Jamita 04 Mei 2008

Jamita tu Minggu Exaudi
Tanggal, 04 Mei 2008
Nats : Daniel 3 : 20 - 29
Pdt. Dr. B. Purba
EPHORUS

Ditangihon Debata do Pangidoan ni Angka Naporsea

1. Patujolo:
Di halongonan Sinai (di pardalanan ni bangso Israel sian Tano Misir tu Tano Kanan-Tano bagabaga i), dipahot Debata do padanNa tu si Abraham marhite namamillit bangso Israel gabe bangso Na, jala olo Debata gabe Debata nasida. Marhite I, gabe diihoti Debata do diriNa dohot bangso I marhite “parpadanan”. Pardomuan na istimewa (parpadanan) I, dipapatar Debata marhite napaluahon nasida (sian parhatobanon Misir). Tujuan ni Debata patupahon I, ima asa:”Manjadi harajaon malimmalim , jala bangso na badia nasida di Debata” (2 Musa 19:6). Lapatan na, Debata ma gabe Raja di nasida, jala Israel gabe bangso nabadia, gabe panondang tu angka parbegu (Jes 42:6).
Alai, ndang satia bangso Israel tu tohonan na sangap i. Dung manang sadia leleng nasida di tano bagabaga (tano Kanan ) I, dipangido nasida do tu Debata sahalak raja laho manggomgom nasida di Tano bagabaga I singkat ni Debata. Alasan nasida, asa sarupa nasida dohot angka bangso na humaliang nasida na ginonggom ni raja sian tongatonga nasida ( 1 Sam 8:5). Dioloi Debata do i. Raja na parjolo, i ma raja Saul; na paduahon, raja David; na patoluhon, raja Salomo. Dung mate raja Salomo (raja na patoluhon), mambrontak ma angka marga na di utara. Ujung na, tarbagi dua ma harajaon i, (harajaon utara dohot harajaon Selatan). Mulai sian I, dibolongkon nasida ma sude padan nasida dohot Debata, jala holan dosa nama diula na dua harajaon i. Alani, dibuang Debata ma nsida tu Babel marhite namamangke bangso Assur dohot bangso Babel gabe alat di tangan ni Debata. Laos di tingki I ma tarbuang dohot si Daniel, Sadrakh, Mesak dohot Abednego. Alai anggo di jamita on, ndang dohot dibaritahon si Daniel, nangpe si Daniel do nian partogi ni halak on na tolu. Na masa di habuangan I ma na dibaritahon di buku Daniel on.
Molo tapihutihut do barita na sinurathon di Daniel bindu 3 on, tarlumobi ma di jamita on (ayat 20-29), dibaritahon do tu hita Hamonangan ni Debata dohot angka Naporsea di Debata marolohon huaso ni portibion.

2. Hatorangan:
1). Monang do na porsea hinorhon ni hasatiaonna mangoloi Debata.
Dung dibege raja Nebukadnesar na so olo si Sadrak, Mesak, Abednego marsomba tu ganaganaan sere napinauli ni raja Nebukadnesar i, dijou raja I ma nasida tu jolona. Dilehon raja I dope kesempatan tu nasida manguba pingkiran nasida marhite na mandok:”Onpe molo olo hamu nuaeng, disi dibege hamu soara ni sarune, tulila, hasapi, arbab, sordam…marsinggang jala marsomba tu ganaganaan naung hupauli i. Alai molo so olo hamu marsomba, ingkon tongkinon hamu timpalhonon tu liang pamurunan na marnalanala.Dungi idaon ma manang Debata dia na tuk paluahon hamu sian tanganhu”(ayat 15). Marhite pandohan na on, dipapatar tu hita paboa naung dirajumi raja Nebukadnesar do na so tarbatas be huasona. Berhak do ibana di rohana mambuat hosa ni na tolu halak on. Ndang adong manang ise pe na boi margogo mangambati ibana, manang paluahon na tolu halak on sian tangan na. Debata Jahowa (Debata nanioloan ni si Sadrak, Mesak, Abednego) pe, ndang margogo be di rohana paluahon nasida sian tanganna. Ndang holan sian jolma ibana dietong gumogo, alai dohot do nang sian Debata Jahowa.
Alai marsihohot do si Sadrak, Mesak, Abednego di haporseaonna tu Debata Jahowa. Mangolu, manang mate pe, tung so jadi olo nasida manomba debata ganaganaan na pinauli ni raja Nebukadnesar i. Hasatiaon nasida I tu Debata, ido pamonang nasida maralohon raja Nebukadnesar dohot mambahen debata ganaganaan ni Nebukadnesar I gabe so marlapatan. Talu do raja na gogo I dohot debata na I dibahen hasatiaon ni naporsea I di Debata Jahowa namangolu i.Gagal do Nebukadnesar mamaksa nasida. Gumogo do haporseaon nasida I sian tentara dohot huaso ni raja Nebukadnesar, gomogo dohot sian debata ni Nebukadnesar i. Maila raja Nebukadnesar marnida natorop naginonggomannai, ala gagal ibana mamaksa na tolu halak naporsea on manomba ganaganaan napinatupa na i. Diuji Nebukadnesar do manutupi hataluan dohot hailaonna I marhite namandabuhon Sadrak, Mesak, Abendengo tu liang api na sangajo pintu lompit mohop na sian na somal (ayat 19-20), alai ndang mosok nasida (ayat 27). Hasatiaon tu Debata do apala sinjata nagumogo manaluhon nasa musunta dohot nasa hagogoon na di tanoon.

2). Mansoadahon diri, ido Panindangion Nagumogo.
Hasatiaon tu Debata ndang na so adong konsekwensi (panghorhon) tu ngolu ni halak na porsea. Dipapatar Sadrak, Mesak, dohot Abednego do hasatiaonna tu Debata marhite haoloonna sumeahon hosana. On ma panindangion na sumurung tu saluhut jolma na di tanoon, paboa haporseaon ni halak Kristen mansai arga situtu do. Ndang boi diasam dohot kedudukan-pangkat, manang arta-hepeng na di tanoon. Hosa ni naporsea I do asam na.
Tabege do nang di barita pardalanan ni Huria (Sejarah Gereja) di tano on. Mansai torop do halak Kristen na mate martir hinorhon ni hasatiaon nasida manghaporseai dohot mangoloi Debata naung papatar diriNa di bagasan Jesus Kristus. Mulai ma I sian Stefanus (Ul.Ap.7:58). Alai laos ido panindangion na sumurung dibahen na martambatamba bilangan ni angka na porsea di liat portibion sahat tu tingkinta saonari. Di pesta olopolop ni Hurianta HKI sadarion, dipaingot hita marhite jamita on, asa tutu situtu tahangoluhon ngolu panindangion I, songon naung nihangoluhon ni angka parhalado, ruas na parjolo i. Parhalado, Ruas, sitindangi na parjolo I di Huria, songon si Sadrak, Mesak, dohot Abednego na di jamita ondo. Diseahon nasida hosa nasida, manang dipaburuburu jala dileai nasida, ndang na mamparjuangkon na ringkot di nasida siganup ari, alai tung alani hasation nasida do manghaporseai dohot mangoloi Debata. Pangalaho dohot ngolu sisongon I ma diigil Debata sian hita Parhobas dohot Ruas ni HKI asa boi maju HKI, jala lam mangolu panindangionna tu liat portibion.

3). Satia do Debata Jahowa tu angka NaposoNa.
Taida do di jamita on, disampathon do Sadrak, Mesak, dohot Abednego tu liang api lompit pitu hali ummohop sian na somal (ayat 19-20), alai ndang mosok nasida, gari obuk ni ulu nasida dohot angka paheanna ndang muap api (ayat 27). Ro do Debata paluahon nasida marhite surusuruanNa (ayat 25). Haposan do Debata. Olo jala margogo do Debata paluahon angka nasatia porsea tu Ibana sian ragam ni hamaolon. Alai, manang olo Debata patupa tanda halongangan na songon on, manang ndang, anggo angka naporsea, marsihohot do manghaporseai, paboa sai nadumenggan I do dipatupa Debata di ngoluna.
Taparhatopot do, ndang apala jotjot masa tanda halongangan na songon on di ngolu ni jolma siganup ari. Tongtong dope godang parungkilon taadopi di namangoloi Debata hita pararathon Barita Nauli i. Godang dope huaso na mangambati hita. Angkup ni I, mansai torop dope donganta na di tano on napinasiaksiak ni angka na gogo, torop angka na nirupa. Manoktong do hita mangido tu Debata, asa dipatupa Debata tanda halongangan laho mangalo jolma “napajolo gogo papudi uhum”. Marhite I, boi ma hatop manjirir Barita Nauli I, jala angka naginosagosa dohot nanirupa boi ma dapotan pangondian. Alai, ndang sai olo Debata mangalusi tangiangta I hombar tu pangidoanta. Alai nangpe songon I, pos do rohanta, adong do sangkap naummuli sian Debata tu hita. Manoktong do Debata manghaholongi hita di ngolunta siganup ari. Manoktong do Debata mangalehon hamonangan tu angka NaposoNa (Ruas ni HuriaNa) na satia manghaporseai dohot mangoloi Ibana. Nangpe tongtong dope mian di bagasan parungkilon angka NapososNa I, alai monang. Manoktong do Debata manangihon pangidoanta (tangiangta). Alani, pos ma rohanta manjouhon: “EXAUDI”-TANGIHON AHU ALE DEBATANGKU. Amen. DIRGAHAYU 81 Tahun HKI.