngolu na marpangkirimon. Ndang masa mandele manang putus asa di angka na porsea, alai benget paimahon sibahenon ni Debata. Patoluhon, tongtong marlas roha mamujimuji Debata.
4. Jouhonon asa sude ruas patupa pendekatan, panogunoguon tu angka ruas na jarang marminggu asa ringgas, tu na so olo marminggu asa olo. Na boi do angka na jarang manang na so olo marminggu merasa ditolak Debata jala dipapulik (dikucilkan) donganna sahuria. Lumobi ruas na mangulahon kesalahan manang dosa na gabe mandele, songon i angka na di hurungan, na so tarbahensa be mandapothon Debata sian hagogoonna sandiri tumangkas ma i jonohan jala toguon asa malua sian pandelean, sian ketertekanan jiwa alai asa malungun mida bohi ni Debata.